Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Pemerinsa—Kati Tu Ukum Ari Petara?

Pemerinsa—Kati Tu Ukum Ari Petara?

LUZIA PINCHAT KAKI KIBA. Lebuh iya agi mit, iya bisi penyakit polio. Penyakit tu ulih ngerampit sereta nyerang sistem saraf tubuh. Lebuh iya berumur 16 taun, seiku indu ke ngaji iya madah: “Petara ngukum nuan ngena penyakit tu laban nuan enda ngasi sereta jai enggau indai nuan.” Pengudah beberapa taun, Luzia agi ingat baka ni jaku indu nya ngasuh iya anchur ati.

LEBUH DAMARIS BISI KANSER UNTAK, apai iya nanya iya: “Nama utai digaga nuan nyentukka nuan bulih penyakit tu? Nuan tentu bisi ngereja utai ti amat jai. Nya alai, Petara ngukum nuan.” Damaris balat tusah ati lebuh ninga jaku apai iya.

Beribu-ribu taun mensia udah ngumbai penyakit datai ari Petara. Bup Manners and Customs of Bible Lands madahka mayuh orang ba jeman Jesus pechaya “penyakit nyadi ketegal orang nya tauka sida sebilik bedosa, lalu nya ukum ke iya.” Medieval Medicine and the Plague madahka ba urung kurun ke-14 enggau ke-15, “sekeda orang ngumbai Petara ngenataika penyakit kena ngukum orang ketegal dosa sida.” Lebuh bejuta iku orang ba Eropah mati ketegal penyakit ti berampit ba kurun ke-14, kati tu ketegal Petara ngukum orang ke jai? Tauka penyakit tu nyadi ketegal dirampit bakteria, baka ke dipadah bala pakar berubat? Sekeda engka berunding, kati Petara amat ngena penyakit ngukum orang ketegal dosa sida? *

PERUNDINGKA: Enti penyakit sereta pemerinsa nya ukum ari Petara, nama kebuah Jesus ngeraika orang ti sakit? Tu tentu enda sejalai enggau pengelurus Petara. (Matthew 4:23, 24) Jesus nadai kala nyakal utai ti digaga Petara. Ku iya: “Aku seruran ngereja utai ti ngerinduka ati Iya” lalu ‘aku ngereja utai ti diasuh Apai.’—John 8:29; 14:31.

Bup Kudus enggau terang madahka, Petara Jehovah seruran lurus. (Ulang Adat 32:4) Ambika chunto, Petara enda kala ngasuh penusah bas bebadi, ke munuh bepuluh iku orang ke enda besalah ketegal deka ngukum seiku orang ba bas nya. Sejalai enggau pengelurus Petara, Abraham, seiku nembiak Petara ke tetap ati, madah Petara “tentu enggai munuh sida ke nadai penyalah sama enggau sida ke bepenyalah.” (Pemungkal 18:23, 25) Bup Kudus mega madah ‘Petara ti Pemadu Bekuasa enda ngereja penyai’, Iya enda “ngereja utai ti salah.”—Jop 34:10-12.

NAMA AJAR BUP KUDUS PASAL PEMERINSA?

Pemerinsa ke ditapi kitai ukai ukum ari Petara ketegal sesiti penyalah ke digaga kitai. Jesus enggau terang madahka pasal tu lebuh iya enggau bala murid iya meda seiku lelaki ke buta kenyau ari ada. ‘Sida murid iya lalu nanya iya, “Pengajar, dosa sapa ti ngasuh iya ada buta? Dosa iya empu, tauka dosa apai indai iya?” Disaut Jesus, “Iya ke buta nya ukai laban dosa iya tauka dosa apai indai iya.”’—John 9:1-3.

Murid Jesus tentu tekenyit lebuh Jesus madahka, orang nya buta ukai ketegal dosa orang nya empu tauka dosa ari apai indai. Jesus ukai semina ngeraika orang ke buta nya, tang enggau ngereja nya iya mutarka runding orang ti salah ke ngumbai pemerinsa nya ukum ari Petara. (John 9:6, 7) Sida ke bisi penyakit ti raya kemayaharitu ulih bulih pengelantang laban nemu penyakit ukai ukum ari Petara.

Nama kebuah Jesus ngeraika orang ti sakit enti Petara ngukum sida ketegal penyalah ke digaga sida?

Ayat Bup Kudus madahka

  • ‘Petara enda ulih diuji penyai, lalu Iya Empu enda nguji orang.’ (JAMES 1:13) Endang amat, “penyai” ke ditapi mensia beribu taun ti nyengkaum penyakit, pemedis enggau pemati deka nadai agi.

  • Jesus Kristus “ngeraika semua sida ke sakit.” (MATTHEW 8:16) Lebuh Jesus ngeraika orang ke sakit, iya nunjukka utai ke deka digaga Perintah Petara lebuh merintah dunya.

  • “Iya [Petara] deka ngendas semua ai mata ari mata sida. Nadai agi pemati, nadai agi tinggang pemerinsa tauka nyabak tauka pemedis. Utai ti lama udah lesap.”—PEMANDANG 21:3-5, Bup Kudus Berita Manah Ka Rebak Diatu.

 SAPA KE PATUT DISALAHKA?

Nama kebuah mensia ditinggang pemedis sereta pemerinsa? Mensia suah berundingka tanya tu ari beribu taun kelia. Enti nya ukai salah Petara, sapa ke patut disalahka? Saut ngagai tanya tu deka dikerandauka ba artikel ti nangkanka tu.

^ per. 4 Taja pan Petara kala ngukum orang ketegal dosa ke digaga sida, Bup Kudus nadai madahka Jehovah agi ngena penyakit tauka penusah kena ngukum orang kemayaharitu..