Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Kita ke Biak—Kita Ulih Ngelaban Sitan

Kita ke Biak—Kita Ulih Ngelaban Sitan

“Rasukka semua kereban perang ari Petara, ngambika kita ulih bediri tegap ngelaban akal Sitan.”—EPS. 6:11, NW.

LAGU: 79, 140

1, 2. (a) Nama kebuah orang Kristian ke biak ulih menang ngelaban Sitan enggau bala antu? (Peda gambar ba pun artikel.) (b) Nama deka dipejuraika kitai?

RASUL Paul nyemaka orang Kristian baka bala soldadu. Kitai enggau beperang, lalu bala munsuh kitai nya endang nyengala! Tang kitai ukai beperang ngelaban mensia; kitai beperang ngelaban Sitan enggau bala antu. Sida bisi peneleba beperang beribu-ribu taun lalu amat landik belaban. Nya alai kitai baka ke enda ulih menang ba perang tu, anang agi enti kitai nya orang ke biak. Ulih orang ke biak menang beperang ngelaban munsuh ti kering nya? Ulih, lalu bisi nya udah menang! Nama kebuah? Laban sida bulih pengering ari Jehovah. Pia mega, baka bala soldadu ke udah dilatih manah, sida ‘ngerasukka semua kereban perang ari Petara’ ngambika sida besedia beperang.—Bacha Epesus 6:10-12 ari nota kaki. *

 2 Lebuh Paul ngena jaku sema nya, iya engka berunding pasal baju perang ke dikena bala soldadu Rome. (SKR. 28:16) Ba artikel tu, kitai deka meresa jaku sema nya. Kitai mega deka bejuraika utai ti dipadah sekeda orang ke biak pasal penanggul ke ditapi sereta penguntung ke diulih ketegal ngerasukka tiap iti kereban perang ari Petara.

Bisi nuan ngena tiap iti kereban perang?

“PEMENDAR NYADIKA BELULANG”

3, 4. Baka ni pemendar ari Bup Kudus nya baka belulang ke dikena soldadu Rome?

3 Bacha Epesus 6:14. Belulang ke dikena soldadu Rome bisi lambar besi ti mipis kena ngelindung punggung soldadu sereta ngetanka terabai dada iya ti berat ngambika enda bekinsit. Sekeda belulang nya mega bisi pengepit ke tegut kena nangkin pedang enggau duku pandak. Ketegal belulang iya ditanchang rat, orang ke nyadi soldadu deka andal agi lebuh beperang.

Pemendar ke dipelajarka kitai ari Bup Kudus ngelindung kitai ari ajar ti bula

4 Baka belulang, pemendar ke dipelajarka kitai ari Bup Kudus ulih ngelindung kitai ari ajar ti bula. (Jhn. 8:31, 32; 1 Jhn. 4:1) Lalu dalam agi pengerindu kitai ke pemendar ari Bup Kudus, senang agi kitai deka idup sejalai enggau standard Petara, tauka ngena “terabai dada” kitai. (Mas. 111:7, 8; 1 Jhn. 5:3) Pia mega, enti kitai ulih meretika pemendar enggau dalam agi, senang agi kitai deka ngetanka pemendar ari diserang munsuh.—1 Pet. 3:15.

5. Nama kebuah kitai patut seruran nyebut utai ti amat?

5 Ketegal pemendar ari Bup Kudus nya beguna ba kitai, kitai ngasika utai ti disebut Bup Kudus lalu kitai seruran nyebut utai ti amat. Pemula nya siti senyata ti pemadu mujur dikena Sitan. Pemula ngenusahka orang ke nusui enggau orang ke pechayaka pemula nya. (Jhn. 8:44) Nya alai taja pan kitai enda sempurna, kitai enggau naka ulih enda bula. (Eps. 4:25) Tu enda senang. Abigail, ke beumur 18 taun, madahka: “Nyebut utai ti amat kekadang enda seruran meri penguntung, kelebih agi enti nyebut utai ti bula ulih nulung nyeliahka utai ti tusah.” Nya alai nama kebuah iya seruran nyebut utai ti amat? Ku iya madahka: “Enti aku nyebut utai ti amat, aku bisi ati ti beresi ba mua Jehovah. Lalu apai indai enggau bala pangan aku nemu, sida ulih arapka aku.” Victoria, ke beumur 23 taun, madahka: “Lebuh nuan nyebut utai ti amat sereta ngetanka utai ti dipechaya nuan, nuan engka dikeduan. Tang nuan seruran deka bulih penguntung ti badas: Nuan deka berani agi, ngasaika diri rapat agi enggau Jehovah, lalu dipebasa orang ke sayauka nuan.” Bisi nuan beratika kebuah nya manah enti seruran ‘nanchangka pemendar nyadika belulang’?

Pemendar nyadika belulang (Peda genteran 3-5)

“PENGELURUS NYADIKA TERABAI DADA”

6, 7. Nama kebuah pengelurus disemaka baka terabai dada?

6 Terabai dada soldadu Rome suah agi digaga ari singkap besi ke ditusun  beringkat lalu digaga ngeruang ngambika umbas ba dada iya. Singkap besi dijantilka ngagai tali ari kulit jelu ngena gelang enggau penganchin besi. Kedua-dua piak bau iya ditutup mayuh agi ngena singkap besi ke mega dijantilka ngagai tali ari kulit jelu. Pemerat enggau tukuh terabai dada nya ngasuh soldadu tusah engkebut. Nya alai iya patut seruran meresa terabai dada ngambika enda tekinsit. Tang terabai dada nya ngelindung ati sereta perengka tubuh soldadu nya ari mata pedang ti tajam tauka ari laja!

Kitai enda chukup penemu dikena ngelindung ati kitai

7 Standard Jehovah ti lurus ke ngelindung “ati” kitai, ulih disemaka baka terabai dada. (J-lam. 4:23) Orang ke nyadi soldadu tentu enggai nukar terabai dada ti digaga ari besi enggau iya ti digaga ari besi ke enda tan. Pia mega, kitai tentu enggai nukar standard Jehovah ke bekaul enggau utai ti amat ngena penemu kitai empu. Kitai enda chukup penemu dikena ngelindung ati kitai. (J-lam. 3:5, 6) Nya kebuah kitai patut seruran nentuka “terabai dada” agi ulih ngelindung ati kitai.

8. Nama kebuah kitai patut ngasika standard Jehovah?

8 Kati nuan kadang-kadang ngumbai standard Jehovah ngerampas pengelepas nuan, tauka nagang nuan ngereja utai ti dikinginka nuan? Daniel, ke beumur 21 taun, madahka: “Bala pengajar enggau nembiak ke sekelas ngeleseka aku laban aku nitihka standard Bup Kudus. Ba siti timpuh, aku enda andalka diri empu lalu berasai ditekan.” Tang baka ni asai ati iya diatu? Ku iya madahka: “Pengujung iya, aku meda penguntung ketegal idup sejalai enggau standard Jehovah. Sekeda ari bala ‘pangan’ aku berengkah makai dadah; sekeda nya badu besekula. Sinu ati aku meda pengidup sida baka nya. Jehovah amat ngelindung kitai.” Madison, ke beumur 15 taun, madahka: “Aku tusah deka nitihka standard Jehovah lalu enda ulih ngasaika utai ti dikerinduka bala pangan aku.” Nya alai, nama digaga iya? “Aku ngingatka diri empu ke ngarika nama Jehovah, lalu penguji nya chara dikena Sitan nyerang aku. Lebuh aku menang napi penguji nya, aku temegah ati enggau diri empu.”

Pengelurus nyadika terabai dada (Peda genteran 6-8)

“SEDIA DEKA NUSUI BERITA MANAH PASAL PEMAIK, NYADIKA KASUT KITA”

9-11. (a) Nama “kasut” ke dikena orang Kristian? (b) Nama ulih nulung kitai berasai nyamai lebuh nginjil?

9 Bacha Epesus 6:15. Soldadu Rome enda ulih enggau beperang enti nadai kasut. Tapa kasut nya digaga ari tiga lapis kulit jelu, nya alai kasut nya ulih tan. Kasut nya mega nyamai dikena, nya alai orang ke nyadi soldadu enda nangi lebuh bejalai sereta enda mudah tekelinchir.

10 Ketegal kasut bala soldadu Rome ulih nulung sida mujur ba perang, kasut simbolik ke dikena kitai ulih nulung kitai “nusui Berita Manah pasal pemaik.” (Isa. 52:7; Rom. 10:15) Tang kadang-kadang kitai begunaka pemerani ngambika ulih nginjil. Bo, ke beumur 20 taun, madahka: “Aku takut nginjil ngagai orang ke sekelas  enggau aku. Engka ketegal aku malu. Lebuh aku ngenang nya, aku enda nemu kebuah aku takut. Diatu aku rindu nginjil ngagai bala pangan ke serambau.”

11 Mayuh orang Kristian ke biak ngasaika diri nyamai nginjil enti sida udah besedia tumu. Baka ni nuan ulih nyediaka diri? Julia, ke beumur 16 taun, madahka: “Aku nyimpan litaricha dalam beg sekula, lalu aku ningaka penemu sereta utai ti dipechaya ke dipadah bala ke sekelas enggau aku. Enggau nya aku ulih berundingka bagi utai ke ulih nulung sida. Ketegal udah besedia, aku ulih berandau enggau sida pasal utai ke ulih nulung sida.” Makenzie, ke beumur 23 taun, madahka: “Enti nuan nelap sereta nyadi peninga ti manah, nuan ulih nemu utai ke ditapi bala pangan ke serambau. Aku nentuka diri udah macha semua litaricha ti diungkup ngagai sida ke biak. Nya chara aku ulih mai bala pangan ke serambau ngagai utai ti bisi dalam Bup Kudus tauka ba jw.org ke ulih nulung sida.” Besedia enggau manah ngambika ulih nginjil nya baka ke ngena “kasut” ti umbas ba nuan.

Seruran sedia nyadika kasut (Peda genteran 9-11)

 “PENGARAP NYADIKA TERABAI”

12, 13. Nama sekeda “laja ti beapi-api” ke ditimbak Sitan?

12 Bacha Epesus 6:16. Soldadu Rome mai terabai ti besai. Nya ngelindung kedua-dua bau iya nyentuk ngagai pala patung, sereta mega ngelindung iya ari pedang, sangkuh enggau laja.

13 Nama “laja ti beapi-api” ke ditimbak Sitan ngagai nuan? Iya engka nyerang nuan ngena pemula pasal Jehovah. Sitan deka nuan ngumbai Jehovah enda sayauka nuan tauka ngumbai nadai orang ibuhka nuan. Ida, ke beumur 19 taun, madahka: “Aku suah ngasaika Jehovah enda rapat enggau aku lalu Iya enggai aku nyadi Pangan Iya.” Nama digaga Ida lebuh iya ngasaika baka nya? “Pengawa begempuru nya utai ke ngemansangka pengarap aku. Suba aku semina duduk aja lalu nadai kala meri komen, laban ngumbai nadai orang deka ninga utai ti ka disebut aku. Tang diatu, aku nyediaka utai ke dikena begempuru lalu nguji nyaut dua tauka tiga kali. Nya tusah, tang aku berasai puas ati lebuh aku bisi ngereja nya. Lalu bala menyadi meransang ati. Ari pengawa begempuru aku seruran nemu Jehovah rinduka aku.”

14. Nama ulih dipelajarka kitai ari peneleba Ida?

14 Terabai ke dikena soldadu seruran sama pemesai. Tang ari peneleba Ida kitai nemu, pengarap kitai enda baka nya. Pengarap kitai ulih nambah tauka kurang, ulih nyadi kering tauka lemi. Lalu utai tu bepanggai ba kitai empu. (Mat. 14:31; 2 Tes. 1:3) Ngambika “pengarap nyadika terabai” ke ulih ngelindung kitai, kitai patut ngasuh pengarap kitai besai sereta kering agi!

Pengarap nyadika terabai besai (Peda genteran 12-14)

“PENGELEPAS NYADIKA SELAPUK BESI”

15, 16. Baka ni pengadang kitai nya baka selapuk besi?

15 Bacha Epesus 6:17 ari nota kaki. * Soldadu Rome ngena selapuk besi ngelindung pala, rekung, enggau mua iya. Kadang-kadang selapuk besi nya bisi pemegai ngambika ulih dibinching soldadu.

16 Sama baka selapuk besi ke ngelindung untak soldadu, “pengadang kitai ke pengelepas” ngelindung runding kitai. (1 Tes. 5:8; J-lam. 3:21) Pengadang nulung kitai betatika semaya Petara, lalu enda mudah lemi semengat ketegal penusah ke ditapi kitai. (Mas. 27:1, 14; SKR. 24:15) Tang enti kitai deka pengadang ngelindung kitai, pengadang nya patut nyata ba kitai. Kitai patut ngerasukka “selapuk besi” ba pala kitai, ukai minching iya!

17, 18. (a) Baka ni Sitan nipu kitai ngambika muka selapuk besi? (b) Baka ni kitai nunjukka diri enda ulih ditipu Sitan?

17 Baka ni Sitan nipu kitai ngambika muka selapuk besi? Perundingka utai ti digaga iya ba Jesus. Sitan nemu Jesus deka nyadi pemerintah ke mensia. Tang Jesus patut merinsa sereta mati dulu. Lalu udah nya Jesus patut nganti jam ke udah ditetapka Jehovah sebedau ulih nyadi Raja. Nya alai Sitan meri Jesus peluang tumu agi nyadi raja. Sitan besemaya, enti Jesus nyembah iya, Jesus ulih nyadi pemerintah dunya tekala nya. (Luk. 4:5-7) Sitan mega nemu, Jehovah udah besemaya deka meri kitai utai ti manah ba dunya baru. Tang kitai patut nganti semaya nya dikeamatka. Lalu lebuh nganti, kitai engka bisi mayuh penanggul. Nya  alai Sitan deka meri kitai peluang bulih pengidup ti lantang diatu. Iya deka kitai ngenuluka pengelantang diri, lalu Perintah Petara nyadi lumur dua.—Mat. 6:31-33.

18 Mayuh orang Kristian ke biak enda ulih ditipu Sitan. Ambika chunto, Kiana, ke beumur 20 taun, madahka: “Aku nemu semina Perintah Petara aja ke ulih mutarka semua penusah kitai.” Baka ni utai ti manah tu ngubah chara iya berunding sereta ngena pengidup diri? Utai ti manah nya nulung iya ingat, utai ba dunya tu enda meruan lama. Ari ke bebendar ngulihka kereja ba dunya tu, Kiana ngena jam enggau pengering iya gawa ke Jehovah.

Selapuk besi (Peda genteran 15-18)

“JAKU PETARA NYADIKA PEDANG TI DIBERI ROH KUDUS PETARA”

19, 20. Baka ni kitai ulih landik agi ngena Jaku Petara?

19 Bala soldadu Rome ngena pedang ke kira-kira 50 sentimeter (20 inchi) pemanjai. Bala soldadu nya landik amat ngena pedang laban sida belatih ngena pedang ninting hari.

20 Rasul Paul madahka Jaku Petara nya baka pedang. Jehovah udah meri kitai pedang. Tang kitai patut belajar ngena pedang nya enggau landik ngambika ulih ngetanka pengarap tauka ngemetulka chara kitai berunding. (2 Kor. 10:4, 5; 2 Tim. 2:15) Baka ni nuan ulih landik agi ngena Jaku Petara? Sebastian, ke beumur 21 taun, madahka: “Aku nulis siti ayat ari tiap iti bagi lebuh aku macha Bup Kudus. Aku ngumpul ayat Bup Kudus ke dikerindu aku.” Tu nulung iya meretika agi chara Jehovah berunding. Ku Daniel agi: “Lebuh macha Bup Kudus, aku milih ayat ke diasai aku ulih nulung orang ke ditemu ba pengawa nginjil. Aku beratika orang deka agi ninga enti sida meda nuan rindu bejaku pasal Bup Kudus sereta bebendar deka nulung sida.”

Jaku Petara nyadika pedang ti diberi roh kudus Petara (Peda genteran 19-20)

21. Nama kebuah kitai enda patut takutka Sitan enggau bala antu?

21 Baka ke udah dipelajarka kitai ari peneleba orang ke biak ba artikel tu, kitai enda patut takutka Sitan enggau bala antu. Sida amat kering, tang Jehovah kering agi. Lalu sida enda ulih idup belama iya. Sida deka dikurung lalu enda ulih ngemediska orang dalam timpuh Seribu Taun Kristus Merintah, lalu udah nya sida deka dipunaska. (Pem. 20:1-3, 7-10) Kitai ngelala munsuh kitai, chara dikena iya nipu, sereta tuju iya. Enggau saup ari Jehovah, kitai ulih bediri tegap ngelaban Sitan!

^ per. 1 Epesus 6:10-12, NW: “Ke pengujung iya, terus ngulihka pengering diri ari Petara sereta ari pengering Iya ti besai. Rasukka semua kereban perang ari Petara, ngambika kita ulih bediri tegap ngelaban akal Sitan. Laban kitai bibat, ukai ngelaban mensia, tang ngelaban bala pemerintah, ngelaban piak ti bekuasa, ngelaban pemerintah dunya ti petang tu, enggau ngelaban kuasa roh ti jai di langit.”

^ per. 15 Epesus 6:17, NW: “Lalu ambi mega pengelepas nyadika selapuk besi kita, enggau jaku Petara nyadika pedang ti diberi roh kudus Petara.”