Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  September 2017

‘Jaku Petara Kitai, Tan Belama Iya’

‘Jaku Petara Kitai, Tan Belama Iya’

‘Sigi amat, rumput rangkai, lalu bungai layu, tang jaku Petara kitai, tan belama iya.’—ISA. 40:8.

LAGU: 95, 97

1, 2. (a) Baka ni enggau pengidup enti sema nadai Bup Kudus? (b) Nama nulung kitai bulih penguntung ari Jaku Petara?

BAKA NI enggau pengidup nuan enti sema nuan nadai ngembuan Bup Kudus? Nuan tentu nadai jaku ajar ti badas kena ngiring nuan ninting hari. Nuan tentu enda nemu pemendar pasal Petara, pengidup, tauka jemah ila. Lalu nuan tentu mega enda nemu utai ti udah digaga Jehovah ke mensia kelia menya.

2 Kitai berasai gaga laban enda napi pekara tu. Jehovah udah meri kitai Jaku Iya, Bup Kudus. Iya udah besemaya, pesan ari Bup Kudus deka tan belama iya. Rasul Peter ngambi ayat ari Isaiah 40:8. Taja pan ayat nya enda madah enggau nyemetak pasal Bup Kudus, tang ayat nya bekaul enggau pesan ari Bup Kudus. (Bacha 1 Peter 1:24, 25.) Kitai tau bulih mayuh penguntung ari Bup Kudus enti macha iya dalam bansa jaku kitai empu. Orang ke rinduka Jaku Petara endang nemu pasal tu. Beratus taun ti udah, orang bebendar nyalin  Bup Kudus lalu ngeluarka iya, taja pan tusah sereta balat disakal. Jehovah deka mayuh orang “diselamatka, lalu nemu penemu pasal pemendar.”—1 Tim. 2:3, 4.

3. Nama deka dikerandauka kitai ba artikel tu? (Peda gambar ba pun artikel.)

3 Dalam artikel tu, kitai deka berandau pasal baka ni Jaku Petara agi tan taja napi (1) ubah ba jaku, (2) ubah ba politik ke ngubah bansa jaku, lalu (3) pengawa nyalin Bup Kudus ke disakal. Baka ni randau tu ulih nulung kitai? Terima kasih kitai ke Bup Kudus sereta Pengarang iya deka majak dalam.—Mik. 4:2; Rom. 15:4.

UBAH BA BANSA JAKU

4. (a) Baka ni bansa jaku berubah nitihka maya? (b) Nama kebuah kitai nemu Petara enda milih siti bansa jaku aja? Baka ni asai ati nuan pasal utai tu?

4 Nyau kelama, bansa jaku ke dikena berubah. Reti leka jaku enggau rambai jaku engka bebida ari ke suba. Nuan engka ulih beratika nya ba bansa jaku ke dikena nuan. Tu mega ulih dipeda dalam bansa jaku kelia. Jaku Hebrew enggau jaku Gerika ke dikena orang kemaya hari tu bebida ari iya ke dikena nulis Bup Kudus kelia. Mayuh orang enda ulih meretika Bup Kudus ke ditulis ngena jaku lama nya, nya kebuah sida begunaka salin ti baru. Sekeda orang ngumbai diri ulih meretika Bup Kudus enggau manah agi enti sida belajarka jaku Hebrew enggau jaku Gerika kelia. Tang nya enda entu ulih nulung sida baka ke dipelaba sida. * (Peda nota kaki.) Kitai amat gaga ati laban Bup Kudus tauka sebagi ari iya udah disalin dalam lebih ari 3,200 iti bansa jaku. Endang Jehovah ke dekaka orang ari “semua bansa, raban bansa, jaku” bulih penguntung ari Jaku Iya. (Pemandang 14:6.) Tu tentu ngasuh kitai berasai semak agi ngagai Petara kitai, ke ngembuan pengerindu sereta enda bepilih mata.—SKR. 10:34.

Kitai amat gaga ati laban Bup Kudus tauka sebagi ari iya udah disalin dalam lebih ari 3,200 iti bansa jaku

5. Nama ngasuh Versi King James beguna?

5 Ubah ke bisi ba bansa jaku mega ngubah Bup Kudus ke disalin. Salin Bup Kudus ke senang dibacha lebuh iya baru dikeluarka nyau kelama engka tusah deka dimeretika. Siti chunto nya Versi King James, terubah iya dikeluarka ba taun 1611. Iya nyadi siti ari Bup Kudus jaku English ti tebilang. Leka jaku ke dikena dalam Versi King James indah ngubah jaku English. * (Peda nota kaki.) Taja pia, salin tu semina ngena nama Jehovah beberapa kali aja. Ba mayuh ayat dalam Bup Kudus jaku Hebrew ke bisi ngayanka nama Petara, sida ngena “TUAN” ke ditulis ngena urup besai. Chelak ke udah nya mega ngena leka jaku “TUAN” dalam urup besai ba sekeda ayat dalam  Bup Kudus Kristian jaku Gerika. Enggau tu, Versi King James ngaku nama Petara patut bisi ba Sempekat Baru.

6. Nama kebuah kitai berasai gaga ke New World Translation?

6 Lebuh Versi King James terubah iya bisi, iya ngena jaku English ke baru. Tang nyau kelama, sekeda leka jaku nya nyau enda ulih dikena, lalu diatu leka jaku nya tusah dimeretika. Tu mega nyadi ba salin Bup Kudus ti keterubah dalam bansa jaku bukai. Nya alai kitai berasai gaga laban bisi atur udah digaga kena ngasilka New World Translation of the Holy Scriptures, ke ngena bansa jaku kemaya hari tu. Semua tauka sebagi salin tu udah bisi dalam lebih ari 150 iti bansa jaku. Reti nya, mayuh orang di dunya diatu ulih macha salin tu dalam bansa jaku sida empu. Leka jaku ke baru sereta terang reti ngasuh pesan Petara senang tama ba ati kitai. (Mas. 119:97) Tang utai ke ngasuh New World Translation amat bebida ari Bup Kudus bukai iya nya iya ngengkahka nama Petara ba endur ke asal.

UBAH BA POLITIK

7, 8. (a) Nama kebuah mayuh orang Judah ba abad ketiga S.M. enda ulih meretika Bup Kudus jaku Hebrew? (b) Nama utai ti dikumbai Septuagint jaku Gerika?

7 Ubah ba politik di dunya kekadang ngubah bansa jaku ke dikena orang ba siti-siti timpuh. Tang Jehovah udah nentuka Bup Kudus deka bisi dalam bansa jaku ke ulih dimeretika orang. Ambika chunto, 39 iti bup mit keterubah dalam Bup Kudus ditulis orang Judah tauka orang Israel. Sida orang keterubah ‘diberi pesan Petara.’ (Rom. 3:1, 2) Terubah iya, sida nulis semua bup mit nya dalam jaku Hebrew tauka jaku Aramaik. Tang ba abad ketiga S.M, mayuh orang Judah enda agi nemu jaku Hebrew. Nama kebuah? Perintah Gerika ngelekai laban Alexander ti Tebilang udah ngalahka mayuh endur ba dunya. Ketegal tu, jaku Gerika nyadi jaku ke suah dikena ba endur ke dipegai perintah Gerika lalu mayuh orang berengkah ngena jaku Gerika, ukai ngena bansa jaku sida empu. (Dan. 8:5-7, 20, 21) Tu nyengkaum mayuh orang Judah, nya alai sida tusah deka meretika Bup Kudus dalam jaku Hebrew. Baka ni mutarka pekara tu?

8 Kira-kira 250 taun sebedau Jesus ada, lima iti bup mit keterubah dalam Bup Kudus disalin ngagai jaku Gerika. Udah nya, bup mit ke bukai dalam Bup Kudus jaku Hebrew mega disalin. Salin tu dikumbai Septuagint jaku Gerika. Nya meh salin penuh Bup Kudus jaku Hebrew ti keterubah.

9. (a) Baka ni salin Septuagint enggau salin Bup Kudus bukai ke dulu nulung orang ke macha Jaku Petara? (b) Ni bagi ba Bup Kudus jaku Hebrew ti dikerinduka nuan?

9 Septuagint nya nulung orang Judah ke ngena jaku Gerika macha Bup Kudus jaku Hebrew dalam jaku Gerika. Ulih nuan ngambarka pengaga ati sida laban ulih ninga tauka macha Jaku Petara dalam bansa jaku sida empu? Nyau kelama, sekeda bagi dalam Bup Kudus disalin ngagai bansa jaku bukai ke suah dikena baka jaku Syria, Gotik, enggau Latin. Seraya majak mayuh orang nyau ulih macha sereta meretika Bup Kudus, sida mega nyau rinduka iya. Lalu sida bisi ayat ti dikerinduka sida, baka kitai kemaya hari tu. (Bacha Masmur 119:162-165.) Amat, Jaku Petara agi tan taja pan politik tauka bansa jaku udah berubah.

 PENGAWA NYALIN BUP KUDUS TI DISAKAL

10. Maya jeman John Wycliffe, nama kebuah mayuh orang enda ulih macha Bup Kudus?

10 Kekadang, mayuh pemerintah ti bekuasa nguji nagang orang macha Bup Kudus. Tang orang ke nangika Petara enda ngetu ngasuh Bup Kudus mengkang bisi ke semua orang. Seiku ari sida nya, John Wycliffe, ke diau di England urung 600 taun suba. Iya pechaya, semua orang patut ulih macha Bup Kudus. Maya jeman iya, mayuh orang di England enda kala ninga pesan ari Bup Kudus dalam bansa jaku sida. Rega Bup Kudus kelalu mar, lalu tiap iti Bup Kudus ditulis ngena jari. Nya alai, mimit amat orang ke ngembuan Bup Kudus. Pia mega, mayuh orang maya nya enda nemu macha. Orang ke ngagai gerija ninga Bup Kudus dibacha inggar dalam jaku Latin, tang nya bansa jaku lama ke enda dimeretika orang biasa. Baka ni Jehovah nentuka orang ulih ngembuan Bup Kudus dalam bansa jaku sida empu?—J-lam. 2:1-5.

John Wycliffe enggau sida ke bukai dekaka tiap iku orang ngembuan Jaku Petara. Kati nuan mega dekaka utai ti sama? (Peda genteran 11)

11. Nama asil ti dibai Bup Kudus ke disalin Wycliffe?

11 Ba taun 1382, John Wycliffe enggau sida ke bukai nyalin Bup Kudus ngagai jaku English. Bup Kudus ke disalin Wycliffe tebilang amat ba bala raban ke dikumbai Lollard. Sida rinduka Bup Kudus. Sida ngagai sebuah genturung pendiau ke sebuah genturung pendiau di serata England. Raban Lollard macha Bup Kudus sereta meri sekeda bagi ari Bup Kudus ke ditulis ngagai orang ke ditemu sida. Pengawa sida ngasuh Bup Kudus tebilang baru.

12. Nama runding bala tuai pengarap gerija pasal Wycliffe enggau pengawa iya?

12 Bala tuai pengarap gerija begedika Wycliffe, Bup Kudus iya sereta raban ke nitihka iya. Bala tuai pengarap gerija nya merinsaka raban Lollard, lalu ngerusak semua Bup Kudus ke disalin Wycliffe ti ditemu sida. Taja pan Wycliffe udah mati, sida nuduh iya nyakal ajar gerija, tauka munsuh Gerija. Sida nyengkubang tulang iya, nunu tulang nya, lalu muai  abus tulang nya ngagai sungai Swift. Tang mayuh orang deka macha sereta meretika Jaku Petara, lalu bala tuai pengarap gerija enda ulih nagang utai tu. Beratus taun udah nya, orang di Eropah enggau endur bukai di dunya berengkah nyalin sereta nyelak Bup Kudus dalam bansa jaku ke ulih dimeretika mayuh orang.

IYA “TI DEKA NGAJAR KITA UTAI KE PENGUNTUNG KITA”

13. Nama ulih dipechaya kitai? Baka ni tu ngasuh pengarap kitai tegap agi?

13 Bup Kudus bepun ari Petara. Tang tu ukai reti pengawa nyalin Septuagint, Bup Kudus ari Wycliffe, Versi King James, tauka salin Bup Kudus ke bukai nya endang bepun ari Petara. Tang, lebuh kitai mansik baka ni semua salin nya diasilka, nya endang terang nunjukka Jaku Jehovah agi tan baka ke disemaya Iya. Tu ngeringka pengarap kitai laban utai bukai ke udah disemaya Jehovah mega deka dikeamatka.—Jos. 23:14.

14. Baka ni utai ti ditemu kitai pasal Bup Kudus ngasuh pengerindu kitai ke Petara dalam agi?

14 Lebuh kitai beratika chara Jehovah nyaga Jaku Iya, pengarap kitai ba Iya majak tegap agi, lalu pengerindu kitai ke Iya majak dalam agi. * (Peda nota kaki.) Nama kebuah Jehovah meri kitai Bup Kudus lalu besemaya deka nyaga Bup Kudus? Laban Iya rinduka kitai sereta deka ngajar kitai chara tau bulih penguntung ari Bup Kudus. (Bacha Isaiah 48:17, 18.) Tu meransang kitai rindu sereta ngasika Iya.—1 Jhn. 4:19; 5:3.

15. Nama deka dikerandauka kitai ba artikel pengudah tu?

15 Kitai rindu amat ke Jaku Petara, nya alai baka ni kitai tau bulih mayuh agi penguntung lebuh macha Bup Kudus kediri? Baka ni kitai ulih nulung orang ke ditemu kitai maya nginjil beterima kasihka Bup Kudus? Baka ni bala pengajar ba eklisia ulih nentuka tiap-tiap utai ke diajar sida bepelasarka Jaku Petara? Kita deka berandauka tanya tu ba artikel pengudah tu.

^ per. 4 Peda artikel ‘Perlukah Kita Belajar Bahasa Ibrani dan Yunani?’-IN kena 1 November 2009, dalam majalah Menara Pengawal.

^ per. 5 Mayuh rambai jaku English ti tebilang diambi ari Versi King James.