Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TOPIK RANDAU | NAMA DIPADAH BUP KUDUS PASAL—MELIKAT

Baka Ni Melikat Ulih Nulung Nuan

Baka Ni Melikat Ulih Nulung Nuan

Bala melikat ke tetap ati keran deka nulung mensia lalu bebendar ngereja peneka Petara. Lebuh Petara nempa dunya, bala melikat “belagu sama sereta, lalu bala orang serega manjung gaga ati.” (Jop 38:4, 7) Sepemanjai sejarah, bala melikat ingin “deka nemu” jaku ti benabi ke bekaul enggau utai ti deka nyadi ba dunya jemah ila.—1 Peter 1:11, 12.

Bup Kudus nunjukka ngambika peneka Petara dikemujurka, bala melikat kekadang nyaga bala penyembah ti bendar. (Masmur 34:7) Ambika chunto:

  • Lebuh Jehovah ngerusak nengeri Sodom enggau Gomorah, melikat nulung Lot ke lurus enggau sida sebilik ngerarika diri.—Pemungkal 19:1, 15-26.

  • Maya jeman Babilon kelia, lebuh tiga iku nembiak Hebrew ke diukum bunuh dalam serumbung api ti mau, Petara “udah ngirumka melikat Iya, lalu ngelepaska sida.”—Daniel 3:19-28.

  • Pengudah Daniel ke lurus bemalam dalam lubang singa, iya madahka diri selamat laban ‘Petara udah ngasuh melikat Iya nutup mulut singa.’—Daniel 6:16, 22.

Bala melikat lama udah nulung mensia ke tetap ati

BALA MELIKAT NYUKUNG EKLISIA KRISTIAN BA ABAD KETERUBAH

Kekadang, bala melikat ke mai pesan ari Petara nulung eklisia Kristian ba abad keterubah dalam sekeda pekara enti nya ulih nulung ngamatka tuju Jehovah. Ambika chunto:

  • Seiku melikat muka pintu rumah jil lalu mai bala rasul pansut ngambika sida ulih terus nginjil ba Rumah Sembiang.—Kereja Rasul 5:17-21.

  • Seiku melikat ngasuh Pilip ke nyadi penginjil ngagai jalai raya ke ngerenchah menua puang ti nuju ari Jerusalem ngagai Gasa, lalu nginjil ngagai seiku pemesai ari Etiopia ke mansang ngagai Jerusalem nyembah Petara.—Kereja Rasul 8:26-33.

  • Lebuh jam udah datai alai Jehovah ke deka orang ke ukai bansa Judah nyadi orang Kristian, seiku melikat pegari dalam genera ngagai Kornelius, seiku pemesai dalam siti regimen soldadu Rome, lalu ngasuh iya mai rasul Peter ngagai rumah iya.—Kereja Rasul 10:3-5.

  • Lebuh rasul Peter dijil, seiku melikat pegari lalu mai iya pansut ari rumah jil.—Kereja Rasul 12:1-11.

 BAKA NI MELIKAT ULIH NULUNG NUAN

Nadai bukti ke nunjukka Petara diatu ngena bala melikat nulung mensia ngena chara baka ke disebut dalam Bup Kudus. Taja pia, bekaul enggau jam kitai, Jesus madahka: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’ (Matthew 24:14) Kati nuan nemu bala murid Kristus benung ngereja pengawa tu di baruh iring bala melikat?

Bala melikat nulung nusui berita manah di serata dunya

Bup Pemandang madahka, bala melikat bebendar deka nulung mensia di serata dunya belajar pasal Petara Jehovah sereta tuju Iya ke mensia. Rasul John nulis: “Aku tepedaka siku agi melikat terebai ba tengan langit, mai Berita Manah ti meruan belama iya ti deka ditusui ngagai orang ke diau di dunya, ngagai semua bansa, raban bansa, jaku enggau menua. Ku iya bejaku enggau nyawa ti inggar, ‘Nangika Petara, lalu pujika mulia Iya, laban maya udah datai alai Iya deka ngakim. Sembah meh Iya ti udah ngaga serega, tanah, tasik enggau mata ai!’” (Pemandang 14:6, 7) Mayuh peneleba kemaya hari tu nunjukka bala melikat nyukung pengawa nusui pasal Perintah Petara di serata dunya. Amat, indah lebuh seiku orang ti bedosa nesal ati lalu pulai baru ngagai Jehovah, ‘bala melikat Petara deka rami gaga ati.’—Luke 15:10.

Nama deka nyadi lebuh pengawa nginjil udah tembu dipejalaika? Udah nya bala melikat ke nyadi “bala soldadu serega” deka nyukung Jesus Kristus, Raja ke semua raja, ‘beperang lebuh Hari Besai Petara ti Pemadu Bekuasa’ ba Armagedon. (Pemandang 16:14-16; 19:14-16) Bala melikat ke bekuasa deka bejalaika pengawa ngerusak seraya Tuan Jesus ‘ngukum orang . . . ke enda ngasika Berita Manah Jesus Kristus Tuan kitai.’—2 Tesalonika 1:7, 8.

Nya alai pechaya meh, bala melikat endang deka nulung nuan. Sida balat ibuhka orang ke keran deka nyembah Jehovah, lalu Iya suah ngena sida ngeringka sereta nyaga bala nembiak Iya ke tetap ati ba dunya.—Hebrews 1:14.

Lalu tiap iku kitai bisi pilih ti besai ke patut digaga. Kati kitai deka mending sereta ngasika berita manah ke benung ditusui di serata dunya? Saksi-Saksi Jehovah ba kandang endur nuan diau gaga ati deka mantu nuan bulih penguntung ke datai ari tulung bala melikat Petara ti kering.