Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga—Edisyen Dikena Belajar  |  Ogos 2017

Tanya Ari Pemacha

Tanya Ari Pemacha

Nama kebuah utai ke ditulis pasal pengidup Jesus maya agi mit dalam bup Matthew enda sebaka enggau utai ke ditulis dalam bup Luke?

Utai ti dipadah pasal pengada enggau pengidup Jesus maya agi mit dalam bup Matthew enda sebaka enggau utai ti dipadah dalam bup Luke laban tiap iku penulis nulis pasal runding sereta utai ke ditapi orang ti bebida.

Bup Matthew madah pasal utai ke bekaul enggau Josep. Bup nya nerangka utai ke digaga Josep lebuh iya nemu Maria udah betubuh-bisi, dalam mimpi seiku melikat nerangka utai ke nyadi, sereta chara iya nitihka pesan ari seiku melikat nya. (Matthew 1:19-25) Bup nya mega nerangka baka ni seiku melikat nangkan Josep dalam mimpi, ngasuh iya mai anak enggau bini iya rari ngagai menua Ejip, lalu baka ni iya ngasika jaku tangkan nya. Udah nya Matthew madahka, Josep bisi siti agi mimpi ke alai seiku melikat ngasuh iya pulai ngagai menua Israel. Iya pulai tang ngaga pemutus diau di nengeri Nazaret enggau anak bini iya. (Matthew 2:13, 14, 19-23) Ba dua bab keterubah dalam bup Injil iya, Matthew nyebut nama Josep dua belas kali, tang nama Maria semina semilan kali.

Taja pia, utai ti ditulis dalam bup Luke madah pasal Maria. Bup nya nerangka melikat Gabriel datai ngagai iya, Maria nemuai ngagai petunggal iya, Elisabet, sereta jaku puji iya ngagai Jehovah. (Luke 1:26-56) Bup nya mega nerangka utai ti dipadah Simeon ngagai Maria pasal pemerinsa ke deka ditapi Jesus. Udah nya Luke nerangka utai ke nyadi lebuh Jesus ngagai rumah sembiang enggau sida sebilik maya iya beumur 12 taun. Indah dalam bup nya mega, Luke ngambi jaku ke disebut Maria, ukai jaku ke disebut Josep, lalu Luke madahka Maria balat alit ati enggau utai ke nyadi. (Luke 2:19, 34, 35, 48, 51) Ba dua bab keterubah dalam bup Injil iya, Luke nyebut nama Maria 17 kali, tang nama Josep semina 6 kali. Nya alai Matthew madah mayuh agi pasal utai ti dirunding sereta digaga Josep. Tang Luke madah pasal utai ti dirunding sereta ditapi Maria.

Suku juru peturun Jesus mega enda sebaka ripih dalam dua iti bup Injil. Matthew nulis pasal peturun Josep lalu nunjukka Jesus ke nyadi anak iru Josep, ngembuan hak ti sah merintah ba perintah David. Nama kebuah? Laban Josep nya peturun Raja David nengah anak David, Solomon. (Matthew 1:6, 16) Taja pia, Luke nulis pasal peturun Maria sereta nunjukka Jesus ngembuan hak ti patut ba perintah David nitihka “peturun David.” (Rome 1:3) Nama kebuah? Laban Maria nya peturun Raja David nengah anak David, Natan. (Luke 3:31) Tang nama kebuah Luke enda madahka Maria nya anak indu Heli? Laban kesuah iya rikut rasmi semina madah pasal orang ke lelaki dalam siti-siti ruang bilik. Nya alai, lebuh Luke nulis pasal Josep sereta madahka iya anak Heli, orang nemu, Josep nya menantu Heli.—Luke 3:23.

Suku juru peturun Jesus dalam bup Injil Matthew enggau Luke nunjukka, Jesus nya Messiah ti udah disemaya Petara. Indah orang Parisi enggau Saduki enda nyangkal Jesus nya peturun Raja David. Utai ti ditulis dalam bup Matthew enggau Luke pasal suku juru peturun Jesus negapka pengarap kitai sereta ngasuh kitai andalka semaya Petara ti bukai deka dikeamatka.