Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Lebuh Nuan Ngasaika Diri Enda Ulih Tan Agi

Lebuh Nuan Ngasaika Diri Enda Ulih Tan Agi

Adriana ari Brazil madahka, “Asai ati tu baka ke enda nemu abis. Aku ngasaika manah agi enti aku mati.”

KALA NUAN ngasaika diri enda ulih tan agi nyentukka nuan enggai agi idup? Nuan engka ulih meretika asai ati Adriana. Iya merinsa ketegal napi asai ati ti balat irau, tusah ati sereta putus pengarap. Adriana bisi penyakit depression (kemurungan).

Perundingka mega utai ke dipadah seiku lelaki Jepun ke benama Kaoru. Iya nyaga apai indai iya ke udah tuai sereta benung sakit. Ku iya madahka, “Maya nya, ketegal mayuh penanggul ba endur kereja, aku asaika enda ulih tan agi. Nya ngasuh aku enggai makai. Aku mega enda entu ulih tinduk. Aku berunding, enda ka manah agi enti aku mati aja.”

Seiku lelaki ari Nigeria, ke benama Ojebode madahka, “Aku selalu tusah ati nyentukka aku nyabak. Nya alai aku ngiga chara kena munuh diri.” Taja pan Ojebode, Kaoru, enggau Adriana bisi runding deka munuh diri, tang sida enda ngereja nya.

NAMA UTAI KE ULIH NULUNG?

Ninting taun beratus ribu iku orang munuh diri. Mayuh ari sida ke munuh diri nya orang lelaki ketegal sida kelalu malu deka minta tulung. Jesus madahka orang sakit begunaka lutur. (Luke 5:31) Nya alai, enti nuan napi asai ati baka tu, anang malu ngiga tulung. Mayuh orang ke sakit depression ulih napi penyakit tu pengudah tetemuka chara berubat ti ngena. Ojebode, Kaoru, enggau Adriana udah nerima bantu ari lutur, lalu diatu sida ulih napi penyakit nya enggau manah agi.

Kena napi penyakit depression, lutur engka bisi meri ubat. Lutur mega engka meri awak berandau enggau orang ke sakit ngambika ulih ningaka asai ati iya. Maya nya, lutur engka nguji nulung iya ngembuan runding ti manah. Sida ke sakit depression mega begunaka sukung ari diri sebilik sereta bala pangan ti ibuhka sida, ti sabar, sereta nemu asai ati enggau runding sida. Pangan kitai ti pemadu manah iya nya Petara Jehovah. Iya nulung kitai ngena jaku Iya ke bisi ba Bup Kudus.

ULIH PENYAKIT TU DIGERAIKA?

Orang ke sakit depression begunaka timpuh ti panjai kena berubat. Sida mega patut ngaga sekeda ubah ba pengidup sida. Enti nuan benung napi penyakit tu, nuan ulih arapka semaya Petara. Ojebode madahka, “Aku enda sabar nganti semaya Petara ba Isaiah 33:24 dikeamatka. Ayat nya madah jemah ila orang ba dunya badu agi ‘madahka diri sakit.’” Petara madahka ba “dunya ti baru” ila, orang “nadai agi pedis.” Semaya tu ulih meri pengelantang. (Pemandang 21:1, 4) Nitihka semaya tu kitai nadai agi sakit, lalu tu nyengkaum nadai agi penusah ba dalam ati enggau ba runding kitai. Asai ati ti tusah deka lenyau belama iya lalu “enda agi dikingatka.”—Isaiah 65:17.