Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Nama Penguntung ke Diulih ari Belajar Pasal Petara?

Nama Penguntung ke Diulih ari Belajar Pasal Petara?

Dalam majalah tu, kitai udah belajarka sekeda utai ke nulung kitai nyaut tanya, Sapa Petara? Ari Bup Kudus kitai nemu nama Iya, Jehovah, lalu kualiti Iya ti nyulut nya pengerindu. Kitai mega beratika utai ti udah digaga enggau ti deka digaga Iya ke penguntung mensia. Taja pan bisi mayuh utai dipelajarka pasal Petara, tang nuan engka berunding baka ni nuan deka bulih penguntung enti belajar mayuh agi.

Jehovah besemaya “enti nuan mansang ngagai Iya, Iya deka nyambut nuan.” (1 Bansa Israel 28:9) Uji gambarka pemeri berega ti deka diulih nuan lebuh nuan ngiga lalu ngelala Petara—nuan ‘nyadi pangan’ Iya! (Masmur 25:14) Nama penguntung enti ulih nyadi pangan Iya?

Pengelantang ti bendar. Bup Kudus madahka Jehovah nya ‘Petara ti beberekat,’ tauka Petara ti gaga ati. (1 Timoti 1:11) Semak ngagai Jehovah sereta nitihka jalai Iya deka ngenataika pengelantang ti bendar. Tu manah ke emosi, runding, enggau tubuh nuan. (Masmur 33:12) Nuan mega ulih idup lantang lebuh Iya ngajar nuan nyeliahka chara idup ke enda manah, ngemansangka tebiat ti manah, sereta ngetanka kaul ti manah enggau orang bukai. Nuan tentu deka besetuju enggau utai ke disebut pemasmur: ‘Naka meh pengelantang aku diau semak Petara.’—Masmur 73:28.

Iya ibuh sereta beratika kitai. Jehovah besemaya ngagai nembiak Iya: “Aku deka ngajar sereta meri nuan jaku lalau.” (Masmur 32:8) Reti nya Jehovah Empu ibuhka nembiak Iya seiku-seiku lalu nyediaka utai nitihka diguna sida seiku-seiku. (Masmur 139:1, 2) Enti nuan udah nyadi pangan Jehovah, nuan deka ngasaika Iya seruran enggau nuan.

Pengidup ti manah jemah ila. Kelimpah ari nulung nuan ngembuan pengidup ti lantang sereta ngemuaska ati diatu, Petara Jehovah mega nulung nuan bulih pengidup ti manah ke jemah ila. (Isaiah 48:17, 18) Bup Kudus madahka: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ (John 17:3) Ba maya ti tusah tu, pengidup ti meruan belama iya ke disemaya Petara nulung kitai “tegap” baka sauh.—Hebrew 6:19.

Tu sekeda ari kebuah ke nulung kitai ngelala Petara, lalu ngemansangka kaul enggau Iya. Enti deka nemu mayuh agi, nuan tau berandau enggau Saksi-Saksi Jehovah tauka ngelawa jw.org/iba.