Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  September 2017

“Berani, lalu Kereja Pengawa Nya”

“Berani, lalu Kereja Pengawa Nya”

‘Nuan enda tau enda kering sereta berani, lalu kereja pengawa nya. Anang takut tauka irau ati; laban Jehovah . . . bisi enggau nuan.’—1 BAN. 28:20.

LAGU: 38, 34

1, 2. (a) Nama pengawa besai ke diterima Solomon? (b) Nama kebuah David irau ati ke Solomon?

SOLOMON nerima siti pengawa ti spesial. Jehovah milih iya ngemataka pengawa nirika Rumah Sembiang di Jerusalem, iya nya siti ari projek ti pemadu besai sepemanjai sejarah! Rumah Sembiang nya “enda tau enda chukup manah” lalu iya deka beberita ketegal pemanah iya. Kelebih agi, iya deka nyadi Rumah Sembiang ke Jehovah.—1 Ban. 22:1, 5, 9-11.

2 Raja David pechaya, Petara deka nyukung Solomon. Tang Solomon “agi biak, lalu nadai peneleba.” Kati iya berani nerima pengawa nirika Rumah Sembiang nya? Tauka kati umur iya ke agi biak sereta nadai peneleba nekul iya nerima pengawa nya? Ngambika ulih mujur, Solomon patut berani lalu ngereja pengawa nya.

3. Nama ulih dipelajarka Solomon pasal pemerani ari apai iya?

3 Solomon tentu udah belajar mayuh pasal pemerani ari apai iya, David. Indah lebuh David agi biak, iya belaban  enggau jelu siga ke nyerang domba apai iya. (1 Sam. 17:34, 35) Iya mega nunjukka diri amat berani lebuh iya ngelaban Goliat ke besai tinggi, seiku soldadu ke kering sereta ngenakutka. Amat, enggau saup ari Petara sereta ngena sigi batu, David ulih ngalahka Goliat.—1 Sam. 17:45, 49, 50.

4. Nama kebuah Solomon patut berani?

4 Kitai ulih nemu kebuah David nya orang ti engkeman meransang Solomon ngambika berani lalu nirika Rumah Sembiang nya. (Bacha 1 Bansa Israel 28:20.) Enti Solomon enda mandangka pemerani, asai ati ti takut deka nekul iya, iya nya nagang iya berengkah ngereja pengawa nya. Lalu tu enda manah agi ari ke enda mujur ba pengawa iya.

Kitai begunaka tulung ari Jehovah ngambika berani lalu ulih ngereja pengawa ke diberi Iya

5. Nama kebuah kitai begunaka pemerani?

5 Baka Solomon, kitai begunaka tulung ari Jehovah ngambika berani lalu ulih ngereja pengawa ke diberi Iya. Nya alai, aram kitai belajarka chunto sekeda orang kelia ke mandangka pemerani. Udah nya, kitai mikirka chara kitai ulih mandangka pemerani lalu nembuka pengawa kitai.

TELADAN PASAL PEMERANI

6. Nama utai ti ngerinduka ati nuan pasal pemerani Josep?

6 Josep mandangka pemerani lebuh bini Potipar ngumbuk iya ngereja ulah seks ti kamah. Iya nemu nyawa diri engka deka lenyau enti iya enggai. Tang ari ke alah diumbuk, iya mandangka pemerani lalu tekala nya enggai nitihka utai ku bini Potipar.—P-kal. 39:10, 12.

7. Baka ni Rahap mandangka pemerani? (Peda gambar ba pun artikel.)

7 Rahap nya siti agi chunto pasal pemerani. Lebuh pematau orang Israel datai ke rumah iya di Jeriko, iya engka berasai takut lalu enggai nulung pematau nya. Tang ketegal iya manggaika diri ba Jehovah, iya berani ngelalaika dua iku pematau nya lalu nulung seduai iya ngelepaska diri. (Jos. 2:4, 5, 9, 12-16) Rahap pechaya, Jehovah nya Petara ti bendar, lalu iya andal Jehovah deka meri menua Jeriko ngagai orang Israel. Rahap enda ngelakka asai ati ti takutka orang, indah nyengkaum raja menua Jeriko enggau bala soldadu iya, nekul iya. Tang, iya ngereja pengawa enggau berani lalu nyelamatka diri empu sereta sida sebilik.—Jos. 6:22, 23.

8. Baka ni pemerani Jesus udah nulung bala rasul?

8 Bala rasul Jesus ke tetap ati mega mandangka pemerani. Sida udah meda pemerani ke diayanka Jesus, lalu tu nulung sida neladan iya. (Mat. 8:28-32; Jhn. 2:13-17; 18:3-5) Lebuh orang Saduki nguji nagang sida ngajar pasal Jesus, bala rasul enda bedulika tagang sida.—SKR. 5:17, 18, 27-29.

9. Baka ni 2 Timoti 1:7 nulung kitai nemu ari ni penatai pemerani?

9 Josep, Rahap, Jesus enggau bala rasul keran deka ngereja utai ti ngena. Sida mandangka pemerani ukai ketegal sida andalka penau diri, tang ketegal sida bepanggai ba Jehovah. Kekadang lebuh kitai begunaka pemerani, kitai mega patut bepanggai ba Jehovah, ukai ba diri empu.  (Bacha 2 Timoti 1:7.) Aram kitai beratika dua iti pekara ba pengidup ke begunaka pemerani: ba ruang bilik kitai sereta ba eklisia.

PEKARA KE BEGUNAKA PEMERANI

10. Nama kebuah orang Kristian ke biak begunaka pemerani?

10 Bisi mayuh pekara ke ngasuh orang Kristian ke biak patut mandangka pemerani ngambika ulih gawa ke Jehovah. Sida ulih belajar lalu nitihka chunto Solomon ke mandangka pemerani lebuh iya ngaga pemutus ti pintar ke deka nembuka pengawa nirika rumah sembiang. Taja pan orang ke biak ulih sereta patut diiring apai indai sida, tang sida bisi pemutus ti berat ke patut digaga kediri empu. (J-lam. 27:11) Sida begunaka pemerani kena ngaga pemutus bekaul enggau sapa ke patut nyadi pangan sida, nama deka digaga sida kena merindang diri, baka ni sida deka meruan tuchi ba ulah, sereta ni maya sida deka dibaptisa. Sida begunaka pemerani laban sida ngelaban peneka Sitan, ke ngelaban Petara.

11, 12. (a) Baka ni Moses mandangka pemerani? (b) Baka ni orang ke biak ulih neladan chunto Moses?

11 Siti pemutus berat ke patut digaga orang ke biak iya nya netapka juluk ati. Ba sekeda menua, orang ke biak diasuh ngemeratka bidang pelajar ke tinggi agi sereta bulih kereja ke begaji besai. Ba menua bukai, gaya ekonomi balat enda manah, lalu orang ke biak ngasaika sida patut gawa nulung diri sebilik. Enti nuan bisi napi siti ari penanggul nya, pikirka chunto Moses. Iya dibesaika anak indu raja menua Ejip, nya alai iya engka bisi juluk ati deka nyadi kaya tauka tebilang. Gambarka penanggul ke diasaika iya ari ruang bilik iya, bala pengajar sereta bala penyanding penemu ke bansa Ejip! Tang Moses berani, lalu milih deka enggau nembiak Petara. Pengudah iya ninggalka menua Ejip enggau pengaya ke bisi dia, iya bepanggai ba Jehovah enggau pengabis ati. (Heb. 11:24-26) Asil iya, Jehovah merekatka iya enggau belimpah-limpah, lalu Jehovah deka merekatka iya enggau mayuh agi jemah ila.

12 Lebuh orang ke biak berani netapka juluk ati ba pengawa ke Jehovah sereta ngenuluka Perintah Petara ba pengidup sida, Iya deka merekatka sida. Iya deka nulung sida nyediaka utai ti diguna apai indai sida. Ba abad keterubah, Timoti ke agi biak ngena pengidup iya gawa ke Petara, lalu nuan pan ulih. * (Peda nota kaki.)—Bacha Pilipi 2:19-22.

Kati nuan deka berani dalam semua pekara ba pengidup nuan? (Peda genteran 13-17)

13. Baka ni pemerani nulung menyadi Kristian indu ke biak nyapai juluk ati iya?

13 Seiku menyadi Kristian indu ke biak di Alabama, U.S.A., begunaka pemerani ngambika ulih netapka juluk ati ba pengawa ke Petara. Ku iya nulis, “Lebuh udah besai, aku nyadi orang ke amat malu. Aku tusah deka bejaku enggau orang ba Palan Gempuru, anang agi enti ngetuk pintu rumah orang ke enda dikelala.” Enggau tulung apai indai iya sereta bala bukai ba eklisia, iya ulih nyapai juluk ati ke deka nyadi pengerintis biasa. Ku iya madah: “Dunya Sitan nyungkak orang belajar tinggi agi, ngulihka nama, ngulihka duit, sereta ngembuan mayuh reta nyadika juluk ati.” Tang iya mega sedar, mayuh orang enda ulih nyapai juluk ati nya, lalu  nya semina ngasuh orang stres sereta pedis. Ku iya nambah: “Tang gawa ke Jehovah udah ngenataika pengelantang ti besai sereta ati ti puas.”

14. Ni maya apai indai ke orang Kristian begunaka pemerani?

14 Apai indai ke orang Kristian mega begunaka pemerani. Ambika chunto, tuke engka suah ngasuh nuan bekereja lebih jam ba hari ke udah ditetapka nuan belajarka Bup Kudus ba diri sebilik, ba pengawa nginjil sereta ba gempuru eklisia. Nuan begunaka pemerani madahka enggai ngagai tuke nuan, lalu netapka chunto ti patut ngagai anak nuan. Tauka sekeda apai indai ba eklisia engka ngemendarka anak sida ngereja utai ke enda diasuh nuan kereja anak nuan. Lebuh bala apai indai nya nanya nuan kebuah iya, kati nuan berani lalu madahka kebuah nya enggau chara ti bebasa?

15. Baka ni Masmur 37:25 enggau Hebrew 13:5 ulih nulung apai indai?

15 Endang begunaka pemerani enti deka nulung anak kitai netapka sereta nyapai juluk ati ba pengawa ke Petara. Ambika chunto, sekeda apai indai engka takut deka meransang anak sida nyadika pengawa pengerintis nya kereja sida, gawa ba endur ke begunaka mayuh agi bantu, gawa ba Betel, tauka nulung nirika Palan Gempuru sereta Palan Gempuru Besai. Apai indai engka irauka anak sida enda ulih nyaga sida tauka diri empu dudi hari. Taja pia, apai indai ke pintar mandangka pemerani sereta arapka Jehovah deka ngamatka semaya Iya. (Bacha Masmur 37:25; Hebrew 13:5.) Apai indai ke mandangka  pemerani sereta bepanggai ba Jehovah nulung anak sida ngereja utai ti sama.—1 Sam. 1:27, 28; 2 Tim. 3:14, 15.

16. Baka ni sekeda apai indai nulung anak sida netapka juluk ati ba pengawa ke Petara, lalu baka ni tu meri penguntung ke anak sida?

16 Sepasang melaki-bini di Amerika Serikat nulung anak seduai iya ngemeratka pengawa ke Jehovah. Ku laki nya madah: “Sebedau anak kami duai nemu bejalai sereta bejaku, kami duai berandau enggau sida pasal pengaga ati ke diulih ba pengawa ngerintis sereta gawa ke eklisia. Nya meh juluk ati sida diatu.” Ku iya nambah, ketegal anak seduai iya udah netapka sereta nyapai juluk ati, nya nulung sida ngelaban penguji ba dunya Sitan lalu ngemeratka pengawa ke Jehovah. Seiku menyadi Kristian lelaki ke bisi dua iku anak nulis: “Mayuh apai indai ngena mayuh awak sereta belanja nulung anak sida nyapai juluk ati ba pekara baka lumba enggau main, hobi sereta bidang pelajar. Endang manah agi enti ngena mayuh awak sereta belanja nulung anak kitai nyapai juluk ati ke ulih nulung sida ngetanka kaul ti manah enggau Jehovah. Endang puas ati ulih meda anak kami duai nyapai juluk ati ba pengarap sereta sama bulih berekat enggau seduai iya.” Nuan ulih pechaya, apai indai ke nulung anak sida netapka sereta nyapai juluk ati ba pengawa ke Petara deka bulih berekat ari Iya.

PEMERANI BA EKLISIA

17. Beri sekeda chunto pasal pemerani ba eklisia Kristian.

17 Kitai mega patut mandangka pemerani ba eklisia. Ambika chunto, bala tuai gempuru begunaka pemerani lebuh sida mutarka sekeda kes ke bekaul enggau dosa ti besai tauka lebuh sida nulung orang ke napi penanggul ti tau nganu nyawa ketegal orang nya patut diperubat enggau lengkas. Sekeda bala tuai gempuru ngelawa rumah jil lalu belajar enggau orang ke bisi ati deka belajar tauka ngatur pengawa begempuru. Lalu baka ni enggau bala menyadi Kristian indu ke bedau belaki? Sida bisi mayuh peluang mandangka pemerani sereta gawa ke Jehovah. Sida ulih nyadi pengerintis, pindah ngagai endur ke begunaka mayuh agi bantu, gawa enggau program Pengawa Ngaga Pelan/Nirika ba Endur Nya, sereta enggau Sekula Penginjil Perintah Petara. Sekeda ari sida indah dikangau enggau Sekula Gilead.

18. Baka ni bala menyadi Kristian indu ke tuai mandangka pemerani?

18 Kitai rinduka bala menyadi Kristian indu ke tuai, lalu kitai gaga ati laban sida bisi enggau kitai ba eklisia! Taja pan sekeda ari sida engka enda ulih ngereja mayuh pengawa ke Petara baka ke udah, tang sida agi ulih mandangka pemerani lalu ngereja pengawa nya. (Bacha Titus 2:3-5.) Ambika chunto, seiku menyadi Kristian indu ke tuai patut mandangka pemerani enti tuai gempuru ngasuh iya bejaku enggau seiku menyadi Kristian indu ke biak pasal chara begari enggau penumbas iya. Menyadi Kristian indu ke tuai nya enda nganu menyadi Kristian indu ke biak pasal gari ke dikena iya. Tang enggau chara ti nelap, menyadi Kristian indu ke tuai nya deka nulung iya berunding baka ni gari ke dikena iya bisi kaul orang bukai. (1 Tim. 2:9, 10) Lebuh bala menyadi Kristian indu ke tuai mandangka pengerindu baka nya, sida ulih negapka bala menyadi Kristian.

19. (a) Baka ni bala menyadi Kristian lelaki ke udah dibaptisa tau bulih pemerani? (b) Baka ni Pilipi 2:13 enggau 4:13 ulih nulung bala menyadi Kristian lelaki nyadi berani?

 19 Bala menyadi Kristian lelaki ke udah dibaptisa mega patut berani lalu ngereja pengawa ke Jehovah. Lebuh sida sanggup nyadi penulung gempuru sereta tuai gempuru, eklisia deka bulih mayuh penguntung. (1 Tim. 3:1) Taja pia, sekeda ari sida engka kakang ati deka megai pengawa nya. Tu engka ketegal menyadi Kristian ke lelaki kala ngereja penyalah, lalu diatu iya ngasaika diri enda patut nyadi penulung gempuru tauka tuai gempuru. Seiku agi menyadi Kristian ke lelaki engka ngasaika diri nadai ngembuan penau ti diguna kena bejalaika pengawa nya. Enti nuan ngasaika nya, Jehovah ulih nulung nuan bulih pemerani. (Bacha Pilipi 2:13; 4:13.) Kingatka chunto pasal Moses. Iya mega ngasaika diri enda ulih ngereja utai ke diasuh Jehovah kereja iya. (P-sut. 3:11) Tang Jehovah nulung iya nyadi berani lalu ngereja utai ke patut. Baka ni menyadi Kristian lelaki ke udah dibaptisa tau bulih pemerani baka nya? Iya ulih besampi minta tulung ngagai Jehovah sereta macha Bup Kudus ninting hari. Iya ulih belematika chunto Bup Kudus pasal orang ke mandangka pemerani. Iya ulih enggau baruh ati minta bala tuai gempuru ngelatih iya sereta madahka diri deka nulung lebuh eklisia begunaka tulung. Kitai meransang semua menyadi Kristian lelaki ke udah dibaptisa ngambika berani sereta bebendar gawa ke bala menyadi Kristian!

‘JEHOVAH . . . BISI ENGGAU NUAN’

20, 21. (a) David ngingatka Solomon pasal nama? (b) Kitai ulih pechayaka nama?

20 Raja David ngingatka Solomon pasal Jehovah ke deka enggau Solomon nyentuk ngagai Rumah Sembiang nya tembu didirika. (1 Ban. 28:20) Solomon tentu belematika jaku tu, lalu iya enda ngelakka umur iya ti biak sereta nadai peneleba nekul iya bejalaika pengawa nya. Tang, iya mandangka pemerani lalu enggau tulung ari Jehovah, Rumah Sembiang ke chukup manah nya tembu dalam kandang tujuh setengah taun.

21 Jehovah udah nulung Solomon, lalu Iya mega ulih nulung kitai berani sereta ngemujurka pengawa kitai ba diri sebilik enggau ba eklisia. (Isa. 41:10, 13) Enti kitai mandangka pemerani lebuh gawa ke Jehovah, kitai ulih pechaya Iya deka merekatka kitai diatu sereta jemah ila. Nya alai, “berani, lalu kereja pengawa nya.”

^ per. 12 Nuan deka bulih sekeda chara baka ni netapka juluk ati ba pengawa ke Petara dalam artikel “Gunakanlah Cita-Cita Rohani untuk Memuliakan Pencipta Saudara,”-IN ke dikeluarka ba majalah Menara Pengawal kena 15 Julai 2004.