Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  September 2017

Neladan Pengasih Jehovah

Neladan Pengasih Jehovah

‘Aku tu Jehovah Petara ti kasih.’—P-SUT. 34:6.

LAGU: 57, 147

1. Baka ni Jehovah madah pasal Diri Empu ngagai Moses? Nama kebuah tu beguna?

BISI sekali, Petara madah pasal Diri Empu ngagai Moses enggau madahka nama Diri sereta sekeda ari pemanah Iya. Jehovah ulih madah pasal kuasa tauka penemu-dalam Iya, tang Iya enda ngereja nya. Iya dulu nyebut pasal pengasih. (Bacha Pemansut 34:5-7.) Moses deka nemu sekalika Jehovah nyukung iya tauka enda. Nya alai Jehovah madahka sekeda pemanah ke nunjukka Iya amat deka nulung bala nembiak Iya. (P-sut. 33:13) Baka ni asai ati nuan lebuh nemu Jehovah amat ibuhka kitai? Artikel tu deka berandau pasal pengasih, iya nya asai ati ti sinu ke pemerinsa orang bukai lalu keran deka nulung sida.

2, 3. (a) Nama nunjukka mensia endang bisi pengasih? (b) Nama kebuah nuan patut nemu utai ti dipadah Bup Kudus pasal pengasih?

2 Jehovah nya pengasih, lalu mensia digaga neladan gamal Iya. Nya kebuah mensia ibuhka orang bukai. Indah orang ke enda ngelala Jehovah pan suah mandangka pengasih. (P-kal.  1:27) Dalam Bup Kudus, kitai bisi mayuh cherita pasal orang ke mandangka pengasih. Ambika chunto, lebuh Solomon deka nemu sapa entara dua iku indu ke ngempu seiku anak ti agi mit, iya nguji seduai iya enggau ngasuh anak nya dibelah dua. Indai ke ngempu anak nya balat kasihka anak iya, nya alai iya ngasuh raja nya meri anak nya ngagai indu ke seiku agi. (1 Raj. 3:23-27) Siti agi chunto pasal pengasih nya anak indu raja menua Ejip. Lebuh iya tetemuka Moses ke agi mit, iya nemu anak mit nya anak orang Hebrew, lalu patut dibunuh. Tang “anak raja sinu ati ke iya,” lalu iya deka ngemesaika Moses baka anak iya empu.—P-sut. 2:5, 6.

3 Nama kebuah kitai patut belajar pasal pengasih enggau mayuh agi? Laban Jehovah deka kitai nunda teladan Iya. (Eps. 5:1) Taja pan kitai ditempa ngambika ngembuan pengasih, kitai enda sempurna lalu ingin deka berundingka diri empu aja. Kekadang enda senang kitai deka ngaga pemutus sekalika deka nulung orang bukai tauka mengkang betatika diri empu aja. Nama ulih nulung kitai ibuh agi ke orang bukai? Kesatu, aram kitai beratika baka ni Jehovah sereta sekeda orang mandangka pengasih. Kedua, aram kitai meda baka ni kitai ulih neladan pengasih Petara sereta kebuah ngereja nya manah ke kitai.

JEHOVAH—TELADAN TI SEMPURNA PASAL PENGASIH

4. (a) Nama kebuah Jehovah ngirumka melikat ngagai Sodom? (b) Nama ulih dipelajarka kitai ari utai ke ditapi sida Lot sebilik?

4 Bup Kudus ngundan mayuh chunto pasal pengasih Jehovah. Ambika chunto, perundingka utai ti digaga Iya ke Lot. Lot nya orang ti lurus ke “balat tusah ati” enggau orang ke ngereja ulah ti kamah di Sodom enggau Gomorah. Orang ke diau dia enda bebasaka Jehovah, lalu Iya ngumbai sida patut mati. (2 Pet. 2:7, 8) Jehovah ngirumka melikat ngagai Lot ngambika madah pasal Sodom enggau Gomorah ke deka dirusak, lalu Lot patut ngerarika diri. Bup Kudus madahka: ‘Lot kakang. Tang Jehovah kasihka iya. Nya alai temuai [melikat] ke dua iku nya megai jari Lot lalu ngiring iya, bini iya, enggau dua iku anak indu iya, lalu nguluka sida pansut ari nengeri nya.’ (P-kal. 19:16) Baka Jehovah ke meretika penusah ti ditapi Lot, kitai ulih pechaya Iya meretika semua penusah ke ditapi kitai.—Isa. 63:7-9; Jas. 5:11; 2 Pet. 2:9.

Jehovah meretika penusah ke ditapi kitai

5. Baka ni Jaku Petara ngajar kitai chara mandangka pengasih?

5 Jehovah mega udah ngajar nembiak Iya mandangka pengasih. Pikirka pasal siti ari adat ke udah diberi Iya ngagai orang Israel. Enti orang berutang ba orang ke nyali duit, orang ke nyali duit tau ngambi baju panjai orang ke berutang nyadika gadai utang kena nunjukka iya deka mayar duit ke diinjau. (Bacha Pemansut 22:26, 27.) Tang orang ke nyali duit enda tau enda mulaika baju panjai ngagai orang ke nginjau duit sebedau padam mata panas ngambika iya ulih ngena baju nya ngangatka tubuh diri maya  malam hari. Orang ke nadai pengasih engka enggai mulaika baju panjai nya, tang Jehovah ngajar nembiak Iya kasihka orang. Nama dipelajarka kitai ari prinsip ke bisi ba pesan tu? Anang enda ibuhka utai ti diguna menyadi Kristian. Lebuh kitai ulih nulung menyadi Kristian indu tauka lelaki ke napi pemerinsa, kitai deka ibuhka utai ti diguna iya.—Kol. 3:12; Jas. 2:15, 16; bacha 1 John 3:17.

6. Nama ulih dipelajarka kitai ari pengasih Jehovah ngagai orang Israel ke bedosa?

6 Jehovah kasihka orang Israel indah lebuh sida bedosa ngelaban Iya. Kitai macha: ‘Jehovah Petara aki ini sida udah majak ngasuh bala nabi Iya meri jaku tangkan ngagai bala nembiak Iya, laban Iya enggai ke sida enggau Rumah Sembiang nya dirusak.’ (2 Ban. 36:15) Pia mega, kitai patut kasihka orang ti bedau agi ngelala Jehovah ke engka deka nesal ati lalu nyadi pangan Iya. Jehovah enggai seiku pan orang dirusak lebuh maya ngakim datai. (2 Pet. 3:9) Nya alai, kala agi bisi awak, kitai deka enggau naka ulih bekunsi jaku tangkan Iya ngagai semua orang, lalu nulung mayuh orang bulih penguntung ari pengasih Petara.

7, 8. Nama kebuah siti ruang bilik pechaya Jehovah udah mandangka pengasih ngagai sida?

7 Kemaya hari tu, mayuh ari nembiak Jehovah udah ngasaika pengasih Iya. Ambika chunto, maya taun 1990-an di Bosnia, mayuh bengkah raban etnik benung belaya sereta bebunuhka pangan diri. Milan, * seiku nembiak lelaki ke beumur 12 taun, diau di menua nya enggau sida sebilik. Milan, menyadi lelaki iya ke biak agi, apai indai iya, sereta bala Saksi ke bukai benung nepan bas ari Bosnia ke Serbia. Sida mupuk ngagai konvensyen, ke alai apai indai Milan deka dibaptisa. Lebuh ba adan menua, sekeda bala soldadu beratika sida sebilik nya ari raban etnik ke bukai lalu ngasuh sida nurun ari bas nya. Udah nya sida ngasuh bala menyadi Kristian ke bukai dalam bas nya neruska pejalai sida. Pengelama dua hari, bala soldadu nya enda ngemendarka sida Milan sebilik mupuk. Pengujung iya, pegawai ke ngaduka kes nya ngangauka pegawai ke tinggi agi pangkat lalu nanya utai ke patut digaga iya ngagai sida Milan sebilik. Sida sebilik bisi bediri semak dia, lalu ulih ninga saut ari pegawai ke tinggi agi pangkat nya, “Bai sida pansut, lalu timbak sida!”

8 Lebuh soldadu dua iku nya benung bejaku, dua iku orang ke enda dikelala mansang ngagai sida Milan sebilik. Seduai iya nelai lalu madahka diri mega Saksi, lalu madahka bala menyadi Kristian ke nepan bas udah nusui ngagai seduai iya pasal utai ke udah nyadi. Dua iku Saksi nya ngasuh Milan enggau menyadi lelaki iya tama dalam kerita ngambika ulih meraka adan menua laban bala soldadu enda meresa dokumen pejalai anak mit. Udah nya, seduai iya ngasuh apai indai Milan bejalai nengah belakang pos penyaga adan menua, lalu betemu enggau sida iya din. Milan balat takut nyentukka iya enda nemu sekalika iya patut ketawa tauka nyabak. Apai indai Milan nanya, “Ba runding seduai, kati sida deka nejuka kami mupuk pia aja?” Tang lebuh sida mansa, bala soldadu baka ke enda meda sida. Milan enggau menyadi iya betemu enggau apai indai seduai iya ba sepiak adan menua nya, lalu sida mupuk  ngagai konvensyen. Sida pechaya Jehovah udah nyaut sampi sida! Ari Bup Kudus kitai nemu, Jehovah enda seruran ngelindung nembiak Iya ngena chara tu. (SKR. 7:58-60) Tang ba pekara tu, Milan madahka: “Ba aku, bala melikat baka ke udah ngasuh bala soldadu nya enda meda kami lalu Jehovah udah nyelamatka kami.”—Mas. 97:10.

Baka Jesus, kati nuan keran deka nulung sereta ngajar orang pasal Jehovah?

9. Baka ni asai ati Jesus pasal orang mayuh ke nitihka iya? (Peda gambar ba pun artikel.)

9 Jesus nya teladan ti badas bekaul enggau pengasih. Iya kasihka orang laban iya meda “sida irau ati sereta nadai daya, baka bedus ti nadai orang ngibun.” Nya alai, nama digaga iya? “Iya lalu belabuh ngajar sida mayuh macham utai.” (Mat. 9:36; bacha Mark 6:34.) Tang, orang Parisi nadai pengasih lalu enggai nulung sida. (Mat. 12:9-14; 23:4; Jhn. 7:49) Baka Jesus, kati nuan keran deka nulung sereta ngajar orang pasal Jehovah?

10, 11. Kati kitai patut seruran mandangka pengasih? Terangka.

10 Tu ukai reti nya patut seruran mandangka pengasih. Ambika chunto, Raja Saul engka ngumbai diri udah mandangka pengasih lebuh iya enda munuh Agak, ke nyadi raja menua Amalek sereta munsuh nembiak Petara. Saul mega enda munuh semua jelu orang Amalek. Tang Jehovah udah ngasuh Saul munuh semua orang Amalek enggau jelu sida. Ketegal Saul enda ngasi, Jehovah nulak iya nyadi raja. (1 Sam. 15:3, 9, 15) Jehovah nya Hakim ti lurus. Iya ulih meda ati mensia, lalu nemu ni maya enda patut mandangka pengasih. (Sab. 2:17; Esk. 5:11) Enda lama agi, Iya deka ngakim semua orang ke enggai ngasika Iya. (2 Tes. 1:6-10) Nya ukai maya Jehovah mandangka pengasih ngagai orang ke jai. Taja pia, enggau ngerusak sida, Iya mandangka pengasih ngagai orang ke lurus ti deka diselamatka Iya.

11 Endang amat, ukai kitai ke ngakim sekalika orang nya patut idup tauka mati. Tang, kitai patut enggau naka ulih ari diatu nulung orang. Baka ni chara kitai ulih mandangka pengasih ngagai orang bukai? Di baruh tu bisi sekeda chara.

CHARA KITAI ULIH MANDANGKA PENGASIH

12. Baka ni nuan ulih mandangka pengasih ari chara nuan ngintu orang bukai?

12 Deka nulung ba pengidup besehari-hari. Jehovah dekaka orang Kristian mandangka pengasih ngagai orang bukai sereta ngagai bala menyadi Kristian sida. (Jhn. 13:34, 35; 1 Pet. 3:8) Siti reti pengasih nya “sama merinsa.” Orang ke mandangka pengasih nguji deka nulung orang ke napi pemerinsa. Nya alai, kitai patut ngiga peluang nulung orang bukai, engka enggau chara meri tulung ke diguna sida.—Mat. 7:12.

Pandangka pengasih nuan ngena chara nulung orang bukai (Peda genteran 12)

13. Nama digaga nembiak Petara pengudah pengerusak alam nuntung?

13 Sama enggau pengawa meri bantu. Lebuh kitai meda orang merinsa ketegal siti-siti pengerusak alam, kitai deka  mandangka pengasih ngagai sida. Nembiak Jehovah dikelala orang ketegal nulung orang bukai ba maya ke baka nya. (1 Pet. 2:17) Ambika chunto, seiku menyadi Kristian indu ke bansa Jepun diau ba endur ke rusak kena tanah berenyang enggau tsunami ba taun 2011. Iya madahka diri “balat diperansang sereta berasai lantang ati” lebuh meda bala sukarela ari endur bukai di Jepun sereta ari menua bukai datai ngaduka sekeda rumah enggau Palan Gempuru. Ku iya nambah: “Peneleba tu nulung aku sedar, Jehovah ibuhka kitai. Lalu bala Saksi ibuhka pangan diri. Mayuh bala menyadi Kristian di serata dunya besampika kitai.”

14. Baka ni nuan ulih nulung orang ke sakit sereta ke tuai?

14 Nulung orang ke sakit sereta ke tuai. Lebuh kitai meda orang merinsa ketegal penyakit sereta tuai umur, kitai berasai kasihka sida. Kitai keran deka meda penanggul tu nadai agi, nya alai kitai besampi minta Perintah Petara datai. Maya nya mega, kitai enggau naka ulih nulung orang ke sakit sereta ke tuai. Seiku penulis nulis pasal indai iya. Iya madahka, bisi sekali indai iya ke udah tuai sereta bisi penyakit Alzheimer, ngamahka baju diri. Lebuh indai iya nguji nuchi baju diri ke kamah, luching pintu rumah bebunyi. Dua iku Saksi indu ke suah  ngabas iya datai. Seduai iya nanya sekalika ulih nulung. Ku indai penulis nya nyaut: “Ulih, tang aku amat malu.” Seduai iya nulung iya. Udah nya seduai iya ngaga ai teh ke iya lalu berandau enggau iya. Penulis nya berasai beterima kasih lalu madahka dua iku Saksi nya “ngereja utai ti diajar sida.” Kati pengasih nuan ngagai orang ke sakit sereta ke tuai meransang nuan enggau naka ulih nulung?—Plp. 2:3, 4.

15. Baka ni pengawa nginjil kitai nulung orang bukai?

15 Nulung orang ngelala Jehovah. Chara ti pemadu manah kitai ulih nulung orang iya nya ngajar sida pasal Petara enggau Perintah Iya. Siti agi chara iya nya nulung sida meda kebuah ngasika standard Jehovah nya manah ke sida. (Isa. 48:17, 18) Pengawa nginjil nya chara manah dikena ngemuliaka Jehovah sereta mandangka pengasih ngagai orang bukai. Ulih nuan ngereja mayuh agi ba pengawa nginjil?—1 Tim. 2:3, 4.

PENGASIH MEGA MANAH KE NUAN!

16. Nama penguntung enti kitai mandangka pengasih?

16 Bala pakar pengerai untak madahka, mandangka pengasih nya manah ke pengerai sereta kaul kitai enggau orang bukai. Lebuh nuan nulung orang ke napi pemerinsa, nuan deka berasai gaga agi ati, besai agi pengadang, kurang agi berasai puang, sereta kurang agi ngembuan runding ti negatif. Mandangka pengasih nya manah ke nuan. (Eps. 4:31, 32) Lebuh pengerindu meransang kitai nulung orang bukai, kitai ngembuan ati ti manah laban kitai nemu diri ngereja utai ti diasuh Jehovah. Pengasih deka nulung kitai nyadi apai indai, kaling pengidup sereta pangan ke manah agi. Nambahka nya, orang ke mandangka pengasih ngagai orang bukai deka bulih bantu lebuh sida begunaka iya.—Bacha Matthew 5:7; Luke 6:38.

17. Nama kebuah nuan deka mandangka pengasih?

17 Taja pan mandangka pengasih nya manah ke kitai, batang kebuah kita mandangka pengasih nya laban kitai deka neladan Jehovah sereta ngenataika mulia ngagai Iya. Jehovah nya Pun pengerindu enggau pengasih. (J-lam. 14:31) Iya netapka chunto ti sempurna ke kitai. Nya alai, aram meh kitai enggau naka ulih neladan Petara ngena chara mandangka pengasih. Enggau nya kitai deka majak semak agi ngagai bala menyadi Kristian kitai sereta ngembuan kaul ti manah agi enggau orang ke ngelingi kitai.—Gal. 6:10; 1 Jhn. 4:16.

^ per. 7 Nama udah ditukar.