Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2016

 TOPIK RANDAU | NAMA KEBUAH PATUT LURUS?

Baka Ni Pengawa ke Enda Lurus Ngenusahka Nuan

Baka Ni Pengawa ke Enda Lurus Ngenusahka Nuan

“Mayuh penanggul ulih diputarka ngena pengawa enda lurus ke mit.” —Samantha, Afrika Selatan.

Kati nuan setuju enggau jaku nya? Baka Samantha, kekadang kitai bisi napi penanggul. Lebuh kitai mutarka penanggul ngena pengawa ke enda lurus, tu ulih nunjukka ni bagi utai ti dikemeratka kitai. Ngambika chunto, ketegal enggai malu, kitai engka ngumbai pengawa ke enda lurus nya enda salah. Tang udah nya, enti kitai ditemu orang ngereja pengawa ke enda lurus, tu ulih ngenusahka kitai. Peratika pekara di baruh tu.

PENGAWA KE ENDA LURUS NGASUH ORANG ENDA ARAPKA KITAI

Kaul ti manah bepun ari arapka pangan diri. Lebuh dua iku orang arapka pangan diri, sida berasai selamat sereta likun. Tang kitai begunaka awak kena arapka pangan diri. Orang berengkah arapka pangan diri lebuh sida meri awak begulai enggau pangan diri, enda bula sereta enda berundingka diri empu. Taja pia, arapka pangan diri tu ulih rusak, ketegal siti aja pengawa ke enda lurus. Lalu lebuh orang enda agi arapka kitai, kitai tusah deka ngasuh sida arapka kitai baru.

Kati nuan kala dikemulaka orang ke dikumbai nuan kawan ti manah? Enti kala, baka ni asai ati nuan? Nuan tentu balat pedis ati sereta berasai dikeduan. Tu ulih dimeretika. Endang amat, pengawa ke enda lurus ulih ngerusak kaul ti berega.

PENGAWA KE ENDA LURUS ULIH BERAMPIT

Siti pansik ari Robert Innes, seiku profesor ekonomi ba Universiti California nunjukka, “pengawa ke enda lurus endang ulih berampit.” Nya alai, pengawa ke enda lurus ulih disamaka enggau virus—suah agi nuan begulai enggau orang ke udu nipu, peluang nuan deka kena “rampit” pengawa ke enda lurus pan besai agi.

Baka ni nuan ulih nyeliahka diri ari deka ngereja pengawa ke enda lurus? Bup Kudus ulih nulung nuan. Peratika meh sekeda prinsip ari Bup Kudus.