Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Februari 2016

Terus Nyembah Jehovah Enggau Gaga Ati

Terus Nyembah Jehovah Enggau Gaga Ati

UJI pikirka pasal hari ti pemadu ngagaka ati ba pengidup nuan. Kati hari nya maya nuan kawin tauka maya anak tuai nuan ada? Tauka hari nya maya nuan dibaptisa? Hari nya engka hari ti pemadu ngagaka ati ba pengidup nuan. Lalu ba hari nya, naka meh pengaga bala menyadi Kristian meda nuan nunjukka diri rinduka Petara enggau pengabis ati, semengat, runding sereta pengering!—Mark 12:30.

Enti pia, nuan udah ngasaika diri balat gaga ati lebuh nyembah Jehovah kenyau ari nuan dibaptisa. Taja pia, sekeda bala penginjil udah enda agi gaga ati baka ke udah. Nama kebuah tu nyadi? Nama kebuah kitai ulih terus nyembah Jehovah enggau gaga ati?

KEBUAH SEKEDA SIDA ENDA AGI GAGA ATI

Pesan pasal Perintah Petara balat ngagaka ati kitai. Nama kebuah? Laban Jehovah besemaya Perintah Iya enda lama da agi deka ngerusakka dunya ti jai tu, lalu ngenataika dunya baru Petara. Sepaniah 1:14 madah ngagai kitai: ‘Hari Jehovah nyau semak - semak amat lalu deka datai enggau jampat!’ Tang enti kitai ngasaika diri udah lama nganti ari ke disadang, tu ulih ngasuh kitai enda agi gaga ati baka ke udah. Tu ulih ngasuh kitai enda agi ransing ati gawa ke Jehovah.—Jaku-Dalam 13:12.

Lebuh kitai meri awak begulai enggau bala menyadi Kristian kitai, kitai berasai diperansang ngambika terus nyembah Jehovah enggau gaga ati. Ulah nembiak Jehovah ke manah engka udah narit ati kitai ngagai sembah ti bendar sereta nulung kitai berengkah nyembah Petara enggau gaga ati. (1 Peter 2:12) Taja pia, nama deka nyadi enti seiku ari bala menyadi Kristian kitai dirara ketegal iya enda ngasika pesan Petara? Tu ulih ngasuh sekeda orang ba gempuru lemi semengat, lalu ngasuh sida enda entu gaga ati.

Angkunkan reta mega ulih ngasuh kitai enda gaga ati. Baka ni? Dunya Sitan nguji ngasuh kitai meli utai ke enda entu amat diguna kitai. Nya alai, kitai patut ingatka jaku Jesus: ‘Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Petara enggau duit.’ (Matthew 6:24) Kitai enda ulih nyembah Jehovah enggau gaga ati sereta ba maya ti sama enggau naka ulih nguji deka ngulihka semua utai ba dunya.

GAWA KE JEHOVAH NGAGAKA ATI

Nyembah Jehovah ukai utai ti mar dikereja orang ke rinduka Iya. (1 John 5:3) Kingatka utai ti dipadah Jesus: ‘Datai ngagai aku semua kita ke lelak ngema utai ti berat, lalu aku deka ngasuh kita belelak. Ambi lalu san tangkun aku, lalu belajar ari aku, laban aku nelap sereta baruh ati, lalu belelakka semengat kita. Laban tangkun aku  mudah, lalu ma aku lempung.’ (Matthew 11:28-30) Nyadi orang Kristian ti bendar ulih ngagaka ati. Kitai tentu bisi kebuah ti manah gaga ati gawa ke Jehovah. Aram meh kitai berandauka tiga iti kebuah iya diatu.—Habakuk 3:18.

Kitai nyembah Pemeri-Nyawa kitai, Petara ti lantang ati. (Kereja Rasul 17:28; 1 Timoti 1:11) Kitai nemu kitai berutang nyawa ba Penempa kitai. Nya alai, aram meh kitai terus nyembah Iya enggau gaga ati, enda ngira berapa lama kitai udah nyembah Iya kenyau ari kitai dibaptisa.

Héctor ngetanka pengaga ati iya enggau ngingatka peluang ke dibai Perintah Petara sereta seruran mengkang nginjil

Peratika Héctor, ke nyadi tuai ti ngabas pengelama 40 taun lebuh iya nyembah Jehovah. Taja pan iya “nyau tuai,” iya agi rindu ati nyembah Jehovah. (Masmur 92:12-14) Penyakit bini iya udah ngurangka pengawa iya gawa ke Petara, tang Héctor agi gaga ati. Ku iya: “Ati aku tusah meda bini aku majak enda bepengerai, lalu aku tusah ngintu iya. Tang aku enda ngelakka utai tu ngachau pengaga ati aku nyembah Petara ti bendar. Nemu diri berutang nyawa ba Jehovah ke bisi kebuah nempa mensia, udah chukup ngasuh aku rinduka Iya sereta nyembah Iya enggau pengabis ati. Aku enggau naka ulih mengkang kisuk ba pengawa nginjil, lalu aku nguji ngetanka peluang ke dibai Perintah Petara dalam runding aku ngambika aku enda lenyau pengaga ati.”

Jehovah udah nyediaka tebus, ngambika kitai tau bulih pengidup ti ngagaka ati. Endang amat, ‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya.’ (John 3:16) Amat, dosa kitai ulih diampunka lalu kitai tau bulih pengidup ti meruan belama iya, enti kitai ngayanka pengarap ba tebus, pemeri ari Petara ti bepengerindu. Tu endang kebuah ti pemadu manah beterima kasih ke tebus! Lalu tu deka meransang kitai nyembah Jehovah enggau gaga ati.

Jesús idup enggau pengumbas iya sereta betaun-taun nyembah Jehovah enggau gaga ati

Seiku menyadi Kristian lelaki ke benama Jesús, ke diau ba menua Mexico, madahka: “Aku nyadi ulun kereja aku. Kekadang aku panjai jam gawa tiap hari taja pan aku enda patut gawa baka nya. Tu ketegal aku ka ngulihka mayuh agi duit. Udah nya aku belajar pasal Jehovah, sereta chara Iya meri Anak ke dikesayau Iya ngagai mensia. Aku keran deka nyembah Iya. Nya alai aku nyerahka pengidup aku ngagai Jehovah, lalu pengudah 28 taun aku gawa ba kompeni nya, aku mutuska diri deka badu lalu nyadi pengerintis istimewa.” Nya meh chara Jesús berengkah nyembah Jehovah enggau gaga ati.

Pengidup ti tuchi mai pengelantang ke kitai. Kati nuan agi ingat baka ni gaya pengidup  nuan sebedau nuan ngelala Jehovah? Rasul Paul ngingatka orang Kristian ba Rome, sida “suba udah nyadi ulun dosa” tang udah nyadi “ulun pengelurus.” Ketegal sida ngembuan pengidup ti tuchi, sida ulih nganti pengidup ti meruan belama iya. (Rome 6:17-22) Kitai mega nitihka standard Jehovah, nya alai kitai bebas ari ati ti tusah ketegal ngereja ulah ti kamah tauka chara pengidup ti jai. Tu endang ngagaka ati!

“Taun-taun ti ngagaka ati aku ba pengidup iya nya awak ke dikena aku nyembah Jehovah.”—Jaime

Peratika Jaime, seiku orang ke enda arapka Petara, pechayaka teori evolusi, sereta mega nyadi pemain boxing. Jaime berengkah datai ke gempuru Kristian, lalu alit ati enggau pengerindu ti diasaika iya dia. Awakka ulih ninggalka chara pengidup lama iya, Jaime besampi ngambika iya ulih arapka Jehovah. Ku Jaime madahka: “Belubah-lubah aku nemu Apai ti bepengerindu sereta ngembuan pengasih nya bisi. Ngetanka standard Jehovah ti lurus udah nyaga aku. Enti aku enda berubah, aku engka udah kena bunuh baka sekeda bala kawan aku ke bemain boxing. Taun-taun ti ngagaka ati aku ba pengidup iya nya awak ke dikena aku nyembah Jehovah.”

ANANG LEJU!

Baka ni asai ati kitai maya nganti pengujung dunya ti jai tu? Kingatka, kitai ngereja peneka Petara sereta nganti pengidup ti meruan belama iya. “Nya alai anang leju ngereja utai ti badas, laban ba maya ti patut kitai deka ngetau, enti kitai enda mantul ngapa.” (Galatia 6:8, 9) Enggau tulung ari Jehovah, aram meh kitai betan, bebendar ngemansangka kualiti ke diguna kitai ngambika selamat pansut ari “penusah ti besai,” lalu terus nyembah Jehovah enggau gaga ati.—Pemandang 7:9, 13, 14; James 1:2-4.

Kitai tau arapka Jehovah deka merekat pengeliat ati kitai, laban Iya nemu pengawa ke digaga kitai sereta pengerindu ke diayanka kitai ngagai Iya enggau nama Iya. Enti kitai mengkang nyembah Iya enggau gaga ati, kitai deka baka pemasmur David, ke madahka: ‘Aku seruran nemu Jehovah bisi enggau aku. Iya semak aku, lalu nadai utai ulih ngelebuka aku. Nya alai aku meri terima kasih sereta gaga ati, lalu aku berasai likun.’—Masmur 16:8, 9.