Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Julai 2016

 TOPIK RANDAU | BUP KUDUS—TAN BELAMA IYA

Penerang Ti Beguna

Penerang Ti Beguna

Bup Kudus enda baka bup pengarap bukai. Iya udah ngubah utai ti dipechaya mayuh orang kenyau ari menya. Taja pia, iya nyadi siti bup ke suah dipansik sereta dibantah.

Ngambika chunto, sekeda pakar enda pechaya, Bup Kudus kemaya hari tu sama enggau tulis ke asal. Seiku profesor ke belajar pasal pengarap madahka: “Kitai enda nemu sekalika kitai udah ngaduka teks ke asal enggau betul. Kitai semina bisi salin ke udah diaduka baru, lalu mayuh ari salin nya digaga beratus taun pengudah teks ke asal, lalu bisi mayuh utai ke enda sama.”

Sida ke bukai deka nemu sekalika Bup Kudus nya amat baka ke asal ketegal jalai pengarap sida enda sama. Ngambika chunto, apai indai Faizal madahka Bup Kudus nya bup ti kudus, tang iya udah diubah. Ku Faizal madahka: “Ketegal nya, aku enda entu pechaya lebuh orang deka berandau enggau aku pasal Bup Kudus. Nambahka nya, sida nadai ngembuan Bup Kudus ke asal. Iya udah diubah!”

Kati nya beguna nemu sekalika Bup Kudus udah diubah tauka enda? Peratika tanya tu: Ulih nuan arapka semaya ti ngelantangka ati ari Bup Kudus pasal jemah ila, enti nuan enda nemu sekalika semaya nya bisi dalam teks ke asal? (Rome 15:4) Deka nuan ngena prinsip Bup Kudus lebuh ngaga pemutus ti berat bekaul enggau kereja, ruang bilik, tauka sembah, enti Bup Kudus kemaya hari tu semina ngembuan teks salah ke ditulis mensia?

Taja pan bup mit ke asal dalam Bup Kudus udah nadai agi, kitai ulih meresa salin ke lama—nyengkaum beribu iti manuskrip Bup Kudus. Baka ni manuskrip nya ulih tan ari rusak, disakal sereta pengawa ke nguji ngubah teks? Baka ni manuskrip ke ulih tan nya ngasuh nuan pechaya Bup Kudus kemaya hari tu amat baka ke asal? Peratika saut ngagai tanya nya ba artikel pengudah tu.