Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  No. 2 2017

 TOPIK RANDAU | NAMA DIPADAH BUP KUDUS PASAL—MELIKAT

Kati Bisi Melikat ke Jai?

Kati Bisi Melikat ke Jai?

Bisi. Ari ni penatai sida? Kingatka, Petara nempa bala melikat ngambika ulih bibas milih. Enda lama pengudah Adam seduai Hawa iya nya mensia ti keterubah ditempa, seiku melikat ti sempurna udah salah nguna peluang bibas milih ke dikembuan iya lalu mungkal pengawa ngelaban Petara ba dunya. Iya mujur mai Adam seduai Hawa angkat ngelaban Petara. (Pemungkal 3:1-7; Pemandang 12:9) Bup Kudus nadai madahka nama melikat nya tauka penuduk ke dikembuan melikat nya sebedau iya ngelaban Petara. Tang pengudah iya ngelaban Petara, Bup Kudus ngumbai iya Sitan, reti nya, “Penyakal,” lalu Antu, reti nya “orang ti madah bula pasal orang bukai.”—Matthew 4:8-11.

Tang sayau amat, pengawa ngelaban tu ukai semina naka nya aja. Maya jeman Noah, bala melikat ke enda ditemu penyampau “ninggalka endur alai sida diau” nyadi ruang bilik Petara di serega. Sida datai ke dunya lalu ngena tubuh mensia ngambika ulih ngereja ulah ti kamah. Tu pengawa ke limpang ari tuju sida digaga.—Jude 6; Pemungkal 6:1-4; 1 Peter 3:19, 20.

Nama nyadi ngagai bala melikat ke jai nya? Lebuh Petara ngenataika bah di serata dunya kena nuchi dunya tu, sida ninggalka tubuh mensia lalu pulai ke serega. Taja pia, Petara enda ngemendarka bala melikat ke ngelaban tu ngambi pulai baru penuduk sida ti asal. Tang Petara ngengkahka sida ba endur ti baruh, “ba endur ti pemadu petang,” ke dikumbai Tartaros. (Jude 6; 2 Peter 2:4, nota kaki.) Bala melikat ke jai tu udah ngasuh sida empu di baruh kuasa Antu Sitan, iya nya “raja antu,” ke majak “nyaru diri nyadi melikat penampak.”—Matthew 12:24; 2 Korint 11:14.

Bup Kudus madahka, Perintah Messiah Petara iya nya siti Perintah ti di serega, ditumbuhka ba taun 1914. * Pengudah Perintah nya ditumbuhka, Sitan enggau bala antu iya dibuai ari serega ke dunya. Penyai enggau ulah ti kamah ke majak nyadi ba bumi kitai nunjukka ulah sida ti bedendam sereta mai pengerusak.—Pemandang 12:9-12.

Taja pia, utai jai ke majak nambah nunjukka pengujung kuasa merintah ari bala antu nyau semak. Enda lama agi, bala antu ke jai tu enda agi ulih ngachau. Pengudah Perintah Petara merintah dunya paradais pengelama 1,000 taun, bala antu ke jai nya deka bisi siti awak ti pandak sereta ke penudi iya nguji mensia. Udah nya sida deka dipunaska belama iya.—Matthew 25:41; Pemandang 20:1-3, 7-10.

^ per. 6 Ke penerang mayuh agi pasal Perintah Petara, peda Pelajar 8 dalam bup Nama Utai ti Bendar Diajar Bup Kudus? ke dikeluarka Saksi-Saksi Jehovah. Bisi mega ba www.jw.org.