Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Peda Bida Entara Sida ke Nyembah Jehovah Enggau ke Enda Nyembah Iya

Peda Bida Entara Sida ke Nyembah Jehovah Enggau ke Enda Nyembah Iya

“Bala nembiak Aku deka . . . meda bida entara orang ke lurus enggau orang ke jai.”—MAL. 3:18.

LAGU: 127, 101

1, 2. Nama kebuah pengidup nembiak Petara kemayaharitu enda senang? (Peda gambar ba pun artikel.)

MAYUH lutur enggau misi bekereja ngintu pesakit ke bisi penyakit ke nemu berampit. Taja pan sida nyaga sereta nulung pesakit, tang sida mega patut nyaga diri ngambika enda kena penyakit ke benung digeraika sida. Kitai ke nyadi nembiak Jehovah mega napi utai ti sama. Mayuh ari kitai idup sereta bekereja enggau orang ke bisi ulah sereta kualiti ti amat bebida enggau kualiti Petara. Tu ulih ngasuh kitai tusah.

2 Ba hari ti penudi dunya tu, orang ke enda rinduka Petara enda bedulika standard Iya pasal utai ti ngena enggau salah. Rasul Paul nyebut pasal kualiti sida ti enda manah lebuh iya nulis surat nuju Timoti. Paul madahka kualiti ti enda manah tu deka majak nyadi seraya kitai semak enggau pengujung dunya  tu. (Bacha 2 Timoti 3:1-5 *, 13. *) Taja pan kitai engka rawan enggau kualiti ti enda manah tu, tang kitai enda ulih rari ari chara orang ke ngelingi kitai berunding, bejaku, sereta ngereja utai. (J-lam. 13:20) Ba artikel tu, kitai deka beratika baka ni kualiti tu bebida ari kualiti ti dikembuan nembiak Petara. Kitai mega deka beratika utai ke ulih digaga kitai kena nyaga diri ari dirampit kualiti ti enda manah lebuh kitai nulung orang ngelala Jehovah.

3. Orang ke baka ni ti dipadah ba 2 Timoti 3:2-5?

3 Paul nulis, ba hari ti penudi bisi “mayuh macham penusah deka nyadi.” Udah nya iya ngaga siti lis pasal 19 iti kualiti enda manah ke bisi maya jeman kitai. Semua kualiti tu sama enggau kualiti ti dipadah Paul ba Rome 1:29-31, tang lis ba surat iya ke nuju Timoti ngena leka jaku ke nadai ba ayat bukai dalam Bup Kudus Kristian jaku Gerika. Paul ngepunka lis iya ngena rambai jaku “laban orang deka semina.” Tang ukai semua orang ngembuan kualiti ti enda manah baka nya. Orang Kristian ti bendar ngembuan kualiti ke amat bebida.—Bacha Malaki 3:18.

CHARA KITAI MERESA DIRI EMPU

4. Ba runding nuan, nama reti ngerigangka diri ketegal sumbung?

4 Pengudah Paul madahka mayuh orang deka rinduka diri empu aja sereta angkunka duit, iya mega madahka orang deka bejaku begah, sumbung, sereta ngerigangka diri laban sumbung. Orang ke bisi kualiti tu suah ngumbai diri manah agi ari orang bukai ketegal gamal sida, utai ke ulih dikereja sida, utai ti dikemisi sida, tauka penuduk sida dalam pengidup. Orang ke baka nya semina deka ditinggika orang bukai. Seiku pakar nulis pasal orang ke baka nya: “Ba dalam ati iya bisi siti alta lalu iya nyembah diri empu ba alta nya.” Sekeda orang bisi madahka, penyumbung balat enda manah nyentukka orang ke sumbung enda rindu lebuh sida meda penyumbung ba orang bukai.

5. Baka ni nembiak Jehovah ke tetap ati nyau nyadi sumbung?

5 Jehovah begedika penyumbung, ke dikumbai “pendiau ti sumbung” dalam Bup Kudus. (J-lam. 6:16-19) Penyumbung ngenyauhka orang ari Petara. (Mas. 10:4) Penyumbung nya siti kualiti ari Sitan. (1 Tim. 3:6) Tang sayau amat, sekeda nembiak Petara ti taluk bisi kena rampit ulah ti sumbung. Ambika chunto, Raja Usiah ari menua Judah udah betaun-taun tetap ati. Tang Bup Kudus madahka: ‘Lebuh Usiah nyau udah kering, iya sumbung. Penyumbung iya ngujungka iya dibuai. Iya enda ngasika Jehovah Petara iya.’ Usiah mansang ngagai Rumah Sembiang lalu nunu menyan, iya nya pengawa ke ukai dikereja iya. Udah nya, Raja Hesekiah ke tetap ati mega nyadi sumbung, taja pan enda lama aja.—2 Ban. 26:16; 32:25, 26.

6. Nama utai ke engka ngasuh David ulih nyadi sumbung? Tang nama kebuah iya mengkang baruh ati?

6 Sekeda orang nyadi sumbung laban sida manah gamal, tebilang, landik ba musik, bekuasa, tauka dikerinduka orang bukai. David ngembuan semua utai tu, tang  iya mengkang baruh ati sepemanjai pengidup iya. Ambika chunto, pengudah David munuh Goliat, Raja Saul madahka David tau jadi enggau anak indu iya. Tang ku David madahka: “Sapa aku tu, lalu purih sapa aku tu, alai aku tau nyadika menantu raja?” (1 Sam. 18:18) Nama nulung David mengkang baruh ati? David nemu, iya bisi penau, penuduk, sereta ulah ti manah laban Petara baruh ati sereta ibuhka iya. (Mas. 113:5-8) David nemu, semua utai manah ke dikemisi iya datai ari Jehovah.—Banding 1 Korint 4:7.

Orang ulih ditarit ngagai Jehovah ngena pemaruh ati nembiak Iya

7. Nama ulih nulung kitai nunjukka diri baruh ati?

7 Baka David, nembiak Jehovah kemayaharitu nguji deka baruh ati. Ati kitai berasai ditegu laban nemu Jehovah Empu, ke Pemadu Tinggi, nya baruh ati. Kitai deka nitihka jaku tu: “Rasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat.” (Kol. 3:12) Kitai mega nemu pengerindu “enda temegah tauka sumbung.” (1 Kor. 13:4) Lebuh orang bukai meda kitai baruh ati, sida mega deka ngelala Jehovah. Baka laki ke enda arapka Jehovah ulih ditarit ngagai Jehovah ngena ulah manah bini iya ke Kristian, orang mega ulih ditarit ngagai Jehovah ngena pemaruh ati nembiak Iya.—1 Pet. 3:1.

CHARA KITAI BEGULAI ENGGAU ORANG BUKAI

8. (a) Nama runding orang kemayaharitu pasal enda ngasika apai indai? (b) Nama diasuh Bup Kudus gaga anak?

8 Paul nerangka chara orang deka begulai enggau pangan diri ba hari ti penudi. Iya nulis, bala anak enda ngasika apai indai. Kemayaharitu, mayuh bup, cherita wayang, sereta program TV mandangka ulah bala anak ke enda ngasi nya, utai ti enda salah sereta ulih diterima. Tang kebendar, ulah ti enda ngasi ngelemika ruang bilik, lalu nya ulih mai penanggul ngagai semua orang. Orang udah lama nemu pasal utai tu. Ambika chunto, ba menua Gerika kelia, orang ke nyamah apai indai diri deka lenyau hak ba komuniti iya. Di baruh adat Rome, orang ke nyamah apai diri deka diukum baka orang ke munuh. Bup Kudus jaku Hebrew enggau Bup Kudus jaku Gerika ngasuh bala anak bebasaka apai indai sida.—P-sut. 20:12; Eps. 6:1-3.

9. Nama ulih nulung anak ngasika apai indai?

9 Nama ulih nulung anak ngasika apai indai taja pan orang ke ngelingi sida enda ngasi? Lebuh anak mikirka semua utai manah ti udah dikereja apai indai ke sida, anak patut berasai beterima kasih lalu deka ngasika apai indai. Orang ke nembiak mega patut nemu, Petara, Apai semua kitai, deka sida ngasika apai indai. Lebuh orang ke nembiak nyebut utai ti manah pasal apai indai diri, sida nulung bala pangan bebasa agi ke apai indai diri. Amat, enti apai indai nadai penyayau ngagai anak sida, anak tusah deka ngasika sida. Tang lebuh orang ke nembiak ngasaika apai indai amat sayauka iya, nya ulih nulung iya ngasika apai indai taja pan tusah deka ngereja nya. Seiku menyadi Kristian lelaki biak ke benama Austin madahka: “Taja  pan aku suah bisi pengingin deka ngereja utai ti salah, tang apai indai netapka iring ti ulih dititihka aku, nerangka kebuah atur diberi, sereta nadai natak kemaya deka berandau. Tu nulung aku ngasi. Aku ulih beratika sida ibuhka aku, lalu nya ngasuh aku deka ngelantangka ati sida.”

10, 11. (a) Nama kualiti enda manah ti diayanka orang ke enda rinduka pangan diri? (b) Ni penalam pengerindu orang Kristian ti bendar ngagai orang bukai?

10 Paul mega nyebut pasal kualiti bukai ke nunjukka orang nadai pengerindu ke pangan diri. Pengudah nyebut “enda ngasika apai indai,” iya nyebut pasal enda nemu meri terima kasih. Orang ke enda nemu meri terima kasih enda gaga ati ke utai manah ti dikereja orang bukai ke sida. Paul mega madahka orang deka enda taluk. Sida enggai sepenemu enggau orang, reti nya sida enggai bebaik enggau orang bukai. Sida deka bejaku mechat Petara tauka orang sereta nyadi munsuh pangan sida. Lalu sida deka betenahka orang, iya nya nusui pemula ke ulih ngenyaika nama orang. *—Peda nota kaki.

11 Nembiak Jehovah amat bebida laban sida ngayanka pengerindu ti tulin ngagai orang. Tu endang amat. Indah Jesus madahka, ba Adat Moses, rinduka orang bukai nya pesan kedua berat pengudah pesan ke ngasuh rinduka Petara. (Mat. 22:38, 39) Jesus mega madahka, orang Kristian ti bendar dikelala orang ketegal pengerindu ti diayanka sida ngagai pangan diri. (Bacha John 13:34, 35.) Orang Kristian ti bendar indah rinduka munsuh sida.—Mat. 5:43, 44.

12. Baka ni Jesus ngayanka pengerindu ngagai orang?

12 Jesus nunjukka diri amat rinduka orang. Iya nunjukka tu enggau bejalai ngagai siti menua ke siti menua madah ngagai orang berita manah pasal Perintah Petara. Iya ngeraika orang ke buta, orang ke enda ulih bejalai, orang ke sakit lan, enggau orang ke bengal. Iya mega ngangkatka orang ke udah mati idup baru. (Luk. 7:22) Jesus indah meri nyawa diri kena nyelamatka mensia, taja pan mayuh orang begedika iya. Jesus enggau sempurna neladan pengerindu Apai iya. Di serata dunya, Saksi-Saksi Jehovah neladan Jesus lalu ngayanka pengerindu ngagai orang bukai.

13. Baka ni pengerindu ke diayanka kitai ngagai orang bukai nulung sida ngelala Jehovah?

13 Lebuh kitai ngayanka diri rinduka orang, tu ngasuh sida deka ngelala Apai kitai ti di serega. Ambika chunto, seiku lelaki di Thailand ngagai konvensyen pelilih menua lalu rindu ati lebuh iya meda bala menyadi Kristian ngayanka pengerindu ngagai pangan diri. Pengudah iya pulai ke rumah, iya minta belajarka Bup Kudus dua kali seminggu enggau Saksi-Saksi Jehovah. Udah nya nginjil ngagai semua kaban belayan iya. Enam bulan udah nya, iya enggau sekula lalu diberi pengawa macha Bup Kudus ti keterubah ba Palan Gempuru. Kati kitai ngayanka pengerindu ngagai orang bukai? Tanya diri empu: ‘Kati aku enggau naka ulih nulung diri sebilik, orang ba eklisia aku, sereta orang ba endur nginjil? Kati aku bisi runding ti sama baka Jehovah pasal orang bukai?’

UKUI KAMPUNG ENGGAU ANAK DOMBA

14, 15. Nama kualiti enda manah ke diayan mayuh orang? Baka ni sekeda orang ngubah personaliti sida?

14 Ba hari ti penudi, orang mega ngayanka  kualiti bukai ke patut diseliahka kitai. Ambika chunto, mayuh orang begedika utai ti badas. Sida indah nulak utai ti badas. Orang ke baka tu enda nemu nagang diri, mangah. Sekeda nya kieh. Sida enda berunding ngereja utai lalu enda bedulika ulah sida ke ulih ngenusahka orang bukai.

15 Mayuh orang ke kala ngembuan ulah baka jelu ti mangah udah ngubah personaliti sida. Ubah ti besai tu udah dipadah dalam Bup Kudus. (Bacha Isaiah 11:6, 7.) Kitai macha dalam Bup Kudus pasal jelu babas, baka ukui kampung enggau singa, ke ulih begulai enggau anak domba enggau anak sapi. Nama kebuah sida ulih begulai? Ku Bup Kudus madahka: ‘Dunya deka penuh laban penemu Jehovah baka ai ti ngemenuhka tasik.’ (Isa. 11:9) Jelu enda ulih belajar pasal Jehovah, nya alai ayat tu madahka ubah ke digaga orang ba personaliti sida.

Prinsip Bup Kudus ulih ngubah pengidup! (Peda genteran 16)

16. Baka ni Bup Kudus nulung orang ngaga ubah ba personaliti sida?

Enda senang ngaga ubah ke baka tu, tang roh kudus Petara ulih nulung orang ke deka ngelantangka ati Iya

16 Mayuh bala menyadi Kristian kitai suba mangah baka ukui kampung tang diatu sida rinduka pemaik. Nuan ulih macha pasal sekeda peneleba sida dalam siri “Bup Kudus Ngubah Pengidup,” ke bisi ba jw.org. Sida ke udah ngelala sereta nyembah Jehovah tu enda baka orang ke bepegai ba agama, tang enda idup sejalai enggau ajar agama sida. Diatu sida ‘nyadi mensia ti baru [“ngerasukka personaliti ti baru,”NW], ditempa neladan gamal  Petara lalu nyadi amat lurus sereta kudus.’ (Eps. 4:23, 24) Lebuh orang belajar pasal Petara, sida nemu sida patut nitihka standard Iya. Tu nulung sida ngaga ubah ba utai ti dipechaya sida, chara sida berunding, sereta utai ti dikereja sida. Enda senang ngaga ubah ke baka tu, tang roh kudus Petara ulih nulung orang ke deka ngelantangka ati Iya.

“ANANG BEGULAI ENGGAU SIDA”

17. Baka ni kitai ulih nyeliah ari dikuingka orang ke ngembuan kualiti ti enda manah?

17 Kitai enda tusah meda bida entara orang ke nyembah enggau ke enda nyembah Petara. Kitai patut bejimat ngambika kualiti sida ti enda manah, enda nguingka kitai. Kitai deka nitihka iring ari Jehovah ke enda ngasuh kitai begulai enggau orang ke bisi ulah ti enda manah baka ke disebut ba 2 Timoti 3:2-5. Amat, kitai enda entu ulih nyeliahka semua orang ke ngembuan kualiti ti enda manah. Kitai engka gawa, besekula enggau sida, tauka diau enggau sida. Tang kitai tau enda ibuh berunding tauka bisi ulah baka sida. Nama ulih nulung kitai? Kitai ulih ngeringka kaul kitai enggau Jehovah lebuh belajarka Bup Kudus sereta milih orang ke rinduka Iya nyadika pangan rapat.

18. Baka ni utai ti disebut sereta dikereja kitai ulih nulung orang bukai ngelala Jehovah?

18 Kitai mega deka nulung orang bukai ngelala Jehovah. Giga peluang kena meri saksi, lalu minta Jehovah nulung nuan nyebut utai ti patut ba maya ti ngena. Kitai patut ngawakka orang bukai nemu kitai tu Saksi-Saksi Jehovah. Udah nya, ulah kitai ti manah deka mai mulia ngagai Petara, ukai mai mulia ngagai kitai empu. Jehovah udah ngajar kitai ‘muai semua ulah ti jai, enggau semua pengingin dunya, lalu nemu nagang diri, diau lurus, sereta nangika Petara dalam dunya tu.’ (Tit. 2:11-14) Enti kitai neladan Jehovah sereta ngereja utai ti dikedekaka Iya, orang bukai ulih meda nya. Sekeda orang indah engka madahka: ‘Kami ingin deka enggau kita, laban kami udah ninga Petara bisi enggau kita.’—Sek. 8:23.

^ per. 2 2 Timoti 3:1-5, NW: “Tang nuan enda tau enda nemu tu: ba hari ti penudi mayuh macham penusah deka nyadi. Orang deka rinduka diri empu aja, angkunka duit, bejaku begah, sumbung, bejaku mechat Petara tauka orang, enda ngasika apai indai, enda nemu meri terima kasih, enda taluk, nadai penyayau, enggai sepenemu enggau orang, betenahka orang, enda nemu nagang diri, mangah, begedika utai ti badas, nyadi munsuh pangan sida, kieh, ngerigangka diri laban sumbung, rindu ngelantangka ati diri tang enda rinduka Petara, baka ke bepegai ba agama, tang sida enda idup sejalai enggau ajar agama sida.”

^ per. 2 2 Timoti 3:13, NW: “Tang orang ke jai enggau orang ke pura-pura ngapa, deka majak jai-sejai, nipu orang, lalu sida empu deka kena tipu.”

^ per. 10 Rambai jaku “orang ke betenah” dalam jaku Gerika nya di·aʹbo·los. Dalam Bup Kudus, rambai jaku tu dituju ngagai Sitan, ke nyebut utai ti bula pasal Petara.