Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  No. 2 2017

Nemu Nuan?

Nemu Nuan?

Kati sempama Jesus pasal “ukui” nya jaku ti ngemaruhka orang?

Seiku anak mit indu enggau anak ukui, patung ari menua Gerika tauka Rome (ke digaga entara abad keterubah S.M. enggau abad kedua M.)

Bisi sekali, lebuh Jesus ba luar adan menua Israel di Siria ke dipegai Rome, seiku indu bansa Gerika datai minta tulung. Saut Jesus ke ngena sempama nya mandingka orang ke ukai bansa Judah enggau “ukui.” Di baruh Adat Moses, ukui dikumbai jelu ke enda tuchi. (Adat Lewi 11:27) Kati jaku Jesus nya ngemaruhka indu bansa Gerika nya sereta orang ke ukai bansa Judah ke bukai?

Enda. Baka ke dipadah Jesus ngagai bala murid iya, nulung orang Judah nya utai ke patut dikemeratka maya nya. Nya alai, ngena sempama nya Jesus madah ngagai indu bansa Gerika: “Aku enda patut ngambi pemakai ari anak mit, lalu nibarka nya ngagai ukui [“anak ukui,” NW].” (Matthew 15:21-26; Mark 7:26) Ba orang Gerika enggau ba orang Rome, ukui nya jelu tupi ti dikesayau lalu diau dalam rumah tuan iya sereta bemain enggau bala anak. Nya alai leka jaku “ukui” engka ngambarka utai ti ngelantang sereta ngagaka ati. Indu bansa Gerika nya meretika utai ku Jesus lalu nyaut: ‘Nya endang amat, Tuan, tang indah ukui deh makai teda pemakai ti labuh ari mija tuan iya.’ Jesus muji pengarap iya lalu ngeraika anak indu iya.—Matthew 15:27, 28.

Kati rasul Paul meri jaku lalau ti manah lebuh iya minta pejalai kapal ditangguh dulu?

Ukir kapal barang ti besai (abad keterubah M.)

Kapal ke mai Paul ngagai Itali tusah nanjak ribut. Lebuh benung ba palan penyangkai kapal, rasul Paul minta pejalai kapal ditangguh dulu. (Kereja Rasul 27:9-12) Kati bisi kebuah ti berat iya meri jaku lalau nya?

Bala kelasi nemu, belayar ba tasik Mediterranean maya musin seleju tau ngasuh bebadi. Ari urung 15 November nyentuk ngagai 15 Mac, tasik enda engkeman alai belayar. Tang pejalai kapal ke disebut Paul nya kena bulan September tauka Oktober. Dalam bup Epitome of Military Science, Vegetius seiku penulis Rome (urung taun 400 M.) madah pasal belayar ba tasik nya: “Sekeda bulan ulih belayar, sekeda bulan enda entu ulih, lalu bulan ke bukai endang enda ulih.” Vegetius madahka, belayar ari 27 Mei nyentuk ngagai 14 September nya selamat, tang maya ke enda entu ulih tauka maya ke ulih ngasuh bebadi nya belabuh ari 15 September nyentuk ngagai 11 November sereta ari 11 Mac nyentuk ngagai 26 Mei. Paul, ke mindah nitihka musin tentu nemu pasal utai tu. Juragan kapal enggau orang ke bempu kapal mega nemu pasal utai tu, tang sida enda bedulika jaku lalau Paul. Nya ngujungka kapal sida karam.—Kereja Rasul 27:13-44.