Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Februari 2016

Belajar Ari Bala Nembiak Jehovah Ke Tetap Ati

Belajar Ari Bala Nembiak Jehovah Ke Tetap Ati

“Nuan endang tetap ati ngagai orang ke tetap ati ngagai Nuan.”—MAS. 18:25.

LAGU: 63, 43

1, 2. Baka ni David nunjukka diri tetap ati ngagai Petara? (Peda gambar ba pun artikel.)

SAUL enggau 3,000 iku bala soldadu iya ngiga David ba menua puang di menua Judah laban deka munuh David. Tang bisi sekali lebuh malam hari, David enggau bala soldadu iya tetemuka endur alai Saul enggau bala soldadu iya nirika kem. Semua sida benung tinduk, nya alai David enggau Abisai bejimat bejalai mansa bala soldadu, lalu tetemuka Saul. Abisai nelai David: “Awakka aku ngentumka sangkuh iya empu ngagai iya, sekali aja, enda ibuh ditandu.” Tang David nagang iya munuh Saul. Ku iya madah ngagai Abisai: ‘Anang munuh iya, laban Jehovah deka ngukum orang ke ngenataika jari ba raja ti udah dipilih Iya.’ Udah nya David madahka: ‘Jehovah enda ngasuh aku ngenataika jari ngagai orang ke udah ditata Jehovah nyadi raja!’—1 Sam. 26:8-12.

2 David nemu utai ti diguna iya ngambika tetap ati ngagai Jehovah. Iya nemu iya patut bebasaka Saul, nya alai iya nadai berunding deka ngemediska Saul. Nama kebuah? Laban Petara udah milih Saul nyadi raja menua Israel. Baka menya, kemaya hari tu,  Jehovah dekaka semua nembiak Iya tetap ati ngagai Iya sereta bebasaka sida ke dikemendarka Iya bekuasa.—Bacha Masmur 18:25.

3. Baka ni Abisai tetap ati ngagai David?

3 Abisai bebasaka David laban iya nemu Petara udah milih David nyadi raja. Tang pengudah nyadi raja, David ngereja dosa ti besai. Iya beleman enggau bini Uriah, lalu udah nya ngasuh Joab nentuka Uriah mati ba perang. (2 Sam. 11:2-4, 14, 15; 1 Ban. 2:16) Abisai nya menyadi tuai Joab. Nya alai iya engka bisi ninga pasal utai ti dikereja David, tang iya agi bebasaka David. Abisai mega tuai soldadu lalu iya ulih ngena kuasa iya ngeletak diri empu nyadi raja, tang iya enda ngereja tu. Iya bekereja ke David, lalu nyaga David ari munsuh.—2 Sam. 10:10; 20:6; 21:15-17.

4. (a) Baka ni David nyadi teladan tetap ati ngagai Petara? (b) Nama teladan bukai ke deka dikerandauka kitai?

4 David tetap ati ngagai Jehovah sepemanjai pengidup iya. Lebuh iya agi biak, iya munuh Goliat ti besai tinggi ke bejai Jehovah sereta orang Israel. (1 Sam. 17:23, 26, 48-51) Lebuh David nyadi raja, nabi Jehovah iya nya Natan patut ngerara David ketegal dosa ke udah dikereja iya. Tekala nya David ngaku diri udah bedosa, lalu iya nesal ati. (2 Sam. 12:1-5, 13) Udah nya, lebuh David udah tuai, iya meri mayuh utai ti berega dikena nulung ngaga Rumah Sembiang Jehovah. (1 Ban. 29:1-5) Endang amat, taja pan David ngereja penyalah ti besai ba pengidup iya, tang iya enda ngetu tetap ati ngagai Petara. (Mas. 51:4, 10; 86:2) Ba artikel tu, kitai deka berandauka teladan David enggau orang bukai ke idup maya jeman nya, lalu belajarka chara kitai ulih tetap ati ngagai Jehovah lebih agi ari orang bukai. Kitai mega deka berandauka kualiti bukai ke ulih nulung kitai tetap ati ngagai Jehovah.

KATI NUAN DEKA TETAP ATI NGAGAI JEHOVAH?

5. Nama ulih dipelajarka kitai ari penyalah Abisai?

5 Lebuh Abisai deka munuh Saul, iya nguji deka tetap ati ngagai David. Tang ketegal David nemu ngemediska ‘orang ke udah ditata Jehovah nyadi raja’ nya salah, iya nagang Abisai munuh raja nya. (1 Sam. 26:8-11) Tu ngajar kitai utai ti beguna: Lebuh kitai mutuska ngagai sapa kitai patut tetap ati dulu, kitai patut berundingka ni bagi prinsip Bup Kudus ke ulih dikena kitai ba pekara tu.

Tetap ati ngagai Jehovah nya beguna agi ari tetap ati ngagai orang bukai

6. Taja pan kitai endang deka tetap ati ngagai diri sebilik sereta bala kawan, nama kebuah kitai anang enda bejimat?

6 Kitai endang deka tetap ati ngagai orang ke dikerinduka kitai, baka kawan tauka diri sebilik. Tang ketegal kitai enda sempurna, asai ati kitai ulih nipu kitai. (Jer. 17:9) Nya alai, enti orang ke dikerinduka kitai ngereja pengawa ti jai, lalu ninggalka pemendar, kitai anang enda ingat tetap ati ngagai Jehovah nya beguna agi ari tetap ati ngagai orang bukai.—Bacha Matthew 22:37.

7. Baka ni seiku menyadi Kristian ke indu mengkang tetap ati ngagai Petara ba maya ti tusah?

 7 Enti seiku ari kita sebilik udah dibuai ari gempuru, nuan ulih nunjukka diri tetap ati ngagai Jehovah. Chunto, bisi sekali, indai Anne ke udah dibuai ari gempuru, betelefon ngagai Anne madahka diri deka nemuai ngagai iya. [1] (Peda nota penutup.) Indai Anne madahka diri enda nyamai ati, laban sida sebilik enggai bejaku enggau iya. Tu ngasuh Anne berasai tusah ati, lalu iya mutus deka nyaut indai iya ngena surat. Sebedau nulis surat, Anne belematika sekeda prinsip Bup Kudus. (1 Kor. 5:11; 2 Jhn. 9-11) Udah nya, dalam surat nya, iya nerangka enggau manah, indai iya ke ninggalka sida sebilik lebuh indai iya ngereja penyalah lalu enggai nesal ati. Anne madahka, indai iya semina ulih lantang ati enti indai iya pulai baru ngagai Jehovah.—Jas. 4:8.

8. Nama kualiti ke ulih nulung kitai tetap ati ngagai Petara?

8 Nembiak Petara ke tetap ati maya jeman David mega baruh ati, siru, sereta berani. Aram meh kitai beratika baka ni kualiti tu ulih nulung kitai tetap ati ngagai Jehovah.

KITAI ENDA TAU ENDA BARUH ATI

9. Nama kebuah Abner nguji deka munuh David?

9 Anak Saul, Jonatan, enggau Abner ke nyadi tuai soldadu orang Israel, meda David minching pala Goliat ngagai Raja Saul. Jonatan nyadi kawan David sereta mengkang tetap ati ngagai iya. (1 Sam. 17:57–18:3) Tang Abner enda. Udah nya, iya indah nulung Saul ke deka munuh David. (1 Sam. 26:1-5; Mas. 54:3) Jonatan seduai Abner nemu Petara dekaka David nyadi raja menua Israel ke baru. Tang pengudah Saul mati, Abner enda nyukung David. Tang iya nguji deka nyiri anak Saul, Is-boset nyadi raja. Udah nya, Abner engka deka nyiri diri empu nyadi raja, lalu engka nya meh kebuah iya beleman enggau seiku ari bini Raja Saul. (2 Sam. 2:8-10; 3:6-11) Nama kebuah Jonatan enggau Abner bisi runding ke enda sama pasal David? Laban Jonatan tetap ati ngagai Jehovah sereta baruh ati, tang Abner enda.

10. Nama kebuah Absalom enda tetap ati ngagai Petara?

10 Anak Raja David, Absalom, enda tetap  ati ngagai Petara laban iya enda baruh ati. Iya deka nyadi raja, nya alai iya “nyendiaka sebuah kerita perang enggau kuda ke iya empu, enggau lima puluh iku orang nyaga iya lebuh iya bejalai.” (2 Sam. 15:1) Iya mega nguingka ati mayuh orang Israel ngambika sida tetap ati ngagai iya. Iya indah nguji deka munuh apai iya, taja pan iya nemu Jehovah udah milih David nyadi raja ba menua Israel.—2 Sam. 15:13, 14; 17:1-4.

11. Baka ni kitai tau bulih penguntung ari cherita Bup Kudus pasal Abner, Absalom sereta Baruk?

11 Lebuh orang enda baruh ati sereta dekaka mayuh agi kuasa, iya tusah deka mengkang tetap ati ngagai Petara. Endang amat, kitai rinduka Jehovah, lalu kitai enggai berundingka diri empu aja sereta jai baka Abner seduai Absalom. Tang kitai patut bejimat, ngambika enda berengkah bisi pengingin angkunka duit tauka kereja ke ngasuh kitai ngasaika diri beguna. Tu ulih ngachau kaul kitai enggau Jehovah. Sekretari Jeremiah, Baruk, udah lama inginka utai ti enda dikembuan iya, lalu enda agi lantang ati nyembah Jehovah. Udah nya Jehovah bejaku ngagai Baruk: ‘Aku ti Jehovah, deka ngeruntuhka utai ti udah digaga Aku, lalu nyabut utai ti udah ditanam Aku. Aku deka ngereja nya di serata dunya. Kati nuan minta diri dikemesaika orang? Anang.’ (Jer. 45:4, 5) Baruk mendingka Jehovah. Lalu kitai mega patut mendingka Iya, laban enda lama da agi Iya deka ngerusak dunya ti jai tu.

Lebuh nuan ngasuh menyadi Kristian ke lelaki minta tulung ari bala tuai gempuru, nuan ngayanka diri siru enggau iya sereta tetap ati ngagai Jehovah

12. Padahka kebuah kitai enda ulih tetap ati ngagai Petara enti kitai berundingka diri empu aja.

12 Daniel, seiku menyadi Kristian ke lelaki ba menua Mexico, patut mutuska ngagai sapa iya patut tetap ati. Iya deka kawin enggau seiku indu ke enda nyembah Jehovah. Ku Daniel madahka: “Aku agi nulis surat ngagai indu nya, taja pan aku udah nyadi pengerintis.” Tang udah nya iya nemu, iya semina ngereja utai ti dikedekaka iya empu aja. Iya enda tetap ati ngagai Jehovah, lalu iya patut baruh ati. Nya alai, iya madah ngagai seiku tuai gempuru ke bepeneleba pasal indu nya. Ku Daniel nerangka: “Iya nulung aku nemu, enti deka tetap ati ngagai Petara,  aku patut ngetu nulis surat ngagai indu nya. Pengudah suah besampi, aku pan ngetu nulis surat ngagai iya. Enda lama udah nya, pengaga ati aku ba pengawa nginjil nambah.” Diatu, Daniel udah bisi bini ke rinduka Jehovah, lalu iya empu nyadi tuai ti ngabas.

TETAP ATI NGAGAI PETARA NULUNG KITAI BISI PENYIRU

Enti nuan nemu kawan nuan udah ngereja dosa ti besai, kati nuan deka berandau enggau iya pasal penanggul iya, lalu nentuka iya minta tulung ari tuai gempuru? (Peda genteran 14)

13. Baka ni Natan mengkang tetap ati ngagai Petara sereta David taja pan David udah ngereja dosa?

13 Lebuh kitai tetap ati ngagai Jehovah, kitai mega ulih tetap ati ngagai orang bukai sereta enggau naka ulih nulung sida. Nabi Natan mengkang tetap ati ngagai Jehovah sereta mega ngagai David. Pengudah David ngambi bini orang bukai, lalu udah nya munuh laki indu nya, Jehovah ngasuh Natan ngerara David. Natan berani sereta ngasika Jehovah. Tang iya mega berunding dulu, sebedau iya bejaku enggau David ngena chara ti siru. Iya deka nulung David nemu dosa ke digaga David nya besai amat. Nya alai, iya nusui siti cherita pasal seiku lelaki kaya ke ngenchuri anak domba ke semina dikemisi seiku lelaki ke seranta. Lebuh David ninga nya, iya balat ringat enggau pengawa ke udah digaga lelaki ke kaya nya. Udah nya, ku Natan: “Orang nya nuan empu.” David nyau sedarka diri udah bedosa ngelaban Jehovah.—2 Sam. 12:1-7, 13.

14. Baka ni nuan ulih tetap ati ngagai Jehovah sereta ngagai kawan nuan tauka ngagai kaban belayan?

14 Nuan mega ulih tetap ati ngagai Jehovah dulu sereta tetap ati ngagai orang bukai enggau ngayanka penyiru. Chunto, nuan engka nemu seiku menyadi Kristian ke lelaki udah ngereja dosa ti besai. Nuan engka deka tetap ati ngagai iya, kelebih agi enti iya nya kawan rapat nuan tauka seiku ari kita sebilik. Tang nuan mega nemu, tetap ati ngagai Jehovah nya utai ti beguna agi. Nya alai baka Natan, ngasika Jehovah tang ngayanka penyiru ngagai menyadi Kristian ke lelaki nya. Padah ngagai iya, iya patut minta bala tuai gempuru nulung iya, lalu iya patut lengkas berandau enggau sida. Enti iya enggai, nuan empu patut madah pasal iya ngagai bala tuai gempuru. Enggau tu, nuan mengkang tetap ati ngagai Jehovah. Lalu ba maya ti sama, nuan ngayanka penyiru ngagai menyadi Kristian nya laban bala tuai gempuru ulih nulung iya bisi kaul ti manah baru enggau Jehovah. Sida deka ngajar iya enggau chara ti siru sereta nelap.—Bacha Adat Lewi 5:1; Galatia 6:1.

KITAI BEGUNAKA PEMERANI KENA TETAP ATI NGAGAI PETARA

15, 16. Nama kebuah Husai begunaka pemerani ngambika tetap ati ngagai Petara?

15 Husai nya seiku ari kawan Raja David ke tetap ati. Lebuh orang deka nyiri Absalom nyadi raja, Husai begunaka pemerani kena mengkang tetap ati ngagai David sereta ngagai Petara. Iya nemu Absalom  enggau bala soldadu iya udah ngagai nengeri Jerusalem, lalu David patut ngerarika diri. (2 Sam. 15:13; 16:15) Tang nama digaga Husai? Kati iya ninggalka David lalu nyukung Absalom? Enda. Taja pan David udah tuai, lalu mayuh orang deka munuh iya, Husai mengkang tetap ati ngagai iya laban Jehovah udah milih David nyadi raja. Nya alai, Husai ngagai Bukit Kana betemu enggau David.—2 Sam. 15:30, 32.

16 David ngasuh Husai pulai baru ngagai nengeri Jerusalem, lalu pepura nyadi kawan Absalom ngambika Absalom mendingka utai ti dipadah iya, tang ukai mendingka Ahitopel. Husai berani sereta berambunka nyawa diri ngasika David sereta mengkang tetap ati ngagai Jehovah. David besampi ngambika Jehovah nulung Husai, lalu nya amat nyadi. Absalom mendingka Husai, ukai mendingka Ahitopel.—2 Sam. 15:31; 17:14.

17. Nama kebuah kitai begunaka pemerani ngambika ulih tetap ati?

17 Kitai begunaka pemerani ngambika tetap ati ngagai Jehovah sereta ngasika Iya, ukai ngereja utai ti dikedekaka diri sebilik, orang ke sama enggau bekereja tauka perintah. Ngambika chunto, Taro, seiku lelaki ari menua Jipun, kenyau ari mit enggau naka ulih ngereja semua utai ngambika apai indai iya lantang ati. Iya ngasika sereta tetap ati ngagai apai indai iya, ukai ketegal iya patut ngereja nya, tang ketegal iya sayauka seduai iya. Tang lebuh iya berengkah belajar enggau Saksi-Saksi Jehovah, apai indai iya ngasuh iya badu belajar. Tu ngasuh iya tusah ati, lalu iya pedis deka madah ngagai apai indai iya, iya deka datai ke gempuru. Ku Taro madahka: “Betaun seduai iya ringat ngagai aku sereta nagang aku datai nemuai. Aku besampi minta pemerani ngambika mengkang tetap enggau pemutus aku. Diatu seduai iya udah berubah manah, lalu aku ulih suah nemuai ngagai seduai iya.”—Bacha Jaku-Dalam 29:25.

18. Nama penguntung ke diulih nuan ari artikel tu?

18 Baka David, Jonatan, Natan sereta Husai, arapka kitai mega ngasaika ati ti puas ketegal tetap ati ngagai Jehovah. Kitai anang baka Abner enggau Absalom, ke enda tetap ati. Endang amat, kitai enda sempurna sereta ngaga penyalah. Tang aram meh kitai nunjuk ngagai Jehovah, tetap ati ngagai Iya nya utai ti pemadu beguna ba pengidup kitai.

^ [1] (genteran 7) Sekeda nama udah ditukar.