Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Ngambika Semua Kitai Beserakup baka Jehovah enggau Jesus ke Beserakup

Ngambika Semua Kitai Beserakup baka Jehovah enggau Jesus ke Beserakup

‘Aku besampi ngambika semua sida nyadi siku.’—JHN. 17:20, 21.

LAGU: 24, 99

1, 2. (a) Nama dipinta Jesus lebuh besampi kepenudi iya enggau bala rasul iya? (b) Nama kebuah Jesus irau pasal penyerakup?

JESUS irau pasal penyerakup lebuh kepenudi iya makai enggau bala rasul iya. Lebuh besampi enggau sida, Jesus madahka diri dekaka bala murid iya nyadi seiku, tauka beserakup, baka iya enggau Apai iya ke beserakup. (Bacha John 17:20, 21 ari nota kaki.) * Enti bala murid Jesus beserakup, orang deka nemu Jehovah udah nganjung Jesus ke dunya. Orang ulih ngelala bala murid Jesus ti bendar ari pengerindu sida ke pangan diri, lalu pengerindu tu deka nulung sida majak beserakup.—Jhn. 13:34, 35.

2 Kitai ulih meretika kebuah Jesus suah nyebut pasal penyerakup malam nya. Jesus beratika bala rasul iya bedau tentu beserakup. Ambika chunto, bala rasul bekelikuh pasal “sapa ke besai agi” baka ke udah. (Luk. 22:24-27; Mrk. 9:33, 34)  Sekali agi, James enggau John minta Jesus meri seduai iya penuduk ke manah agi ba Perintah Petara ti di serega, iya nya duduk muak ari kanan enggau ari kiba Jesus.—Mrk. 10:35-40.

3. Nama nekul bala murid Kristus beserakup, lalu nama tanya ke deka dipejuraika kitai?

3 Ukai semina inginka pangkat ti tinggi sereta mayuh kuasa ke nekul bala murid Kristus beserakup. Orang maya jeman Jesus bepechah-belah ketegal pemenchi sereta bepilih mata. Bala murid Jesus patut mutarka asai ati ke enda manah nya. Ba artikel tu, kitai deka bejuraika sekeda tanya tu: Nama digaga Jesus senentang bepilih mata? Baka ni iya nulung bala murid iya ngambika enda bepilih mata enggau orang bukai, lalu beserakup? Lalu baka ni teladan Jesus sereta utai ti diajar iya nulung kitai mengkang beserakup?

JESUS ENGGAU BALA MURID IYA NAPI ULAH SEKEDA ORANG KE BEPILIH MATA

4. Beri sekeda chunto ulah ti bepilih mata ke ditapi Jesus.

4 Indah Jesus napi ulah orang ke bepilih mata. Lebuh Philip madahka diri udah tetemuka Messiah ngagai Natanel, ku Natanel nyaut: “Kati utai ti badas ulih datai ari Nasaret?” (Jhn. 1:46) Natanel engka nemu Messiah deka ada di Betlehem, laban ayat ba Mikah 5:2 bisi nyebut. Iya engka ngumbai Nasaret nya enda patut alai Messiah ngentapka diri. Bisi mega orang Judah ke tinggi pangkat enda bebasaka Jesus laban iya datai ari Galili. (Jhn. 7:52) Mayuh orang Judah ngumbai orang ari Galili nya baruh agi penuduk ari bansa sida. Orang Judah ke bukai nguji ngeleseka Jesus enggau ngangau iya orang Samaria. (Jhn. 8:48) Orang Samaria enda sama bansa sereta jalai pengarap enggau orang Judah. Orang Judah enggau orang Galili bela enda tentu bebasaka orang Samaria, lalu enggai begulai enggau sida.—Jhn. 4:9.

Ngambika mengkang beserakup, bala murid Jesus patut ngubah chara sida berunding

5. Nama kebuah bala murid Jesus napi ulah ti bepilih mata?

5 Bala tuai pengarap orang Judah mega enda bebasaka bala murid Jesus. Orang Parisi ngumbai sida “ditinggang sumpah.” (Jhn. 7:47-49) Orang Parisi ngumbai orang ke enda belajar ba sekula jalai pengarap orang Judah enggau orang ke enda nitihka adat orang Parisi nya orang ke sengapa dia sereta nadai guna. (SKR. 4:13) Jesus enggau bala murid iya napi ulah ti bepilih mata laban orang maya nya temegahka jalai pengarap sida, penuduk sida ba komuniti, sereta bansa sida. Ulah ti bepilih mata mega ngachau bala murid sereta chara sida berunding pasal orang bukai. Ngambika mengkang beserakup, sida patut ngubah chara sida berunding.

6. Padahka sekeda peneleba ke nunjukka ulah ti bepilih mata ulih ngachau kitai.

6 Kemayaharitu, orang ke ngelingi kitai kelalu bepilih mata. Orang engka bepilih mata enggau kitai, tauka kitai engka bepilih mata enggau orang bukai. Ku seiku menyadi Kristian indu ke nyadi pengerintis diatu di Australia madahka: “Aku majak  begedika orang ke bekulit putih lebuh aku beratika utai enda lurus ke ninggang orang Aborigin—suba enggau diatu.” Iya mega ngembuan asai ati ti begedi ketegal sekeda orang enda manah enggau iya. Seiku menyadi Kristian lelaki ari Kanada madahka baka ni asai ati iya suba: “Ba aku, orang ke ngena jaku Perancis nya manah agi.” Iya nyebut munyi nya ketegal iya enda rinduka orang ke bejaku ngena jaku English.

7. Nama digaga Jesus pasal bepilih mata?

7 Sama baka jeman Jesus kelia, asai ati ti begedika orang bukai kemayaharitu balat amat sereta tusah diputarka. Baka ni Jesus mutarka asai ati ke baka nya? Kesatu, iya enda kala bepilih mata. Iya seruran rinduka orang bukai. Iya nginjil ngagai orang ke kaya enggau ke seranta, ngagai orang Parisi enggau orang Samaria, lalu indah ngagai bala pengumpul chukai enggau orang ke ngereja dosa. Kedua, Jesus ngajar bala murid iya sereta netapka teladan ngambika sida enda bepilih mata enggau orang bukai.

MUTARKA ULAH TI BEPILIH MATA NGENA PENGERINDU ENGGAU PEMARUH ATI

8. Nama prinsip ke nulung kitai beserakup? Terangka.

8 Jesus ngajar siti prinsip ke nulung kitai beserakup. Iya madah ngagai bala murid iya: “Semua kita tu diri menyadi magang.” (Bacha Matthew 23:8, 9.) Reti nya, semua kitai diri menyadi magang laban kitai anak Adam. (SKR. 17:26) Jesus madahka bala murid iya mega diri menyadi magang laban sida ngaku Jehovah nya Apai sida. (Mat. 12:50) Semua sida mega enggau ruang bilik Jehovah lalu beserakup ketegal pengerindu enggau pengarap. Nya kebuah bala rasul ngumbai orang Kristian ke bukai nya bala menyadi sida dalam surat sida ngagai eklisia.—Rom. 1:13; 1 Pet. 2:17; 1 Jhn. 3:13.

9, 10. (a) Nama kebuah orang Judah enda patut temegahka bansa diri? (b) Baka ni Jesus nunjukka ulah ti ngemaruhka orang ari bansa bukai nya salah? (Peda gambar kesatu ba pun artikel.)

9 Pengudah Jesus madahka bala murid iya patut ngumbai pangan diri menyadi, iya mega madahka sida patut baruh ati. (Bacha Matthew 23:11, 12.) Baka ke udah ditemu kitai, kadang-kadang penyumbung mechah-belahka bala rasul. Lalu maya jeman Jesus, orang balat temegahka bansa diri. Mayuh orang Judah ngumbai sida manah agi ari orang bukai laban sida bala anak Abraham. Tang John Pemaptisa madah ngagai sida: ‘Petara ulih ngaga batu tu nyadi peturun Abraham!’—Luk. 3:8.

10 Jesus madahka ulah ti temegahka bansa diri nya salah. Iya nunjukka tu amat salah lebuh seiku pengajar Adat nanya iya: “Sapa pangan aku?” Kena nyaut tanya nya, Jesus nusui siti cherita. Seiku orang Judah dipalu bala penyamun lalu ninggalka iya ba jalai. Taja pan sekeda orang Judah bisi mansa, sida nadai nulung iya. Tang seiku orang Samaria kasihka iya lalu ngintu iya. Jesus ngujungka cherita iya enggau ngasuh pengajar Adat neladan orang Samaria nya. (Luk. 10:25-37) Jesus nunjukka orang Samaria ulih ngajar orang Judah nama reti rinduka pangan sida.

11. Nama kebuah bala murid Jesus enda tau bepilih mata, lalu baka ni iya nulung sida meretika pekara tu?

11 Sebedau Jesus ke serega, iya ngasuh  bala murid iya nginjil di “serata menua Judea enggau Samaria, enggau ngagai ujung dunya.” (SKR. 1:8) Ngambika ulih ngereja nya, bala murid Jesus patut muai asai ati ti temegah sereta bepilih mata. Jesus suah nyebut pasal kualiti manah ke dikembuan orang ari menua bukai, lalu tu ulih nyikap bala murid iya nginjil ngagai semua bansa. Ambika chunto, Jesus muji seiku pegawai soldadu ari menua bukai ke ngembuan pengarap ti besai. (Mat. 8:5-10) Ba menua iya empu, Nasaret, Jesus madahka baka ni Jehovah udah nulung orang ari menua bukai, baka seiku indu balu orang Ponisia ari Sarepat enggau seiku orang Siria ke kena sakit lan benama Naaman. (Luk. 4:25-27) Jesus mega nginjil ngagai seiku indu Samaria lalu diau ba menua Samaria dua hari laban orang dia rindu enggau pesan ke dibai iya.—Jhn. 4:21-24, 40.

ORANG KRISTIAN BA ABAD KETERUBAH PATUT NGELABAN ULAH TI BEPILIH MATA

12, 13. (a) Baka ni asai ati bala rasul lebuh Jesus ngajar seiku indu orang Samaria? (Peda gambar kedua ba pun artikel.) (b) Nama nunjukka James seduai John enda tentu meretika utai ti deka diajar Jesus ngagai seduai iya?

12 Bala rasul enda senang deka mutarka ulah sida ti bepilih mata. Sida tekenyit ati laban Jesus sanggup ngajar seiku indu orang Samaria. (Jhn. 4:9, 27) Nama kebuah? Engka ketegal tuai pengarap orang Judah enggai bejaku enggau orang indu ba mua orang mayuh, lalu tentu enggai bejaku enggau indu orang Samaria ke jai rita. Bala rasul ngasuh Jesus makai. Tang ketegal Jesus rindu berandau enggau indu nya, nya alai iya enda bedulika diri lapar. Petara dekaka Jesus nginjil sereta ngereja utai ti dikedekaka Iya. Nginjil ngagai indu orang Samaria nya mega utai ti dikedekaka Petara, lalu nya baka pemakai ba Jesus.—Jhn. 4:31-34.

13 James seduai John enda tentu meretika utai ti diajar Jesus nya. Lebuh bala murid enggau Jesus bejalai nengah menua Samaria, sida ngiga endur bemalam ba sebuah genturung pendiau. Tang orang Samaria enggai sida bemalam dia. James seduai John balat pedis ati lalu nanya Jesus sekalika iya dekaka seduai iya ngangauka api nurun ari langit lalu ngerusak semua genturung pendiau nya. Jesus ngerara seduai iya. (Luk. 9:51-56) James seduai John engka enda ngemalat nya pedis ati enti sema utai nya nyadi ba menua sida di Galili. Seduai iya pedis ati engka ketegal ulah ti bepilih mata. Udah nya, lebuh John nginjil ngagai orang Samaria lalu mayuh orang mendingka iya, iya engka berasai malu enggau ulah iya sebedau tu.—SKR. 8:14, 25.

14. Baka ni penanggul ke bekaul enggau ulah ti bepilih mata diputarka?

14 Enda lama pengudah Pentikos ba taun 33 M., bisi penanggul ke bekaul enggau ulah ti bechiping nyadi ba eklisia. Lebuh bala menyadi Kristian lelaki nyadung pemakai ngagai bala indu balu ke seranta, sida enda ibuhka bala indu balu ke bejaku ngena jaku Gerika. (SKR. 6:1) Tu engka nyadi ketegal ulah ti bepilih mata ngagai orang ke ngena bansa jaku bukai. Bala rasul jampat-jampat mutarka penanggul nya. Sida milih tujuh iku menyadi lelaki ke landik bejalaika pengawa nyadung pemakai nya enggau sama bela. Sida tujuh nya ngembuan nama Gerika, ke ulih ngenyamaika ati bala indu balu nya.

15. Baka ni Peter belajar ngayanka ulah ti enda bepilih mata enggau semua orang? (Peda gambar ketiga ba pun artikel.)

 15 Ba taun 36 M., bala murid Jesus berengkah nginjil ngagai semua bansa. Sebedau nya, rasul Peter selalu begulai enggau orang Judah. Udah nya Petara enggau terang nunjukka orang Kristian enda patut bepilih mata, lalu Peter nginjil ngagai Kornelius, seiku soldadu Rome. (Bacha Kereja Rasul 10:28, 34, 35.) Peter mega begulai sereta makai enggau orang Kristian ke ukai orang Judah. Taja pia, beberapa taun udah nya, lebuh ba Antiok, iya badu makai enggau orang Kristian ke ukai orang Judah. (Gal. 2:11-14) Paul ngerara Peter, lalu Peter nerima jaku rara iya. Baka ni kitai nemu? Lebuh Peter nulis surat iya ti keterubah ngagai orang Kristian ke orang Judah enggau ke ukai orang Judah ba Asia Mit, iya nyebut pasal kebuah nya beguna rinduka semua bala menyadi Kristian kitai.—1 Pet. 1:1; 2:17.

16. Orang Kristian ba abad keterubah dikelala orang ketegal nama?

16 Ketegal teladan Jesus, bala rasul belajar rinduka “semua orang.” (Jhn. 12:32; 1 Tim. 4:10) Taja pan tu begunaka awak, sida ngubah chara sida berunding pasal orang. Indah orang Kristian ba abad keterubah dikelala orang ketegal pengerindu sida ke pangan diri. Ba urung 200 M., penulis Tertullian nulis utai ti disebut orang pasal orang Kristian: “Sida rinduka pangan diri,” lalu “Sida indah sanggup mati ke pangan diri.” Ketegal orang Kristian nya udah “nyadi mensia ti baru,” sida belajar ngumbai semua orang sama bela magang, nitihka chara Petara berunding.—Kol. 3:10, 11.

17. Baka ni kitai ulih muai asai ati ti ngasuh bepilih mata? Padahka sekeda chunto.

17 Kemayaharitu, kitai mega begunaka awak enti deka muai asai ati ti ngasuh bepilih mata. Seiku menyadi Kristian indu ba menua Perancis madahka diri tusah deka muai asai ati ke baka nya. Ku iya  madahka: “Jehovah udah ngajar aku reti pengerindu, reti bekunsi, reti rinduka semua bansa mensia. Tang aku agi belajar mutarka asai ati ti ngasuh bepilih mata ngagai orang bukai, lalu tu enda seruran senang. Nya kebuah aku majak besampi pasal utai nya.” Seiku menyadi Kristian indu di Sepanyol madahka kadang-kadang iya agi ngelaban asai ati ti enda manah ngagai sekeda raban orang. Ku iya madahka: “Selalu iya aku ulih ngelaban. Tang aku nemu aku patut terus ngelaban. Aku gaga ati ulih enggau ruang bilik Jehovah ti beserakup.” Semua kitai patut belematika asai ati diri. Kati kitai mega patut muai asai ati ti ngasuh bepilih mata?

LEBUH PENGERINDU NAMBAH, ULAH TI BEPILIH MATA PAN LENYAU

18, 19. (a) Nama sekeda kebuah kitai patut nerima semua orang? (b) Baka ni kitai ulih ngereja tu?

18 Endang manah enti kitai seruran ingatka diri kala diseraraka ari Petara. (Eps. 2:12) Tang Jehovah mai kitai ngagai Iya ngena pengerindu. (Hos. 11:4; Jhn. 6:44) Lalu Kristus nerima kitai. Jesus nulung kitai ngambika ulih enggau ruang bilik Petara. (Bacha Rome 15:7.) Taja pan kitai enda sempurna, Jesus udah nerima kitai enggau siru, nya alai kitai anang enggai nerima orang bukai!

Kitai beserakup sereta rinduka pangan diri laban kitai ngiga “penemu-dalam ti datai ari atas” (Peda genteran 19)

19 Seraya kitai majak semak enggau pengujung dunya ti jai tu, orang deka majak bepechah-belah, bepilih mata, sereta ngembuan ati ti begedi. (Gal. 5:19-21; 2 Tim. 3:13) Tang ketegal kitai nembiak Jehovah, kitai ngiga “penemu-dalam ti datai ari atas,” ke ulih nulung kitai enda bepilih mata sereta ngemansangka pemaik. (Jas. 3:17, 18) Kitai gaga ati ulih bebakih enggau orang ari menua bukai, nerima chara sida ngereja utai, sereta belajarka jaku sida. Lebuh kitai ngereja tu, kitai ngasaika pemaik ti “baka sungai” enggau pengelurus ti “baka gelumbang” tasik.—Isa. 48:17, 18.

20. Nama nyadi lebuh pengerindu ngubah asai ati sereta chara kitai berunding?

20 Lebuh menyadi Kristian indu ari menua Australia belajarka Bup Kudus, semua ulah ti bepilih mata enggau asai ati ti begedi belubah-lubah lenyau. Pengerindu ngubah asai ati sereta chara iya berunding. Menyadi Kristian lelaki ari menua Kanada ke bejaku ngena jaku Perancis madahka diri diatu nyau nemu kebuah orang begedika orang bukai. Nya ketegal sida enda ngelala orang bukai. Iya nyau nemu “kualiti orang ukai bepanggai ba menua alai sida ada.” Iya indah jadi enggau seiku menyadi Kristian indu ke bejaku ngena jaku English! Peneleba tu nunjukka pengerindu ulih mutarka ulah ti bepilih mata. Pengerindu ti ngempung kitai enda mudah dirusak.—Kol. 3:14.

^ per. 1 John 17:20, 21, NW: “Aku ukai semina besampika sida aja, tang mega besampi ke orang ke arapka aku ulih pesan ti dibai sida, ngambika semua sida nyadi seiku. Baka Nuan, Apai, ke berserakup enggau aku, lalu aku beserakup enggau Nuan, awakka sida mega beserakup enggau tua, ngambika dunya arapka Nuan udah ngirumka aku.”