Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Nama Kebuah Meri Ngagai Iya ke Udah Bisi Semua Utai?

Nama Kebuah Meri Ngagai Iya ke Udah Bisi Semua Utai?

‘Petara kami, kami meri terima kasih ngagai Nuan, lalu kami muji nama Nuan ti bemulia.’—1 BAN. 29:13.

LAGU: 80, 50

1, 2. Baka ni Jehovah nya gerah jari ngagai kitai?

JEHOVAH nya Petara ti gerah jari. Semua utai ti dikemisi kitai datai ari Iya. Semua utai berega ke bisi ba dunya enggi Iya magang, lalu Iya ngena utai nya nyukung pengidup. (Mas. 104:13-15; Hag. 2:8) Ari Bup Kudus kitai ulih nemu, Jehovah kekadang ngena utai ti berega tu nyediaka utai ti diguna nembiak Iya.

2 Ambika chunto, Jehovah meri mana enggau ai ke bansa Israel lebuh sida diau ba menua puang sepengelama 40 taun. (P-sut. 16:35) Enggau nya, sida bisi semua utai ti diguna sida. (Neh. 9:20, 21) Udah nya, Jehovah meri nabi Elisa kuasa kena nambahka penyampau minyak ke diempu seiku indu balu ke tetap ati. Pemeri ari Petara tu nulung indu nya mayar utang lalu iya agi bisi chukup duit ke dikena iya enggau anak lelaki iya beridup. (2 Raj. 4:1-7) Lalu enggau kuasa ari Jehovah, Jesus ulih ngaga kereja ajih kena nyediaka pemakai enggau duit ke diguna.—Mat. 15:35-38; 17:27.

3. Nama deka dikerandauka kitai ba artikel tu?

 3 Jehovah ulih ngena sebarang utai ti dipilih Iya kena nyukung utai ti ditempa Iya. Taja pia, Iya deka nembiak Iya meri utai ke ulih sida kena nyukung gerempung Iya. (P-sut. 36:3-7; bacha Jaku Dalam 3:9. *) Nama kebuah Jehovah deka kitai ngena utai berega ti dikemisi kitai utai ti udah diberi Iya? Baka ni nembiak Jehovah maya jeman Bup Kudus melanja kereja ari Iya? Baka ni gerempung Jehovah ngena duit ke diberi kemayaharitu? Artikel tu deka nyaut semua tanya nya.

NAMA KEBUAH KITAI MERI NGAGAI JEHOVAH?

4. Nama diayanka kitai ngagai Jehovah lebuh kitai nyukung kereja ari Iya?

Kitai meri ngagai Jehovah laban kitai rinduka Iya

4 Kitai meri utai ngagai Jehovah laban kitai rindu sereta beterima kasih ngagai Iya. Lebuh kitai mikirka semua utai ti udah digaga Jehovah ke kitai, ati kitai beresai ditegu. Raja David ngasaika tu lebuh iya madah pasal utai ti diguna kena nirika Rumah Sembiang. David madahka semua utai ti diulih kitai datai ari Jehovah lalu sebarang utai ti diberi kitai ngagai Jehovah endang enggi Iya.—Bacha 1 Bansa Israel 29:11-14.

5. Baka ni Bup Kudus nunjukka meri utai enggau gerah jari nya utai ti beguna dalam sembah ti bendar?

5 Kitai mega meri ngagai Jehovah laban tu chara nyembah Iya. Dalam siti genera, rasul John ninga nembiak Jehovah ti di serega nyebut: ‘O Jehovah Petara kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.’ (Pem. 4:11) Jehovah endang layak nerima semua mulia engga basa, nya alai kitai deka meri Iya utai ti pemadu badas. Nengah Moses, Jehovah ngasuh bansa Israel ngatur tiga iti pengerami dalam setaun. Siti ari sembah ba pengerami nya bekaul enggau pengawa meri ngagai Jehovah. Orang Israel diasuh “meri pemeri.” (U-dat. 16:16) Kemayaharitu, meri utai enggau gerah jari mega sebagi agi sembah kitai. Enggau chara tu, kitai nunjukka diri beterima kasih sereta nyukung gerempung Jehovah.

6. Nama kebuah nya manah enti kitai deka meri utai? (Peda gambar ba pun artikel.)

6 Endang manah enti meri enggau gerah jari kelimpah ari nerima aja. (Bacha Jaku Dalam 29:21. *) Uji gambarka, seiku anak mit bulih mimit duit belanja ari apai indai iya lalu udah nya iya ngena sekeda duit nya meli siti hadiah ke apai indai iya. Baka ni asai ati apai indai iya lebuh nerima hadiah nya? Tauka uji gambarka, seiku pengerintis ti agi biak diau serumah enggau apai indai iya. Iya meri seduai iya mimit duit kena nulung mayar sua tauka meli pemakai ke sida sebilik. Apai indai iya enda ngarapka iya ngereja nya, tang seduai iya nerima duit ke diberi  iya. Nama kebuah? Laban nya chara kena iya ngayanka diri beterima kasih ke semua utai ti dikereja seduai iya. Pia mega, Jehovah nemu, meri utai berega ti dikemisi kitai ngagai Iya, nya utai ti manah.

BAKA NI NEMBIAK JEHOVAH KELIA MENYA MERI PEMERI

7, 8. Baka ni nembiak Jehovah maya jeman Bup Kudus netapka chunto lebuh sida meri pemeri (a) ke siti-siti projek? (b) kena nyukung kereja Iya?

7 Ari Bup Kudus, kitai nemu nembiak Jehovah meri pemeri kena nyukung kereja Jehovah. Kekadang sida meri pemeri ke siti-siti projek. Ambika chunto, Moses meransang orang Israel meri pemeri kena nirika langkau sembiang. Udah nya, Raja David ngereja utai ti sama kena nirika Rumah Sembiang. (P-sut. 35:5; 1 Ban. 29:5-9) Lebuh Raja Joas merintah, bala imam nyeruri Rumah Sembiang ngena duit ke diberi orang. (2 Raj. 12:4, 5) Ba abad keterubah, lapar pungkang bisi nyadi di Judea lalu bala menyadi Kristian begunaka bantu. Nya alai genap iku orang Kristian mutuska penyampau ti ulih diberi sida seiku-seiku ngambi dikirum ngagai menyadi Kristian di Judea.—SKR. 11:27-30.

8 Nembiak Jehovah mega meri duit kena nyukung orang ke ngulu ba kereja Iya. Ambika chunto, di baruh Adat Moses, orang Lewi nadai ngembuan reta baka raban bansa orang Israel ti bukai. Nya alai orang Israel meri sepuluh peratus ari utai ti dikemisi sida ngagai orang Lewi. Tu nulung orang Lewi betatika kereja sida ba langkau sembiang. (P-pau. 18:21) Pia mega, bala indu ke gerah jari ngena utai ti dikemisi sida nyukung Jesus enggau bala rasul iya.—Luk. 8:1-3.

Ari orang ke kaya bendar nyentuk ngagai orang ke seranta bendar, semua bela ulih meri

9. Kelia menya, ari ni penatai pemeri ke diberi?

9 Semua pemeri nya ari mayuh macham penatai. Orang Israel ke meri pemeri kena nirika langkau sembiang engka udah meri utai ti dibai sida ari menua Ejip. (P-sut. 3:21, 22; 35:22-24) Ba abad keterubah, sekeda menyadi Kristian nyual utai ti dikemisi sida, baka tanah tauka rumah, lalu mai duit nya ngagai bala rasul. Bala rasul ngena duit nya nulung bala menyadi Kristian ke begunaka tulung. (SKR. 4:34, 35) Sekeda menyadi Kristian ke bukai enggau tetap nyimpan duit ngambika ulih diberi nyadika pemeri. (1 Kor. 16:2) Nya alai ari orang ke kaya bendar nyentuk ngagai orang ke seranta bendar, semua bela ulih meri.—Luk. 21:1-4.

BAKA NI KITAI MERI PEMERI KEMAYAHARITU

10, 11. (a) Baka ni kitai ulih neladan nembiak Jehovah ti gerah jari ke idup maya jeman Bup Kudus? (b) Nama runding nuan pasal nyukung pengawa Perintah Petara?

10 Kemayaharitu, kitai mega engka dipinta meri pemeri ke siti-siti pengawa. Eklisia nuan engka bekira deka nyeruri Palan Gempuru ke alai kita begempuru tauka nirika siti Palan Gempuru ti baru. Tauka pampang opis ba menua nuan engka patut diseruri. Kitai mega ulih nulung nyukung belanja ba konvensyen  kitai. Tauka bala menyadi Kristian kitai ba menua bukai engka merinsa ketegal pengerusak alam, lalu begunaka tulung ari kitai. Pemeri ari kitai mega dikena nulung pengerintis seberai tasik, pengerintis ti spesial, tuai ti ngabas, sereta sida ke gawa ba indu opis enggau ba pampang opis di serata dunya. Eklisia nuan mega engka enggau tetap ngirumka duit pemeri kena nirika Palan Gempuru Besai sereta Palan Gempuru ke bala menyadi Kristian kitai ba menua bukai di dunya.

11 Semua kitai ulih meri pemeri kena nyukung kereja ke benung digaga gerempung Jehovah ba hari ti penudi tu. Nama orang ke meri pemeri nadai dipadah. Lebuh kitai nyimpan duit dalam kutak pemeri ba Palan Gempuru tauka meri pemeri nengah online ba jw.org, kitai enda madah ngagai orang bukai pasal penyampau pemeri ke diberi kitai. Tang baka ni enti nuan ngasaika pemeri nuan nya kelalu mimit? Ke amat, mayuh ari pemeri ke diterima gerempung kitai datai ari mayuh pemeri ti mit, ukai datai ari pemeri ti besai. Indah bala menyadi Kristian kitai ke bisi mimit aja duit neladan orang Kristian ba abad keterubah di Masedonia. Sida balat “seranta,” tang sida minta ngambika dikemendar meri lalu udah nya meri utai enggau gerah jari.—2 Kor. 8:1-4.

12. Baka ni gerempung Jehovah nguji ngena pemeri enggau pemadu manah?

12 Raban ti Ngiring nunjukka sida tetap ati sereta bepenemu-dalam lebuh ngena duit pemeri nya. (Mat. 24:45) Sida ke dalam raban nya besampi ngambika ulih ngaga pemutus ti manah, sereta bejimat berundingka chara ngena duit. (Luk. 14:28) Maya jeman Bup Kudus, orang ke nyaga pemeri ke diberi nya nentuka pemeri nya semina dikena nyembah Jehovah aja. Ambika chunto, Esra pulai ngagai Jerusalem mai pemeri ari raja menua Persia, nyengkaum emas, pirak, sereta reta bukai ke beungkus lebih ari $100 juta (U.S.) kemayaharitu. Esra ngumbai utai nya pemeri ke diberi ngagai Jehovah. Nya alai Esra meri iring ti nyemetak kena nyaga utai nya laban sida mai utai nya nengah menua ti enda likun. (Esr. 8:24-34) Betaun-taun udah nya, rasul Paul ngumpul duit kena nulung menyadi Kristian di Judea. Iya nentuka sida ke mai duit endang deka ‘ngereja utai ti ngena, ukai semina di mua Jehovah aja, tang mega di mua mensia.’ (Bacha 2 Korint 8:18-21.) Kemayaharitu, gerempung kitai neladan Esra seduai Paul lalu ngena pemeri ke diberi enggau bejimat.

13. Nama kebuah gerempung Jehovah ngaga sekeda ubah baru-baru tu?

13 Siti-siti ruang bilik deka ngaga ubah ba chara ngena duit ngambika enda ngena duit lebih ari ke patut. Tauka sida deka ngiga chara ke ulih nulung sida idup enggau pengumbas iya ngambika ulih ngaga mayuh agi kereja ke Jehovah. Pia mega enggau gerempung Jehovah. Baru-baru tu, bisi mayuh projek baru ti ngagitka ati, lalu kekadang tu ngasuh mayuh duit ke dikena ari ke diterima. Nya alai gerempung Jehovah ngiga chara ngelimat duit sereta ngasuh kereja nya muntang agi, ngambika pemeri ke diberi nuan enggau gerah jari ulih dikena enggau manah.

PENGUNTUNG KE DATAI ARI PEMERI NUAN

Pemeri nuan ke gerah jari nulung pengawa kitai di serata dunya (Peda genteran 14-16)

14-16. (a) Baka ni pemeri ke diberi nuan dikena? (b) Baka ni sekeda projek tu meri penguntung ngagai nuan?

14 Mayuh orang ke udah betaun dalam  pemendar madahka kitai diatu nerima mayuh pemeri ari gerempung Jehovah ari ke udah. Diatu kitai bisi jw.org sereta Berita JW. Kitai bisi New World Translation of the Holy Scriptures dalam mayuh bengkah jaku. Ba taun 2014/2015, Konvensyen Entarabansa “Giga Dulu Perintah Petara!” diatur sepengelama tiga hari ba sekeda stadium ti pemadu besai di 14 buah nengeri di serata dunya. Semua orang ke datai gaga ati!

15 Mayuh orang madahka diri beterima kasih ke pemeri ti datai ari gerempung Jehovah. Ambika chunto, sepasang laki bini ti gawa ke Jehovah di Asia nulis: “Kami duai gawa ba siti nengeri mit. Nya alai, kami duai kekadang ngasaika diri jauh ari bala menyadi bukai, lalu enda ingatka kereja Jehovah mega mayuh digaga ba endur bukai. Tang pengudah kami meda mayuh program ba Berita JW, kami nyau nemu baru kami tu sebagi ari menyadi Kristian di serata dunya. Bala menyadi Kristian ba nengeri nya amat gagit ati enggau Berita JW. Kami suah ninga sida madahka diri berasai semak ngagai bala Raban ti Ngiring pengudah meda program Berita JW tiap bulan, sida. Diatu sida temegah agi ati enggau gerempung Petara.”

16 Di serata dunya, nyauka 2,500 buah Palan Gempuru ke benung didirika tauka diseruri. Raban ba siti eklisia di Honduras madahka sida ingin deka ngembuan Palan Gempuru ke diri empu, tang diatu utai ti dikingin sida nya amat. Ku sida nulis: “Kami gaga amat ati ulih enggau gerempung Jehovah ti di dunya enggau di serega, sereta begulai enggau bala menyadi Kristian di serata dunya.” Mayuh menyadi Kristian madahka asai ati ti sama lebuh sida nerima Bup Kudus sereta litaricha bukai dalam jaku sida empu, lebuh bala menyadi Kristian nulung sida pengudah pengerusak alam, tauka lebuh  sida meda asil manah ba pengawa nginjil di nengeri besai sereta nginjil ba mua orang mayuh ba kandang menua sida.

17. Baka ni kitai nemu Jehovah ke nyukung gerempung Iya kemayaharitu?

17 Mayuh orang ke ukai Saksi-Saksi Jehovah enda ulih meretika baka ni kitai ulih bejalaika semua projek nya enti semina ngena duit pemeri aja. Seiku pegawai tinggi ari siti kompeni besai ngelawa kilang nyelak litaricha kitai. Iya alit ati laban semua kereja nya digaga pekereja sukarela, ngena duit pemeri, sereta nadai ngatur pengawa kena ngumpul duit. Iya madahka, kereja ke dikereja kitai tu tusah deka dijapai. Kitai mega setuju! Tang kitai nemu pengawa tu ulih mujur ketegal bisi sukung ari Jehovah.—Jop 42:2.

BEREKAT KE DIULIH LEBUH KITAI MALAS PEMERI JEHOVAH

18. (a) Nama berekat ke diterima kitai lebuh meri kena nyukung Perintah Petara? (b) Baka ni kitai ulih ngajar bala anak sereta orang ke baru ngereja utai ti sama?

18 Jehovah meri kitai basa sereta peluang nyukung kereja Perintah Petara ti besai. Iya meri jamin, lebuh kitai ngereja nya, Iya deka merekat kitai. (Mal. 3:10) Jehovah besemaya enti kitai meri utai enggau gerah jari, semua utai deka mujur ba kitai. (Bacha Jaku Dalam 11:24, 25.) Iya mega madahka kitai deka lantang ati lebuh kitai meri, laban “beberekat [“lantang,” NW] agi orang ke meri, ari orang ke nerima.” (SKR. 20:35) Ari utai ke disebut enggau dikereja kitai, kitai ulih ngajar bala anak tauka orang ke baru chara meri pemeri ngagai pengawa tu sereta ngasaika mayuh berekat.

19. Baka ni artikel tu udah meransang nuan?

19 Semua utai ti dikemisi kitai datai ari Jehovah. Lebuh kitai malas pemeri ngagai Iya, kitai nunjukka diri rinduka Iya sereta beterima kasih ke semua utai ti udah dikereja Iya ke kitai. (1 Ban. 29:17) Lebuh orang Israel meri pemeri kena nirika langkau sembiang, sida ‘udah meri enggau ati ti gerah mudah ngagai Jehovah, lalu sida gaga ati ke pemayuh utai ti diberi.’ (1 Ban. 29:9) Aram meh kitai malas pemeri ti udah diberi Jehovah ngagai kitai lalu bulih ati ti gaga sereta puas.

^ per. 3 Jaku Dalam 3:9, NW: “Kemesaika Jehovah ngena utai ti berega enggau buah keterubah ari semua hasil utai ti ditanam nuan.”

^ per. 6 Jaku Dalam 29:21, NW: “Enti nuan meri semua utai ti dipinta ulun nuan kenyau ari iya agi mit, jemah ila iya deka nyadi orang ke enda nemu beterima kasih.”