Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  November 2016

Sida Ngelepaska Diri Ari Pengarap Pelesu

Sida Ngelepaska Diri Ari Pengarap Pelesu

“Pansut ari iya, kita ke nembiak Aku.”—PEM. 18:4.

LAGU: 107, 93

1. Baka ni kitai nemu nembiak Petara deka dilepaska ari Babilon ti Besai, lalu nama tanya ke deka disaut kitai?

BA ARTIKEL sebedau tu, kitai udah belajar pasal orang Kristian ke tetap ati ke nyadi orang tangkap ba Babilon ti Besai. Utai ke manah nya, sida enda nyadi orang tangkap belama iya. Kitai nemu pasal tu laban dalam Bup Kudus, Petara ngasuh nembiak Iya “pansut ari” penguasa pengarap pelesu di serata dunya. (Bacha Pemandang 18:4.) Tu nunjukka orang Kristian deka dilepaska ari Babilon ti Besai. Kitai keran deka nemu ni maya iya! Tang keterubah iya, kitai patut nyaut tanya tu: Nama utai ke keran deka digaga Nembiak Bup Kudus pasal Babilon ti Besai indah sebedau taun 1914? Naka ni pengeransing bala menyadi Kristian kitai ba pengawa nginjil maya Perang Dunya l? Kati nembiak Petara nyadi orang tangkap ba Babilon maya nya ketegal sida patut dikemetulka?

“PENGELABUH BABILON”

2. Nama deka digaga Nembiak Bup Kudus rebak ti keterubah indah sebedau Perang Dunya I?

2 Betaun-taun sebedau Perang Dunya I (1914-1918), Charles Taze Russell enggau Nembiak Bup Kudus ke bukai nemu,  Gerempung Gerija enda ngajar pemendar ari Bup Kudus. Nya alai, sida enggai bisi kaul enggau pengarap pelesu. Indah ba taun 1879, Zion’s Watch Tower madahka, tiap iti gerija ke ngaku diri nyadi pengantin indu ti taluk ngagai Kristus, tang nyukung bala perintah, iya endang sebegian ari Babilon ti Besai ke dikumbai Bup Kudus indu sundal.—Bacha Pemandang 17:1, 2.

3. Nama digaga Nembiak Bup Kudus kena nunjukka diri ukai agi nyadi sebegian ari pengarap pelesu? (Peda gambar ba pun artikel.)

3 Bala lelaki enggau indu ke tetap ati nemu, enti sida majak nyukung pengarap pelesu, Petara enda merekatka sida. Nya alai, mayuh ari bala sida nganjung surat ngagai gerija madahka diri enggai agi nyadi raban gerija. Sekeda indah macha surat sida enggau nyawa ti inggar ngagai semua raban ba gerija. Enti macha surat nya enda dikemendarka, sida nganjung surat nya ngagai tiap iku raban gerija sida. Nembiak Bup Kudus enggau terang nunjukka sida enggai bisi kaul enggau pengarap pelesu! Betaun sebedau tu, sida engka dibunuh enti ngereja tu. Tang ba taun 1870, bala perintah ba mayuh menua enda entu nyukung gerija baka ke udah. Diatu orang ulih bibas bejaku pasal Bup Kudus tauka enda besetuju enggau pekara ke bekaul enggau gerija.

4. Maya Perang Dunya I, nama penemu Nembiak Bup Kudus pasal Babilon ti Besai? Terangka.

4 Nembiak Bup Kudus nemu, endang enda chukup enti sida madahka diri enda agi nyukung pengarap pelesu ngagai diri sebilik, kawan rapat, tauka raban ba gerija. Sida deka serata dunya nemu, Babilon ti Besai nya pengarap ti nyundal! Nya alai entara bulan Disember 1917 enggau pun taun 1918, Nembiak Bup Kudus ke semina beberapa ribu iku aja enggau ransing nyadung 10,000,000 iti surat mit ke ngembuan artikel ke betajuk “Pengelabuh Babilon.” Surat mit nya enggau ngengerang mantaika utai ke amat pasal Gerempung Gerija. Baka ke disadang, bala tuai pengarap gerija balat pedis ati! Tang Nembiak Bup Kudus enda badu. Sida keran deka terus nginjil sereta ngasika ‘Petara, ukai ngasika mensia.’ (SKR. 5:29) Tu nunjukka nama? Tu nunjukka maya Perang Dunya I, orang Kristian ke lelaki enggau indu tu enda nyadi orang tangkap; tang iya ke amat, sida benung ngelepaska diri ari pengarap pelesu sereta nulung orang bukai ngereja utai ti sama.

PENGERANSING MAYA PERANG DUNYA I

5. Nama kebuah kitai ngumbai bala menyadi Kristian bisi pengeransing maya Perang Dunya I?

5 Suba, kitai ngumbai nembiak Jehovah enda diterima Iya maya Perang Dunya I laban sida enda nginjil enggau ransing. Ketegal tu, kitai ngumbai Jehovah udah ngemendarka Babilon ti Besai nangkap sida enda lama. Taja pia, bala menyadi Kristian lelaki enggau indu ke tetap ati nyembah Petara entara taun 1914 enggau 1918 udah nya madahka, semua sida ngereja nama-nama utai enggau naka ulih ngambika ulih terus nginjil. Penemu ke terang agi pasal utai ke nyadi ba Nembiak Bup Kudus maya nya nulung kitai meretika sekeda pekara ke disebut ba Bup Kudus.

6, 7. (a) Nama penanggul ke ditapi Nembiak Bup Kudus maya Perang Dunya I? (b) Nama nunjukka Nembiak Bup Kudus nya amat bisi pengeransing?

6 Amat, maya Perang Dunya I, Nembiak Bup Kudus amat kisuk nginjil. Tang sida mega napi sekeda penanggul. Aram kitai beratika dua iti ari penanggul nya. Penanggul kesatu, Nembiak Bup Kudus bedau belajarka chara nginjil ngena Bup Kudus aja. Sida teleba nyadung bup sereta ngawakka litaricha nerangka pemendar ari Bup Kudus. Nya  alai, lebuh bup The Finished Mystery enda dikemendarka perintah ba pun taun 1918, mayuh bala menyadi Kristian tusah bejalaika pengawa nginjil. Penanggul kedua, ba taun ti sama penyakit renga Sepanyol berengkah. Penyakit ti raya tu jampat amat ngelekai, lalu bala menyadi Kristian tusah deka mindah sereta nginjil. Taja pan napi penanggul tu, bala Nembiak Bup Kudus enggau naka ulih neruska pengawa nginjil.

Nembiak Bup Kudus ke amat bisi pengeransing! (Peda genteran 6, 7)

7 Ba taun 1914, raban Nembiak Bup Kudus ke mit nya mandangka “Photo-Drama of Creation.” Cherita tu ke ngena slide sereta gambar enggau bunyi, nya utai ti baru maya nya. Photo-Drama tu madahka cherita pasal mensia, berengkah ari pengawa nempa Adam nyentuk ngagai pengujung Perintah Kristus. Ba taun 1914, taun keterubah iya dipandangka, lebih ari 9,000,000 iku orang udah meda iya. Pikirka. Penyampau nya mayuh agi ari penyampau Saksi-Saksi Jehovah ke bisi di serata dunya kemaya hari tu! Riput bukai nunjukka, ba taun 1916, lebih ari 809,000 iku orang datai begempuru ba Amerika Serikat, lalu ba taun 1918, penyampau tu nyauka nambah ngagai 950,000 iku. Nembiak Bup Kudus nya amat bisi pengeransing!

8. Baka ni bala menyadi Kristian lelaki ke ngiring ngeringka Nembiak Bup Kudus maya Perang Dunya I?

8 Maya Perang Dunya I, bala menyadi Kristian lelaki ke ngiring bebendar nyediaka litaricha Bup Kudus sereta meri peransang ngagai semua Nembiak Bup Kudus. Sukung ti bepengerindu nya ngeringka sida ngambika terus nginjil. Richard H. Barber, seiku penginjil ke ransing maya nya, madahka: “Kami mujur ngetanka sekeda tuai ti ngabas bejalaika pengawa sida, lalu majalah The Watch Tower agi ulih disadung sereta dianjung ngagai menua Kanada ke alai iya enda dikemendarka.” Ku iya nambah: “Aku bisi peluang ngirumka bup The Finished Mystery ke mesai sais kuchik baju ngagai sekeda bala kawan ke nadai bup nya  agi ketegal dirampas perintah. Menyadi Rutherford minta kami ngatur gempuru besai ba sekeda nengeri di Amerika Serikat barat, sereta nganjung sekeda pencheramah kena meransang bala kawan.”

SEKEDA PEKARA PATUT DIKEMETULKA

9. (a) Nama kebuah nembiak Petara patut ngemetulka sekeda pekara entara taun 1914 enggau 1919? (b) Taja pan sida patut ngemetulka sekeda pekara, nama runding ke enda tau bisi ba kitai?

9 Bisi pekara ke agi patut dikemetulka Nembiak Bup Kudus. Sida enda entu nemu nama reti nya lebuh Jehovah ngasuh sida ngasika bala perintah. (Rom. 13:1) Nya kebuah semua sida enda ulih seruran neutral maya bisi perang. Ngambika chunto, lebuh presiden Amerika Serikat ngasuh orang besampika pemaik kena 30 Mei 1918, The Watch Tower mega meransang Nembiak Bup Kudus besampi. Sekeda bala menyadi Kristian meri duit pemeri kena nyukung perang, lalu beberapa iku ari sida indah nyadi soldadu sereta enggau beperang. Tang, taja pan sida patut ngemetulka sekeda pekara, ukai reti nya kitai tau ngumbai tu meh kebuah sida ditaban nyadi orang tangkap ngagai Babilon ti Besai. Iya ke amat, sida nyauka nadai agi kaul enggau penguasa pengarap pelesu di serata dunya maya Perang Dunya I.—Bacha Luke 12:47, 48.

10. Baka ni Nembiak Bup Kudus nunjukka diri bebasaka nyawa?

10 Amat, Nembiak Bup Kudus endang enda entu nemu nama reti nya orang Kristian patut neutral. Tang sida nemu, munuh orang endang salah. Nya alai, beberapa iku menyadi Kristian lelaki ke nyadi soldadu sereta mai senyata maya Perang Dunya I enggai ngena senyata munuh orang bukai. Sekeda ke enggai munuh orang dianjung ba rintai ti di mua maya beperang ngambika sida mati dibunuh.

11. Nama digaga bala perintah lebuh Nembiak Bup Kudus enggai ngena senyata maya beperang?

11 Sitan pedis ati laban bala menyadi Kristian lelaki nya taluk ngagai Petara. Ketegal tu, Sitan “ngaga atur ti jai lalu ngumbai atur nya betul.” (Mas. 94:20) Seiku jeneral Soldadu Amerika Serikat ke benama James Franklin Bell madah ngagai Menyadi Rutherford enggau Van Amburgh, pasal perintah ke nguji ngaga siti atur baru ti deka ngemendarka pengawa ukum bunuh dipejalaika ba orang ke enggai ngena senyata maya beperang. Kelebih agi, utai ku iya nya dituju ngagai Nembiak Bup Kudus. Jeneral nya enggau pedis ati madah ngagai Menyadi Rutherford, atur nya bedau ulih dipejalaika laban presiden Amerika Serikat enda ngemendarka atur nya. Udah nya ku jeneral nya madah: “Tang kami nemu chara nangkap nuan, lalu kami deka ngereja nya!”

12, 13. (a) Nama kebuah lapan iku menyadi Kristian lelaki nya diukum jil lama? (b) Kati diukum jil nya ngasuh sida lenyau pengeran deka ngasika Jehovah? Terangka.

12 Pengujung iya, perintah tetemuka siti chara kena ngukum Nembiak Bup Kudus. Menyadi Rutherford enggau Van Amburgh, nyengkaum enam iku ke bukai ke sama ngarika Watch Tower Society, ditangkap. Hakim ke ngatur kes nya madahka, bala menyadi Kristian lelaki nya balat agi mai penusah ari siti batalion soldadu Jerman. Iya madahka sida udah ngemediska ati perintah, bala soldadu enggau semua gerija, lalu sida patut diukum enggau berat. Nya alai, lapan iku Nembiak Bup Kudus nya diukum jil lama ba Atlanta, Georgia. Taja pia, pengudah perang, sida dilepaska lalu kes sida dibuai.

13 Indah lebuh sida lapan dalam rumah jil, sida keran deka ngasika adat Petara. Baka ni kitai nemu tu? Sida nulis surat ngagai presiden Amerika Serikat minta dilepaska ari rumah jil. Ba surat nya, sida madahka Bup Kudus enda ngasuh kitai munuh orang. Nya  alai, barang sapa ke udah nyerahka diri ngagai Petara tang sengaja enggai ngasika Iya, orang nya enda diterima Iya sereta deka dipunaska. Sida madahka, tu meh kebuah sida enda tauka enggai munuh orang bukai. Sida berani amat nulis utai ke baka tu ngagai presiden! Tu nunjukka bala menyadi Kristian lelaki nya amat keran deka ngasika Jehovah.

PENGUJUNG IYA NEMBIAK PETARA ULIH LEPAS!

14. Ngena ayat Bup Kudus, terangka utai ke nyadi ari taun 1914 nyentuk ngagai taun 1919.

14 Malaki 3:1-3 nerangka utai ke nyadi ba Nembiak Bup Kudus entara taun 1914 enggau pun taun 1919. (Bacha.) Petara Jehovah, Tuan ti bendar, enggau Jesus Kristus, seruan sempekat, datai meresa “peturun Lewi,” ke ngarika orang ke diiri ngena roh kudus. Pengudah Jehovah ngemetulka sereta nuchi sida, sida deka sedia nerima siti pengawa ti baru. Ba taun 1919, Jesus milih “ulun ke tetap ati sereta bepenemu-dalam,” ke diasuh ngiring sereta ngajar semua nembiak Petara. (Mat. 24:45) Pengujung iya, nembiak Petara lepas ari Babilon ti Besai. Kenyau ari nya, sida udah belajar mayuh agi pasal peneka Petara, lalu pengerindu sida ngagai Iya majak dalam. Sida amat beterima kasih ke berekat ari Iya! [1]—Peda nota penutup.

15. Baka ni kitai ulih nunjukka diri beterima kasih laban udah dilepaska ari Babilon ti Besai?

15 Kitai amat beterima kasih laban udah dilepaska ari Babilon ti Besai. Sitan enda ulih ngerusak sembah ti bendar. Iya enda mujur! Taja pia, kitai patut ingatka kebuah Jehovah ngelepaska kitai. Tuju Iya nya, dekaka semua orang diselamatka. (2 Kor. 6:1) Tang pengarap pelesu agi bekuasa atas bejuta iku orang ke lurus ati, lalu sida begunaka tulung ari kitai! Aram meh kitai ngereja nama-nama utai enggau naka ulih ngambika ulih neladan bala menyadi Kristian lelaki kitai ke tetap ati, ke nulung orang ngulihka pengelepas.

^ [1] (genteran 14) Bisi mayuh utai ke sama entara orang Judah ke ditaban nyadi orang tangkap ba Babilon sereta enggau utai ke nyadi ba orang Kristian pengudah pengarap Kristian ke limpang berengkah. Taja pia, kitai enda ulih ngumbai orang Judah ke ditangkap nandaka utai ti nyadi ba orang Kristian ke diiri ngena roh kudus. Nya alai, kitai enda patut nguji deka ngiga reti tiap iti utai ke dipadah nya enggau silik. Tang bisi sekeda utai ke enda sebaka. Siti chunto nya, orang Judah nyadi orang tangkap pengelama 70 taun, tang orang Kristian lama agi nyadi orang tangkap.