Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Lebuh Pengerusak Alam Nyadi

Lebuh Pengerusak Alam Nyadi

“Kami semua putus pengarap. Semua utai ke dikemisi kami abis lenyau ketegal tanah tusur enggau ai bah.”—Andrew, Sierra Leone.

“Pengudah kabut teduh, kami pulai ke rumah. Semua utai jai magang. Kami enda nemu nama patut digaga. Anak indu aku teduduk, lalu nyabak.”—David, Virgin Islands.

ENTI nuan kala merinsa ketegal pengerusak alam, nuan engka ulih ngasaika asai ati sida ke kena penusah tu. Kesuah iya, sida berasai tekenyit, enda ulih nerima utai ke nyadi, charut runding, balat irau sereta enda ulih tinduk jenak. Sida iya putus pengarap, berasai amat lelak, lalu nadai ati deka neruska pengidup sida agi.

Enti bisi pengerusak alam nyadi, nuan mega engka ngasaika diri enda ulih ngetatka penusah nya agi. Nuan engka ngasaika diri enda ulih neruska pengidup nuan agi. Taja pia, Bup Kudus bisi meri pengadang ti manah ke jemah ila. Nya alai, nuan patut neruska pengidup nuan, taja pan napi penusah tu.

BUP KUDUS MADAHKA UTAI MANAH KE DEKA NYADI JEMAH ILA

Pengajar 7:8 madahka: “Pengujung utai endang manah agi ari pun iya.” Lebuh pengerusak alam baru udah nyadi, nuan engka putus pengarap. Tang enti nuan ngaduka utai enggau sabar, pengidup nuan belubah-lubah nyadi majak manah.

Bup Kudus madah jemah ila orang “nadai nyabak agi, tauka kaung-kaung ngangau minta tulung.” (Isaiah 65:19) Tu deka dikeamatka maya dunya tu nyadi paradais lebuh dipegai Perintah Petara. (Masmur 37:11, 29) Maya nya, nadai agi pengerusak alam. Kitai nadai agi ingatka pemerinsa ke kala nyadi, laban Petara ti Pemadu Bekuasa udah besemaya: “Semua utai ti lama, enda agi dikingatka.”—Isaiah 65:17.

Uji perundingka: Petara udah ngatur deka ‘meri kitai pengidup enggau pengadang ke jemah ila.’ Lebuh Petara merintah, kitai deka idup enggau likun. (Jeremiah 29:11) Kati ulih penemu tu meransang nuan lebuh napi penusah? Sally, ke disebut ba artikel keterubah, madahka: “Enti nuan berundingka utai manah ke deka digaga Perintah Petara jemah ila, tu ulih nulung nuan nyeliahka diri ari berundingka penusah ke nyadi, lalu neruska pengidup nuan.”

Endang amat, pengerusak alam ke nyadi ngasuh nuan balat merinsa. Kati nuan deka nemu utai ke deka digaga Perintah Petara ke mensia enda lama da agi? Enti nuan nemu utai tu, tu ulih nulung nuan neruska pengidup nuan, seraya nuan nganti maya penusah tu deka nadai agi jemah ila. Tang ke diatu, Bup Kudus bisi jaku lalau ti ulih nulung nuan napi penusah ke nyadi. Peratika sekeda chunto tu.