Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga—Edisyen Dikena Belajar  |  Julai 2016

 TOPIK RANDAU | BUP KUDUS—TAN BELAMA IYA

Bup Kudus Tan ari Disakal

Bup Kudus Tan ari Disakal

PENANGGUL: Mayuh bala tuai politik enggau tuai pengarap ngembuan juluk ati ke enda sejalai enggau pesan Bup Kudus. Kesuah agi, sida ngena kuasa sida nagang orang ngembuan, ngasilka, tauka nyalin Bup Kudus. Peratika dua iti chunto:

  • Kira 167 S.M.: Raja Antiokhus Epifanes, ke mejal orang Judah nerima pengarap orang Gerika, ngasuh semua salin Bup Kudus jaku Hebrew dirusak. Heinrich Graetz, seiku pakar sejarah nulis, bala pegawai raja nya “nyarik sereta nunu gulung Adat Moses ke bisi ditemu sida, lalu munuh orang ke ditemu sida ngiga pengering tauka pengelantang ari pengawa macha Bup Kudus.”

  • Kira 800 taun menya: Sekeda tuai pengarap Katolik pedis ati laban orang biasa ti bepengarap ke dikumbai sida, orang ke nyakal ajar gerija nusui utai ti diajar Bup Kudus, ukai nusui ajar Katolik. Orang biasa nya ngembuan bup mit dalam Bup Kudus, ukai ngembuan bup Masmur dalam jaku Latin. Seiku kunsil gerija ngasuh bala sida “enggau bebendar, tetap ati sereta bejarit ngiga orang ke nyakal ajar gerija . . . enggau ngiga semua rumah sereta bilik baruh tanah ke dikumbai sida bisi orang ke nyakal. . . . Rumah ke bisi orang ke nyakal deka dirusak.”

Enti munsuh Bup Kudus udah mujur ngerusak iya, pesan dalam Bup Kudus mega lenyau.

Bup Kudus English ke disalin William Tyndale ulih tan taja pan ditagang, ditunu, lalu iya empu dibunuh ba taun 1536

BAKA NI BUP KUDUS ULIH TAN: Raja Antiokhus ngemeratka kimpin iya ba menua Israel, tang orang Judah udah numbuhka beberapa komuniti ba menua bukai. Iya ke amat, bala pakar nganggar, ba kurun ti kesatu M., lebih 60 peratus orang Judah diau ba luar menua Israel. Ba balai gempuru, orang Judah nyimpan salin Bup Kudus—salin Bup Kudus ke sama dikena orang rebak dudi, nyengkaum orang Kristian.—Kereja Rasul 15:21.

Dalam kandang 800 taun, orang ke rinduka Bup Kudus enda takut diperinsa, lalu terus nyalin sereta ngupi ayat Bup Kudus. Indah sebedau mesin chelak ke ulih dipindah kin kitu digaga kena tengan kurun ti ke-15, mayuh bagi ari Bup Kudus udah bisi dalam 33 bengkah bansa jaku. Udah nya, Bup Kudus disalin sereta dikeluarka enggau jampat ari ke udah.

ASIL IYA: Taja pan napi penanggul ari bala raja sereta tuai pengarap, Bup Kudus nyadi bup ti pemadu mayuh disadung sereta disalin dalam sejarah. Iya udah ngubah undang-undang sereta bansa jaku sekeda menua, nyengkaum pengidup bejuta iku orang.