Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  No. 1 2017

Elias Hutter enggau Bup Kudus Jaku Hebrew Iya

Elias Hutter enggau Bup Kudus Jaku Hebrew Iya

ULIH nuan macha jaku Hebrew maya jeman Bup Kudus? Tentu enda ulih. Nuan engka enda kala meda Bup Kudus jaku Hebrew. Taja pia, nuan tentu deka agi beterima kasihka Bup Kudus nuan empu pengudah belajarka sekeda utai pasal seiku pakar ba abad ke-16 ke benama Elias Hutter enggau dua iti Bup Kudus jaku Hebrew ke dikeluarka iya.

Elias Hutter ada ba taun 1553 di Görlitz, siti nengeri mit semak adan menua Jerman enggau menua Poland sereta Republik Czech kemaya hari tu. Hutter belajarka sekeda bansa jaku ari menua timur tengah ba Universiti Lutheran di Jena. Lebuh umur iya 24 taun, iya dichiri nyadi profesor jaku Hebrew di Leipzig. Laban iya deka ngemanahka bidang pelajar, nya alai udah nya iya numbuhka siti sekula di Nuremberg ke alai pelajar ulih belajarka jaku Hebrew, Gerika, Latin, sereta German dalam timpuh empat taun. Maya nya pengawa tu enda ulih digaga ba sekula tauka universiti bukai.

“PEMANAH EDISI TU”

Lambar keterubah Bup Kudus jaku Hebrew ari Hutter ba taun 1587

Ba taun 1587, Hutter ngeluarka Sempekat Lama dalam edisi jaku Hebrew. Edisi tu betajuk Derekh ha-Kodesh, ke diambi ari Isaiah 35:8 lalu reti iya “Jalai Raya Ngagai Pengudus [“Jalai Pengudus,” NW].” Pemanah urup ke dikena meransang orang nyebut “semua utai mandangka pemanah edisi tu.” Tang utai ke ngasuh Bup Kudus tu kelebih agi berega iya nya bala pelajar ulih ngena iya nyadika perengka dikena belajarka jaku Hebrew.

Kena nemu kebuah Bup Kudus jaku Hebrew Hutter nya beguna bendar, peratika dua iti penanggul ke ditapi orang ke deka belajar macha Bup Kudus dalam jaku Hebrew. Kesatu, Bup Kudus nya ngena urup ke enda entu dikelala, lalu kedua, jaku penambah ngasuh urat jaku tusah dikelala. Ngambika chunto, peratika leka jaku Hebrew נפשׁ (ke disalin ngagai ne’phesh), reti iya “nyawa.” Ba Esekiel 18:​4, leka jaku nya ngembuan penambah pun jaku ה (ha), lalu nyadi jaku turu הנפשׁ (han·ne’phesh). Ba orang ke baru belajar, leka jaku הנפשׁ (han·ne’phesh) enggau נפשׁ (ne’phesh) utai ti amat enda sebaka.

 Kena nulung bala pelajar, Hutter ngena chara nyelak ti pintar​​—⁠tiap iti urat jaku dichelak iya ngena urup chelum tebal, lalu penambah jaku dichelak ngena urup ngeruang. Chara tu ngemuntangka bala pelajar ngelala urat jaku dalam jaku Hebrew, lalu nulung sida jampat agi belajarka bansa jaku nya. New World Translation of the Holy Scriptures​​—With References pan ngena chara ti sama ba nota kaki.

EDISI “SEMPEKAT BARU” DALAM JAKU HEBREW

Hutter mega nyelak edisi Sempekat Baru dalam 12 iti bansa jaku. Edisi tu dikeluarka di Nuremberg kena taun 1599, lalu suah dikumbai Nuremberg Polyglot. Hutter deka edisi nya nyengkaum Bup Kudus Kristian jaku Gerika ke disalin ngagai jaku Hebrew. Tang iya madahka taja pan iya “sanggup mayar rega ti tinggi” ke edisi jaku Hebrew nya, salin nya enda ulih digiga. * Nya alai iya nyalin Sempekat Baru ari jaku Gerika ngagai jaku Hebrew kediri empu. Hutter udah ngena mayuh jam enggau pengering, lalu nembuka projek nyalin nya dalam kandang setaun aja!

Ni pemanah Sempekat Baru jaku Hebrew ke disalin Hutter? Peratika utai ti ditulis seiku pakar jaku Hebrew ke benama Franz Delitzsch ba abad ke-19: “Bup Kudus jaku Hebrew ke disalin iya nunjukka iya bisi penemu ti manah ba jaku Hebrew, utai ke amat jarang ba orang Kristian maya nya lalu salin ke digaga iya nya ulih dikena belajar, laban leka jaku ke dikena iya betul.”

ASIL TI MERUAN

Utai ke disalin Hutter enda ngayaka iya. Nya nunjukka salin ke digaga iya enda laku. Taja pia, pengawa ke digaga iya beguna bendar sereta meri asil ti besai nyentuk ke diatu. Ngambika chunto, Sempekat Baru jaku Hebrew ke disalin iya diaduka baru sereta dichelak baru ulih William Robertson ba taun 1661, lalu sekali agi ulih Richard Caddick ba taun 1789. Lalu lebuh Hutter nyalin ari Sempekat Baru jaku Gerika, iya ngena gelar Kyʹri·os (Tuan) enggau The·osʹ (Petara), lalu “Jehovah” (יהוה, JHVH) enti teks nya diambi ari Bup Kudus jaku Hebrew tauka enti Hutter ngasaika gelar nya dituju ngagai Jehovah. Tu ngalitka ati laban mayuh salin Sempekat Baru enda ngena nama Petara, tang salin ke digaga Hutter nunjukka nama Petara patut ditepu dalam Bup Kudus Kristian jaku Gerika.

Lebuh nuan tetemuka nama Petara, Jehovah, dalam Bup Kudus Kristian jaku Gerika dudi hari, kingatka pengawa ke digaga Elias Hutter sereta Bup Kudus jaku Hebrew iya.

^ per. 9 Reti nya, bisi orang bukai ke udah nyalin Sempekat Baru ngagai jaku Hebrew. Seiku ari sida nya Simon Atoumanos, ba taun 1360. Seiku agi Oswald Schreckenfuchs, seiku pakar bansa Jerman ba taun 1565. Salin ke digaga seduai iya enda kala dikeluarka lalu diatu salin nya udah lenyau.