Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2016

“Kami Ingin Deka Enggau Kita”

“Kami Ingin Deka Enggau Kita”

‘Kami ingin deka enggau kita, laban kami udah ninga Petara bisi enggau kita.’—SEK. 8:23.

LAGU: 65, 122

1, 2. (a) Nitih ku Jehovah, nama deka nyadi ba jeman kitai? (b) Nama tanya ti deka disaut ba artikel tu? (Peda gambar ba pun artikel.)

JEHOVAH madahka, maya jeman kitai “sepuluh iku orang ari bansa bukai deka mansang ngagai siku orang Judah lalu bejaku, ‘Kami ingin deka enggau kita, laban kami udah ninga Petara bisi enggau kita.’” (Sek. 8:23) “Orang Judah” ngambarka sida ke udah diiri ngena roh kudus. Sida mega dikumbai ‘orang Israel ke nembiak Petara.’ (Gal. 6:16) “Sepuluh iku orang” ngambarka sida ke bisi peluang idup belama iya ba dunya. Sida nemu Jehovah udah merekatka raban orang ke dipilih tu, lalu sida ngasaika nya basa ti besai ulih enggau raban nya nyembah Jehovah.

2 Baka nabi Sekariah, Jesus madahka nembiak Petara deka beserakup. Iya ngumbai sida ke bisi peluang ke serega nya raban “ke mimit,” lalu ngumbai sida ke bisi peluang idup ba dunya nya “bedus ti bukai.” Tang Jesus madahka semua sida deka nyadi “siti raban” sereta deka nitihka iya, ke nyadi “siku aja pengibun.” (Luk. 12:32; Jhn. 10:16) Ketegal bisi dua raban, sekeda orang engka berunding: (1) Kati bedus ti bukai patut nemu nama semua orang ke dipilih kemaya hari tu? (2) Nama patut diperundingka orang Kristian ke dipilih pasal sida empu? (3) Enti bisi orang ba gempuru aku berengkah makai roti enggau ngirup wain maya Ngingatka Pemati Jesus, baka ni chara aku begulai enggau sida?  (4) Patut aku irau ati lebuh aku meda penyampau sida ke makai roti enggau ngirup wain majak nambah? Artikel tu deka nyaut tanya tu.

KATI KITAI PATUT NEMU NAMA SEMUA ORANG KE DIPILIH KEMAYA HARI TU?

3. Nama kebuah kitai enda ulih nemu sapa ke deka disengkaum dalam 144,000 iku orang ke serega?

3 Kati bedus ti bukai patut nemu nama semua orang ke dipilih ke agi ba dunya kemaya hari tu? Enda. Nama kebuah? Laban nadai seiku orang ulih nemu sekalika sida deka bulih berekat sida tauka enda. [1] (Peda nota penutup.) Taja pan Petara udah ngangauka sida ke serega, sida semina deka bulih berekat enti sida mengkang tetap ati. Sitan nemu pasal utai tu, lalu iya nguji “nesatka” sida ngena “nabi ti pelesu.” (Mat. 24:24) Orang Kristian ke dipilih semina nemu diri deka nerima berekat, pengudah sida diakim Jehovah nyadi orang ke tetap ati. Jehovah meri chop ti penudi tu, sebedau sida mati tauka sebedau “penusah ti besai” berengkah.—Pem. 2:10; 7:3, 14.

4. Enti kitai enda ulih nemu nama semua orang ke dipilih ke agi ba dunya kemaya hari tu, baka ni bedus ti bukai ulih “enggau” sida?

4 Enti kitai enda ulih nemu nama semua orang ke dipilih ke agi ba dunya kemaya hari tu, baka ni bedus ti bukai ulih “enggau” sida? Bup Kudus madahka, “sepuluh iku orang” deka “mansang ngagai siku orang Judah lalu bejaku, ‘Kami ingin deka enggau kita, laban kami udah ninga Petara bisi enggau kita.’” Taja pan ayat Bup Kudus nyebut seiku orang Judah, tang iya ngambarka lebih ari seiku orang. Tu reti iya, orang Judah nya ukai semina seiku aja, tang ngambarka seraban orang ke dipilih. Bedus ti bukai nemu pasal utai tu, lalu sida nyembah Jehovah sama enggau raban nya. Sida tau enda ibuh nemu nama tiap iku orang ari raban nya, lalu nitihka tiap iku sida. Jesus nya Kepala kitai, lalu Bup Kudus ngasuh kitai enda tau enda nitihka iya aja.—Mat. 23:10.

NAMA PATUT DIPERUNDINGKA ORANG KE DIPILIH PASAL SIDA EMPU?

5. Nama jaku tangkan ke patut diperundingka orang ke dipilih, lalu nama kebuah?

5 Orang ke dipilih patut berundingka jaku tangkan ke bisi ba 1 Korint 11:27-29. (Bacha.) Baka ni orang ke dipilih engka makai roti enggau ngirup wain ngena ‘jalai ti enda bebasa’ maya Ngingatka Pemati Jesus? Enti iya enda ngetanka kaul ti manah enggau Jehovah sereta enda tetap ati ngagai Jehovah, iya nunjukka diri enda bebasa lebuh iya makai roti enggau ngirup wain. (Heb. 6:4-6; 10:26-29) Jaku tangkan tu ngingatka orang ke dipilih enda tau enda mengkang tetap ati enti sida deka nerima ‘prais, iya nya kangau Petara, ulih Jesus Kristus, ke mai [sida] ke serega.’—Plp. 3:13-16.

6. Nama patut diperundingka orang ke dipilih pasal sida empu?

6 Paul ngasuh orang Kristian ke dipilih: ‘Aku, ke nyadi orang jil Tuan, bebendar minta kita diau menyana nitihka kangau Tuhan.’ Baka ni sida patut ngereja tu? Paul nerangka: ‘Baruh ati, nelap, liat ati, sabar enggau pangan diri dalam pengerindu, lalu enggau naka ulih nyaga penyerakup dalam roh ngena pemaik ti nanggam kita semua.’ (Eps. 4:1-3) Roh kudus Jehovah nulung nembiak Iya baruh ati, ukai temegah. (Kol. 3:12) Nya alai, orang ke dipilih enda ngumbai sida manah agi ari orang bukai. Sida nemu Jehovah enda meri sida mayuh agi roh kudus ari nembiak Iya ke bukai. Lalu sida enda ngumbai diri ulih meretika pemendar Bup Kudus dalam agi ari orang bukai. Sida mega enda madah ngagai orang bukai pasal diri empu ke udah dipilih sereta patut makai roti enggau ngirup wain maya Ngingatka Pemati Jesus. Tang, sida baruh ati sereta nemu semina Jehovah aja ke ulih ngangauka orang ke serega.

7, 8. Orang Kristian ke dipilih enda ngarapka nama, lalu nama kebuah?

 7 Taja pan orang ke dipilih ngasaika nya basa ti besai ulih dikangau ke serega, tang sida enda ngarapka orang bukai ngereja utai ti istimewa ngagai sida. (Eps. 1:18, 19; bacha Pilipi 2:2, 3.) Sida mega nemu lebuh Jehovah milih sida, Iya enda ngelakka semua orang nemu pasal utai tu. Nya alai, orang ke dipilih enda iran ati enti sekeda orang enda terus pechaya ke iya ti udah dipilih. Iya nemu Bup Kudus enda ngasuh kitai jampat pechayaka orang ke madahka Petara udah meri iya tanggungjawap ti istimewa. (Pem. 2:2) Ketegal orang ke dipilih enggai orang bukai kelalu beratika iya, nya alai iya enda madah pasal diri ke udah dipilih ngagai orang ke baru enggau iya betemu. Iya ke amat, iya engka enda nyebut pasal utai tu ngagai sapa-sapa. Iya mega enda temegah enggau utai manah ke deka dikereja iya di serega.—1 Kor. 1:28, 29; bacha 1 Korint 4:6-8.

8 Orang Kristian ke dipilih enda ngasaika diri semina patut begulai enggau orang ke dipilih aja, baka raban ari siti gerempung. Sida enda nguji ngiga orang ti dipilih ke bukai ngambika sida ulih berandau pasal nyadi orang ke udah dipilih tauka begempuru belajarka Bup Kudus. (Gal. 1:15-17) Gempuru enda ulih beserakup, enti sida ti dipilih ke serega semina begulai enggau raban sida empu aja. Sida ngelaban roh kudus, ke nulung nembiak Petara bulih pemaik enggau penyerakup.—Bacha Rome 16:17, 18.

BAKA NI CHARA KITAI BEGULAI ENGGAU SIDA?

9. Nama kebuah nuan patut bejimat enggau chara nuan begulai enggau sida ke makai roti enggau ngirup wain maya Ngingatka Pemati Jesus? (Peda kutak “Pengerindu Ukai Perangai Ti Jai.”)

9 Baka ni chara kitai begulai enggau bala menyadi Kristian ke dipilih? Jesus madah ngagai bala murid iya: “Semua kita tu diri menyadi magang.” Ku iya agi: “Semua orang ke ngeninggika diri, deka dikemaruhka, lalu semua orang ke ngemaruhka diri, deka ditinggika.” (Mat. 23:8-12) Nya alai salah enti kelalu ngeninggika orang, taja pan iya menyadi Kristus ke udah dipilih. Lebuh Bup Kudus nyebut pasal tuai gempuru, Bup Kudus meransang kitai nunda pengarap sida, tang Bup Kudus enda ngasuh kitai betuaika mensia. (Heb. 13:7) Endang amat, Bup Kudus madahka sekeda orang “patut diberi dua kali lipat gaji [basa].” Tang tu ketegal sida “ngereja pengawa sida enggau menyana” sereta “bebendar nusui Berita Manah enggau ngajar,” ukai ketegal sida nya orang ke dipilih. (1 Tim. 5:17) Enti kitai kelalu muji sereta beratika sida, kitai ulih ngemaluka sida. Tauka kitai ulih ngasuh sida temegah. (Rom. 12:3) Nadai seiku ari kitai deka ngereja utai ti ulih ngasuh seiku ari manyadi Kristus ke dipilih ngereja penyalah ti besai nya!—Luk. 17:2.

Baka ni chara kitai begulai enggau orang ke makai roti enggau ngirup wain maya Ngingatka Pemati Jesus? (Peda genteran 9-11)

10. Baka ni nuan ulih nunjukka diri bebasaka orang ke dipilih Jehovah?

10 Baka ni kitai ulih nunjukka diri bebasaka orang ke dipilih Jehovah? Kitai enda nanya baka ni sida ulih nyadi orang ke dipilih. Tu utai ti bekaul enggau iya empu, kitai enda patut nemu. (1 Tes. 4:11; 2 Tes. 3:11) Lalu kitai enda patut ngumbai laki tauka bini sida, apai indai sida, tauka sida sebilik ke bukai mega orang ke dipilih. Orang ke dipilih enda bulih peluang nya ari diri sebilik. (1 Tes. 2:12) Kitai mega patut nyeliahka diri ari nanya utai ke ulih ngemediska ati sida. Ngambika chunto, kitai enda patut nanya baka ni asai ati bini enti laki iya ke dipilih ke serega enda ulih idup belama enggau iya ba dunya baru. Agi mega, kitai pechaya ba dunya baru Jehovah deka “semua utai ti idup nadai suntuk utai.”—Mas. 145:16.

11. Baka ni kitai nyaga diri enti kitai nyeliahka diri ari “ngelangkungka orang”?

11 Enti kitai enda ngenuluka orang ke dipilih  lebih agi ari orang bukai, kitai mega nyaga diri empu. Baka ni? Bup Kudus madah ngagai kitai, sekeda orang engka “nyaru diri nyadi orang Kristian” ba gempuru, lalu engka madahka diri udah dipilih. (Gal. 2:4, 5; 1 Jhn. 2:19) Sekeda sida ke dipilih tu mega engka enda mengkang tetap ati. (Mat. 25:10-12; 2 Pet. 2:20, 21) Tang enti kitai nyeliahka diri “ngelangkungka orang,” kitai tentu enda nitihka orang bukai, sekalika sida tu orang ke dipilih tauka tebilang tauka udah lama nyembah Jehovah. Enti sida enda agi tetap ati tauka ninggalka gempuru, kitai enda lenyau pengarap ba Jehovah tauka ngetu nyembah Iya.—Jud 16.

KATI KITAI PATUT IRAU ATI PASAL PENYAMPAU SIDA?

12, 13. Nama kebuah kitai enda patut irau ati pasal penyampau orang ke makai roti enggau ngirup wain maya Ngingatka Pemati Jesus?

12 Betaun-taun penyampau orang ke makai roti enggau ngirup wain majak kurang maya Ngingatka Pemati Jesus. Tang baru-baru tu, penyampau sida udah majak nambah ninting taun. Kati kitai patut irau ati pasal utai tu? Enda. Aram kitai meda kebuah iya.

13 ‘Jehovah nemu sapa ke enggi Iya.’ (2 Tim. 2:19) Enda baka Jehovah, bala menyadi lelaki ke ngira penyampau orang ke makai roti enggau ngirup wain maya Ngingatka Pemati Jesus, enda nemu sapa ke amat nyadi orang ke dipilih. Nya alai, penyampau nya nyengkaum sida ke ngumbai diri udah dipilih, tang ke bendar enda dipilih. Ngambika chunto, sekeda orang bisi enggau makai roti sereta ngirup wain, tang udah nya nadai agi. Sekeda ke bukai engka bisi penanggul ba runding tauka asai ati, lalu pechaya sida deka merintah enggau Jesus di serega. Endang amat, kitai enda nemu penyampau ke amat orang ke dipilih ke agi idup ba dunya.

14. Nama dipadah Bup Kudus pasal penyampau orang ke dipilih ke agi diau ba dunya lebuh penusah ti besai berengkah?

14 Sida ke dipilih bisi di serata dunya lebuh Jesus datai ngambi sida ke serega. Bup Kudus madahka Jesus ‘deka ngasuh bala  melikat iya bejalai, lalu sida deka ngempuruka semua orang ke udah dipilih Petara ari semua sukut dunya.’ (Mat. 24:31) Bup Kudus mega madahka lebuh hari ti penudi, bisi mimit orang ke dipilih ke agi diau ba dunya. (Pem. 12:17) Tang, Bup Kudus nadai madahka penyampau sida ke agi diau ba dunya, lebuh penusah ti besai berengkah.

15, 16. Nama patut ditemu kitai pasal 144,000 iku orang ke dipilih Jehovah?

15 Jehovah mutuska ni maya Iya deka milih sida ke patut dipilih. (Rom. 8:28-30) Jehovah berengkah milih sida pengudah Jesus diangkatka idup baru. Enti pia, semua orang Kristian ba kurun keterubah nya orang ke dipilih. Beratus taun udah nya, mayuh ari sida ke ngaku diri orang Kristian nya ukai amat nitihka Kristus. Taja pia, dalam timpuh nya Jehovah bisi milih sekeda orang ke amat nitihka Kristus. Sida amat baka gandum ti sama tumbuh enggau rumput baka ke dipadah Jesus. (Mat. 13:24-30) Ba hari ti penudi, Jehovah agi terus milih orang kena ngenyukupka penyampau 144,000 iku orang ke serega. [2] (Peda nota penutup.) Nya alai, enti Petara mutuska deka milih sekeda ari sida sebedau pengujung datai, kitai pechaya Jehovah ngereja utai ti betul. (Isa. 45:9; Dan. 4:35; bacha Rome 9:11, 16.) [3] (Peda nota penutup.) Kitai patut bejimat ngambika enda baka orang gaji ke mut-mut pasal chara tuan sida ngaji orang ke datai dudi.—Bacha Matthew 20:8-15.

16 Ukai semua orang ke bisi peluang diau di serega deka nyadi “ulun ke tetap ati sereta bepenemu-dalam.” (Mat. 24:45-47) Baka ba kurun keterubah, kemaya hari tu Jehovah enggau Jesus ngena beberapa iku orang ngajar bala nembiak Iya. Ba kurun keterubah, semina beberapa iku aja orang Kristian ke dikena Jehovah nulis Bup Kudus Kristian jaku Gerika. Lalu kemaya hari tu, semina beberapa iku orang Kristian ke dipilih megai tanggungjawap meri nembiak Petara “pemakai ba maya ti patut.”

17. Nama udah dipelajarka kitai ari artikel tu?

17 Nama udah dipelajarka kitai ari artikel tu? Jehovah udah mutuska deka meri pengidup belama iya ba dunya ngagai mayuh ari nembiak Iya, lalu pengidup di serega ngagai orang ke deka merintah enggau Jesus. Jehovah merekatka semua nembiak Iya, “orang Judah” enggau “sepuluh iku orang,” lalu Iya dekaka sida ngasika adat ti sama sereta mengkang tetap ati. Semua enda tau enda mengkang baruh ati. Semua enda tau enda begulai nyembah Iya sereta berakup. Lalu semua enda tau enda ngetanka pemaik ba gempuru. Seraya kitai majak semak enggau pengujung dunya, aram meh kitai semua terus nyembah Jehovah sereta nitihka Jesus nyadi siti raban.

^ [1] (genteran 3) Nitih ku Masmur 87:5, 6, jemah ila Petara deka mandangka nama semua orang ke merintah enggau Jesus di serega.—Rom. 8:19.

^ [2] (genteran 15) Taja pan Kereja Rasul 2:33 madahka Jesus bisi enggau milih orang ke dipilih, tang Jehovah ke ngangauka orang nya.

^ [3] (genteran 15) Ke penerang mayuh agi, peda “Questions From Readers” dalam The Watchtower, 1 Mei 2007, lambar 30-31.