Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  November 2016

 TOPIK RANDAU | GENERA KE NERANGKA PASAL SEREGA

Tanya Pasal Sida ke di Serega

Tanya Pasal Sida ke di Serega

Kala nuan berunding pasal serega sereta pasal sida ke diau dia? Enti kala, nuan sama baka orang bukai. Pengelama beribu taun, orang deka nemu pasal utai tu. Sekeda orang pechaya, serega nya endur alai bala aki ini ke udah mati diau, lalu sida patut dipebasa. Sekeda agi ngambarka serega nya endur ke penuh pemaik, endur alai bala melikat sereta orang manah ke udah mati diau. Bisi mega ngumbai serega nya endur alai beratus juta iku petara diau.

Mayuh orang ngumbai, kitai enda ulih nemu sebarang utai pasal serega laban nadai orang ke kala datai ari endur nya madah ngagai kitai pasal serega. Taja pia, penemu ke baka tu salah. Jesus Kristus endang udah bisi di serega, sebedau iya datai ke dunya. Iya suah madahka utai tu ngagai bala tuai pengarap ba kurun keterubah: ‘Aku udah datai ari serega, ukai deka ngereja peneka aku empu, tang ngereja peneka Iya ke ngirumka aku.’ Jesus empu mega bekunsi penerang nya lebuh iya madah ngagai bala rasul iya: ‘Dalam rumah Apai aku mayuh bilik.’—John 6:38; 14:2.

Amat, Apai Jesus, ke benama Jehovah nya Petara, lalu “rumah” Jehovah nya di serega. (Masmur 83:18) Nya alai, nadai orang ke ulih nerangka pasal serega enggau manah agi enti dibanding enggau Jehovah sereta Jesus Kristus. Seduai iya udah mandangka mayuh penerang pasal serega nengah genera ti ngalitka ati ke diberi seduai iya ngagai orang ke tetap ati.

Artikel pengudah tu deka berandauka sekeda ayat Bup Kudus ke nerangka utai ti dipeda mensia dalam sekeda genera. Seraya nuan beratika genera nya, kingatka, serega nya ukai utai ti nyengala, utai ke ulih ditegu tauka dipeda. Nya alai, ari ke nerangka genera nya ngena chara ke semina ditemu bala melikat, Petara nerangka genera nya ngena chara ke ulih dimeretika kitai kena nunjukka baka ni gaya utai ba serega. Genera nya deka nulung nuan nemu sapa ke diau dalam “mayuh bilik” di serega.