Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Lebuh Nuan Sakit Raya

Lebuh Nuan Sakit Raya

“Lebuh aku nemu diri bisi kanser ba lempuang enggau ba gelung perut, aku asaika nerima ukum bunuh. Tang maya aku pulai pengudah betemu enggau lutur, aku berunding, ‘Aku enda nyangka tu nyadi, tang aku patut ngiga chara napi penyakit tu.’”—Linda, ke beumur 71 taun.

“Aku balat merinsa ketegal sakit urat ba sepiak kiba mua aku. Kekadang, tu mega ngasuh aku balat tusah ati. Aku suah ngasaika aku aja ke napi pemedis tu, nyentukka aku bisi runding deka munuh diri.”—Elise, ke beumur 49 taun.

ENTI nuan tauka orang ke dikesayauka nuan bulih penyakit ti ulih nabanka nyawa, nya tentu ngasuh nuan tusah ati. Kelimpah ari ngenatka penyakit nya, nuan mega engka takut enggau irau lebuh betemu enggau lutur, enda chukup duit kena berubat, tauka tusah deka ngiga chara berubat. Ubat ke diempa mega engka ngasuh nuan bisi pemedis bukai. Penyakit ulih ngachau asai ati nyentukka nuan enda tan agi napi nya.

Tang, nama ulih nulung nuan napi penanggul nya? Mayuh orang bulih pengelantang lebuh sida  besampi ngagai Petara sereta macha ayat Bup Kudus. Kelimpah ari nya, diri sebilik sereta bala pangan mega ulih nulung.

CHARA SEKEDA ORANG NAPI PENANGGUL TU

Robert ke beumur 58 taun madahka, “Arapka Petara, lalu Iya deka nulung nuan tan napi penyakit nya. Padahka asai ati nuan ngagai Jehovah nengah sampi. Pinta roh kudus Iya. Pinta tulung ari Iya ngambika enda lemi semengat, lalu ulih meransang diri sebilik sereta enda kelalu irau.”

Ku Robert nampung baru, “Aku berasai lantang agi lebuh bisi diri sebilik ngeringka aku. Ninting hari, bisi seiku tauka dua iku ari sida telefon ngagai aku lalu nanya, ‘Kati gaya nuan?’ Mayuh bala pangan ari serata endur mega bisi meransang aku. Tu ngasuh aku berasai nyamai agi, sereta kering agi.”

Enti nuan deka ngelawa orang ke sakit, uji peratika utai ke disebut Linda: “Orang ke sakit engka enggai suah bejaku pasal penyakit sida. Sida deka idup baka orang bukai. Nyadi, nuan ulih bejaku pasal utai bukai.”

Taja pan kitai benung sakit raya, tang enti kitai bisi tulung ari Petara sereta Bup Kudus, pia mega sukung ari diri sebilik enggau bala pangan, kitai bulih pengering kena neruska pengidup kitai.