Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Jun 2017

Deka Nuan Mutarka Laya sereta Ngemansangka Pemaik?

Deka Nuan Mutarka Laya sereta Ngemansangka Pemaik?

PETARA JEHOVAH dekaka bala penyembah Iya gaga ati enggau pemaik. Iya deka sida bebaik enggau pangan diri. Enti sida ngereja tu, eklisia Kristian deka bisi pemaik. Pemaik tu narit ati mayuh orang ngagai eklisia.

Ngambika chunto, seiku dukun di Madagascar beratika pemaik ba bala nembiak Jehovah, lalu berunding, ‘Enti aku deka enggau siti-siti jalai pengarap, siti tu meh ti deka dipilih aku.’ Nyau kelama, iya badu nyembah bala antu, ngaduka rumah tangga iya, lalu berengkah nyembah Jehovah, Petara pemaik.

Baka lelaki nya, ninting taun beribu iku orang enggau eklisia Kristian, lalu tetemuka pemaik ti amat dikinginka sida. Tang dalam Bup Kudus kitai macha, ulah “kepapas, lalu semina berundingka diri empu aja” ba eklisia ulih ngerusak kaul sereta ngenataika penusah. (James 3:14-16) Tang Bup Kudus meri kitai jaku ajar ti manah pasal chara kena nyeliahka penusah nya sereta negapka pemaik kitai enggau bala menyadi Kristian. Aram kitai meda baka ni jaku ajar nya udah mujur dikena sekeda menyadi Kristian ke napi penusah.

PENUSAH SERETA CHARA MUTARKA

“Aku tusah deka begulai enggau seiku menyadi Kristian lelaki ke gawa enggau aku. Bisi sekali lebuh kami duai beperak, dua iku orang datai lalu ngemataka kami duai belaya.”—CHRIS.

“Seiku menyadi Kristian indu ke suah enggau aku nginjil enda memukai enggai agi enggau aku. Udah nya iya badu bejaku enggau aku. Aku enda nemu kebuah.”—JANET.

“Aku bejaku enggau dua iku orang serentak ba telefon. Seiku ari seduai nya madahka diri nutup telefon, lalu aku ngumbai iya nadai agi ngena telefon. Aku udah nya nyebut utai ke enda manah pasal iya ngagai ke seiku agi orang ba telefon, tang seiku nyin bisi ninga.”—MICHAEL.

“Ba eklisia kami, dua iku pengerintis berengkah bisi penanggul enggau pangan diri. Seiku nganu ke seiku. Laya seduai iya ngasuh orang bukai enda nyamai ati.”—GARY.

Penusah tu baka ke enda besai. Tang nya ulih ngasuh orang lama pedis ati sereta ngerusak pemaik ba eklisia. Tang manah amat, bala menyadi Kristian nya nitihka iring ari Bup Kudus, lalu ulih bebaik baru. Nama iring ari Bup Kudus ke udah nulung sida?

“Anang belaya di rantau jalai.” (Pemungkal 45:24) Josep meri jaku ajar tu ngagai bala menyadi iya lebuh sida pulai baru ngagai apai sida. Lebuh orang enda tetagangka asai ati diri, lalu nejuka diri jampat pedis ati, tu ngasuh penanggul nyadi besai agi. Orang bukai mega pedis ati. Chris nemu, kekadang iya tusah deka baruh ati sereta nitihka iring. Iya deka berubah, nya alai iya minta ampun ngagai menyadi Kristian ke belaya enggau iya. Udah nya, Chris bebendar nagang pengeringat  diri. Lebuh menyadi Kristian ke udah belaya enggau iya beratika Chris bebendar deka berubah, iya pan deka berubah. Diatu seduai iya udah bebaik lalu begulai baru nyembah Jehovah.

“Enti nuan nadai bulih jaku lalau, pengawa nuan deka puntan.” (Jaku Dalam 15:22) Lebuh pangan Janet badu bejaku enggau iya, Janet berunding deka ngena ayat Bup Kudus tu. Iya bejaku enggau menyadi Kristian indu nya. Janet nanya sekalika iya udah ngereja utai ti ngemediska ati menyadi Kristian indu nya. Terubah iya, seduai iya bela tusah deka bejaku enggau pangan diri. Tang seraya seduai iya terus berandau enggau manah, seduai iya berasai lantang agi ati. Menyadi Kristian indu nya nyau sedarka diri udah salah sangka enggau utai ke udah nyadi, lalu kebendar Janet nadai ngereja utai ti ngemediska ati iya. Iya minta ampun ngagai Janet, lalu seduai iya diatu begulai baru nyembah Jehovah.

“Nya alai lebuh kita deka meri pemeri kita ba alta, lalu teingatka menyadi lelaki tauka menyadi indu kita bisi enda nyamai ati ngagai kita, tinggalka pemeri kita dia di mua alta, bebaik dulu enggau iya.” (Matthew 5:23, 24) Jaku ajar tu disebut Jesus lebuh iya meri Ajar ba atas Bukit. Pengudah Michael nyebut utai ti enda manah pasal menyadi Kristian lelaki ke bukai, iya berasai balat tusah ati. Iya berunding deka ngereja sebarang utai ke patut kena mutarka pekara nya. Nya alai iya betemu enggau menyadi Kristian lelaki nya, lalu madahka diri amat nesal ati. Nama nyadi? Ku Michael madahka, “Iya ngampun aku ari ati.” Seduai iya bebaik baru.

“Sabar enggau pangan diri, lalu ampun pangan diri enti kita bisi enda nyamai ati ngagai pangan diri.” (Kolosi 3:12-14) Agi ingat nuan ke dua iku pengerintis ke belaya lebuh nginjil? Seiku tuai gempuru nulung seduai iya sedar, seduai iya ngemediska ati orang bukai sereta ngasuh sida enda nyamai ati. Tuai gempuru nya ngingatka seduai iya patut sabar enggau pangan diri sereta nulung ngenanka pemaik ba eklisia. Seduai iya nerima sereta nitihka jaku lalau tuai gempuru nya. Diatu seduai iya begulai nusui berita manah.

Jaku ajar ti sama ba Kolosi 3:12-14 ulih nulung nuan baruh ati, deka ngampun orang ke udah ngemediska ati nuan, lalu badu berundingka pekara nya. Tang baka ni enti kitai nguji deka ngampun tang enda ulih ngereja nya? Prinsip Bup Kudus ba Matthew 18:15 ulih nulung kitai. Taja pan Jesus semina bejaku pasal dosa ti besai, iya nerangka utai ke ulih digaga kitai lebuh kitai bisi penanggul enggau menyadi Kristian. Enggau chara ti siru sereta baruh ati, kitai ulih berandau sereta nguji mutarka penanggul nya enggau menyadi Kristian.

Bisi mayuh jaku ajar bukai ke ulih dikena dalam Bup Kudus. Mayuh ari chara nya begunaka roh kudus Petara ngambika kitai ulih ngayanka ‘buah roh kudus.’ Kualiti nya “pengerindu, pengaga, pemaik,  pengeliat ati, penyiru, pemadas, penetap ati, penelap, ulih nagang diri.” (Galatia 5:22, 23) Pikirka tu. Mesin ulih bejalai enggau manah enti semua perengka diberi minyak. Pia mega, kitai senang agi mutarka penanggul sereta bisi kaul ti manah enti kitai ngayanka kualiti ti manah ari Jehovah.

PERSONALITI TI BEBIDA NGASUH EKLISIA NGERINDUKA ATI

Tiap iku kitai ngembuan personaliti ke diri empu. Tiap iku kitai enda sebaka ari segi kualiti, chara beratika utai sereta madahka runding diri. Tu ulih ngasuh kaul kitai ngelantangka ati sereta ngerinduka ati. Tang personaliti kitai ti bebida mega ulih ngasuh salah sangka sereta enda sepenemu. Seiku tuai gempuru ti bepeneleba meri siti chunto baka ni utai tu tau nyadi lebuh iya madahka: “Orang ke malu tusah deka begulai enggau orang bukai. Utai ke bebida tu baka ke mit, tang nya tau nyadi penanggul ti besai.” Kati nuan pechaya orang ke ngembuan personaliti ti bebida endang enda ulih begulai enggau pangan diri? Aram kitai meda chunto dua iku rasul. Lebuh kitai berunding pasal Peter, kitai lalu berundingka pasal orang ke selalu nyebut utai enggau enda berunding. Lebuh kitai berunding pasal John, kitai lalu ngambarka seiku menyadi Kristian lelaki ke bisi pengerindu ti selalu berunding dulu sebedau bejaku tauka ngereja utai. Peter enggau John ngembuan personaliti ti bebida. Tang seduai iya ulih begulai manah nyembah Jehovah. (Kereja Rasul 8:14; Galatia 2:9) Sama mega enggau kitai kemaya hari tu. Indah orang Kristian ke ngembuan personaliti ti amat bebida ulih begulai manah.

Tang baka ni enti bisi orang ba eklisia nuan nyebut tauka ngereja utai ti ngemediska ati nuan? Anang enda ingat, Kristus udah mati ke orang nya sereta ke nuan, lalu nuan patut rinduka orang nya.  (John 13:34, 35; Rome 5:6-8) Endang enda manah ngumbai diri enda ulih begulai enggau orang nya tauka nuan deka nyeliahka diri ari iya. Tang, tanya diri empu: ‘Kati menyadi Kristian bisi ngereja utai ti ngelanggar adat Jehovah? Kati iya sengaja deka ngemediska ati aku? Tauka kati kami duai semina ngembuan personaliti ti bebida? Kati iya ngembuan kualiti ke dikinginka aku?

Ngambika chunto, enti orang nya rindu bejaku tang nuan enda, nama kebuah enda sama nginjil lalu beratika utai ke ulih dipelajarka nuan? Tauka baka ni enti iya gerah agi jari ari nuan? Bisi nuan ngasaika pengelantang ba ati ketegal nulung orang ke tuai, orang ke sakit tauka orang ke seranta? Kati nuan belajar ari orang nya chara nuan ulih gerah agi jari? Kebendar, taja pan nuan enggau menyadi Kristian nya bebida, nuan ulih beratika kualiti manah ke bisi ba iya. Taja pan seduai engka enda ulih nyadi pangan rapat, seduai ulih semak enggau pangan diri. Tu deka ngenataika pemaik ngagai seduai sereta eklisia.

Ba abad keterubah, bisi dua iku menyadi Kristian indu ke benama Eudia enggau Sintike. Seduai iya ngembuan personaliti ti amat bebida, tang rasul Paul meransang seduai iya ‘besetuju enggau pangan diri dalam Tuan.’ (Pilipi 4:2) Kitai mega deka nyembah Jehovah enggau bala menyadi Kristian kitai sereta ngemansangka pemaik ba eklisia.

ANANG NGELAKKA RUNDING TI ENDA SEPENEMU MAJAK NYADI

Nama kebuah kitai patut jejampat muai sebarang asai ati ti enda manah ngagai orang bukai? Kitai ulih mandingka asai ati tu enggau rumput ke tumbuh ba kebun bungai ti manah. Enti kitai enda nyabut rumput nya, iya deka ngalahka bungai ba kebun. Pia mega, enti asai ati kitai ti enda manah ngagai orang bukai majak balat, tu ulih ngachau  semua orang ba eklisia. Tang enti kitai rinduka Jehovah enggau bala menyadi Kristian kitai, kitai deka enggau naka ulih nyaga pemaik ba eklisia.

Enti nuan enggau baruh ati deka bebaik enggau orang bukai, nuan engka tekenyit enggau asil manah iya

Enti kitai deka bebaik enggau orang bukai, kitai engka deka tekenyit enggau asil manah iya. Seiku Saksi kala ngasaika tu. Ku iya becherita: “Aku ngasaika seiku menyadi Kristian indu ngaga aku baka anak mit. Tu ngasuh aku enda nyamai ati. Lebuh ati aku majak pedis, aku berengkah kasar enggau iya. Aku ngumbai, ‘Iya enda bebasaka aku, nya alai aku enggai bebasaka iya.’”

Udah nya, menyadi Kristian tu berundingka ulah diri. “Aku berengkah meda pengurang ke bisi ba diri empu, lalu aku amat tusah ati ke diri empu. Aku nemu, aku patut ngubah runding diri. Pengudah besampi ngagai Jehovah pasal pekara nya, aku melika iya siti hadiah ke mit, lalu nulis siti kad minta ampun ke ulah aku ti enda manah. Kami duai merap pangan diri, lalu setuju enggai ngenang pekara nya agi. Kami duai nadai agi penanggul enggau pangan diri.”

Semua orang begunaka pemaik. Tang asai ati ti enda lantang tauka temegah ulih ngasuh orang ngereja pengawa ke nadai pemaik. Utai tu suah nyadi ba dunya, tang Jehovah dekaka utai ti bebida ba bala penyembah Iya. Bala Saksi-Saksi Jehovah patut bisi pemaik sereta penyerakup. Jehovah ngena roh kudus ngasuh Paul nulis ngagai orang ngambika “diau menyana nitihka kangau” ti udah diterima sida. Iya meransang sida ngereja tu enggau ‘baruh ati, nelap, liat ati, sabar enggau pangan diri dalam pengerindu, lalu enggau naka ulih nyaga penyerakup dalam roh ngena pemaik ti nanggam kita semua.’ (Epesus 4:1-3) ‘Penyerakup dalam roh ngena pemaik’ ti diasai nembiak Jehovah nya berega amat. Nya alai, aram meh kitai enggau naka ulih negapka agi pemaik nya sereta mutarka sebarang penanggul ke bisi entara kitai enggau bala menyadi Kristian.