Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

“Kita berega agi.”—MATTHEW 10:31

Kati Petara Ibuhka Nuan?

Kati Petara Ibuhka Nuan?

NAMA ULIH DIPELAJAR KITAI ARI UTAI TI DIGAGA PETARA?

Timpuh 60 minit ti keterubah pengudah anak mit ada, nya timpuh ti amat berega. Nama kebuah? Laban indai ke begulai enggau anak iya ba timpuh tu, ulih nulung anak iya mansang besai enggau manah. *

Nama meransang indai ngemataka anak iya ke baru ada enggau pengerindu? Ba The Journal of Perinatal Education, Profesor Jeannette Crenshaw madahka tu ketegal penyampau hormon oxytocin ti tinggi. Hormon tu meransang indai rinduka anak iya ke baru ada lebuh iya megai, merening sereta nusuka anak iya. Ba maya nya, bisi siti da agi hormon ke meransang indai deka begulai enggau anak iya. Nama ulih dipelajarka kitai ari tu?

Petara Jehovah nempa mensia ngambika anak ke baru ada enggau indai iya bisi kaul ti rapat. * Raja David muji Petara laban iya “ada” lalu berasai likun lebuh diberap indai iya. Iya besampi: ‘Aku udah manggaika diri ba Nuan kenyau ari ada, lalu Nuan endang Petara aku.’—Masmur 22:9, 10.

PERUNDINGKA: Enti Petara ngaga tubuh mensia ngambika indai ngembuan pengerindu ke anak ti baru ada lalu meri utai ke diguna anak iya, endaka tu mega nunjukka Petara rinduka tiap iku kitai, laban kitai ‘anak Petara’?—Kereja Rasul 17:29.

NAMA AJAR BUP KUDUS TI NUNJUKKA PETARA IBUHKA KITAI?

Jesus Kristus ke nemu pasal Petara lebih agi ari orang bukai madahka: “Dua iku burung pipit dijual enggau rega sesingkap duit seling ke mit rega, enda pia? Taja pia, nadai siku sida labuh ke tanah, enda ditemu Apai kita. Indah semua lambar buk ba pala kita deh udah diitung magang. Nya alai, anang takut. Kita berega agi ari burung pipit!”—Matthew 10:29-31, NW.

Semina sekeda ari kitai ibuhka tiap iku burung ti mit, lalu mimit aja orang ke nemu burung tu “labuh ke tanah.” Tang, Apai ba serega ibuhka tiap iku sida! Enda ngira ni penyampau burung, ba Jehovah, mensia jauh agi berega ari burung. Nya alai, jaku lalau tu endang terang: “Anang takut” laban Petara ibuhka nuan. Iya amat rinduka nuan!

Petara ibuhka sereta ngemataka kitai enggau pengerindu

 Ayat Bup Kudus madahka

  • ‘Jehovah meda utai ti nyadi di semua endur. Iya nengkilaka kitai, nemuka kitai ngereja utai ti manah tauka ngereja utai ti jai.’—JAKU DALAM 15:3.

  • ‘Jehovah ngemataka orang ke lurus lalu mendingka sabak sida.’—MASMUR 34:15.

  • “Aku deka lantang sereta rami gaga ketegal pengerindu Nuan ti meruan belama iya, laban Nuan udah meda pemerinsa aku. Nuan nemu penusah aku.”—MASMUR 31:7.

“AKU NGASAIKA DIRI ENDA DIKERINDUKA JEHOVAH”

Kati pengidup kitai ulih berubah enti kitai nemu Petara ibuhka sereta ngemataka kitai? Au, ulih. Ku Hannah, * ari England nerangka:

“Aku selalu ngasaika Jehovah enda rinduka aku lalu sampi aku enda disaut. Aku ngumbai tu ketegal pengarap aku ke enda tegap. Aku ngasaika diri diukum tauka enda dikeibuhka laban aku enda beguna. Aku ngasaika Petara enda ibuhka aku.”

Tang diatu, Hannah enda agi kakang ati enggau pengibuh sereta pengerindu Jehovah. Nama kebuah? Hannah nerangka: “Ubah tu nyadi enggau belubah. Aku agi ingat siti cheramah Bup Kudus ke bejaku pasal tebus Jesus lalu tu negu ati aku. Cheramah tu nulung aku andal enggau pengerindu Jehovah. Lebuh sampi aku disaut, aku suah nyabak laban aku nemu Jehovah endang sayauka aku. Pia mega, belajarka Bup Kudus sereta datai ngagai gempuru Kristian nulung aku nemu mayuh agi pasal Jehovah, pemanah Iya sereta runding Iya pasal kitai. Diatu aku ulih meda enggau terang sukung ari Jehovah enggau pengerindu Iya. Nambahka nya, aku nemu Iya keran deka ngibun kitai seiku-seiku.”

Utai ku Hannah amat meri peransang. Tang baka ni nuan ulih nemu Petara meretika sereta ingatka asai ati nuan? Artikel ke nangkanka tu deka nyaut tanya tu.

^ per. 3 Sekeda indai engka napi sakit udah beranak ke dikumbai postpartum depression. Penyakit tu ngasuh sida tusah deka begulai enggau anak sida ke baru ada. Taja pia, tu ukai salah sida. Nitihka U.S. National Institute of Mental Health, postpartum depression ukai nyadi ketegal utai ke digaga indai nya. Kena nemu mayuh agi penerang bekaul enggau topik tu, peda artikel Memahami Depresi Pascapersalinanba 8 Jun, 2003, majalah Sedarlah!

^ per. 5 Jehovah nya nama Petara ke bisi ayan ba Bup Kudus.—Masmur 83:18; peda Jaku Penerang, genteran 3 ba Bup Kudus Baru.

^ per. 15 Ba artikel tu, sekeda nama udah diubah.