Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TOPIK RANDAU | NAMA KEBUAH PATUT LURUS?

Kati Pengawa ke Lurus Enda Ulih Diguna Agi?

Kati Pengawa ke Lurus Enda Ulih Diguna Agi?

Hitoshi gawa ba opis akaun ke dipegai siti ejensi ngiga kereja di Jipun. Lebuh iya meresa akaun ejensi enggau bos, Hitoshi diasuh ngaga riput pelesu pasal akaun. Hitoshi madahka, ati iya enda ngasuh iya ngereja pengawa ke enda lurus. Ketegal tu, bos Hitoshi ngemba deka muai iya ari kereja. Tang udah nya, iya amat dibuai kereja.

Beberapa bulan udah nya, Hitoshi berasai tusah ati enggau kereja ke digiga iya. Chunto, ba siti interbiu kereja, Hitoshi madahka iya enda ulih enggau pengawa ke enda lurus. Orang ke interbiu iya nyaut, “Nyelai amat chara nuan berunding!” Sida Hitoshi sebilik enggau bala kawan meransang iya mengkang lurus ba semua pekara. Tang udah nya, iya belabuh kakang ati. Ku iya, “Aku berunding sekalika pengawa aku ke lurus nya utai ti manah tauka enda.”

Utai ke nyadi ba Hitoshi nunjukka ukai semua orang ibuhka pengawa ke lurus. Endang amat, indah sekeda orang engka ngumbai pengawa ke lurus nya utai ti ngenusahka, kelebih agi ba pengawa dagang. Seiku indu ke bekereja ba menua Afrika Selatan madahka, “Aku dikelingi orang ke enda lurus, lalu kekadang aku pan deka enggau ngereja pengawa ke enda lurus.”

Sebengkah pengawa enda lurus ke bisi ba dini-dini endur kemaya hari tu iya nya bula. Beberapa taun ti udah, pansik ke digaga Robert S. Feldman, seiku pakar psikologi ari Universiti Massachusetts Amherst nunjukka, 60 peratus orang ke besai tuai bula abis kurang sekali dalam kandang sepuluh minit lebuh sida bejaku. Nitih ku Feldman, “Asil pansik nya ngenyitka ati kitai. Kitai enda nyangka pengawa bula tu utai ke suah digaga ba pengidup ninting hari.” Mayuh orang begedi lebuh orang bula ngagai sida, tang iya ke amat semua orang bula.”

Nama kebuah bula, ngenchuri, enggau pengawa bukai ke enda lurus suah digaga kemaya hari tu? Baka ni pengawa ke enda lurus bekaul enggau semua orang? Lalu keberat agi, baka ni kitai ulih nyeliahka diri ari ngereja pengawa ke enda lurus?