Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Chara Mensia Deka Nemu Utai ke Nyadi Jemah Ila

Chara Mensia Deka Nemu Utai ke Nyadi Jemah Ila

Kala nuan berundingka utai ti deka nyadi ngagai kita sebilik jemah ila? Kati kita sebilik bulih pengaya tauka penusah? Bulih pengerindu tauka berasai puang? Kati umur nuan panjai tauka enda? Mensia berundingka tanya tu pengelama beribu taun.

Kemayaharitu, bala pakar mansik pemansang dunya lalu nyangka utai ti deka nyadi ba jemah ila. Mayuh utai ke dipadah sida iya amat nyadi, tang bisi mega enda. Ambika chunto, ba taun 1912, seiku orang ke ngaga taligrap wireless ke benama Guglielmo Marconi madahka: “Semua perang deka nadai agi ba jeman wireless.” Lalu seiku manager ari kompeni Decca Record ke nulak raban ban The Beatles ba taun 1962 madahka semua raban ban ke bemain gitar deka nadai agi.

Mayuh orang ngena pengawa bemanang kena nemu utai ti deka nyadi jemah ila. Sekeda minta lalau ari pakar astrologi. Ambika chunto, horoskop mayuh dikeluarka ba majalah enggau surat kabar. Ke bukai minta orang ke nilit nasit “macha” pengidup sida ke jemah ila ngena daun terup, atau babi, tauka garis tapa jari.

Sekeda orang ba jeman kelia ngiga imam lelaki tauka indu ngambika ulih nemu pasal utai ti deka nyadi. Bala imam tu bulih penerang ari petara ke disembah sida. Ambika chunto, Raja Kroesus ari menua Lidia nganjung pemeri ti besai rega ngagai seiku imam ba Delfi, Gerika. Raja Kroesus deka nemu sekalika iya ulih menang enti iya beperang enggau Raja Sairus ari menua Persia. Imam nya madahka Kroesus deka ngalahka “siti perintah ti tebilang” enti iya mupuk ngelaban Sairus. Ketegal iya andalka diri deka menang, Kroesus mansang beperang. Tang perintah ti tebilang ke dirusak nya perintah iya empu!

Utai ke dipadah imam nya enda terang laban perintah Raja Kroesus enggau Raja Sairus sama tebilang. Nya alai, enda ngira ni bagi piak ke menang, jaku ke dipadah imam nya baka ke betul. Raja Kroesus lenyau semua utai ketegal penerang ti salah tu. Kati pengidup orang ke agi nitihka chara tu majak manah?