Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Jun 2017

Jehovah Meri Pengelantang Ba Ati Lebuh Kitai Dituntung Semua Macham Penusah

Jehovah Meri Pengelantang Ba Ati Lebuh Kitai Dituntung Semua Macham Penusah

‘Petara ti pun semua pengelantang, ke merindang kami lebuh kami dituntung semua macham penusah.’—2 Kor. 1:3, 4.

LAGU: 38, 56

1, 2. Baka ni Jehovah ngelantangka ati kitai lebuh dituntung penusah, lalu nama semaya ke ditemu kitai ba Jaku Iya?

SEIKU menyadi Kristian lelaki bujang ke biak berundingka ayat ba 1 Korint 7:28 ke madahka orang ke berumah-tangga “deka dituntung penusah dunya.” Menyadi Kristian lelaki nya berandau enggau seiku tuai gempuru ti tuai ke udah bebini, lalu nanya: “Nama ‘penusah’ nya, lalu baka ni aku ulih mutarka penusah nya enti aku bebini?” Sebedau nyaut tanya, tuai gempuru nya ngasuh iya berundingka utai ti ditulis rasul Paul: Jehovah nya ‘Petara ti pun semua pengelantang, ke merindang kami lebuh kami dituntung semua macham penusah.’—2 Kor. 1:3, 4.

2 Kitai nemu, Jehovah ti Apai kitai, rinduka kitai, lalu Iya ngelantangka ati kitai lebuh kitai napi penusah. Nuan engka agi ingatka maya lebuh Jehovah nyukung sereta ngiring nuan nengah Jaku Iya. Kitai tau pechaya, Iya dekaka utai ti  pemadu badas ke kitai, baka ke digaga Iya ngagai nembiak Iya menya.—Bacha Jeremiah 29:11, 12.

3. Nama tanya ke deka disaut kitai ba artikel tu?

3 Kesuah iya, kitai deka senang agi natka penanggul enggau penusah enti kitai nemu utai ke ngasuh nya nyadi. Nya alai, nama kebuah kitai napi penusah ba rumah tangga tauka ba ruang bilik kitai? Lalu nama chunto ari jeman Bup Kudus sereta kemaya hari tu ke ulih nulung kitai bulih pengelantang ba ati ke diguna kitai? Aram kitai nyaut dua iti tanya nya sereta meda baka ni kitai ulih natka penusah.

PENANGGUL BA RUMAH TANGGA

4, 5. Nama penusah ke engka ditapi laki enggau bini?

4 Pengudah Jehovah nempa indu ti keterubah, Iya mai indu nya ngagai seiku lelaki, lalu indu nya nyadi bini lelaki nya. Udah nya, ku Jehovah bejaku: “Lelaki ninggalka apai indai iya, lalu begulai enggau bini iya, lalu seduai iya nyadi siku.” (P-kal. 2:24) Endang amat, semua kitai kemaya hari tu enda sempurna. (Rom. 3:23) Ketegal tu, lebuh orang ke lelaki enggau ke indu jadi melaki-bini, seduai iya nemu diri deka napi penanggul. Ngambika chunto, sebedau belaki, sida ke indu patut ngasika apai indai sida. Tang Jaku Petara madahka, laki deka nyadi kepala bini pengudah seduai iya jadi. (1 Kor. 11:3) Terubah iya, laki engka tusah deka ngasuh bini ngereja siti-siti utai. Lalu bini engka tusah deka ngereja utai ti diasuh laki iya enti dibandingka enggau utai ti diasuh apai indai iya. Pia mega, lebuh orang baru jadi melaki-bini, seduai iya engka bisi penanggul enggau entua seduai iya, lalu tu mega ulih nyadi penusah.

5 Pikirka mega pasal asai ati laki enggau bini lebuh nemu diri deka bisi anak. Taja pan seduai iya gaga amat ati, kesuah agi seduai iya mega irau. Seduai iya engka irau pasal kandung sereta pengerai anak. Seduai iya mega nemu, belanja sida deka nambah. Pengudah anak nya ada, laki bini patut ngaga sekeda ubah. Indai deka ngena mayuh agi awak ngintu anak ke agi mit nya. Nya alai, laki enggau bini enda entu ulih betatika pangan diri baka ke udah. Apai mega deka bisi mayuh agi tanggung pengawa. Iya patut nentuka utai ti diguna anak bini disediaka.

6-8. Baka ni asai ati laki bini enti seduai iya enda ulih ngembuan anak?

6 Bisi penusah bukai ke ditapi orang ke berumah-tangga. Seduai iya keran deka bisi anak, tang enda ulih. Lebuh bini enda ulih ngandung, iya balat tusah ati. (J-lam. 13:12) Maya jeman Bup Kudus, endang beguna bendar sida ke indu belaki sereta ngembuan anak. Nya kebuah Rachel, bini Jakop, berasai balat tusah ati ngenang menyadi iya ulih ngandung tang iya enda ulih. (P-kal. 30:1, 2) Ba sekeda menua kemaya hari tu, mayuh orang ngumbai ngembuan mayuh anak nya beguna bendar. Orang suah nanya kebuah bala pengerintis seberai tasik ke diau ba menua nya nadai anak. Taja pan sida udah nerangka kebuah iya, tang sekeda orang agi madahka, “Pia, kami deka besampika seduai ngambika bisi anak dudi hari.”

 7 Peratika siti agi chunto. Seiku menyadi Kristian indu di England seruran deka ngembuan anak. Lebuh iya nemu diri enda ulih ngembuan anak ba dunya tu, iya berasai balat tusah ati. Udah nya iya enggau laki iya ngiru anak. Tang iya kekadang agi berasai tusah ati. Ku iya madahka, “Aku nemu, ngiru anak enda sama baka kitai ke ngadaka anak diri empu.”

8 Bup Kudus madahka, “indu deka diselamatka laban iya beranak.” (1 Tim. 2:15) Tang tu ukai reti iya deka bulih pengidup ti meruan belama iya ketegal iya ngembuan anak. Nya alai, nama reti ayat nya? Indai deka kisuk ngintu bala anak enggau rumah iya. Tu deka nulung iya nyeliahka pengawa baka bejakuka orang tauka masuk champur ba utai ke enda bekaul enggau iya. (1 Tim. 5:13) Taja pia, iya agi napi penanggul ba rumah tangga enggau ba ruang bilik iya.

Jehovah udah meri mayuh semaya ti ngelantangka ati kitai lebuh napi maya ti tusah

9. Nama penusah bukai ke ditapi orang ke berumah-tangga?

9 Penusah bukai ke ditapi sekeda orang ke berumah-tangga, iya nya mati kaling pengidup ti dikesayau. Taja pan sida engka ngumbai tu enda nyadi ba sida, tang mayuh ari sida enda ulih rari ari penanggul tu. Orang Kristian amat pechayaka semaya pengangkat ari mati, lalu tu meri pengelantang ba ati sida. (Jhn. 5:28, 29) Dalam Bup Kudus, Apai kitai, Jehovah, udah meri mayuh semaya ti ngelantangka ati kitai lebuh napi maya ti tusah. Diatu, aram kitai meda baka ni sekeda nembiak Jehovah bulih pengelantang ba ati sereta baka ni asai ati tu udah nulung sida.

Baka ni nuan tau bulih pengelantang ba ati enti kaling pengidup nuan mati? (Peda genteran 9, 12)

PENGELANTANG BA ATI LEBUH KITAI MERINSA NAPI PENUSAH

10. Baka ni Hanah bulih pengelantang ba ati? (Peda gambar ba pun artikel.)

10 Peratika utai ti nyadi ba Hanah, bini ti dikesayauka Elkanah. Hanah deka ngembuan anak tang enda ulih. Taja pia, Peninah, seiku agi bini Elkanah, ngembuan mayuh anak. (Bacha 1 Samuel 1:4-7.) Ketegal tu, Peninah ngeleseka Hanah “ari taun siti ngagai taun siti.” Tu ngasuh Hanah balat agi tusah ati. Nama digaga Hanah kena ngelantangka ati diri? Iya besampi ngagai Jehovah. Iya mega ngagai endur alai nyembah Jehovah, lalu iya lama bendar besampi. Iya minta Jehovah meri iya seiku anak lelaki, lalu pechaya Jehovah deka nulung iya. Pengudah besampi, ati iya berasai lantang agi, lalu “mua iya enda agi tusah.” (1 Sam. 1:12, 17, 18) Iya nemu, Jehovah deka meri iya seiku anak lelaki tauka ngelantangka ati iya ngena chara bukai.

11. Baka ni sampi ulih ngelantangka ati kitai?

11 Ketegal kitai enda sempurna sereta diau ba dunya Sitan, kitai deka majak napi penusah. (1 Jhn. 5:19) Tang kitai bisi bantu. Kitai ulih besampi ngagai Jehovah, ‘Petara ti pun semua  pengelantang.’ Nya meh utai ti digaga Hanah. Iya madah ngagai Jehovah utai ke amat diasaika iya sereta minta Jehovah nulung iya. Pia mega, lebuh kitai berasai merinsa, kitai ukai semina madahka penanggul diri ngagai Jehovah. Kitai patut minta Iya nulung kitai sereta madah ngagai Iya utai ke amat diasaika kitai.—Plp. 4:6, 7.

12. Nama nulung Anna gaga ati taja pan napi penusah?

12 Kitai berasai balat tusah ati ketegal nadai anak tauka ketegal orang ti dikesayauka kitai udah mati. Tang kitai agi ulih tetemuka pengelantang ba ati. Peratika chunto Anna, ke idup maya jeman Jesus. Laki iya mati pengudah seduai iya berumah-tangga tujuh taun. Lalu iya nadai anak. Tang nama nulung iya? “Iya enda kala ninggalka Rumah Sembiang.” Taja pan Anna beumur 84 taun, iya agi ngagai Rumah Sembiang besampi sereta nyembah Jehovah. (Luk. 2:37) Nya meh utai ti ngelantangka ati iya sereta nulung iya gaga ati taja pan napi penusah.

13. Baka ni bala pangan ti bendar ngelantangka ati kitai enti kaban belayan ngenusahka ati kitai?

13 Kitai mega tau bulih pengelantang ba ati ari bala pangan ti bendar ba eklisia. (J-lam. 18:24) Paula beumur lima taun lebuh indai iya badu nyembah Jehovah. Paula balat tusah ati, lalu iya tusah napi penanggul tu. Tang udah nya, seiku menyadi Kristian indu ti nyadi pengerintis ke benama Ann meransang iya, sereta ibuhka iya. Paula madahka: “Taja pan Ann nadai kaul enggau aku, aku ngasaika pengibuh iya ulih nulung aku. Tu nulung aku mengkang nyembah Jehovah.” Udah nya, indai Paula pulai baru ngagai eklisia, lalu tu amat ngagaka ati Paula. Ann mega gaga ati laban ulih nulung Paula terus nyembah Jehovah.

14. Nama penguntung enti kitai ngelantangka ati orang bukai?

14 Enti kitai kisuk ngereja utai ti manah ngagai orang bukai, kitai enda entu  berundingka penanggul diri. Ngambika chunto, mayuh bala menyadi Kristian indu ke udah tauka bedau belaki nemu, lebuh sida bekunsi berita manah pasal Perintah Petara enggau orang bukai, sida bekereja enggau Jehovah sereta ngereja peneka Iya. Tu ngasuh sida gaga ati. Amat, semua kitai ulih ngayanka pengibuh ngagai orang bukai enti bekunsi berita manah enggau sida. Lalu lebuh kitai ngereja utai ti manah ngagai bala menyadi Kristian, kitai rapat agi enggau sida. (Plp. 2:4) Nya meh utai ti dikereja rasul Paul. Iya ibuhka orang bukai baka “indai ke siru enggau anak diri.” Paul mega ngelantangka ati sereta  meransang bala menyadi Kristian ke lelaki “baka apai ke ngintu anak diri.”—Bacha 1 Tesalonika 2:7, 11, 12.

PENGELANTANG BA ATI DALAM RUANG BILIK

15. Sapa ke patut ngajar bala anak pasal Jehovah?

15 Baka ni kitai ulih ngelantangka ati ruang bilik ke bisi ba eklisia? Kekadang, orang ke baru engka ngasuh kitai nulung sida ngajar bala anak sida pasal Jehovah, tauka belajarka Bup Kudus enggau bala anak sida. Bup Kudus nunjukka, Jehovah meri apai indai tanggung pengawa ngajar sereta ngelatih bala anak sida. (J-lam. 23:22; Eps. 6:1-4) Taja pan ba sekeda pekara orang bukai ulih nulung, tang endang manah agi enti apai indai ke ngajar bala anak sida empu. Apai indai patut suah bejaku enggau bala anak.

Apai indai patut suah bejaku enggau bala anak

16. Nama patut dikingatka kitai lebuh nulung bala anak?

16 Lebuh apai tauka indai ngasuh kitai belajarka Bup Kudus enggau anak iya, anang enda ingat, kitai nadai kuasa ti sama baka enggi apai tauka indai. Kekadang kitai belajar enggau anak ke bisi apai indai ti enda dalam pemendar. Lebuh kitai belajar enggau bala anak ke ukai anak kitai, manah agi belajar enggau sida lebuh apai indai sida bisi ba rumah tauka lebuh Saksi ke kering ba pengarap bisi enggau tauka belajar ba endur ke bisi mayuh orang. Enggau tu, kitai enda ngelakka orang bukai bisi runding ti enda manah ngagai kitai. Nyau kelama, apai indai empu engka ulih ngajar bala anak sida pasal Jehovah.

17. Baka ni bala anak ulih ngelantangka ati diri sebilik?

17 Bala anak ke udah belajar rinduka Jehovah ulih ngelantangka ati sereta meransang diri sebilik. Baka ni? Enggau bebasaka apai indai sereta bebendar nulung sida enggau chara ti patut. Pia mega, lebuh bala anak mengkang tetap ati ngagai Jehovah, tu utai ti meransangka ati semua orang ba diri sebilik. Sebedau Bah Besai, Lamek nyembah Jehovah. Ku iya madah pasal anak lelaki iya, Noah: ‘Anak mit tu deka ngelantangka kitai ti ngereja pengawa ti mar ba tanah ti udah disumpah Jehovah.’ Jaku nya dikeamatka pengudah Bah Besai lebuh Jehovah muai sumpah ari tanah. (P-kal. 5:29; 8:21) Kemaya hari tu, bala anak ke mengkang tetap ati ngagai Jehovah mega ulih ngelantangka ati sida sebilik. Sida ulih nulung diri sebilik tan natka penusah diatu sereta jemah ila.

18. Nama ulih nulung kitai tan taja pan napi penusah?

18 Nembiak Jehovah kemaya hari tu bulih pengelantang ba ati ari sampi, belematika chunto dalam Bup Kudus, sereta kaul sida ti rapat enggau bala menyadi Kristian. (Bacha Masmur 145:18, 19.) Kitai nemu Jehovah endang seruran sedia deka ngelantangka ati kitai, lalu Iya endang deka nulung kitai tan natka semua penusah ke ditapi kitai!