Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Astrologi enggau Betilit Nasit—Chara Nemu Jemah Ila?

Astrologi enggau Betilit Nasit—Chara Nemu Jemah Ila?

ASTROLOGI

Astrologi nya siti ari pengawa nujum ke ngumbai bintang, bulan enggau planet bisi kaul enggau pengidup orang ba dunya. Pakar astrologi tauka orang ke pandai pasal bintang madahka penuduk bintang, bulan enggau planet maya seseiku orang ada ulih nentuka personaliti sereta utai ke nyadi ngagai orang nya dudi hari ila. Taja pan astrologi bepun ari jeman Babilon kelia, tang iya agi dikena nyentukka diatu. Nitihka pansik ke digaga ba Amerika Serikat ba taun 2012, 33% orang madahka astrologi nya “baka ke bisi kaul enggau sains,” lalu 10% madah nya “endang bisi kaul enggau sains.” Kati nya amat? Enda. Tu kebuah iya.

  • Planet enggau bintang nadai kuasa kena nentuka pengidup tauka gaya pendiau mensia.

  • Selalu iya utai ke dipadah pakar astrologi ulih nyadi ba sapa-sapa aja

  • Utai ke dipadah sida kemayaharitu digaga nitihka ajar sida kelia menya, ti madahka planet bepusin ngelingi bumi. Tang kebendar iya, planet bepusin ngelingi mata panas.

  • Utai ke dipadah pakar astrologi pasal seseiku orang enda sebaka.

  • Astrologi bisi nyebut pasal 12 iti kategori kelai zodiak. Sida nentuka zodiak nitihka hari pengada orang nya. Ketegal penuduk bumi ba langit luar udah berubah dalam beribu taun ti udah, haribulan ti ditentuka ngena kategori kelai zodiak bekaul enggau maya bumi ngelingi mata panas enda betul agi. Tang pakar astrologi agi ngena haribulan ke lama nya. Nya alai, orang ke ada kemayaharitu enda agi ulih nitihka kelai zodiak ke lama.

Kelai zodiak dikumbai ulih nentuka personaliti seseiku orang. Tang kebendar iya, orang ke ada ba hari ti sama enda ngembuan personaliti ti sama. Hari pengada orang nadai kaul enggau personaliti iya. Pakar astrologi ngakim seseiku orang nitihka kelai zodiak, tang enda meda personaliti orang nya ti bendar. Enda ke tu runding ti salah?

 BETILIT NASIT

Ari kelia menya, mensia suah betemu enggau orang ke landik nilit nasit. Sida betilit nasit ngena perengka dalam jelu enggau mensia tauka meda ari chara manuk lelaki mantuk tumpuk asi. Bisi mega meda nasit ari chura daun tauka rampang kupi. Kemayaharitu, pengawa betilit nasit digaga ngena daun terup, atau babi, macha garis tapa jari tauka chara bukai. Kati betilit nasit tu amat ulih nulung kitai nemu pasal dudi hari? Enda. Aram kitai berundingka pekara tu.

Chara ti enda sama ke dikena orang ke nilit nasit ngasuh sida nyakal pangan diri. Taja pan sida ngena chara ti sama, utai ke dipadah sida mega enda sejalai. Ambika chunto, enti seiku orang nanya dua iku penilit nasit enggau tanya ti sebaka ngena daun terup ti sama, saut sida patut sebaka. Tang selalu iya, saut sida enda sebaka.

Chara tauka tuju orang ke betilit nasit ngereja tu udah ditemu. Orang ke mantah pengawa sida madah, daun terup tauka atau babi nya semina utai ngapa. Penilit nasit “macha” gaya orang ke betemu enggau iya. Iya enda begunaka utai ke dikena iya nilit nasit. Ambika chunto, penilit nasit ti landik meri jaku tanya lalu meratika saut enggau gaya tubuh orang ke betemu enggau iya. Tu ulih ngasuh iya nemu pasal orang nya. Pengudah nya, penilit nasit deka nerima basa laban udah nemu pasal orang ke datai nya. Ketegal orang ke datai pechaya ngagai sida, sekeda ari penilit nasit bulih mayuh duit.

UTAI KE DIPADAH BUP KUDUS

Pengawa astrologi enggau betilit nasit madahka pengidup kitai dudi hari endang udah ditentuka. Tang kati tu amat? Bup Kudus madahka kitai ulih milih utai ke dipechayaka tauka dikedekaka kitai. Tang pemutus ke digaga kitai bisi kaul enggau pengidup kitai dudi hari.—Josua 24:15.

Nembiak Petara patut nulak pengawa astrologi enggau betilit nasit laban Petara begedika semua pengawa nujum. Bup Kudus madahka: ‘Anang betilitka nasit, tauka beburung, tauka bedukun, tauka bemanang, tauka bekenaka pengaruh, tauka betanya ngagai antu, tauka betanya ngagai semengat orang ke udah mati. Laban TUHAN kita begedika orang ke ngereja utai ti jai baka nya.’ *Ulang Adat 18:10-12.

^ per. 16 Nitihka lambar Jaku Penerang ba Bup Kudus Baru, TUHAN ke disalin ba Bup Kudus nya Jehovah.