Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Julai 2016

Ngerembaika Berita Manah Pasal Pengasih Petara

Ngerembaika Berita Manah Pasal Pengasih Petara

‘Besaksika Berita Manah pasal pengasih Petara.’—SKR. 20:24.

LAGU: 101, 84

1, 2. Baka ni rasul Paul nunjukka diri beterima kasih ke pengasih Petara?

RASUL Paul madahka: “[Petara] enda lebu kasihka aku.” (Bacha 1 Korint 15:9, 10.) Paul nemu iya enda patut nerima tauka bulih pengasih Petara ti besai. Iya udah merinsaka orang Kristian.

2 Nyau semak pengujung pengidup iya, Paul nulis ngagai Timoti: ‘Aku meri terima kasih ngagai Jesus Kristus Tuan kitai, ke udah meri aku pengering, laban iya udah ngira aku tetap ati, lalu udah ngeletak aku bekereja ke iya.’ (1 Tim. 1:12-14) Nama kereja nya? Paul madah ngagai bala tuai gempuru ba gempuru di Epesus: ‘Aku enda sayauka nyawa diri, asal ga aku ulih nembuka pejalai aku enggau pengawa ti udah diasuh Tuan Jesus kereja aku, iya nya, besaksika Berita Manah pasal pengasih Petara.’SKR. 20:24.

3. Nama pengawa ke diberi ngagai Paul? (Peda gambar ba pun artikel.)

3 Nama “Berita Manah” ke ditusui Paul, lalu baka ni “Berita  Manah” nya mandangka pengasih Jehovah? Paul madah ngagai orang Kristian ba Epesus: ‘Kita tentu udah ninga pasal Petara ke udah, ulih pengasih Iya, meri aku pengawa ke penguntung kita.’ (Eps. 3:1, 2) Jesus udah ngasuh Paul nusui berita manah ngagai orang ke ukai bansa Judah. Diatu, sida ke ari bansa bukai bisi ungkup ba Perintah Petara ke diperintah Messiah. (Bacha Epesus 3:5-8.) Paul nginjil enggau ransing sereta netapka chunto ti manah ngagai orang Kristian kemaya hari tu. Iya nunjukka pengasih Petara “enda lebu” ba iya.

KATI PENGASIH PETARA MERANSANG NUAN?

4, 5. Nama kebuah kitai ulih ngumbai ‘Berita Manah pasal Perintah Petara’ sama enggau berita manah pasal ‘pengasih Petara’?

4 Ba pengujung dunya tu, nembiak Jehovah bisi tanggung pengawa nusui ‘Berita Manah pasal Perintah Petara . . . nyadika saksi ngagai semua bansa.’ (Mat. 24:14) Berita manah pasal Perintah Petara mega ‘Berita Manah pasal pengasih Petara.’ Nama kebuah pia? Semua berekat ke deka diterima kitai ari Perintah Petara datai ari pengasih Jehovah. (Eps. 1:3) Paul nunjukka terima kasih ke pengasih Jehovah enggau ransing ati nginjil. Kati kitai nunda teladan Paul?—Bacha Rome 1:14-16.

5 Ba artikel sebedau tu, kitai udah belajar baka ni kitai ke bedosa tau bulih penguntung ari pengasih Jehovah dalam mayuh chara. Ketegal kitai udah bulih mayuh penguntung, kitai bisi tanggung pengawa ngajar orang bukai pasal chara Jehovah mandangka pengerindu Iya sereta chara sida tau bulih penguntung ari pengerindu Iya. Baka ni chara kitai ulih nulung orang bukai beterima kasih ke pengasih Petara?

NGEREMBAIKA BERITA MANAH PASAL GENSELAN TEBUS JESUS

6, 7. Lebuh kitai nerangka reti tebus ngagai orang, baka ni tu bekaul enggau ngerembaika berita manah pasal pengasih Petara?

6 Kemaya hari tu, mayuh orang enda ngasaika diri salah lebuh sida bedosa, nya alai sida enda meretika kebuah mensia begunaka tebus. Nambahka nya, majak mayuh orang nemu, gaya pengidup sida enda ngelantangka sida. Lalu sebedau sida betemu enggau Saksi-Saksi Jehovah, sida enda nemu nama reti dosa, baka ni dosa bekaul enggau kitai sereta nama utai ke patut digaga kitai kena ngelepaska diri ari nyadi ulun dosa. Pengudah orang ke lurus ati nemu reti dosa, sida berasai lantang laban nemu Jehovah udah ngirum Anak Iya ke dunya kena ngelepaska kitai ari dosa enggau pemati. Jehovah ngereja nya ketegal pemesai pengerindu sereta pengasih Iya.—1 Jhn. 4:9, 10.

7 Peratika utai ti dipadah Paul pasal Anak ti dikerinduka Jehovah: ‘Dalam iya kitai ditebus ulih darah iya, iya nya dosa kitai diampun, nitihka pemesai pengasih [Jehovah].’ (Eps. 1:7) Genselan tebus Kristus nya bukti pengerindu Petara ti pemadu besai ke kitai sereta nunjukka pemesai pengasih Iya. Endang ngelantangka ati lebuh nemu, dosa kitai deka diampun, lalu kitai deka ngembuan ati ti beresi enti kitai nunjukka pengarap ngagai genselan Jesus! (Heb. 9:14) Tu endang berita manah ti patut dikunsi enggau orang bukai!

NULUNG ORANG NYADI KAWAN PETARA

8. Nama kebuah mensia ke bedosa patut bebaik enggau Petara?

8 Enti orang enda mandangka pengarap ngagai genselan Jesus, Petara ngumbai sida munsuh Iya. Nya alai, kitai bisi tanggung pengawa madah ngagai sida, sida ulih  nyadi kawan Petara. Rasul John nulis: ‘Barang sapa arapka Anak, bulih pengidup ti meruan belama iya. Barang sapa enda ngasika Anak, nadai bulih pengidup, tang deka natka pengeringat Petara.’ (Jhn. 3:36) Kitai ulih lantang ati laban genselan Kristus ulih nulung kitai nyadi kawan Petara. Paul nerangka utai nya ngena chara tu: ‘Kita, ke udah beserara ari Petara, lalu udah bemunsuh enggau Iya dalam ati kita, lalu udah ngereja penyai, diatu udah dibai Kristus bebaik enggau Petara ngena tubuh Kristus empu, ulih pemati iya.’—Kol. 1:21, 22.

9, 10. (a) Nama tanggung pengawa ke diberi Kristus ngagai bala menyadi iya ke diiri ngena roh kudus? (b) Baka ni “bedus ti bukai” nulung orang ke diiri ngena roh kudus?

9 Kristus udah meri bala menyadi iya ke diiri ngena roh kudus ba dunya tu “pengawa mai semua mensia bebaik enggau Iya [Jehovah].” Paul madah ngagai sida: ‘Semua utai tu datai ari Petara magang, ke udah mai kitai bebaik enggau Iya Empu, ulih Kristus, lalu udah meri kitai pengawa mai semua mensia bebaik enggau Iya. Reti nya, dalam Kristus, Petara udah mai semua dunya bebaik enggau Iya Empu, enda ngitung penyalah sida, lalu ngasuh kami nusui pesan pemaik tu. Nya alai, kami nyadika pengari Kristus, laban Petara bejaku ngena kami. Kami bebendar ngarika Kristus ngumbuk kita, mai kita bebaik enggau Petara.’—2 Kor. 5:18-20.

10 “Bedus ti bukai” ngumbai nya peluang ulih nulung orang ke diiri ngena roh kudus ba pengawa tu. (Jhn. 10:16) Ketegal nyadi “pengari” Kristus, “bedus ti bukai” bisi ungkup ti besai agi ba pengawa nginjil, ngajar orang pemendar sereta nulung orang bisi kaul ti rapat enggau Jehovah. Tu pengawa ti beguna ba pengawa nusui berita manah pasal pengasih Petara.

NGAJAR ORANG PASAL PETARA TI NINGA SAMPI

11, 12. Nama kebuah nya berita ti manah enti orang nemu sida ulih besampi ngagai Jehovah?

11 Mayuh orang besampi laban nya ngasuh sida lantang ati, tang sida enda entu pechaya Petara ninga sampi sida. Sida patut nemu, Jehovah ninga sampi. Pemasmur David nulis: “Nuan nyaut sampi [“ninga sampi,” NW]. Semua mensia deka datai ngagai Nuan. Lebuh kami alah laban penyai ti dikereja kami, Nuan ngampun penyalah kami.”—Mas. 65:2, 3.

12 Jesus madah ngagai bala murid iya: ‘Enti kita minta sebarang utai dalam nama aku, aku deka ngereja nya.’ (Jhn. 14:14) Reti nya, kitai ulih besampi ke “sebarang utai” ke sejalai enggau peneka Jehovah. John nulis: ‘Baka tu ku pemerani kitai di mua Petara, iya nya enti kitai minta sebarang utai nitihka peneka Iya, Iya ninga kitai.’ (1 Jhn. 5:14) Endang manah ulih nulung orang nemu, sampi nya ukai semina utai ti ngasuh sida lantang ati tang nya chara dikena mansang semak ngagai ‘kerusi diraja Petara ti kasih’! (Heb. 4:16) Lebuh kitai ngajar orang chara besampi ti patut, ngagai Orang ti patut, sereta ke utai ti patut, kitai nulung sida nyadi kawan Jehovah sereta bulih pengelantang ati lebuh sida ditinggang penusah.—Mas. 4:1; 145:18.

PENGASIH PETARA BA DUNYA BARU

13, 14. (a) Nama peluang ti amat manah ke deka diulih orang ke diiri ngena roh kudus jemah ila? (b) Nama pengawa badas ke deka dikereja orang ke diiri ngena roh kudus ke mensia?

13 Jehovah deka mandangka pengasih Iya enggau mayuh agi “dalam dunya ti deka datai.” Baka ni? Petara deka meri siti peluang ti amat manah ngagai 144,000 iku orang ke deka sama merintah enggau  Kristus di serega. Paul nerangka pasal peluang nya lebuh iya nulis: ‘Petara balat rinduka kitai, ulih pemesai pengasih Iya, Iya udah ngasuh kitai idup begulai enggau Kristus, taja pen kitai udah mati dalam dosa kitai — kita diselamatka ulih pengasih. Lalu Iya ngangkatka kitai idup baru enggau Kristus, lalu ngasuh kitai duduk enggau Iya di serega dalam Jesus Kristus, ngambika, dalam dunya ti deka datai, Iya ulih mandangka pemesai pengasih Iya ti nadai banding, ngena penelap ati Iya ke kitai dalam Jesus Kristus.’—Eps. 2:4-7.

14 Endang tusah deka ngambarka utai manah ti udah disediaka Jehovah ke orang Kristian ke diiri ngena roh kudus lebuh sida merintah enggau Kristus di serega. (Luk. 22:28-30; Plp. 3:20, 21; 1 Jhn. 3:2) Jehovah deka “mandangka pemesai pengasih Iya” ngagai sida dalam chara ti lain agi ari ke bukai. Sida deka nyadi “Jerusalem ti baru,” indu ti ditikah Kristus. (Pem. 3:12; 17:14; 21:2, 9, 10) Sida deka bekereja enggau Jesus “ngeraika bansa.” Sida deka nulung mensia lepas ari tating dosa enggau pemati sereta deka nulung sida nyadi sempurna.—Bacha Pemandang 22:1, 2, 17.

15, 16. Baka ni Jehovah deka mandangka pengasih Iya ngagai “bedus ti bukai” jemah ila?

15 Epesus 2:7 madahka, Petara deka mandangka pengasih Iya “dalam dunya ti deka datai.” Maya nya, semua orang di dunya deka ngasaika “pemesai pengasih Iya.” (Luk. 18:29, 30) Siti ari chara ti pemadu besai ke deka dikena Jehovah mandangka pengasih Iya ba dunya, iya nya ngangkatka mensia idup baru ari “dunya pemati.” (Jop 14:13-15; Jhn. 5:28, 29) Sapa ke deka diangkatka idup baru? Bala lelaki enggau indu ti tetap ati ke udah mati sebedau Kristus mati sereta bala “bedus ti bukai” ke mati enggau tetap ati ngagai Jehovah maya hari ti penudi. Semua sida ke tetap ati tu deka diidupka baru ngambika ulih terus nyembah Jehovah.

16 Bejuta iku mensia ke mati ti enda ngelala Petara mega deka diangkatka idup  baru. John nulis: “Aku lalu tepedaka orang ke udah mati, ke besai enggau ke mit, bediri di mua kerusi diraja nya, lalu mayuh bengkah bup dibuka. Siti agi bup dibuka, iya nya bup pengidup. Lalu orang ke udah mati diakim nitihka utai ti udah dikereja sida, munyi ti ditulis dalam bup nya. Tasik lalu nyerahka orang ke mati dalam iya. Pemati enggau Dunya pemati nyerahka orang ke mati dalam seduai iya, lalu semua orang nya diakim nitihka utai ti udah dikereja sida.” (Pem. 20:12, 13) Orang ke diangkat idup baru deka bisi peluang belajar pasal Jehovah, lalu nerima Perintah Iya. Sida patut belajar sereta nitihka prinsip Bup Kudus sereta iring baru ke bisi dalam “bup.” Iring ke baru nya deka nyadi chara bukai dikena Jehovah mandangka pengasih Iya.

TERUS NUSUI BERITA MANAH

17. Nama juluk ati kitai lebuh enggau pengawa nginjil?

17 Pengawa nusui berita manah pasal Perintah Petara nya beguna agi ari ke udah, laban pengujung udah semak! (Mrk. 13:10) Kitai patut ingat, juluk ati kitai nginjil iya nya deka ngemuliaka Jehovah. Baka ni kitai ulih ngereja tu? Kitai patut madah ngagai orang, semua berekat ba dunya baru semina ulih diasaika kitai ketegal pengasih Jehovah.

Enggau ransing nyadi ‘ulun ke manah ti nerima pengasih Petara.’ —1 Pet. 4:10 (Peda genteran 17-19)

18, 19. Baka ni kitai ngemuliaka pengasih Jehovah?

18 Lebuh kitai nginjil, kitai ulih madah ngagai orang, lebuh Perintah Kristus merintah, mensia deka bulih semua penguntung ari tebus, lalu belubah-lubah nyadi sempurna. Bup Kudus madahka: ‘Semua utai ti udah digaga Petara dilepaska ari tubuh sida ti nemu buruk, lalu bulih pengelepas ti bemulia ti endang enggi bala anak Petara.’ (Rom 8:21) Tu semina ulih nyadi nengah pengasih Jehovah.

19 Kitai bisi peluang madah ngagai semua orang pasal semaya ti ngalitka ati ke bisi ba Pemandang 21:4, 5: “[Petara] deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.” Udah nya Jehovah, ke duduk ba kerusi diraja bejaku: “Peda nuan, diatu Aku ngaga semua utai nyadi baru magang!” Iya mega bejaku ngagai aku: “Tuliska tu, laban leka jaku tu bendar sereta tau dikarapka.” Lebuh kitai enggau ransing nusui berita manah tu ngagai orang bukai, kitai ngemuliaka pengasih Jehovah!