Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2016

Roh Kudus Ke Besaksi Ngagai Roh Kitai

Roh Kudus Ke Besaksi Ngagai Roh Kitai

Roh kudus empu ke besaksi ngagai roh kitai, madahka kitai tu anak Petara.’—ROM. 8:16.

LAGU: 109, 108

1-3. Nama utai ke ngasuh hari Pentikos nya istimewa, lalu baka ni utai nya ngamatka utai ti udah dipadah ba Bup Kudus? (Peda gambar ba pun artikel.)

MAYA nya pagi Hari Minggu ba nengeri Jerusalem. Orang benung ngintu hari Pentikos, hari ke diintu lebuh orang belabuh ngetau gandum. Nya hari ti istimewa sereta ngagitka ati. Pagi nya ba Rumah Sembiang, imam besai ngenjuk pemeri baka ke selama. Udah nya kira-kira pukul semilan, iya ngenjuk dua tuku roti beragi ke digaga ari gandum keterubah diketau, tauka gandum ti baru diketau. Imam besai miauka tuku roti nya ari sepiak ke sepiak ke dienjuk ngagai Jehovah. Nya meh hari Pentikos taun 33.—Lew. 23:15-20.

2 Beratus taun imam besai ngereja pengawa tu ninting taun. Pemeri nya bekaul enggau utai ti besai ke nyadi ba hari Pentikos taun 33. Lalu utai nya nyadi ba 120 iku murid Jesus ke besampi enggau pangan diri ba sadau rumah di nengeri Jerusalem. (SKR. 1:13-15) Nabi Joel udah nulis pasal utai tu, lapan ratus taun dulu menya. (Jol. 2:28-32; SKR. 2:16-21) Nama utai ke nyadi ti ngasuh iya beguna bendar?

3 Bacha Kereja Rasul 2:2-4. Kena hari Pentikos taun 33, Petara meri bala murid Jesus roh kudus Iya, lalu sida nyadi orang  ti dipilih ke serega. (SKR. 1:8) Udah nya, orang mayuh berengkah begempuru ngelingi sida, lalu bala murid Jesus berengkah bejaku pasal utai manah ke baru udah dipeda sereta didinga sida. Rasul Peter nerangka utai ke baru udah nyadi, lalu kebuah iya beguna bendar. Udah nya, iya madah ngagai orang mayuh: ‘Nesal ati ke dosa kita, genap iku kita, lalu dibaptisa dalam nama Jesus Kristus, ngambika dosa kita diampun, lalu kita deka nerima roh kudus nyadika pemeri ti diberi Petara.’ Sehari nya, kira-kira 3,000 iku orang dibaptisa, lalu sida mega nerima roh kudus.—SKR. 2:37, 38, 41.

4. (a) Nama kebuah kitai patut nemu utai ke nyadi ba hari Pentikos? (b) Nama utai besai bukai ke engka udah nyadi ba hari ti sama betaun-taun dulu menya? (Peda nota penutup.)

4 Imam besai enggau tuku roti ke dienjuk iya maya hari Pentikos ngambarka nama? Imam besai ngambarka Jesus. Tuku roti ngambarka bala murid Jesus ti dipilih ke serega. Bala murid Jesus nya udah dipilih ari entara mensia ke bedosa sereta dikumbai “lumur satu.” (Jas. 1:18) Petara udah nerima sida nyadika anak Iya, lalu udah milih sida merintah nyadi raja enggau Jesus ba Perintah Petara ti di serega. (1 Pet. 2:9) Jehovah deka ngena Perintah Iya merekatka semua mensia ke ngasi. Nya alai, sekalika kitai deka diau di serega enggau Jesus tauka ba dunya paradais, hari Pentikos taun 33 nya endang amat beguna ba kitai.  [1] —Peda nota penutup.

NAMA NYADI LEBUH ORANG DIPILIH?

5. Baka ni kitai nemu ukai semua sida ti dipilih nerima roh kudus enggau chara ti sama?

5 Bala murid Jesus ke ba sadau rumah seruran ingatka hari nya. Tiap iku sida bisi utai ti baka daun api ba atas pala sida. Jehovah meri sida penau bejaku ngena jaku bansa bukai. Sida pechaya bendar sida udah diiri ngena roh kudus. (SKR. 2:6-12) Tang, utai ti ngalitka ati tu enda nyadi ba semua orang Kristian lebuh sida dipilih. Chunto, Bup Kudus nadai nyebut pasal utai ti baka daun api ayan ba atas pala beribu iku orang di nengeri Jerusalem ke dipilih dudi agi ba hari nya. Sida diiri ngena roh kudus lebuh sida dibaptisa. (SKR. 2:38) Pia mega, enda semua orang Kristian diiri ngena roh kudus lebuh sida dibaptisa. Orang Samaria diiri ngena roh kudus nyau kelama pengudah sida dibaptisa. (SKR. 8:14-17) Lalu iya ke ngalitka ati, Kornelius enggau sida sebilik diiri ngena roh kudus sebedau sida dibaptisa.—SKR. 10:44-48.

6. Nama deka diterima semua orang ke dipilih, lalu baka ni tu bekaul enggau sida?

6 Endang amat, orang Kristian nemu sida dipilih enggau chara ti enda sama. Sekeda engka tekala nya nemu Jehovah milih sida. Sekeda da agi nemu pengudah siti timpuh. Tang rasul Paul nerangka utai ke nyadi ba tiap iku sida. Ku iya: ‘Lebuh kita udah arapka Iya, kita lalu ditanda ngena roh kudus ti udah disemaya. Roh kudus nya nyadika jamin kitai deka nerima pesaka.’ (Eps. 1:13, 14) Nya alai, Jehovah ngena roh kudus Iya madah ngagai orang Kristian nya, sida udah dipilih Iya ke serega. Enggau tu, roh kudus nya “nyadika jamin,” tauka bukti ngagai sida, jemah ila sida deka idup belama iya di serega, ukai ba dunya.—Bacha 2 Korint 1:21, 22; 5:5.

7. Nama patut digaga tiap iku orang Kristian ke dipilih ngambika nerima berekat di serega?

7 Lebuh orang Kristian dipilih, kati tu nunjukka iya tetap deka bulih berekat iya? Enda. Iya nemu, iya udah dikangau ke serega. Tang iya semina deka bulih berekat nya, enti iya mengkang tetap ati ngagai Jehovah. Ku Peter nerangka: ‘Nya alai, menyadi, awakka kita lebih agi ransing netapka diri amat udah dikangauka sereta udah dipilih,  laban enti kita ngereja nya, kita enda ngelengkaka pengarap kita. Laban nya meh jalai kita deka diberi hak enggau penuh kena kitai tama ngagai Perintah ti meruan belama-lama iya, ti diempu Jesus Kristus ti Tuan enggau Juruselamat kitai.’ (2 Pet. 1:10, 11) Nya alai, tiap iku orang Kristian ke udah dipilih enda tau ngelakka sebarang utai nagang iya ari nyembah Jehovah. Taja pan iya udah dikangau ke serega, tang enti iya enda mengkang tetap ati, iya enda ulih bempu berekat nya.—Heb. 3:1; Pem. 2:10.

BAKA NI IYA NEMU?

8, 9. (a) Nama kebuah mayuh orang tusah deka meretika utai ke nyadi lebuh orang nya dipilih? (b) Baka ni orang nya ulih nemu iya udah dikangau ke serega?

8 Mayuh ari nembiak Petara kemaya hari tu engka tusah deka meretika utai ke nyadi ba orang lebuh Petara milih orang nya. Tu endang amat, laban sida empu bedau dipilih. Petara ngaga mensia ngambika idup belama iya ba dunya, ukai di serega. (P-kal. 1:28; Mas. 37:29) Tang, Jehovah udah milih sekeda orang nyadi raja enggau imam di serega. Nya alai lebuh Iya milih sida, pengadang enggau chara sida berunding deka berubah, ngambika sida tau bulih pengidup di serega.—Bacha Epesus 1:18.

9 Tang, baka ni orang nya ulih nemu iya udah dikangau ke serega? Peratika utai ti dipadah Paul ngagai bala menyadi Kristian ke udah dipilih di menua Rome, ke “udah dikangauka nyadi nembiak Tuhan.” Ku iya madah ngagai sida: ‘Kita ukai nerima roh ti ngasuh kita nyadi ulun penakut baru, tang kita udah nerima roh ti ngiru kita nyadi anak Petara. Lebuh kitai ngangau, “Abba! Apai!” iya nya roh kudus empu ke besaksi ngagai roh kitai, madahka kitai tu anak Petara.’ (Rom. 1:7; 8:15, 16) Petara ngena roh kudus Iya madah ngagai orang nya pasal iya ke dikangau nyadi raja enggau Jesus di serega.—1 Tes. 2:12

10. Nama reti jaku ba 1 John 2:27 lebuh jaku nya madahka orang Kristian ke dipilih enda begunaka orang bukai ngajar iya?

10 Sida ke nerima kangau ari Petara enda begunaka orang bukai madah ngagai sida pasal sida ke udah dipilih. Jehovah ngasuh sida pechaya. Rasul John madah ngagai orang Kristian ke dipilih: ‘Kita udah ditata Iya ti kudus, lalu semua kita bisi penemu.’ Iya mega madahka: ‘Tang ba pasal kita empu, roh ti udah diterima kita ari Iya meruan dalam kita. Nya alai kita enda begunaka orang ngajar kita.’ (1 Jhn. 2:20, 27) Orang Kristian ke dipilih patut nerima ajar ari Jehovah baka sida ke bukai. Tang sida enda begunaka orang bukai madahka sida nya orang ke udah dipilih. Jehovah udah ngena roh kudus Iya madah ngagai sida ngambika sida nemu sida udah dipilih!

SIDA “DIADAKA BARU”

11, 12. Nama engka diperundingka orang Kristian ke dipilih, lalu nama kebuah iya pechaya?

11 Lebuh orang Kristian diiri ngena roh kudus, sida balat berubah. Iya ke amat, Jesus ngumbai sida “diadaka baru.” (Jhn. 3:3, 5) Udah nya iya nerangka: ‘Anang alit ati lebuh aku madah ngagai kita, “Kita enda tau enda diadaka baru.” Ribut bepuput ngagai sebarang endur iya deka. Kita ninga munyi iya, tang kita enda nemu ari ni penatai iya, tauka kini ke tunga iya bepuput. Baka nya mega orang ke diadaka roh kudus.’ (Jhn. 3:7, 8) Endang amat, tusah deka nerangka enggau nyentuk baka ni asai ati nyadi orang ke dipilih enti orang nya bedau kala dipilih. [2] —Peda nota penutup.

12 Orang ke udah dipilih engka berunding, ‘Nama kebuah Jehovah milih aku tang enda milih orang bukai?’ Indah iya engka berunding sekalika iya ulih megai  tanggungjawap nya tauka enda. Tang iya pechaya Jehovah udah milih iya. Iya balat gaga ati sereta amat beterima kasih ke pemeri nya. Semua orang ke dipilih ke serega ngasaika utai ti diasaika Peter lebuh iya madahka: ‘Pujika Petara ti Apai Jesus Kristus Tuan kitai! Ulih pengasih Iya ti besai, Iya udah meri kitai pengada ti baru ngagai pengadang ti idup ulih pengangkat Jesus Kristus ari mati, enggau ngagai pesaka ti enda nemu buruk, ti tuchi sereta enda nemu abis, ti ditaruh di serega ke kita.’ (1 Pet. 1:3, 4) Lebuh sida macha ayat tu, sida amat pechaya Apai sida bejaku enggau sida.

13. Baka ni chara orang nya berunding berubah lebuh iya diiri ngena roh kudus, lalu nama ngasuh orang nya berubah?

13 Sebedau Jehovah ngangauka sida ke serega, sida bisi peluang idup belama iya ba dunya. Sida nganti maya endur Jehovah deka ngaga dunya nyadi paradais sereta muai semua penyai. Sida engka ngambarka diri ngelaluka diri sebilik tauka kawan ke diangkatka idup baru. Sida deka ngaga rumah lalu diau dia, tauka nanam pun buah lalu makai buah iya. (Isa. 65:21-23) Nama kebuah runding sida berengkah berubah? Kati sida berubah ketegal sida balat tusah ati tauka balat merinsa? Kati sida berengkah ngumbai idup belama iya ba dunya tu enda ngerinduka ati sereta ngumbai diri enda lantang ati diau ba dunya tu? Tauka kati sida deka ngasaika baka ni gaya pengidup di serega? Enda. Tang, Petara ti mutuska utai tu ke sida. Lebuh Iya ngangauka sida, Iya ngena roh kudus Iya ngubah chara sida berunding sereta berekat ke deka diterima sida.

14. Baka ni asai ati orang ke dipilih pasal pengidup sida ba dunya tu?

14 Nya alai, kati reti nya sida ke dipilih tu enggai agi idup? Paul ngambarka baka ni asai ati orang ke dipilih nya. Iya mandingka tubuh mensia sida enggau “langkau kain,” lalu ku iya madahka: “Laban seagi-agi kitai diau dalam langkau kain tu, kitai bedemuh mai ma ti berat laban kitai enggai dilepaska ari tubuh tu, tang laban kitai keran dekaka tubuh serega dirasukka ba kitai, ngambika tubuh ti nemu mati tu ditelan pengidup.” (2 Kor. 5:4) Sida ke dipilih nya enggai mati. Sida rindu enggau pengidup sida sereta deka nyembah Jehovah ninting hari enggau diri sebilik sereta bala kawan. Tang enda ngira nama digaga sida, sida ingatka berekat ti udah disemayaka Petara ngagai sida ke jemah ila.—1 Kor. 15:53; 2 Pet. 1:4; 1 Jhn. 3:2, 3; Pem. 20:6.

KATI JEHOVAH UDAH NGANGAUKA NUAN?

15. Nama nunjukka orang nya enda diiri ngena roh kudus?

15 Nuan engka berunding sekalika Jehovah udah ngangauka nuan ke serega tauka bedau. Enti nuan ngasaika diri udah, pikirka sekeda tanya ti beguna tu: Kati nuan ngasaika diri balat ransing ba pengawa nginjil? Kati nuan balat rindu belajarka Bup Kudus sereta belajarka ‘utai ti dalam buntut runding Petara’? (1 Kor. 2:10) Kati nuan ngasaika Jehovah udah meri asil ke manah ngagai nuan ba pengawa nginjil? Kati nuan deka ngereja utai ti dikedekaka Jehovah lebih agi ari utai bukai? Kati nuan bisi pengerindu ti dalam ngagai orang bukai sereta ngasaika diri bisi tanggungjawap ti besai nulung sida nyembah Jehovah? Kati nuan bisi meda, Jehovah udah nulung nuan ngena mayuh chara ti nyemetak ba pengidup? Enti nuan nyaut “Au” ngagai semua tanya tu, kati tu nunjukka nuan udah dikangau ke serega? Enda. Nama kebuah? Laban semua nembiak Petara ulih ngasaika utai tu, sekalika sida dipilih tauka enda. Jehovah ulih meri kuasa ti sama ngagai tiap iku nembiak Iya,  enda ngira nama bansa berekat ti deka diterima sida ngena roh kudus Iya. Iya ke amat, enti nuan berunding sekalika nuan deka ke serega tauka enda, tu reti iya nuan enda dikangauka kin. Sida ti dipilih Jehovah nemu sida amat deka ke serega!

16. Baka ni kitai nemu ukai semua orang ke nerima roh kudus Petara udah dikangau ke serega?

16 Dalam Bup Kudus, kitai bisi mayuh chunto pasal orang ke tetap ati ke nerima roh kudus Jehovah, tang sida enda ke serega. Ngambika chunto iya nya John Pemaptisa. Jesus madahka, nadai seiku orang ke besai agi ari John, tang udah nya Jesus madahka, John enda ulih merintah nyadi raja di serega. (Mat. 11:10, 11) David mega diiring roh kudus. (1 Sam. 16:13) Roh kudus nulung iya meretika penemu ti dalam pasal Jehovah sereta ngiring iya nulis sebegian ari Bup Kudus. (Mrk. 12:36) Taja pia, rasul Peter madahka David enda “niki ke serega.” (SKR. 2:34) Jehovah meri sida roh kudus Iya kena ngereja pengawa ti ngalitka ati, tang Iya enda ngena roh kudus Iya ngangauka sida diau di serega. Kati tu reti iya sida enda chukup tetap ati tauka enda ulih merintah di serega? Enda. Ditu reti iya Jehovah deka ngangkatka sida idup baru di Paradais ba dunya.—Jhn. 5:28, 29; SKR. 24:15.

17, 18. (a) Nama berekat ke dianti mayuh ari nembiak Petara kemaya hari tu? (b) Nama tanya ke deka dikerandauka kitai ba artikel pengudah tu?

17 Mayuh ari nembiak Petara kemaya hari tu enda ke serega. Baka Abraham, David, John Pemaptisa enggau mayuh agi sida ke lelaki sereta ke indu maya jeman Bup Kudus, sida nganti maya diau ba dunya lebuh perintah Petara deka merintah atas sida. (Heb. 11:10) Bisi 144,000 iku orang deka merintah enggau Jesus di serega. Tang, Bup Kudus nyebut pasal “bala peturun” sida ke dipilih ke agi diau ba dunya ba maya ti penudi. (Pem. 12:17) Nya alai, mayuh ari 144,000 iku orang tu udah mati, lalu diau di serega.

18 Tang enti orang bisi madahka iya udah dipilih, nama patut digaga sida ke bisi peluang idup belama iya ba dunya? Enti orang ba gempuru nuan berengkah makai roti sereta ngirup wain maya Ngingatka Pemati Jesus, baka ni chara kitai begulai enggau sida? Lalu baka ni enti penyampau sida ke madahka diri udah dipilih majak nambah? Patut nuan irau ati? Kitai deka nyaut tanya tu ba artikel pengudah tu.

^ [1] (genteran 4) Hari Pentikos engka diintu ba maya ti sama ninting taun, lebuh Adat diberi ngagai Moses ba menua Sinai. (P-sut. 19:1) Nya alai, Moses engka mai bansa Israel ngena Adat ba maya ti sama ninting taun, lebuh Jesus ngaga sempekat baru enggau orang ti dipilih ke serega.

^ [2] (genteran 11) Ke penerang mayuh agi pasal nama reti diadaka baru, peda The Watchtower, 1 April 2009, lambar 3-11.