Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Nuan Ulih Idup Belama Iya ba Bumi

Nuan Ulih Idup Belama Iya ba Bumi

ENDAKA TU NGALITKA ATI? Penempa kitai udah besemaya deka meri kitai pengidup ti meruan di bumi. Taja pia, mayuh orang tusah deka pechayaka tu. Ku sida, ‘Nadai orang ulih rari ari pemati. Nya endang utai ti biasa ba pengidup.’ Ke bukai ngumbai mensia ulih idup belama iya, tang ukai ba bumi. Sida ngumbai pengidup belama iya semina ulih nyadi lebuh orang nya mati lalu ngagai serega. Nama runding nuan?

Sebedau nuan ngaga pemutus, uji perundingka saut ari Bup Kudus ngagai tiga iti tanya tu: Berapa lama mensia patut idup enti nitihka gaya sida ditempa? Nama tuju asal Petara ngaga bumi enggau mensia? Baka ni pemati ulih nyadi ba mensia?

MENSIA DITEMPA ENGGAU MANAH

Ari semua utai ke ditempa Petara ba bumi, mensia nya ti pemadu manah. Nama kebuah? Bup Kudus madahka mensia ditempa “neladan gamal” Petara. (Pemungkal 1:26, 27) Nama reti tu? Reti iya kitai ulih nunda kualiti enggau pemanah Petara, baka pengerindu sereta pengelurus Iya.

Nambahka tu, mensia ngembuan penau nemu berunding, nemu ngelala utai ti manah enggau jai, sereta deka bisi kaul enggau Petara. Nya alai kitai ulih beterima kasih ke pemanah gamal dunya raya, rampa menua, seni, musik enggau pantun. Kelebih agi, mensia bisi penau nyembah Penempa. Semua utai tu nunjukka mensia bebida ari utai bukai ke ditempa Petara ba bumi.

Uji perundingka tu: Kati Petara deka meri mensia kualiti ti ngalitka ati sereta penau ke ulih dikemansang enti Iya semina deka kitai idup 70 tauka 80 taun aja? Ke bendar iya Petara meri mensia kualiti sereta penau ngambika kitai ulih idup lantang ba bumi belama iya.

TUJU ASAL PETARA

Sekeda orang madahka Petara enda ngaga mensia ngambika idup belama iya ba bumi. Sida madahka bumi digaga endur diau enda lama aja, alai mensia diuji kena nemu sekalika sida ulih ngagai serega lalu idup belama iya enggau Petara. Enti tu amat, endaka tu ngasuh Petara betanggungjawapka semua penyai ba bumi tu? Tu enda sama enggau kualiti Petara. Bup Kudus madahka: ‘Semua jalai Iya endang lurus magang. Petara ti tetap ati, enda nipu. Iya ngereja utai ti ngena sereta lurus.’—Ulang Adat 32:4.

 Bup Kudus enggau terang madahka tuju asal Petara ngaga bumi ba ayat tu: ‘Serega endang enggi Jehovah siku aja, tang Iya meri dunya [“bumi,” NW] ngagai kitai mensia.’ (Masmur 115:16) Amat, Petara ngaga bumi nyadi endur diau ti manah ke mensia lalu Iya meri semua utai ke diguna ngambika kitai ulih diau lantang belama iya.—Pemungkal 2:8, 9.

‘Serega endang enggi Jehovah siku aja, tang Iya meri dunya [“bumi,” NW] ngagai kitai mensia.’—Masmur 115:16

Bup Kudus mega bisi madahka tuju Petara ngaga mensia. Iya ngasuh mensia keterubah “ngemenuhka dunya sereta bekuasa atas iya . . . enggau semua utai ti idup di dunya.” (Pemungkal 1:28) Adam seduai Hawa ulih ngerembaika Paradais ngagai serata dunya. Naka meh pemanah peluang tu ke seduai iya! Endang amat Adam seduai Hawa sereta peturun sida bisi peluang idup belama iya ba bumi, ukai ba serega.

NAMA KEBUAH KITAI MATI?

Nama kebuah kitai mati? Bup Kudus madahka seiku melikat Petara ke ngelaban ti dikumbai Antu Sitan, nguji deka ngerusak utai ke udah digaga Petara ba Eden. Baka ni?

Sitan nipu Adam seduai Hawa lalu ngujungka sida enggau iya ngelaban Petara. Sitan madahka Petara ngetanka utai ti manah ari sida, iya nya ulih nentuka utai ti betul enggau utai ti salah. Seduai iya milih deka ngasika Sitan lalu ngelaban Petara. Asil iya? Seduai iya mati baka ke udah ditangkan Petara, lalu lenyau pengidup belama iya ba Paradais.—Pemungkal 2:17; 3:1-6; 5:5.

Pengawa Adam seduai Hawa ke ngelaban Petara balat ngenusahka pengidup mensia nyentukka diatu. Bup Kudus madahka: “Baka dosa ti datai ngagai dunya nengah orang siku [Adam], lalu pemati datai laban dosa, nya alai pemati ngelekai ngagai semua mensia.” (Rome 5:12) Kitai mati ukai ketegal udah ditentuka Petara, tang ketegal kitai nerima dosa ari Adam seduai Hawa.

NUAN ULIH IDUP BELAMA IYA BA BUMI

Pengawa ngelaban ba kebun Eden enda ngubah tuju asal Petara ngaga mensia enggau bumi. Pengerindu sereta pengelurus Petara ti sempurna ngasuh Iya nyediaka jalai ngambika ngelepaska kitai ari dosa enggau pemati. Rasul Paul nerangka: ‘Upah dosa nya pemati, tang pemeri ti diberi Petara pechuma nya pengidup ti meruan belama iya dalam Jesus Kristus Tuan kitai.’ (Rome 6:23) Enggau penuh pengerindu, Petara ‘meri Anak Tunggal Iya [Jesus Kristus], ngambika genap iku orang ke arapka iya enda mati tang bulih pengidup ti meruan belama iya.’ (John 3:16) Enggau meri diri empu nyadika tebus, Jesus nebus semua utai ke udah dilenyauka Adam. *

Enda lama da agi, semaya Petara ke deka ngaga bumi nyadi paradais deka dikeamatka. Nuan ulih diau ba Paradais enti nuan ngasika jaku Jesus: “Tama nengah pintu ti sempit, laban pintu ti besai enggau jalai ti luas nuju ngagai pengerusak, lalu mayuh orang nengah jalai nya. Tang pintu ti sempit, enggau jalai ti mar, nuju ngagai pengidup, lalu semina mimit aja orang tetemuka iya.” (Matthew 7:13, 14) Amat, pengidup nuan ke jemah ila bepanggai ba pemutus ke digaga nuan. Nama deka digaga nuan?

^ per. 17 Ke penerang mayuh agi pasal nama asil tebus ngagai kitai, peda Pelajar 5 ba bup Nama Ulih Dipelajarka Kitai Ari Bup Kudus? ke dikeluarka Saksi-Saksi Jehovah, lalu bisi ba www.jw.org/iba.