Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  No. 2 2017

 TOPIK RANDAU | NAMA DIPADAH BUP KUDUS PASAL—MELIKAT

Utai ti Bendar Pasal Melikat

Utai ti Bendar Pasal Melikat

Kati nuan deka nemu utai ti bendar pasal bala melikat—sapa sida, baka ni sida tau bisi, lalu nama pengawa sida? Saut ngagai semua tanya nya semina ulih ditemu ba Jaku Petara, iya nya Bup Kudus. (2 Timoti 3:16) Nama dipadah Bup Kudus pasal bala melikat?

  • Petara nya Roh, nya alai bala melikat mega roh, enda ulih dipeda laban “nadai isi tauka tulang.” Bala melikat ti taluk diau di serega lalu ulih terus betemu enggau Petara di serega.—Luke 24:39; Matthew 18:10; John 4:24.

  • Kekadang bala melikat pegari ngena tubuh mensia ngambika ulih bejalaika pengawa ti diberi Petara ba dunya, lalu udah nya ninggalka tubuh mensia pengudah nembuka pengawa sida.—Pengulu 6:11-23; 13:15-20.

  • Taja pan bala melikat digambarka dalam Bup Kudus baka lelaki sereta selalu mali diri ngena tubuh lelaki, ba bala sida nadai lelaki tauka indu. Sida enda belaki bebini sereta ngasilka bansa sida empu. Nambahka nya, sida ukai nyadi mensia dulu ba dunya—sekalika nyadi anak mit ke baru ada, anak mit, tauka orang besai tuai. Bala melikat ditempa Jehovah. Nya kebuah Bup Kudus ngumbai sida ‘anak Petara.’—Pemungkal 6:2; Masmur 148:2, 5.

  • Bup Kudus nyebut pasal “ngena mayuh macham jaku mensia, enggau ngena jaku melikat.” Tu nunjukka bala melikat bisi bansa jaku lalu sida mega bejaku enggau pangan diri. Taja pan Petara udah ngena melikat bejaku enggau mensia, Iya enda ngemendarka kitai nyembah bala melikat tauka besampi ngagai sida.—1 Korint 13:1; Pemandang 22:8, 9.

  • Bisi beribu-ribu, bejuta-juta iku melikat, engka bisi bebiliun iku sida. *Daniel 7:10; Pemandang 5:11.

  • Bala melikat nya “kering sereta bekuasa”—jauh kering ari mensia—lalu pemintar sida ngelui ari enggi mensia. Sida ulih mindah laju, jauh laju ari ke ulih digambarka mensia.—Masmur 103:20; Daniel 9:20-23.

  • Taja pan bala melikat bisi mayuh kuasa sereta pintar, sida bisi pengurang, lalu bisi sekeda utai ke enda ditemu sida.—Matthew 24:36;1 Peter 1:12.

  • Bala melikat ditempa ngambika ngembuan ulah, pemanah, sereta peluang bibas milih. Nya alai baka mensia, sida ulih milih sekalika deka ngereja utai ti ngena tauka salah. Tang sayau amat, sekeda bala melikat milih angkat ngelaban Petara.—Jude 6.

^ per. 8 Nitihka rambai jaku asal Gerika, Pemandang 5:11 nyebut pasal “bepuluh ribu kali bepuluh ribu.” Nya alai, engka bisi beratus juta iku tauka bebiliun iku melikat!