Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Ogos 2017

Baka Ni Kitai Ngelengka Sereta Ninggalka Ulah ti Lama

Baka Ni Kitai Ngelengka Sereta Ninggalka Ulah ti Lama

‘Lengkaka pengidup [ulah, NW] ti lama, enggau semua pengawa iya.’—KOL. 3:9.

LAGU: 121, 142

1, 2. Nama diperatika orang pasal Saksi-Saksi Jehovah?

MAYUH orang beratika Saksi-Saksi Jehovah enda sebaka enggau orang bukai. Ngambika chunto, seiku penulis ke benama Anton Gill muji pemanah bala Saksi maya jeman Nazi Jerman. Ku iya nulis: “Bala Saksi-Saksi Jehovah nyadi tagit bala nazi ke balat begedika sida. . . . Ba taun 1939, bisi 6,000 iku bala Saksi ba [kem alai ngetan orang tangkap].” Ku iya nambah, taja pan bala Saksi napi pemerinsa ti balat, sida dikelala orang ketegal sida tau dikearap, enda ngelaban lebuh ditekan, taluk ngagai Petara sida, sereta beserakup.

2 Orang di Afrika Selatan mega beratika utai ti enda sebaka pasal Saksi-Saksi Jehovah. Bisi sekali, bala Saksi ke enda sebaka chura kulit di menua nya enda dikemendarka begulai begempuru. Taja pia, kena Hari Minggu, 18 Disember 2011, lebih ari 78,000 iku bala Saksi ari mayuh pupu bansa di Afrika Selatan sereta menua bukai ke semak dia begempuru ngulu siti program spesial ba stadium ti pemadu  besai di Johannesburg. Seiku ari manijer stadium nya madahka: “Sida tu bala orang ke ngembuan ulah ti pemadu badas ke kala dipeda aku ba stadium tu. Semua sida begari enggau kemas. Lalu kita udah meresi stadium tu enggau manah. Tang kelebih agi, kitai amat datai ari pupu bansa.”

3. Nama utai ke ngasuh bala menyadi Kristian kitai ngalitka ati?

3 Indah orang ke ukai Saksi ulih enggau terang meda kitai endang bala menyadi Kristian entarabansa ti ngalitka ati. (1 Pet. 5:9) Nama kebuah kitai enda sebaka enggau gerempung ke bukai? Laban tulung ari Bup Kudus sereta roh kudus Petara, kitai bebendar ngubah sebarang ulah ti enda ngerinduka ati Jehovah ke bisi ba kitai. Kitai “ngelengkaka pengidup [ulah, NW] ti lama,” lalu nganti enggau “mensia [ulah, NW] ti baru.”—Kol. 3:9, 10.

Kitai ulih ngaga ubah ti besai ba pengidup

4. Nama deka dikerandauka kitai ba artikel tu? Nama kebuah?

4 Pengudah kitai ngelengkaka ulah ti lama, kitai patut ninggalka iya. Ba artikel tu, kitai deka dulu belajarka baka ni kitai ulih ngelengkaka ulah ti lama, sereta kebuah utai tu berat amat. Kitai deka nemu, orang ulih ngaga ubah ti besai ba pengidup enda ngira ni pemesai utai salah ke dikereja iya. Udah nya, kitai deka berandauka utai ti ulih dikereja orang ke udah lama dalam pemendar ngambika ulih ngelengkaka ulah ti lama. Nama kebuah kitai patut berandauka pekara tu? Laban sekeda orang ke kala nyembah Jehovah nyau enda bejimat agi. Sida berengkah berunding sereta beperangai baka sebedau sida ngelala Jehovah. Genap iku kitai patut ingatka jaku tangkan tu: “Enti kita ngumbai diri bediri tegap, bejaga kita ngambika kita enda rebah.”—1 Kor. 10:12.

MUAI SEMUA PENGINGIN SEKS TI KAMAH

5. (a) Beri siti chunto ke nunjukka kebuah kitai patut enggau lengkas ngelengkaka ulah ti lama. (Peda gambar ba pun artikel.) (b) Nama bansa pengawa ke bekaul enggau ulah ti lama ke disebut ba Kolosi 3:5-9?

5 Nama deka digaga nuan enti nemu gari diri kamah sereta bau? Tentu nuan muka gari nya enggau lengkas. Pia mega, enti kitai nemu diri ngereja utai ti dipegedika Jehovah, kitai patut berubah enggau lengkas. Ngenang pasal pengawa ti salah ke baka nya, Paul madahka: “Buai semua utai nya ari kita.” Aram kitai beratika dua iti pengawa ti salah nya: ulah seks ti kamah enggau ulah ti enda tuchi.—Bacha Kolosi 3:5-9.

6, 7. (a) Baka ni jaku Paul nunjukka kitai patut bebendar ngelengkaka ulah ti lama? (b) Baka ni chara pengidup Sakura? Nama ngasuh iya deka berubah?

6 Ulah seks ti kamah. Dalam Bup Kudus, “ulah ti kamah” nya nyengkaum beleman enggau orang ke ukai laki tauka bini diri. Paul madahka, orang Kristian patut ‘munuh semua pengingin dunya ti dalam’ sida enti utai nya bekaul enggau ulah seks ti kamah. Reti nya, kitai patut  bebendar muai pengingin ti salah. Tu enda senang dikereja, tang kitai ulih mujur!

7 Kitai ulih meda tu ari chunto seiku menyadi Kristian indu ari menua Jepun ke benama Sakura. * (Peda nota kaki.) Lebuh Sakura mansang besai, iya suah berasai puang sereta seilu-ilu. Kena muai asai ati ti puang, iya berengkah beleman lebuh iya beumur 15 taun. Sakura beleman enggau mayuh orang lalu udah bebuai anak tiga kali. Ku iya madahka: “Terubah iya, aku berasai enda irau lebuh beleman enggau orang, laban aku ngumbai diri diguna sereta dikesayau. Tang suah agi aku beleman, aku majak irau.” Sakura ngembuan pengidup ke baka tu nyentuk ngagai umur iya 23 taun. Udah nya iya berengkah belajarka Bup Kudus enggau Saksi-Saksi Jehovah, lalu iya rindu enggau utai ti dipelajarka iya. Jehovah nulung iya badu agi ngembuan pengidup ke baka nya sereta mutarka asai ati ti balat salah sereta malu. Diatu, Sakura nyadi pengerintis biasa, lalu iya enda agi berasai puang. Ku iya madahka: “Aku amat gaga ati ulih ngasaika pengerindu Jehovah ninting hari.”

BAKA NI DEKA BADU NGEREJA ULAH TI ENDA TUCHI

8. Nama sekeda pengawa ke ulih ngasuh Petara ngumbai kitai enda tuchi?

8 Ulah ti enda tuchi. Dalam Bup Kudus, “ulah ti enda tuchi” nya ukai semina nyengkaum ulah seks ti kamah. Nya nyengkaum pengawa baka nginsap tauka ngena jaku tundi ti kamah. (2 Kor. 7:1; Eps. 5:3, 4, NW) Nya mega nyengkaum utai ti enda manah ke dikereja orang lebuh kediri, baka macha bup ke meransang pengingin seks tauka meda pornografi. Utai tu ulih ngujungka pengawa ti enda tuchi, iya nya ngeluchu. (Kol. 3:5) *—Peda nota kaki.

9. Nama ulih nyadi enti orang nanam “runding ti kamah”?

9 Orang ke suah meda pornografi nanam “runding ti kamah” lalu ulih gian enggau pengawa seks. Bala pemansik beratika, gian meda pornografi nya sama enggau gian ngirup ai bisa tauka makai dadah. Nya kebuah tebiat meda pornografi ulih ngenusahka. Tu nyengkaum asai ati ti balat malu, asil kereja enda entu manah, ruang bilik ti enda lantang, sarak, sereta indah munuh diri. Pengudah seiku lelaki badu agi gian meda pornografi pengelama setaun, iya madahka, nya baru iya ngasaika diri ulih bebasaka diri empu baru.

10. Baka ni Ribeiro ngelepaska diri ari gian meda pornografi?

10 Mayuh orang ngasaika diri tusah amat deka ngelepaska diri ari pornografi. Tang penusah tu ulih diputarka. Peratika chunto Ribeiro ari menua Brazil. Lebuh iya agi nembiak, iya ninggalka rumah lalu gawa ba kilang ke ngaga keretas lama nyadi baru. Dia, iya meda majalah pornografi. Ku Ribeiro madahka: “Belubah-lubah aku nyadi gian. Pengingin tu kelalu balat nyentukka aku enda sabar nganti indu ke diau begulai enggau aku pansut ari rumah ngambika aku ulih meda video pornografi.” Bisi sekali ba endur kereja, Ribeiro meda siti tugung  bup lama ke deka digaga nyadi baru lalu tepedaka bup Rahsia Kebahagiaan Keluarga. Iya ngambi lalu macha bup nya. Utai ke ditemu iya meransang iya belajarka Bup Kudus enggau Saksi-Saksi Jehovah. Tang Ribeiro agi beguna timpuh ti panjai kena ngelepaska diri ari gian meda pornografi. Nama nulung iya? Ku iya madahka: “Nengah sampi, belajarka Bup Kudus, sereta belematika utai ke dipelajarka aku, terima kasih aku ke pemanah Petara nambah nyentukka pengerindu aku ke Jehovah dalam agi ari pengingin aku ke pornografi.” Ketegal tulung ari Bup Kudus sereta roh kudus Petara, Ribeiro ngubah chara pengidup iya, dibaptisa, lalu diatu iya nyadi tuai gempuru.

Kitai mega patut rinduka Jehovah sereta begedika utai ti jai

11. Nama deka nulung orang ngelepaska diri ari pornografi?

11 Peratika kena ngelepaska diri ari pornogarfi, Ribeiro ukai semina belajarka Bup Kudus aja. Iya belematika utai ti dibacha iya dalam Bup Kudus lalu ngelakka utai ti dibacha iya tama ba ati. Ribeiro besampi ngagai Jehovah, minta tulung ari Iya. Utai tu nulung ngenalamka agi pengerindu Ribeiro ke Petara, ngambika pengerindu iya ulih ngalahka pengingin ti deka meda pornografi. Kena ngelepaska diri ari pornografi, kitai mega patut rinduka Jehovah sereta begedika utai ti jai.—Bacha Masmur 97:10.

BUAI PENGERINGAT, JAKU TI JAI, SERETA BULA

12. Nama udah nulung Stephen muai pengeringat enggau jaku ti jai?

12 Sekeda orang jampat amat ringat, lalu nyebut jaku ti kasar sereta ngutuk orang bukai. Enti utai tu bisi nyadi, sida sebilik deka tusah. Seiku apai ke benama Stephen ari menua Australia, suah ngena jaku sumpah sereta jampat ringat ketegal utai ti mit. Ku iya madahka: “Aku enggau bini aku udah tiga kali beserara lalu benung berunding deka sarak.” Udah nya, seduai iya berengkah belajarka Bup Kudus enggau bala Saksi, lalu Stephen nguji nitihka utai ti benung dipelajarka iya. Iya madahka, sebedau ngelala Jehovah, iya jampat amat ringat enti bisi utai ke ngasuh iya pedis ati nyentukka iya ngasaika diri baka bom ke nganti maya deka meletup. Tang pengudah Stephen berengkah nitihka jaku ajar Bup Kudus, utai berengkah manah agi. Ku iya madahka: “Pengidup kami sebilik majak manah. Enggau tulung ari Jehovah, diatu aku ngasaika mayuh pemaik enggau pengelantang.” Diatu, Stephen nyadi penulung gempuru, lalu bini iya udah nyadi pengerintis biasa beberapa taun. Bala tuai gempuru ke sama eklisia enggau Stephen madahka: “Stephen nya orang ti imun, bagas gawa, sereta ngembuan ati ti baruh.” Sida mega madahka diri enda kala meda iya ringat. Stephen enggai nerima puji ke ubah ti udah digaga iya. Ku iya madahka: “Nadai siti ari berekat ke manah tu ulih nyadi ba pengidup aku enti aku enda nerima tulung ari Jehovah kena ngubah pengidup aku.”

13. Nama kebuah pengeringat tau ngenusahka? Nama jaku tangkan ke diberi Bup Kudus ngagai kitai?

 13 Bup Kudus enda ngasuh kitai jampat ringat, bejaku kasar enggau orang bukai, sereta beperak. (Eps. 4:31) Perangai ke baka tu suah ngujungka ulah ti kasar. Kemaya hari tu, mayuh orang ba dunya ngumbai pengeringat sereta ulah ti kasar nya ukai utai ti salah. Tang kebendar, perangai ke baka tu enda ngemuliaka Penempa kitai. Mayuh ari bala menyadi Kristian kitai udah ngubah perangai sida lalu nganti enggau ulah ti baru.—Bacha Masmur 37:8-11.

14. Kati ulih orang ti kasar nyadi orang ke baruh ati?

14 Seiku menyadi Kristian ke benama Hans nyadi tuai gempuru ba eklisia di menua Austria. Tuai pengatur tuai gempuru ke sama eklisia enggau Hans madahka: “Iya seiku ari menyadi Kristian lelaki ke amat baruh ati, ke jarang ditemu nuan.” Tang Hans enda selalu baruh ati. Lebuh iya agi nembiak, iya berengkah ngirup kelalu mayuh ngirup ai bisa lalu nyadi orang ti kasar. Bisi sekali lebuh iya mabuk, iya balat ringat nyentukka iya munuh girlfriend iya. Hans dijil 20 taun, tang pengidup dalam rumah jil enda ngubah pengidup iya. Udah nya indai iya ngasuh seiku tuai gempuru ngelawa iya, lalu Hans berengkah belajarka Bup Kudus. Ku iya madahka: “Aku tusah deka muai ulah aku ti lama. Ayat Bup Kudus ti meransang aku iya nya Isaiah 55:7, ke madahka: ‘Awakka orang ke jai, ninggalka jalai pengidup sida,’ sereta 1 Korint 6:11, ke madah pasal orang ke udah ninggalka jalai pengidup ti bedosa: ‘Baka nya  meh sekeda bala kita suba.’ Betaun-taun Jehovah sabar nulung aku ngena roh kudus Iya ngambika aku ulih ngembuan ulah ti baru.” Hans dibaptisa lebuh iya agi dalam rumah jil, lalu iya dilepaska pengudah dijil 17 taun setengah. Ku iya madahka: “Aku beterima kasih ke pengasih enggau pengampun ari Jehovah.”

15. Nama sebengkah agi chara ulah ti lama? Nama dipadah Bup Kudus pasal nya?

15 Bula mega sebagi ari ulah ti lama. Ngambika chunto, mayuh orang bula ketegal enggai mayar chukai tauka nyeliah ari betanggungjawapka penyalah sida. Tang Jehovah nya ‘Petara ti tetap ati.’ (Mas. 31:5) Nya alai Iya dekaka semua penyembah Iya “nyebut utai ti bendar” sereta enda ‘bula.’ (Eps. 4:25; Kol. 3:9) Endang amat, kitai patut nyebut utai ti bendar taja pan nya ngasuh malu tauka tusah.—J-lam. 6:16-19.

BAKA NI SIDA ULIH MENANG

16. Nama ulih nulung kitai ngelengkaka ulah ti lama?

16 Enda senang deka ngelengkaka ulah ti lama ngena pengering kitai empu. Sakura, Ribeiro, Stephen, enggau Hans bebendar ngubah chara pengidup sida ti lama. Kuasa ari Jaku Petara sereta roh kudus Iya udah nulung sida ngaga ubah nya. (Luk. 11:13; Heb. 4:12) Ngambika bulih tulung ari kuasa nya, kitai patut macha Bup Kudus ninting hari, belematika iya, sereta seruran besampi minta penemu-dalam enggau pengering kena nitihka utai ti dipelajarka kitai. (Jos. 1:8; Mas. 119:97; 1 Tes. 5:17) Kitai mega bulih tulung ari Jaku Petara sereta roh kudus Iya lebuh kitai nyediaka diri sereta ngulu gempuru enggau bala menyadi Kristian. (Heb. 10:24, 25) Lalu kitai deka ngena utai bukai ke udah disediaka gerempung Jehovah ke kitai, baka majalah, Berita JW, JW Librari, sereta jw.org.—Luk. 12:42.

Baka ni kitai ulih ngelengkaka ulah ti lama? (Peda genteran 16)

17. Nama deka dikerandauka kitai ba artikel pengudah tu?

17 Kitai udah berandauka sekeda pengawa ti enda manah ke patut dilengka sereta ditinggalka orang Kristian kena ngelantangka ati Jehovah. Tang bisi utai bukai ke patut digaga kitai. Kitai patut ngembuan ulah ti baru sereta tetap enggau ubah ke udah digaga ba pengidup kitai. Ba artikel pengudah tu, kitai deka berandauka chara kitai ulih ngereja tu.

^ per. 7 Sekeda nama dalam artikel tu udah diubah.

^ per. 8 Peda Penerang ba bup Meruan Dalam Pengerindu Petara, lambar 218-219, ke betajuk “Ngeluchu—Ulah Kamah ti Ulih Dibuai.