Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Ogos 2017

Baka Ni Kitai Ulih Ngembuan Lalu Majak Enggau Ulah ti Baru

Baka Ni Kitai Ulih Ngembuan Lalu Majak Enggau Ulah ti Baru

‘Rasukka ulah ti baru.’ —Kol. 3:10, NW.

LAGU: 126, 28

1, 2. (a) Baka ni kitai nemu kitai ulih ngembuan ulah ti baru? (b) Nama pemanah ulah ti baru ke deka dipelajarka kitai ba Kolosi 3:10-14?

DALAM Bup Kudus Baru jaku Iban, kitai ulih tetemuka rambai jaku “mensia [ulah, NW] ti baru.” (Eps. 4:24; Kol. 3:10) Tu nunjukka ulah ti ditempa sejalai enggau peneka Petara. Kati ulih kitai ngembuan ulah ti baru? Ulih. Jehovah nempa mensia neladan gamal Iya, nya alai kitai ulih neladan pemanah Iya ti badas.—P-kal. 1:26, 27; Eps. 5:1.

2 Endang amat, ketegal kitai enda sempurna, kekadang semua kitai ngembuan pengingin ti salah. Kitai mega dikuingka utai ke bisi ngelingi kitai. Tang enggau saup ari Jehovah ti pengasih, kitai ulih nyadi mensia ti dikedeka Iya. Kena nulung kitai bisi pengeran deka ngereja tu, aram kitai berandauka sekeda pemanah ulah ti baru. (Bacha Kolosi 3:10-14.) Udah nya kitai deka meda baka ni kitai ulih  mandangka pemanah nya ba pengawa nginjil kitai.

“SEMUA KITA NYADI SIKU”

3. Nama sebengkah ari pemanah ulah ti baru?

3 Paul madahka, enda berat sepiak nya siti ari pemanah ti beguna ba ulah ti baru. Iya madahka: “Dalam pengidup ti baru tu sigi nadai bida entara orang bansa bukai enggau orang Judah, entara orang ke udah ditutus enggau orang ke enda ditutus, entara orang ke enda beradat enggau orang ke semina pama mimit ari jelu, entara orang ke ulun enggau orang ke ukai ulun.” Dalam eklisia, nadai seiku orang patut ngasaika diri manah agi ari orang bukai ketegal bansa, menua, tauka penuduk iya dalam komuniti. Nama kebuah? Laban kitai nembiak Kristus, semua kitai “nyadi siku.”—Kol. 3:11; Gal. 3:28.

Kitai masa semua orang, enda ngira nama bansa tauka gaya pengidup iya

4. (a) Baka ni nembiak Jehovah patut begulai enggau orang bukai? (b) Nama utai ke ulih ngachau penyerakup orang Kristian?

4 Lebuh kitai ngembuan ulah ti baru, kitai masa semua orang, enda ngira nama bansa tauka gaya pengidup sida. (Rom. 2:11) Ba sekeda endur di dunya, tu ukai utai ti senang. Ngambika chunto, suba di Afrika Selatan, perintah di menua nya netapka alai endur orang ke enda sebaka bansa diau. Mayuh orang ke diau di menua nya, nyengkaum bala Saksi, agi diau ba endur nya. Raban ti Ngiring deka meransang bala menyadi Kristian kitai ‘nukangka ati.’ Nya alai, ba bulan Oktober 2013, sida ngemendarka siti atur ti spesial ke deka nulung bala menyadi Kristian ke enda sebaka bansa ngelala pangan diri enggau manah agi.—2 Kor. 6:13.

5, 6. (a) Nama atur ke digaga ba siti menua kena nulung nembiak Petara beserakup agi? (Peda gambar ba pun artikel.) (b) Nama asil iya?

5 Bala menyadi Kristian ngaga atur ngambika ba sekeda ujung minggu, bala Saksi ari dua buah eklisia ke ngena jaku ti enda sebaka tauka ari bansa bukai ulih ngena awak nya begulai enggau pangan diri. Bala menyadi Kristian ari dua buah eklisia nya sama nginjil, sama datai ngagai gempuru, sereta ngusung pangan diri. Beratus iku bala menyadi Kristian sama enggau atur tu, lalu pampang opis nerima mayuh riput ti manah. Tu indah narit ati sekeda orang ke ukai Saksi. Ngambika chunto, seiku tuai pengarap gerija madahka: “Aku tu ukai Saksi, tang aku deka madahka kita ngembuan pengawa nginjil ti teratur amat, lalu kitai ngembuan penyerakup taja pan kita pupu bansa.” Baka ni asai ati bala menyadi Kristian pasal atur tu?

6 Terubah, seiku menyadi Kristian indu ke benama Noma ke ngena jaku Xhosa berasai irau deka ngelaluka bala Saksi ari eklisia ke ngena jaku English ngagai rumah iya ke nadai entu utai. Tang pengudah iya nginjil enggau bala Saksi ke bekulit burak sereta ngusung sida, ati iya berasai nyamai agi. Ku iya  madahka: “Sida pan sama baka kitai!” Nya alai, lebuh bala menyadi Kristian ari eklisia ke ngena jaku English nginjil enggau eklisia ke ngena jaku Xhosa, Noma ngelaluka sekeda sida makai ba rumah iya. Iya alit ati lebuh iya meda seiku ari temuai iya, iya nya seiku tuai gempuru ke bekulit burak, gaga ati duduk ba atas kerusi plastik ti baruh. Ketegal atur tu terus dipejalaika, mayuh bala menyadi Kristian bulih bala pangan ti baru sereta terus ngelala sida ke ari gaya pengidup ti enda sebaka.

RASUKKA PENYINU ATI ENGGAU PEMANAH ATI

7. Nama kebuah kitai patut seruran mandangka penyinu ati?

7 Nembiak Jehovah deka napi penusah nyentuk ngagai dunya Sitan nadai agi. Nadai kereja, penyakit ti raya, diperinsa, pengerusak alam, lenyau reta ketegal jenayah, tauka penusah ti bukai engka ninggang semua kitai. Kena nulung pangan diri ba maya ti tusah, kitai patut ngembuan penyinu ati ti bendar. Penyinu ati ulih meransang kitai manah ati enggau orang bukai. Tu sekeda ari pemanah ke bisi ba ulah ti baru. Dua bengkah pemanah tu deka nulung kitai neladan Petara sereta ngelantangka ati orang bukai.—2 Kor. 1:3, 4.

8. Nama asil enti kitai sinu ati sereta manah ati enggau semua orang ba eklisia? Beri siti chunto.

8 Baka ni kitai ulih mandangka diri manah agi ati ngagai orang ba eklisia kitai ke udah pindah ari menua bukai tauka ke enda entu dikeibuhka? Kitai deka ngelaluka sida, nyadi pangan sida, sereta nulung sida nemu kitai begunaka sida ba eklisia. (1 Kor. 12:22, 25) Ngambika chunto, Dannykarl pindah ngagai menua Jepun ari menua Filipina. Ketegal iya datai ari menua bukai, iya enda entu dikeibuhka baka pekereja bukai. Udah nya iya datai ngagai gempuru Saksi-Saksi Jehovah. Ku Dannykarl madahka: “Nyauka semua ke datai nya orang Jepun, tang sida nyambut aku enggau manah. Sida baka orang ke udah lama ngelala aku.” Pemanah ati bala menyadi Kristian nya terus nulung iya semak enggau Jehovah. Nyau kelama Dannykarl dibaptisa, lalu diatu iya nyadi tuai gempuru. Bala tuai gempuru ke dia gaga ati laban iya enggau bini iya, Jennifer, sama enggau eklisia nya, lalu ku sida: “Seduai iya idup enggau pengumbas iya seraya nyadi pengerintis, lalu nyadi chunto ti manah bekaul enggau ngiga dulu Perintah Petara.”—Luk. 12:31.

9, 10. Beri chunto ke nunjukka asil ti manah lebuh kitai mandangka penyinu ati lebuh nginjil.

9 Kitai bisi peluang ngereja pengawa ti “badas ngagai semua orang” lebuh kitai nusui berita manah pasal Perintah Petara. (Gal. 6:10) Mayuh bala Saksi berasai sinu ati ke orang ti datai ari menua bukai, lalu nguji belajarka jaku sida. (1 Kor. 9:23) Utai ti dikereja sida meri asil ti manah. Ngambika chunto, seiku menyadi Kristian indu ke benama Tiffany ti nyadi pengerintis di Australia, belajarka jaku Swahili ngambika ulih nulung eklisia ke ngena jaku Swahili di nengeri Brisbane. Taja pan belajarka jaku nya tusah, tang pengidup iya bisi agi reti. Tiffany madahka: “Enti nuan deka bisi pengawa nginjil ti ngagitka ati, endang manah  enti nuan ulih enggau eklisia ke ngena jaku ari menua bukai. Nya baka pejalai jauh tang nuan enda ibuh ninggalka menua diri. Nuan ulih ngasaika kaul bala menyadi Kristian entarabansa sereta meda penyerakup ti ngalitka ati.”

Nama ngasuh orang Kristian deka nulung orang ke datai ari menua bukai? (Peda genteran 10)

10 Siti ruang bilik di Jepun mega ngereja utai ti sama. Ku anak seduai iya, Sakiko madahka: “Kami suah betemu enggau orang ke datai ari menua Brazil lebuh kami nginjil. Lebuh kami mandangka ayat Bup Kudus ari Bup Kudus ke ngena jaku Portugis, baka Pemandang 21:3, 4 tauka Masmur 37:10, 11, 29, sida mendingka enggau manah, lalu kekadang ai mata sida bekeberai.” Ruang bilik nya berasai sinu ati ke sida lalu deka nulung sida belajarka pemendar. Nya alai ruang bilik nya berengkah belajarka jaku Portugis. Udah nya, sida sebilik nulung ngepunka eklisia jaku Portugis. Betaun sida udah nulung mayuh orang ari menua bukai nyadi nembiak Jehovah. Sakiko madahka: “Belajarka jaku Portugis enda senang, tang berekat iya amat ngemuaska ati. Kami amat beterima kasih ngagai Jehovah.”—Bacha Kereja Rasul 10:34, 35.

RASUKKA ATI TI BARUH

11, 12. (a) Nama kebuah kitai patut ngembuan tuju ti betul enti deka ngembuan ulah ti baru? (b) Nama ulih nulung kitai mengkang baruh ati?

11 Tuju kitai ngembuan ulah ti baru iya nya deka ngemuliaka Jehovah, ukai deka nerima puji ari orang bukai. Kingatka, indah seiku melikat ti sempurna nyadi sumbung, lalu bedosa. (Banding Esekiel 28:17.) Kitai enda sempurna, nya alai kitai tusah amat deka nyeliahka penyumbung. Taja pia, kitai agi ulih ngerasukka ati ti baruh. Nama ulih nulung kitai ngereja tu?

12 Siti chara ke ulih nulung kitai baruh ati iya nya macha Jaku Petara ninting hari sereta belematika utai ti udah dibacha kitai. (U-dat. 17:18-20) Kelebih agi kitai patut belematika utai ti diajar Jesus sereta chunto manah pasal pemaruh ati iya. (Mat. 20:28) Jesus amat baruh ati nyentukka iya masu kaki bala rasul iya. (Jhn. 13:12-17) Siti agi utai ke ulih dikereja kitai iya nya besampi minta roh kudus Jehovah. Roh kudus Iya ulih nulung kitai ngelaban semua pengingin ke ngumbai diri manah agi ari orang bukai.—Gal. 6:3, 4; Plp. 2:3.

Enti kitai baruh ati, eklisia deka bisi mayuh agi pemaik sereta beserakup

13. Nama upah enti baruh ati?

 13 Bacha Jaku Dalam 22:4. Jehovah deka kitai baruh ati. Ati ti baruh ngenataika mayuh upah. Enti kitai baruh ati, eklisia deka bisi mayuh agi pemaik sereta beserakup. Pia mega, Jehovah deka meri kitai pengasih Iya. Rasul Peter madahka: “Lalu semua kita enda tau enda baruh ati lebuh kita begulai enggau pangan diri, laban ‘Petara ngelaban orang ke sumbung, tang ngayanka pengasih ngagai orang ke baruh ati.’”—1 Pet. 5:5.

RASUKKA PENELAP ENGGAU ATI TI LIAT

14. Sapa teladan ti pemadu badas pasal penelap sereta ati ti liat?

14 Ba dunya kemaya hari tu, enti orang nya nelap sereta liat ati, orang bukai suah ngumbai iya lemi. Tang tu enda amat. Pemanah tu datai ari Jehovah, Orang ti pemadu bekuasa di dunya raya. Iya teladan ti pemadu badas pasal penelap sereta ati ti liat. (2 Pet. 3:9) Ngambika chunto, perundingka pengeliat ati Jehovah lebuh Iya nyaut Abraham enggau Lot nengah bala melikat Iya. (P-kal. 18:22-33; 19:18-21) Lalu perundingka pengeliat ati Jehovah ngagai bansa Israel ke enda ngasi pengelama lebih ari 1,500 taun.—Esk. 33:11.

15. Nama teladan ke ditetapka Jesus bekaul enggau nelap sereta ati ti liat?

15 Jesus nya “nelap.” (Mat. 11:29) Iya amat liat ati enggau pengurang bala murid iya. Lebuh Jesus nginjil ba dunya, iya suah dipejai sereta dipetenah. Tang iya nelap sereta liat ati nyentuk ngagai iya mati. Lebuh Jesus balat pedis ba tiang, iya minta Apai iya ngampun orang ke munuh iya. Ku iya madahka: “Sida enda nemu utai ti dikereja diri.” (Luk. 23:34) Indah lebuh Jesus balat ditekan tauka pedis, iya mengkang nelap sereta liat ati.—Bacha 1 Peter 2:21-23.

16. Baka ni kitai ulih mandangka penelap sereta ati ti liat?

16 Paul madahka siti chara kitai ulih mandangka penelap sereta ati ti liat lebuh iya nulis: “Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan ke udah ngampun kita, baka nya mega kita ngampun pangan diri.” (Kol. 3:13) Ngambika ulih ngampun orang bukai, kitai patut nelap sereta liat ati. Tu deka ngemansang sereta nyaga penyerakup dalam eklisia.

17. Nama kebuah nelap sereta liat ati nya beguna?

17 Jehovah deka kitai nelap sereta liat ati enggau orang bukai. Pemanah tu beguna enti kitai deka diau ba dunya baru Iya. (Mat. 5:5; Jas. 1:21) Lebuh kitai nelap sereta liat ati, kitai masa Jehovah sereta nulung orang bukai ngereja utai ti sama.—Gal. 6:1; 2 Tim. 2:24, 25.

RASUKKA PENGERINDU

18. Baka ni pengerindu enggau ulah ke enda bepilih mata bekaul enggau pangan diri?

18 Semua pemanah ke udah dikerandauka kitai bekaul enggau pengerindu.  Ngambika chunto, murid ke benama James meri jaku lalau ngagai bala menyadi Kristian iya laban sida rindu agi ke orang kaya enti dibandingka enggau orang ke seranta. Iya madahka, ulah ke baka nya ngelaban pesan Petara ti ngasuh “rinduka pangan diri [orang bukai, NW] baka kita ke rinduka diri empu.” Udah nya, ku iya nambah: “Tang enti kita bepilih mata, kita bedosa.” (Jas. 2:8, 9) Enti kitai rinduka orang, kitai enda bechiping enggau orang ketegal pelajar, bansa, tauka tikas sosial iya. Kitai enda patut pepura baka orang ke enda bepilih mata.

19. Nama kebuah nya beguna kitai ngerasukka pengerindu?

19 Pengerindu nya mega “liat ati, nelap [manah ati, NW]” sereta enda “sumbung.” (1 Kor. 13:4) Kitai patut liat ati, manah ati, sereta baruh ati ngambika ulih terus bekunsi berita manah enggau orang bukai. (Mat. 28:19) Pemanah tu mega ngasuh kitai senang agi begulai enggau semua bala menyadi Kristian dalam eklisia. Enti semua kitai mandangka pengerindu ke baka nya, bala menyadi Kristian kitai deka beserakup sereta ngenataika basa ngagai Jehovah. Orang bukai ulih meda penyerakup tu, lalu dibai ngagai pemendar. Nya kebuah, Bup Kudus nyimpulka ulah ti baru nya: “Lebih ari semua, rasukka pengerindu kena ngempung semua utai nyadi siti.”—Kol. 3:14.

“MAJAK DIUBAH NYADI BARU”

20. (a) Nama tanya ke patut ditanya kitai empu? Nama kebuah? (b) Pengidup ti ngerinduka ati ke baka ni ti dianti kitai?

20 Semua kitai patut nanya diri empu, ‘Nama agi ubah ke patut digaga aku ngambika ulih ngelengka sereta ninggalka pengidup ti lama?’ Kitai patut besampi ngagai Jehovah sereta minta Iya nulung kitai. Kitai patut bebendar ngubah runding tauka pengawa ti salah ngambika kitai ulih ‘bempu Perintah Petara.’ (Gal. 5:19-21) Kitai mega patut nanya diri empu, ‘Kati aku terus ngubah chara aku berunding ngambika ulih ngelantangka ati Jehovah?’ (Eps. 4:23, 24) Kitai enda sempurna, nya alai kitai patut bebendar ngembuan lalu majak enggau ulah ti baru. Pengawa tu enda ngetu. Naka meh penyamai pengidup enti semua orang ngembuan ulah ti baru sereta deka neladan pemanah Jehovah enggau badas!