Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2016

Aram Meh Kitai “Majak Rinduka Diri Menyadi Dalam Kristus”!

Aram Meh Kitai “Majak Rinduka Diri Menyadi Dalam Kristus”!

Majak rinduka diri menyadi dalam Kristus.”—HEB. 13:1.

LAGU: 72, 119

1, 2. Nama kebuah Paul nulis surat ngagai orang Kristian Hebrew?

KENA taun 61, orang Kristian ba Israel ngasaika pemaik. Taja pan rasul Paul dijil ba Rome, tang iya ngarapka diri ulih jampat dilepaska. Timoti, kaling ke enggau iya bejalai jauh baru udah dilepaska ari jil, lalu seduai iya ngarapka diri ulih nemuai ngagai bala menyadi Kristian ba menua Judea. (Heb. 13:23) Taja pia, dalam kandang lima taun, orang Kristian ba menua Judea, kelebih agi sida ke diau ba nengeri Jerusalem patut besedia ngerarika diri. Nama kebuah? Dulu agi ari nya, Jesus udah madah ngagai bala murid iya, lebuh sida meda nengeri Jerusalem dikelulung bala soldadu, sida enda tau enda rari.—Luk. 21:20-24.

2 Jesus meri jaku tangkan nya ngagai bala murid iya 28 taun ti udah. Maya nya, orang Kristian ba Israel mengkang tetap ati taja pan napi mayuh pemerinsa enggau penguji. (Heb. 10:32-34) Tang Paul deka nulung sida besedia enggau utai ti deka nyadi dudi hari ila. Sida deka ngasaika siti ari penguji ti pemadu besai ke nguji pengarap sida. (Mat. 24:20, 21; Heb. 12:4) Sida deka begunaka ati ti liat sereta pengarap ke tegap agi ari ke udah ngambika ulih ngasika jaku tangkan Jesus ke ngasuh sida ngerarika diri, lalu pengidup sida bepanggai ba utai tu. (Bacha Hebrew 10:36-39.) Nya alai, Jehovah ngasuh Paul nulis surat ngagai bala menyadi Kristian ti dikesayau nya. Surat nya, ke dikumbai bup Hebrew diatu, ditulis  kena ngeringka pengarap sida ngambika ulih napi utai ti deka nyadi.

3. Nama kebuah kitai patut nemu utai ti dipadah ba bup Hebrew?

3 Kitai ke nyadi nembiak Petara kemaya hari tu patut nemu utai ti dipadah ba bup Hebrew. Nama kebuah? Laban kitai napi utai ti sama baka orang Kristian ba menua Judea. Kitai idup “ba hari ti penudi mayuh macham penusah,” lalu mayuh ari bala kitai udah enggau tetap ati natka penguji tauka pemerinsa ti balat. (2 Tim. 3:1, 12) Tang, mayuh ari kitai ngasaika pemaik sereta nadai diperinsa. Nya alai, baka orang Kristian maya jeman Paul, kitai patut bejaga. Nama kebuah? Enda lama da agi, kitai deka ngasaika penguji ti pemadu besai ke nguji pengarap kitai!—Bacha Luke 21:34-36.

4. Nama ayat taun 2016, lalu nama kebuah iya tau dikena?

4 Nama ulih nulung kitai besedia napi utai ti deka nyadi dudi hari ila? Ba bup Hebrew, Paul madahka mayuh utai ke ulih nulung kitai ngeringka pengarap. Siti pesan ke pemadu berat bisi ba Hebrew 13:1. Ayat nya meransang kitai: “Majak rinduka diri menyadi dalam Kristus.” Ayat nya udah dipilih nyadi ayat taun 2016.

Ayat taun kitai ke 2016: “Majak rinduka diri menyadi dalam Kristus.” —Hebrew 13:1

NAMA RETI RINDUKA DIRI MENYADI DALAM KRISTUS?

5. Nama reti rinduka diri menyadi dalam Kristus?

5 Nama reti rinduka diri menyadi dalam Kristus? Rinduka diri menyadi dalam Kristus nya asai ati ke balat rindu entara diri sebilik tauka kawan rapat. (Jhn. 11:36) Kitai enda pepura nyadi diri menyadi. Kitai endang diri menyadi. (Mat. 23:8) Paul madahka: “Rinduka pangan diri enggau ati ti angkun laban kita diri menyadi enggau pangan diri; awakka kita berebut ngayanka basa ngagai pangan diri.” (Rom. 12:10) Jaku tu nunjukka pemalat pengerindu kitai ke bala menyadi Kristian kitai. Pengerindu ngagai diri menyadi dalam Kristus enggau pengerindu Kristian, nulung nembiak Petara semak agi ngagai pangan diri sereta beserakup.

6. Ngagai sapa orang Kristian ti bendar ngayanka pengerindu, lalu nama kebuah?

6 Rambai jaku “rinduka diri menyadi dalam Kristus” suah dikena dalam litaricha orang Kristian. Orang Judah menya ngena leka jaku “menyadi” kena nunjukka orang nya kaban belayan, lalu kekadang kena nunjukka orang nya ukai ari diri sebilik. Tang leka jaku tu enda dikena ba orang ke ukai bansa Judah. Taja pia, kitai ngumbai semua orang Kristian ti bendar “menyadi” kitai, enda ngira ari ni menua sida. (Rom. 10:12) Jehovah udah ngasuh kitai rinduka pangan diri baka diri menyadi. (1 Tes. 4:9) Tang, nama kebuah patut majak ngayanka pengerindu ngagai diri menyadi dalam Kristus?

NAMA KEBUAH KITAI PATUT MAJAK NGAYANKA DIRI RINDUKA MENYADI DALAM KRISTUS?

7. (a) Nama kebuah kitai patut ngayanka diri rinduka menyadi dalam Kristus? (b) Padahka siti da agi kebuah kitai patut ngeringka pengerindu kitai ngagai pangan diri.

7 Kitai patut ngayanka diri rinduka menyadi dalam Kristus laban Jehovah ke ngasuh kitai rinduka sida. Kitai enda rinduka Jehovah enti kitai enggai rinduka bala menyadi Kristian kitai. (1 Jhn. 4:7, 20, 21) Siti da agi kebuah iya nya kitai begunaka pangan diri, kelebih agi maya bisi penusah. Lebuh Paul nulis surat ngagai orang Kristian Hebrew, iya nemu enda lama da agi sekeda ari sida deka ninggalka rumah enggau utai ti dikemisi diri. Jesus udah nerangka, maya nya ila deka balat tusah. (Mrk. 13:14- 18; Luk. 21:21-23) Nya alai, sebedau maya nya datai, sida patut ngeringka pengerindu sida ngagai pangan diri.—Rom. 12:9.

8. Nama patut digaga kitai diatu sebedau penusah ti besai berengkah?

8 Penusah ti amat besai dalam sejarah mensia deka nyadi enda lama da agi. (Mrk. 13:19; Pem. 7:1-3) Kitai patut ngasika jaku lalau tu: ‘Pulai ngagai rumah kita empu, kita ke nembiak aku, lalu tutup pintu kita. Belalai enda lama, nganti pengeringat Petara badu.’ (Isa. 26:20) “Rumah” nya ngambarka gempuru kitai. Nya endur alai kitai enggau bala menyadi Kristian kitai nyembah Jehovah. Tang semina begempuru enggau tetap enggau pangan diri aja enda chukup. Paul ngasuh orang Kristian Hebrew ngayanka pengerindu sereta ngereja pengawa ti badas ngagai pangan diri. (Heb. 10:24, 25) Kitai patut ngeringka pengerindu ngagai menyadi dalam Kristus diatu, laban tu ulih nulung kitai natka sebarang penguji ke deka ditapi kitai dudi hari ila.

9. (a) Kemaya hari tu, nama peluang ke dikemisi kitai ngambika ulih ngayanka pengerindu ngagai menyadi dalam Kristus? (b) Padahka baka ni nembiak Jehovah ngayanka pengerindu ngagai menyadi dalam Kristus.

9 Indah kemaya hari tu, kitai bisi mayuh peluang ngayanka diri rinduka menyadi dalam Kristus, sebedau penusah ti besai berengkah. Mayuh ari bala menyadi Kristian kitai merinsa ketegal tanah berenyang, bah besai, ribut taufan, tsunami, tauka penusah bukai ke datai ari kuasa alam. Sekeda ari sida natka pemerinsa. (Mat. 24:6-9) Lalu bisi penanggul ba penatai pemisi ketegal diau ba dunya ke enda lurus. (Pem. 6:5, 6) Taja pia, mayuh agi penusah ke ditapi bala menyadi Kristian kitai, mayuh agi peluang kitai ngayanka diri rinduka sida. Taja pan dunya tu nadai ngayanka pengerindu, tang kitai patut majak ngayanka diri rinduka menyadi dalam Kristus. (Mat. 24:12) [1]—Peda nota penutup.

BAKA NI KITAI ULIH MAJAK RINDUKA DIRI MENYADI DALAM KRISTUS?

10. Nama deka dikerandauka kitai diatu?

10 Enda ngira nama penusah ke dikemisi kitai, baka ni kitai ulih nentuka diri majak ngayanka pengerindu ngagai menyadi dalam Kristus? Baka ni kitai ulih nunjukka diri bisi pengerindu ke baka tu ngagai bala menyadi Kristian kitai? Pengudah nyebut, “majak rinduka diri menyadi dalam Kristus,” rasul Paul madahka sekeda chara orang Kristian ulih ngereja nya. Aram kitai berandauka enam iti chara nya diatu.

11, 12. Nama reti ngelaluka temuai? (Peda gambar ba pun artikel.)

11 “Anang enda ngelaluka temuai ngagai rumah kita.” (Bacha Hebrew 13:2.) Rambai jaku tu ngingatka kitai pasal Abraham enggau Lot. Seduai iya ngayanka pemanah diri ngagai temuai ke enda dikelala seduai iya. Udah nya baru seduai iya nemu, orang ke enda dikelala seduai iya nya bala melikat. (P-kal. 18:2-5; 19:1-3) Chunto tu meransang orang Kristian Hebrew ngayanka diri rinduka bala menyadi dalam Kristus ngena chara ngelaluka temuai.

12 Baka ni kitai ulih nunjukka diri ngelaluka temuai? Kitai ulih mai bala menyadi Kristian kitai datai ke rumah ngambika ulih sama makai tauka meransang pangan diri. Taja pan kitai enda entu ngelala tuai ti ngabas enggau bini iya, kitai ulih mai seduai iya makai lebuh seduai iya datai ngabas gempuru kitai. (3 Jhn. 5-8) Kitai enda ibuh makai besai tauka nyediaka pemakai ti kelalu mar. Juluk ati kitai iya nya deka meransang bala menyadi Kristian, ukai minta dipuji. Lalu kitai ukai semina mai orang ke ulih malas pemanah kitai aja. (Luk. 10:42; 14:12-14) Utai ke pemadu beguna iya nya  seruran bisi awak ngayanka diri deka nerima temuai!

13, 14. Baka ni kitai ulih ‘ingatka orang ke dalam jil’?

13 “Kingatka orang ke dalam jil.” (Bacha Hebrew 13:3.) Lebuh Paul nulis utai tu, iya nyebut pasal bala menyadi Kristian ke dijil ketegal pengarap sida. Paul muji bala menyadi Kristian laban sida udah ngayanka diri “kasihka orang ke ditutup dalam rumah jil.” (Heb. 10:34) Sekeda bala menyadi Kristian nulung Paul lebuh iya dijil empat taun, tang sida ke bukai nulung iya ari jauh. Baka ni sida ulih nulung Paul? Sida seruran besampi ke iya.—Plp. 1:12-14; Heb. 13:18, 19.

14 Kemaya hari tu, mayuh Saksi dijil ketegal pengarap sida. Bala menyadi Kristian ke diau semak ulih nulung sida enggau nyediaka utai ti diguna sida. Tang mayuh ari kitai diau jauh ari rumah jil. Baka ni kitai ulih nulung sereta seruran ingatka sida? Pengerindu ngagai menyadi dalam Kristus deka meransang kitai seruran besampika sida. Ngambika chunto, kitai ulih besampika bala menyadi Kristian ke lelaki, indu sereta bala anak mit ke dijil di menua Eritrea. Tu nyengkaum Paulos Eyassu, Isaac Mogos, enggau Negede Teklemariam, ke agi dijil pengudah 20 taun.

15. Baka ni kitai ulih bebasaka adat melaki-bini?

15 “Awakka adat melaki-bini dibasa semua orang.” (Bacha Hebrew 13:4.) Kitai mega ulih ngayanka diri rinduka menyadi dalam Kristus ngena ulah kitai ti tuchi. (1 Tim. 5:1, 2) Chunto, enti kitai ngereja ulah seks ti kamah enggau menyadi Kristian, kitai ngenusahka iya enggau sida sebilik. Bala menyadi Kristian ke bukai enda agi arapka kitai. (1 Tes. 4:3-8) Pikirka mega, baka ni asai ati bini enti iya nemu laki iya meda pornografi. Kati iya deka ngumbai laki iya rinduka iya sereta bebasaka adat melaki-bini?—Mat. 5:28.

16. Baka ni asai ati ti puas nulung kitai ngayanka pengerindu ngagai menyadi dalam Kristus?

16 “Nemu puas ati ke utai ti dikemisi kita.” (Bacha Hebrew 13:5.) Arapka Jehovah ulih nulung kitai puas ati enggau utai ti dikemisi kitai. Baka ni tu nulung kitai ngayanka pengerindu ngagai menyadi  dalam Kristus? Lebuh kitai puas ati, kitai deka ingatka, bala menyadi Kristian kitai nya beguna agi ari duit tauka utai bukai. (1 Tim. 6:6-8) Kitai enda ngiga penyalah sida tauka besebana pasal pengidup kitai. Lalu kitai enda chemburu ngagai sida tauka amu. Tang lebuh kitai puas ati, kitai deka gerah jari.—1 Tim. 6:17-19.

17. Baka ni “ati ti berani” nulung kitai ngayanka pengerindu ngagai menyadi dalam Kristus?

17 “Kempang ati [ati ti berani].” (Bacha Hebrew 13:6.) Arapka Jehovah meri kitai pemerani kena natka penguji ti besai. Pemerani tu nulung kitai ngembuan runding ti betul. Lalu lebuh runding kitai betul, kitai ulih ngayanka pengerindu ngagai menyadi dalam Kristus enggau meransang sereta ngelantangka ati sida. (1 Tes. 5:14, 15) Indah lebuh maya penusah ti besai, kitai ulih berani laban nemu pengelepas kitai nyau semak.—Luk. 21:25-28.

18. Baka ni kitai ulih ngeringka pengerindu kitai ngagai bala tuai gempuru?

18 “Kingatka bala tuai kita.” (Bacha Hebrew 13:7, 17.) Bala tuai gempuru ngena awak sida bebendar gawa ke kitai. Lebuh kitai berundingka semua utai ke udah digaga sida, pengerindu enggau terima kasih kitai ngagai sida nambah. Kitai enggai sida lenyau pengaga ati tauka ngasuh sida tusah ati enggau utai ke digaga kitai. Tang kitai deka ngasika sida. Enggau tu kitai meri “basa enggau pengerindu ti pemadu besai ngagai sida ketegal pengawa sida.”—1 Tes. 5:13.

Kati nuan beterima kasih ke pengawa ti digaga bala tuai gempuru ke kitai? (Peda genteran 18)

MAJAK NGEREJA LEBIH AGI ARI NYA

19, 20. Baka ni kitai ulih majak rinduka diri menyadi dalam Kristus enggau lebih agi?

19 Nembiak Jehovah dikelala ketegal pengerindu sida ngagai menyadi dalam Kristus. Sama mega maya jeman Paul. Tang Paul meransang bala menyadi Kristian ngayanka pengerindu enggau chara ti lebih agi. Iya madahka: “Majak ngereja lebih agi ari nya.” (1 Tes. 4:9, 10) Endang amat, kitai seruran bisi peluang ngayanka pengerindu nya!

20 Nya alai, lebuh kitai meda ayat taun kitai ba Palan Gempuru sepemanjai taun tu, aram meh kitai belematika tanya tu: Ulih aku ngelaluka mayuh agi temuai? Baka ni aku ulih nulung bala menyadi Kristian ke ba dalam jil? Kati aku bebasaka adat melaki-bini ari Petara? Nama ulih nulung aku puas ati? Baka ni aku ulih arap agi ke Jehovah? Baka ni aku ulih ngasi agi ngagai sida ke ngiring? Enti kitai deka ngemansangka diri ngena enam iti chara tu, ayat taun ke dilekat ba dinding ukai semina papan tanda aja, tang iya ngasuh kitai ngasika jaku Paul: “Majak rinduka diri menyadi dalam Kristus.”—Heb. 13:1.

^ [1] (genteran 9) Sekeda chunto ke nunjukka chara Saksi-Saksi Jehovah ngayanka diri rinduka menyadi dalam Kristus maya bisi penusah besai, peda Video Gerempung Bala Menyadi Kristian Kitai.