Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Praslin, Seychelles, nya endur alai Jeneral Gordon tetemuka Kebun Eden ba taun 1881

Paradais ba Dunya​​—Mimpi tauka Amat?

Paradais ba Dunya​​—Mimpi tauka Amat?

Paradais! Meda tempat ti manah dalam majalah tauka ba TV ngasuh kitai deka ngagai “paradais” ti jauh ngambika ulih belelak sereta enda mikirka semua pengirau sereta penanggul ke ditapi kitai. Tang baka ke ditemu kitai, pengudah pulai ari raun, pengidup kitai agi baka selama.

Taja pia, kitai berasai gaga ati lebuh mikir pasal dunya ti manah tauka baka paradais. Tang kati dunya ulih nyadi paradais? Tauka tu semina mimpi aja?

PARADAIS TI ASAL

Beratus taun orang bisi ati deka nemu pasal paradais. Sida deka nemu laban Bup Kudus bisi nyebut pasal “siti kebun di menua Eden, ti muak ke timur.” Nama utai ke ngasuh kebun nya balat narit ati? Bup Kudus madahka: ‘Jehovah Petara ngasuh semua bansa kayu ti manah dipeda sereta manah ke pemakai.’ Kebun nya tempat ti manah sereta ngerinduka ati. Utai ke pemadu narit ati ari semua, iya nya “ba tengah-tengah kebun nya bisi mega sepun kayu pengidup.”​​​—⁠Pemungkal 2:​8, 9.

Nambahka nya, ayat ba bup Pemungkal nyebut pasal empat pati sungai ke rarat ari kebun nya. Dua ari pati sungai nya agi dikelala kitai nyentuk ke sehari tu​​​—⁠Tigris (tauka, Hidekel) sereta Eupratis. (Pemungkal 2:​10-​14) Dua pati sungai tu rarat ngagai Teluk Persia mansa siti menua ke dikumbai Iraq diatu, ke kala dipegai menua Persia menya.

Reti nya, paradais ba dunya nyadi pesaka asal Persia. Siti kapet Persia ari abad ke-16 ke bisi ba Philadelphia Museum of Art, di Pennsylvania, U.S.A., ke mandangka siti kebun bedinding ti ditenun ngambarka pun kayu sereta bungai. Reti leka jaku “kebun ti bedinding” dalam jaku Persia nya “paradais,” lalu rampa menua atas kapet nya ngambarka utai ti dipadah Bup Kudus pasal pemanah sereta pengami Kebun Eden.

Indah cherita pasal paradais bisi ditusui dalam mayuh bansa jaku sereta adat di serata dunya. Lebuh ruang bilik mensia pindah ngagai mayuh endur bukai ba dunya, sida mai cherita asal bansa sida empu ke alai pengudah lebih beratus taun, cherita sida bechampur enggau utai ti dipechaya sereta ensera ke bisi ba menua nya empu. Indah diatu, nyauka semua orang ngambarka rampa menua ti manah baka paradais.

NGIGA PARADAIS

Sekeda pematau menua ngumbai diri udah tetemuka paradais ti lenyau nya. Ngambika chunto, Charles Gordon, seiku jeneral soldadu bansa British nemuai ngagai nengeri Seychelles ba taun 1881. Iya balat alit ati enggau pemanah Vallée de Mai​—diatu nyadi palan Pesaka Dunya​—lalu ngumbai endur nya Kebun Eden. Ba taun 1492, seiku orang ke mai kapal bansa Itali, Christopher Columbus, berunding sekalika iya nyau udah tetemuka Kebun Eden lebuh iya sangkai ba pulau Hispaniola, diatu dikumbai Republik Dominika sereta Haiti.

Mapping Paradise, siti bup sejarah moden ke ngundan penerang pasal lebih ari 190 iti kar menya, lalu mayuh ari kar nya nunjukka Adam seduai Hawa ba Kebun Eden. Siti kar ti nyelai ari iya ke bukai bisi ba manuskrip Beatus of Liébana ari abad ke-13. Ba atas kar nya bisi segi empat genap ti mit enggau gambar paradais di tengah-tengah. Ari paradais nya, empat pati sungai rarat ke dikelai “Tigris,” “Eupratis,” “Indus,” enggau “Jordan,” tiap pati sungai nya nuju ngagai empat sukut, engka ngambarka pengerembai ajar Kristian ngagai empat sukut dunya. Utai ti diterang nunjukka, taja pan Paradais ti asal nya enda ditemu endur, cherita ti dipeturun ari siti serak ngagai siti serak nunjukka mensia agi rinduka pemanah ke bisi ba Paradais.

 John Milton, seiku bansa English ke landik bepantun ba abad ke-17, tebilang enggau pantun Paradise Lost, ke bepelasarka cherita ba bup Pemungkal pasal dosa Adam sereta iya ke diburu ari Kebun Eden. Dalam pantun nya, Milton madah pasal semaya mulaika baru pengidup ti meruan belama iya ba dunya ke mensia, lebuh iya nyebut: “Maya nya serata dunya deka nyadi paradais.” Udah nya, iya nulis tampung pantun nya lalu dikumbai iya Paradise Regained.

ENDA DIKEIBUHKA AGI

Sepemanjai sejarah mensia, cherita pasal dunya paradais ti lenyau amat narit ati orang. Tang nama kebuah cherita nya diatu enda dikeibuhka? Tu ketegal, baka ke diperatika bup Mapping Paradise, “bala pakar jalai pengarap . . . sengaja enda ibuhka isu ke bekaul enggau tempat paradais.”

Mayuh orang ke ngagai gerija udah diajar, pengidup ba serega ke patut digiga sida, ukai pengidup ba dunya paradais. Tang ba Masmur 37:​29, Bup Kudus madahka: “Orang ke lurus deka bempu menua tu [dunya] lalu diau ditu belama iya.” Ketegal dunya kitai kemaya hari tu ukai paradais, nama nunjukka semaya nya deka dikeamatka?

PARADAIS DI SERATA DUNYA DEKA DIKEAMATKA

Petara Jehovah, ke nempa Paradais ti asal, udah besemaya deka mulaika baru paradais ti udah lenyau. Baka ni? Kingatka, Jesus ngajar kitai besampi: “Datai meh Perintah Nuan. Nyadi meh peneka Nuan di dunya enggau di serega.” (Matthew 6:​10) Perintah Petara nya siti perintah ba dunya ke dipegai Jesus Kristus lalu Perintah nya deka nganti semua perintah mensia. (Daniel 2:​44) Di baruh Perintah nya, peneka Petara bekaul enggau dunya paradais deka “nyadi.”

Dulu agi ari tu, nabi Isaiah diiring ulih roh kudus ngambika nerang gaya Paradais ti disemaya. Semua pengirau enggau laya ke ninggang mensia kemaya hari tu deka nadai agi. (Isaiah 11:​6-9; 35:​5-7; 65:​21-​23) Kami meransang nuan meri awak ngagai diri empu macha ayat nya dalam Bup Kudus nuan empu. Ngereja nya deka ngasuh nuan andalka utai ti udah disemaya Petara ke mensia ti ngasi. Lalu orang ke idup deka bulih utai ti dilenyauka Adam, iya nya diau di paradais sereta diterima Petara.​​—⁠Pemandang 21:⁠3.

Nama kebuah kitai ulih pechayaka semaya pasal Paradais ba dunya nya ukai semina mimpi aja tang amat? Laban Bup Kudus madahka: ‘Serega endang enggi Jehovah siku aja, tang Iya meri dunya ngagai kitai mensia.’ Pengadang pasal Paradais ba dunya nya ‘udah disemaya Petara (Petara enda kala bula) kenyau ari sebedau penumbuh dunya.’ (Masmur 115:16; Titus 1:⁠2) Naka meh pemanah semaya ti diberi Bup Kudus, iya nya Paradais belama iya!