Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Gawa ke Jehovah, Petara Pengelepas

Gawa ke Jehovah, Petara Pengelepas

“Dia alai roh kudus Jehovah, dia meh pengelepas.”—2 KOR. 3:17, NW.

LAGU: 49, 73

1, 2. (a) Nama kebuah pekara ke bekaul enggau nyadi ulun sereta pengelepas nya utai ti ngirauka ati maya jeman rasul Paul? (b) Sapa ke dikumbai Paul Pun pengelepas ti bendar?

ORANG Kristian ba abad keterubah dipegai Perintah Rome. Orang ba menua nya temegahka undang-undang, temegahka sistem ti dikena sida nentuka sesiti utai nya lurus tauka enda, sereta pengelepas ke dikemisi sida. Tang, perintah ke kering nya begunaka bala ulun kena ngereja mayuh pengawa berat. Bisi sekali, kira-kira 1 ari tiap 3 iku orang ba Perintah Rome nya ulun. Nya kebuah orang biasa, nyengkaum orang Kristian irau amat pasal pekara ti bekaul enggau pengawa nyadi ulun sereta pengelepas.

2 Rasul Paul suah nulis pasal pengelepas. Tang iya ukai nguji deka mutarka penanggul ba dunya, baka ke deka digaga mayuh orang maya nya. Paul enggau bala menyadi Kristian iya bebendar ngajar orang berita manah pasal Perintah Petara sereta nulung sida meretika kebuah genselan tebus Jesus  Kristus nya beguna amat. Paul madahka dini alai bala menyadi Kristian iya ulih tetemuka Pun pengelepas ti bendar. Ku iya nulis “dia alai roh kudus Jehovah, dia meh pengelepas.”—2 Kor. 3:17, NW.

3, 4. (a) Nama dikerandauka Paul ba beberapa iti ayat sebedau 2 Korint 3:17? (b) Nama patut dikereja kitai ngambika bulih pengelepas ke datai ari Jehovah?

3 Ba surat Paul ti kedua nuju orang Korint, Paul nyebut pasal mua Moses ke beperenching lebuh iya nurun ari Bukit Sinai pengudah iya bejaku enggau melikat Jehovah. Lebuh orang Israel meda Moses, sida takut, nya alai Moses mampul mua diri ngena kain. (P-sut. 34:29, 30, 33; 2 Kor. 3:7, 13) Paul nerangka: ‘Tang lebuh orang nguingka diri ngagai Jehovah, kain tambai nya dibuai.’ (2 Kor. 3:16) Nama reti utai ku Paul?

4 Ba artikel sebedau tu kitai nemu, Jehovah nya Penempa semua utai lalu semina Iya aja ke bisi pengelepas ti nadai sekat. Nya alai kitai ulih ngumbai “dia alai roh kudus Jehovah,” dia meh pengelepas. Tang Paul madahka enti kitai deka bulih pengelepas tu, kitai patut nguingka diri ngagai Jehovah. Reti nya kitai patut bisi kaul ti rapat enggau Iya. Orang Israel ba menua puang semina meda utai nitihka runding mensia, ukai nitihka runding Jehovah. Runding enggau ati sida baka ke udah dipampul. Sida deka ngena pengelepas ti baru nya ngemuaska pengingin diri empu.—Heb. 3:8-10.

Indah orang ke dijil tau bisi pengelepas

5. (a) Nama bansa pengelepas ke diberi roh kudus Jehovah? (b) Baka ni kitai nemu orang tau bisi pengelepas ti diberi Jehovah taja pan sida dijil tauka nyadi ulun? (c) Nama sekeda tanya ke patut disaut kitai?

5 Pengelepas ti diberi roh kudus Jehovah besai agi enti dibanding enggau pengelepas ari nyadi ulun. Roh kudus Jehovah ulih ngelepaska kitai ari dosa enggau pemati, sereta mega ngelepaska kitai ari sembah ti pelesu enggau adat ti salah. (Rom. 6:23; 8:2) Nya endang pengelepas ti dianti-anti! Indah orang ke nyadi ulun tauka dijil tau bisi pengelepas tu. (P-kal. 39:20-23) Menyadi Nancy Yuen enggau Menyadi Harold King bela dijil bepuluh taun ketegal pengarap seduai iya. Taja pia seduai iya bisi pengelepas nya. Nuan ulih meda seduai iya nusui pasal peneleba diri ba Berita JW. (Peda ba INTERBIU ENGGAU PENGALAMAN > BETAN NAPI PENGUJI.) Diatu aram kitai nyaut dua iti tanya tu. Baka ni kitai ulih nunjukka pengelepas nya amat berega ba kitai? Lalu baka ni kitai ulih ngena pengelepas kitai enggau manah?

PENGELEPAS KE DIBERI PETARA NGAGAI KITAI NYA BEREGA AMAT

6. Baka ni orang Israel nunjukka sida enda beterima kasih ke pengelepas ti udah diberi Jehovah?

6 Lebuh kitai nerima hadiah ti berega, kitai beterima kasih ngagai orang ke meri hadiah nya. Tang, orang Israel enda beterima kasih ke pengelepas ti diberi Jehovah. Baru beberapa bulan aja pengudah Jehovah ngelepaska sida ari menua Ejip, sida berengkah tetengukka pemakai sereta utai ti diirup ke kala diempa sida din.  Sida mutap pasal mana, pemakai ke udah diberi Jehovah. Sida indah deka pulai baru ngagai menua Ejip! Ba sida ‘ikan, buah entimun, buah semangka, sayur bawang, bawang telu enggau bawang putih’ nya beguna agi ari pengelepas ke udah diberi Jehovah kena nyembah Iya. Nya kebuah Jehovah balat amat ringat ngagai sida. (P-pau. 11:5, 6, 10; 14:3, 4) Ari tu kitai ulih belajarka siti utai ti beguna.

7. Baka ni Paul ngena jaku lalau ke dipadah iya empu ba 2 Korint 6:1, lalu baka ni kitai ulih ngereja utai ti sama?

7 Paul enda ngasuh semua orang Kristian masau pengelepas ke udah diberi Jehovah nengah Anak Iya, Jesus Kristus. (Bacha 2 Korint 6:1.) Paul enda sempurna, nyadi ulun dosa enggau pemati, lalu tu ngasuh iya berasai balat tusah ati. Tang iya madahka: ‘Aku meri terima kasih ngagai Petara ulih Jesus Kristus Tuan kitai!’ Nama kebuah iya nyebut munyi nya? Ku Paul nerang ngagai bala menyadi Kristian iya: ‘Laban adat roh ti meri pengidup dalam Jesus Kristus, udah ngelepaska aku ari adat dosa enggau pemati.’ (Rom. 7:24, 25; 8:2) Baka Paul, kitai patut seruran ingat pasal Jehovah ti udah ngelepaska kitai ari dosa enggau pemati. Ketegal tebus, kitai ulih gawa ke Petara enggau ati ti beresi lalu tu mai pengaga ti bendar ngagai kitai.—Mas. 40:8.

Kati nuan milih deka ngena pengelepas ke dikemisi nuan ngereja utai dikedekaka Jehovah tauka ngereja utai ti dikedekaka nuan? (Peda genteran 8-10)

8, 9. (a) Nama jaku tangkan ke diberi rasul Peter pasal chara kitai patut ngena pengelepas? (b) Baka ni orang engka salah nguna pengelepas sida?

8 Kelimpah ari beterima kasih ngagai Jehovah, kitai mega patut bejimat ngambika enda salah nguna pengelepas kitai. Ambika chunto, rasul Peter nangkan kitai ngena pengelepas nyadika dalih deka ngereja utai ti salah. (Bacha 1 Peter 2:16.) Jaku tangkan tu ngingatka kitai pasal utai ke nyadi ba orang Israel  lebuh sida di menua puang. Kemayaharitu kitai lebih agi begunaka jaku tangkan tu. Sitan enggau dunya iya ngena mayuh macham utai ti ulih dipilih ke narit ati baka gari, utai ti diempa, diirup sereta pemerindang. Mayuh iklan ngena orang ke sigat sereta bajik ngelakuka barang, nyentukka barang ke enda entu beguna patut dibeli. Akal ke baka tu senang amat nguingka kitai, sereta ngasuh kitai salah nguna pengelepas kitai.

9 Jaku lalau Peter mega dikena ba pekara ti berat agi dalam pengidup, baka pelajar tauka kereja ke dipilih kitai. Ambika chunto, orang ke nembiak kemayaharitu diasuh bebendar belajar ngambika ulih diterima masuk universiti ti pemadu manah. Mayuh orang madahka enti sida bisi pelajar ti tinggi agi, sida deka bisi kereja ti manah, bulih mayuh duit, sereta dipebasa. Orang nya mega engka mandangka penerang ti madahka orang ke belajar ba universiti deka bulih gaji ti besai agi enti dibandingka enggau orang ke semina belajar naka sekula sekondari. Orang ke biak engka ngumbai pelajar ti tinggi agi nya manah enti sida bisi ngaga pilih ke bekaul enggau pengidup sida dudi hari. Tang nama patut dikingatka sida enggau apai indai sida?

10. Nama patut dikingatka kitai lebuh ngaga pilih kediri empu?

10 Ketegal utai nya bekaul enggau diri empu, sekeda orang ngumbai diri tau milih sebarang utai ti dikedekaka sida, seagi-agi utai nya enda ngachau ati sida. Sida engka berundingka jaku Paul: “Nama kebuah aku . . . diperintah pengasai ati orang bukai?” (1 Kor. 10:29) Taja pan kitai bisi hak milih bagi pelajar sereta kereja ti dikinginka kitai, kitai anang enda ingat, pengelepas kitai bisi sekat, lalu semua pemutus ke digaga kitai bisi empas. Nya kebuah Paul madahka: ‘“Semua utai tau dikereja magang,” tang ukai semua utai nya pulai ke penguntung. “Semua utai tau dikereja magang,” tang ukai semua utai nya ulih ngemansangka pengidup kitai.’ (1 Kor. 10:23) Nya alai, taja pan kitai ulih milih sekeda utai kediri empu, tang utai ti dikedekaka kitai ukai utai ti patut dikemeratka.

KITAI NGENA PENGELEPAS ENGGAU MANAH ENTI GAWA KE JEHOVAH

11. Nama kebuah Jehovah ngelepaska kitai?

11 Lebuh Peter nangkan pasal salah nguna pengelepas, iya mega madahka chara ti patut ngena pengelepas. Iya ngasuh kitai ngena pengelepas ‘diau nyadi ulun Petara.’ Kebuah Jehovah ngena Jesus ngelepaska kitai ari dosa enggau pemati nya ngambika kitai ulih ngena semua pengidup kitai gawa ke Iya.

Chara ti pemadu manah ngena pengelepas iya nya ngena jam sereta pengering kitai gawa enggau pengabis ati ke Jehovah

12. Nama teladan ti ditetapka Noah enggau sida sebilik ke kitai?

12 Chara ti pemadu manah ngena pengelepas iya nya ngena jam sereta pengering kitai gawa enggau pengabis ati ke Jehovah. Ngereja tu ulih nyaga kitai ari nejuka juluk ati ke bisi ba dunya sereta pengingin diri nyadi utai ti pemadu beguna ba pengidup kitai. (Gal. 5:16) Peratika utai ti digaga Noah enggau sida sebilik. Sida diau ba dunya ti penuh enggau orang ke mangah sereta ke ngereja ulah ti kamah. Tang Noah enggau sida sebilik enggai malit diri enggau juluk ati sereta pengawa ti dikereja orang ke ngelingi sida. Sida deka kisuk ngereja pengawa ke diberi Jehovah ngagai sida. Sida ngaga  bandung, ngumpul pemakai ke sida empu enggau ke bala jelu, sereta nangkan orang pasal Bah Besai. ‘Noah lalu ngereja semua utai nitihka asuh Petara.’ (P-kal. 6:22) Ketegal nya, Noah enggau sida sebilik selamat maya pengujung dunya nya.—Heb. 11:7.

13. Nama pengawa ke diasuh Jehovah kereja kitai?

13 Nama pengawa ke diasuh Jehovah kereja kitai kemayaharitu? Ketegal kitai tu murid Jesus, kitai nemu Jehovah udah ngasuh kitai nginjil. (Bacha Luke 4:18, 19.) Kemayaharitu, Sitan udah mampul runding orang lalu sida enda sedarka diri udah nyadi ulun pengarap pelesu, reta tengkira, sereta sistem politik. (2 Kor. 4:4) Baka Jesus, kitai bisi peluang nulung orang ngelala sereta nyembah Jehovah, Petara pengelepas. (Mat. 28:19, 20) Enda senang nginjil ngagai orang. Ba sekeda endur, orang nadai ati deka ngelala Petara, lalu sekeda nya nganu kitai lebuh nginjil ngagai sida. Tang ketegal Jehovah udah ngasuh kitai nginjil, kitai patut nanya diri empu, ‘Kati ulih aku ngena pengelepas aku gawa mayuh agi ke Jehovah?’

14, 15. Nama deka digaga nembiak Jehovah? (Peda gambar ba pun artikel.)

14 Tang manah amat, mayuh nembiak Jehovah nyau sedarka pengujung dunya tu majak semak, lalu sida deka idup enggau pengumbas iya sereta berengkah ngerintis. (1 Kor. 9:19, 23) Sekeda ngerintis ba menua diri, bisi nya pindah ngagai eklisia ke begunaka bantu. Lima taun ti udah, lebih ari 250,000 iku orang udah berengkah ngerintis, lalu diatu bisi lebih ari 1,100,000 iku pengerintis biasa. Endang ngagaka ati, laban mayuh nembiak Jehovah udah ngena pengelepas sida nyadi pengerintis gawa ke Jehovah!—Mas. 110:3.

15 Nama nulung sida ngena pengelepas enggau manah? Peratika John seduai Judith, ke udah gawa ke Jehovah ba beberapa buah menua sepengelama 30 taun ti udah. Seduai iya madahka, lebuh Sekula Pengerintis berengkah ba taun 1977, bala pemelajar diperansang pindah sereta gawa ba endur ke begunaka mayuh agi bantu. Ngambika ulih nyapai juluk ati nya, John seduai Judith patut idup enggau pengumbas iya. Nya kebuah John nadai entap ba siti-siti kereja. Tang udah nya, seduai iya nginjil ngagai menua bukai. Nama nulung seduai iya napi penanggul baka belajarka jaku baru, nelebaka diri enggau chara pengidup sereta iklim ba menua nya? Seduai iya besampi sereta bepanggai ba Jehovah ngambika nulung seduai iya. Baka ni asai ati seduai iya gawa ke Jehovah baka nya sepemanjai timpuh nya? John madahka: “Aku ngasaika diri udah enggau pengawa ti pemadu badas. Jehovah nya endang amat ba aku, baka seiku apai ti bisi  pengerindu. Diatu aku mereti agi utai ku James 4:8: ‘Datai semak ngagai Petara, lalu Iya deka datai semak ngagai kita.’ Aku nemu aku udah tetemuka utai ti digiga aku ngelama tu, iya nya tuju ti ngemuaska ati ba pengidup.”

16. Baka ni beribu iku orang udah ngena pengelepas sida enggau manah?

16 Enda baka John seduai Judith, sekeda bala menyadi Kristian semina ulih ngerintis penuh jam enda lama, ketegal bisi penanggul. Taja pia mayuh bala menyadi ulih sukarela gawa ba projek nirika bengunan di serata dunya. Ambika chunto, kira-kira 27,000 iku bala menyadi Kristian datai nulung nirika indu opis ba Warwick, New York. Sekeda datai nulung sepengelama dua minggu, beberapa bulan, setaun tauka lama agi. Mayuh ari bala menyadi Kristian nya ngelengkaka sekeda utai ngambika ulih gawa ba Warwick. Sida nyadi teladan ti badas ngena pengelepas sida muji sereta ngemuliaka Jehovah, Petara pengelepas!

17. Enti ari diatu kitai ngena pengelepas enggau manah, nama berekat ke diulih kitai?

17 Kitai berasai gaga laban udah ngelala Jehovah sereta bulih pengelepas ketegal nyembah Iya. Aram meh kitai nunjukka pengelepas nya utai ti berega ba kitai nengah pilih ti digaga kitai. Ari ke salah nguna pengelepas nya, aram meh kitai enggau naka ulih ngena pengelepas nya gawa ke Jehovah. Lalu udah nya kitai ulih ngasaika berekat ti disemayaka Jehovah, lebuh semaya nya dikeamatka: ‘Semua utai ti udah digaga Petara dilepaska ari tubuh sida ti nemu buruk, lalu bulih pengelepas ti bemulia ti endang enggi bala anak Petara.’—Rom. 8:21.