Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Ogos 2017

Pengerindu—Pemanah ti Berega

Pengerindu—Pemanah ti Berega

JEHOVAH ngena roh kudus ngasuh rasul Paul nulis pasal semilan iti pemanah ke datai ari roh kudus. (Galatia 5:22, 23) Kesemua pemanah ti badas nya dikumbai ‘buah roh kudus.’ * (Peda nota kaki.) Buah roh kudus nya mega sebagi ari “mensia [ulah, NW] ti baru” ke patut dirasukka orang Kristian. (Kolosi 3:10) Baka sepun kayu ke deka mansutka buah enti seruran diberi ai, orang deka ngembuan pemanah ti badas tu enti roh kudus bekuasa atas pengidup iya.—Masmur 1:1-3.

Pemanah ti keterubah ke disebut Paul nya pengerindu. Nama kebuah pemanah tu berega? Paul madahka diri “nadai guna” enti nadai pengerindu. (1 Korint 13:2) Tang nama reti pengerindu, lalu baka ni kitai ulih ngemansangka sereta mandangka pengerindu ninting hari?

NAMA RETI PENGERINDU?

Taja pan reti pengerindu nya tusah deka diterangka enggau nyemetak, Bup Kudus nerangka baka ni orang ke ngembuan pengerindu berunding sereta ngereja pengawa. Ngambika chunto, orang ke ngembuan pengerindu nya “liat ati, nelap [manah ati, NW]” sereta “gaga ati ke utai ti bendar.” Enti orang ngembuan pengerindu, iya “natka semua utai, arapka semua utai, ngadang semua utai, tan dalam semua utai.” Iya balat rinduka orang bukai, iya amat ibuhka sida, lalu iya pangan ti taluk. Tang enti orang nadai pengerindu, orang nya kepapas, sumbung, jai jaku, berundingka diri empu, sereta enggai ngampun. Ari ke mandangka ulah ti enda manah nya, kitai deka mandangka pengerindu ti bendar ngagai orang bukai. Nya bansa pengerindu ke “enda berundingka diri empu.”—1 Korint 13:4-8.

JEHOVAH ENGGAU JESUS NETAPKA CHUNTO TI BADAS PASAL PENGERINDU

‘Petara endang pengerindu.’ (1 John 4:8) Semua kereja enggau pengawa Iya mandangka pengerindu. Pengerindu Iya ti pemadu besai ke mensia iya nya ngirumka Jesus ke dunya ngambika merinsa sereta mati ke kitai. Rasul John madahka: ‘Baka tu ku jalai pengerindu Petara udah dipandangka ngagai kitai: Iya udah ngirumka Anak Tunggal Iya ngagai dunya, ngambika kitai tau idup ulih iya. Tu meh pengerindu, ukai reti nya kitai udah rinduka Petara, tang Iya udah rinduka kitai, lalu udah ngirumka Anak Iya nyadika piring [pemeri, NW] kena muai dosa kitai.’ (1 John 4:9, 10) Ketegal pengerindu Petara, dosa kitai ulih diampun, lalu kitai ulih ngembuan pengadang enggau pengidup.

Jesus mandangka diri rinduka mensia enggau meri nyawa diri kena ngereja peneka Petara. Rasul Paul madahka: “Lalu ulih peneka Iya, kitai udah dikuduska ulih piring [pemeri, NW] tubuh Jesus Kristus ti diberi sekali aja ke belama-lama iya.” (Hebrew 10:9, 10) Nadai mensia ke ulih mandangka pengerindu ti besai agi ari nya. Ku Jesus madahka: “Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya.” (John 15:13) Ulih mensia ke enda sempurna nunda pengerindu ke udah diayanka Jehovah enggau Jesus? Ulih! Aram kitai berandauka baka ni kitai ulih ngereja nya.

 “IDUP DALAM PENGERINDU”

Paul meransang kitai: ‘Nya alai tunda teladan Petara, laban kita tu anak ke dikesayauka Iya. Lalu idup dalam pengerindu, baka Kristus ke udah rinduka kitai, lalu udah nyerahka diri ketegal kitai.’ (Epesus 5:1, 2) Nama reti “idup dalam pengerindu”? Reti nya seruran mandangka pengerindu. Kitai ukai semina madahka diri rinduka orang bukai. Kitai mandangka nya enggau utai ti dikereja kitai. John nulis: “Anak, aram kitai rinduka pangan diri, ukai ngena leka jaku tauka ngena utai ti disebut kitai, tang ngena pemendar enggau pengawa ti dikereja kitai.” (1 John 3:18) Ngambika chunto, kitai nusui ‘Berita Manah pasal Perintah Petara’ laban kitai rinduka Jehovah sereta orang bukai. (Matthew 24:14; Luke 10:27) Kitai mega “idup dalam pengerindu” enti kitai liat ati, manah ati, sereta deka ngampun. Kitai nitihka jaku lalau ari Bup Kudus: “Baka [Jehovah] ke udah ngampun kita, baka nya mega kita ngampun pangan diri.”—Kolosi 3:13.

Taja pia, enti kitai ngelalau tauka ngajar orang bukai, nya ukai reti kitai nadai ngembuan pengerindu. Ngambika chunto, sekeda apai indai engka nurutka aja utai ti dipinta anak ngambika anak badu nyabak. Tang apai tauka indai ke amat sayauka anak deka terit enggau anak enti iya ngasaika nya patut. Pia mega, taja pan Petara endang pengerindu, Iya “disiplin semua orang ke dikerinduka Iya.” (Hebrew 12:6) Nya alai, endang ngembuan pengerindu enti meri disiplin maya ngasaika nya patut. (Jaku Dalam 3:11, 12) Tang kingatka, semua kitai bedosa sereta suah puntan ngayanka pengerindu. Nya alai semua kitai ulih mansang ba pengawa ngayanka pengerindu. Baka ni kitai ulih ngereja nya? Aram kitai beratika tiga iti chara.

BAKA NI KITAI ULIH NGEMANSANGKA PENGERINDU?

Kesatu, minta Petara meri nuan roh kudus Iya, laban roh kudus ngasilka pengerindu. Jesus madahka Jehovah meri ‘roh kudus ngagai orang ke minta ari Iya.’ (Luke 11:13) Nya alai kitai ulih pechaya, enti kitai besampi minta roh kudus lalu ngawakka roh kudus nulung kitai, kitai deka ngembuan mayuh agi pengerindu. (Galatia 5:16) Ngambika chunto, enti nuan nya tuai gempuru, nuan ulih minta roh kudus nulung nuan ngembuan pengerindu lebuh nuan meri jaku lalau ari Bup Kudus ngagai orang bukai. Tauka enti nuan nya apai tauka indai, nuan ulih minta roh kudus Petara nulung nuan disiplin bala anak ngena pengerindu, ukai pengeringat.

Kedua, belematika baka ni Jesus mandangka pengerindu indah lebuh orang bukai jai enggau iya. (1 Peter 2:21, 23) Lebuh orang ngemediska ati nuan tauka nuan napi utai ke enda lurus, tanya diri empu, ‘Nama deka digaga Jesus?’ Seiku menyadi Kristian indu ke benama Leigh ngasaika tanya ke baka nya nulung iya berunding dulu sebedau ngereja siti-siti utai. Ku iya madahka: “Bisi sekali, seiku orang ke sama gawa enggau aku ngirum email ke ngembuan jaku ti enda manah pasal aku sereta pasal kereja ke digaga aku ngagai bala ke sama gawa ti bukai. Tu balat ngemediska ati aku. Tang udah nya aku nanya diri empu, ‘Baka ni aku ulih nunda teladan Jesus lebuh mutarka penanggul aku enggau orang nya?’ Pengudah belematika utai ke dikereja Jesus, aku mutuska enggai ibuhka pekara nya, lalu enda ngemesaika pekara nya. Udah nya aku nemu, orang ke sama gawa enggau aku nya napi penanggul ba pengerai, lalu iya balat stres. Aku nyimpulka, iya ukai nulis utai ti dikedekaka iya. Belematika chunto Jesus ke mandangka pengerindu indah lebuh dikeduan, nulung aku mandangka pengerindu ti sama ngagai orang ke sama gawa enggau aku nya.” Enti kitai nunda teladan Jesus, kitai seruran deka mandangka pengerindu ngagai orang bukai.

Ketiga, belajar mandangka pengerindu ti enda berundingka diri empu. Tu bansa pengerindu ke nyadi tanda bala murid Jesus ti bendar. (John 13:34, 35) Jesus empu ngembuan pengerindu ke bansa tu, lalu iya netapka chunto ti badas ke kitai. Baka ni? Enggau ninggalka serega, ‘iya ngelengkaka semua’ utai ketegal kitai, indah “nyentuk ke mati.” (Pilipi 2:5-8) Lebuh kitai nunda teladan pengerindu Jesus ti enda berundingka diri empu, runding enggau asai ati kitai deka sebaka enggau enggi  iya, lalu kitai deka ngenuluka utai ti diguna orang bukai lebih ari enggi kitai empu.

PENGUNTUNG KETEGAL MANDANGKA PENGERINDU

Bisi mayuh penguntung enti mandangka pengerindu. Aram kitai beratika dua iti chunto:

Nama penguntung enti kitai mandangka pengerindu?

  • BALA MENYADI KRISTIAN ENTARABANSA: Ketegal pengerindu kitai ngagai pangan diri, kitai nemu bala menyadi Kristian ba dini-dini eklisia ke dilawa kitai di serata dunya deka ngelaluka kitai enggau ati ti gaga. Endang sigi berekat ulih nemu diri dikerinduka “semua orang bukai ke arap di serata dunya tu”! (1 Peter 5:9) Kitai semina ulih tetemuka pengerindu ke baka tu ba bala nembiak Petara.

  • PEMAIK: “Sabar enggau pangan diri dalam pengerindu” nulung kitai ngasaika “pemaik ti nanggam [kitai] semua.” (Epesus 4:2, 3) Kitai ngasaika pemaik tu ba gempuru, gempuru besai, sereta konvensyen kitai. Endaka nuan setuju pemaik ke baka nya amat ngalitka ati ba dunya ti bepechah-belah kemaya hari tu? (Masmur 119:165; Isaiah 54:13) Lebuh kitai deka bebaik enggau orang bukai, kitai mandangka diri amat rinduka sida, lalu tu ngelantangka ati Apai kitai ti di serega.—Masmur 133:1-3; Matthew 5:9.

“PENGERINDU NGEMANSANGKA ORANG”

Paul nulis: “Pengerindu ngemansangka orang.” (1 Korint 8:1) Nama reti nya? Ba bab ke-13 dalam surat Paul ti keterubah ngagai orang di Korint, iya nerangka baka ni pengerindu ngemansangka orang. Pengerindu berundingka orang bukai. Pengerindu ibuhka utai ti diguna orang bukai. (1 Korint 10:24; 13:5) Lalu ketegal pengerindu nya berundingka orang bukai, liat ati, sereta manah ati, pengerindu ngemansangka ruang bilik sereta ngempung eklisia.—Kolosi 3:14.

Bisi mayuh chara kena mandangka pengerindu ngagai orang bukai, tang pengerindu kitai ke Petara nya ti pemadu berega sereta ngemansangka pengerindu. Nama kebuah? Laban pengerindu ke Iya ngempung kitai! Orang ari semua gaya pengidup, bansa, enggau jaku sama nyembah Jehovah, beserakup gawa ke Iya. (Sepaniah 3:9) Arapka kitai ngembuan pengeran deka mandangka pemanah buah roh kudus Petara ti berega ninting hari.

^ per. 2 Tu artikel ti keterubah ari semilan iti artikel ke deka berandau pasal tiap iti pemanah buah roh kudus nya.