Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Februari 2016

Iya Dikumbai Kawan Jehovah

Iya Dikumbai Kawan Jehovah

“Kita orang Israel ti nembiak Aku, udah dipilih Aku. Kita tu peturun Abraham, ti pangan [kawan] Aku.” —ISA. 41:8.

LAGU: 91, 22

1, 2. (a) Baka ni kitai nemu mensia ulih nyadi kawan Petara? (b) Nama deka dikerandauka kitai ba artikel tu?

KENYAU ari maya kitai ada nyentuk ngagai maya kitai mati, kitai begunaka pengerindu. Mensia begunaka kaul ti rapat sereta kaul ti ngembuan pengerindu. Tang kelebih agi, kitai begunaka pengerindu ari Jehovah. Mayuh orang enda pechaya, mensia tau bisi kaul ti rapat sereta bepengerindu enggau Petara laban Iya enda ulih dipeda sereta pemadu bekuasa. Tang kitai nemu utai ti bendar!

2 Ari Bup Kudus, kitai nemu mensia ulih nyadi kawan Petara. Kitai patut belajar ari teladan sida. Nama kebuah? Laban kaul enggau Petara nya juluk ati ti pemadu beguna ke ulih dikembuan kitai ba pengidup. Nya alai, aram meh kitai beratika teladan ari Abraham. (Bacha James 2:23.) Baka ni iya ulih nyadi kawan Petara? Kaul Abraham ti  rapat enggau Petara bepelasarka pengarap, lalu iya dikumbai “apai semua orang ke arap.” (Rom. 4:11) Seraya nuan beratika teladan iya, tanya diri empu, ‘Baka ni aku ulih neladan pengarap Abraham sereta ngeringka kaul aku enggau Jehovah?’

BAKA NI ABRAHAM NYADI KAWAN JEHOVAH?

3, 4. (a) Padahka utai ti pemadu besai ke nguji pengarap Abraham. (b) Nama kebuah Abraham sanggup nyerahka Isak nyadika pemeri tunu?

3 Uji gambarka Abraham ke beumur kira-kira 125 taun belubah-lubah bejalai niki bukit. [1] (Peda nota penutup.) Entudi iya Isak, anak lelaki iya ke beumur kira-kira 25 taun. Isak ngesan kayu api, lalu Abraham mai sebilah duku enggau utai ti dikena ngidupka api. Nya engka pejalai jauh ke pemadu mar ba pengidup Abraham. Tang tu ukai ketegal iya udah tuai. Iya agi kering. Tang, pejalai jauh nya tusah laban Jehovah udah ngasuh iya nyerahka anak iya nyadika pemeri tunu!—P-kal. 22:1-8.

Abraham enda sengapa ngasika Petara

4 Nya engka utai ti pemadu besai ke nguji pengarap Abraham. Sekeda orang ngumbai Petara jai laban Iya ngasuh Abraham nyerahka anak iya nyadika pemeri tunu. Lalu sida ke bukai ngumbai Abraham sanggup ngereja tu laban iya enda sayauka anak lelaki iya. Orang nyebut baka nya laban sida nadai pengarap sereta enda nemu reti pengarap ti bendar. (1 Kor. 2:14-16) Tang Abraham enda sengapa ngasika Petara. Iya ngasi laban iya bisi pengarap ti bendar ngagai Petara. Iya nemu Jehovah enda ngasuh iya ngereja sebarang utai ke tau ngemedis belama iya. Abraham nemu enti iya ngasi, Jehovah deka merekat iya enggau anak iya. Nama diguna Abraham ngambika bisi pengarap ti tegap baka nya? Iya begunaka penemu enggau peneleba.

5. Baka ni Abraham ulih nemu pasal Jehovah, lalu baka ni penemu nya nulung iya?

5 Penemu. Abraham dibesaika ba nengeri ke dikumbai Ur. Orang ke diau  dia nyembah petara pelesu, tu nyengkaum apai iya. (Jos. 24:2) Nya alai, baka ni Abraham nemu pasal Jehovah? Bup Kudus nunjukka anak Noah, Shem nya kaban belayan Abraham. Lalu Shem agi idup nyentukka Abraham beumur kira-kira 150 taun. Shem nya lelaki ke ngembuan pengarap ti tegap, lalu iya engka berandau enggau bala kaban belayan iya pasal Jehovah. Kitai enda entu nemu enggau bendar, tang tu engka chara Abraham nemu pasal Jehovah. Utai ti ditemu Abraham ngasuh iya rinduka Jehovah, lalu penemu nya nulung iya ngemansangka pengarap iya.

6, 7. Baka ni peneleba Abraham ngeringka pengarap iya?

6 Peneleba. Baka ni Abraham ngulihka peneleba ke ulih ngeringka pengarap iya ngagai Jehovah? Sekeda orang ngumbai runding bekaul enggau ati, lalu ati bekaul enggau pengawa. Ati Abraham diperansang ulih utai ti ditemu iya pasal Jehovah, lalu tu udah ngasuh iya bebasaka ‘Jehovah Petara ti Pemadu Tinggi, ke ngaga langit enggau dunya.’ (P-kal. 14:22) Bup Kudus ngumbai basa nya nangika Petara. (Heb. 5:7) Ngambika bisi kaul ti rapat enggau Petara, kitai patut nangika Iya. (Mas. 25:14) Tu kualiti ti meransang Abraham ngasika Jehovah.

7 Petara ngasuh Abraham seduai Sarah ninggalka rumah seduai iya ba nengeri Ur, lalu mindah ngagai menua bukai. Seduai iya udah tuai, lalu deka diau ba langkau kain sepemanjai pengidup seduai iya. Taja pan deka napi mayuh penusah, tang Abraham keran deka ngasika Jehovah. Ketegal iya ngasi, Petara merekat sereta nyaga iya. Ngambika chunto, lebuh bini Abraham ke bajik, Sarah, diambi ari iya, Abraham nemu diri deka dibunuh, tang Jehovah nyaga seduai iya lebih ari sekali. (P-kal. 12:10-20; 20:2-7, 10-12, 17, 18) Peneleba nya ngasuh pengarap Abraham tegap agi.

8. Baka ni kitai tau bulih penemu enggau peneleba ke ulih ngeringka kaul kitai enggau Jehovah?

8 Kati ulih kitai nyadi kawan rapat Jehovah? Ulih! Baka Abraham, kitai patut nemu pasal Jehovah. Lalu kitai mega tau bulih penemu enggau peneleba ke diguna kitai. Kemaya hari tu, penemu enggau peneleba kitai mayuh agi ari enggi Abraham. (Dan. 12:4; Rom. 11:33) Bup Kudus penuh enggau penemu pasal Petara “ke  ngaga langit enggau dunya.” Utai ti ditemu kitai ngasuh kitai rinduka Jehovah sereta nulung kitai bebasaka Iya. Pengerindu enggau basa ngagai Petara meransang kitai ngasika Iya. Ari tu, kitai meda chara Iya nyaga sereta merekat kitai, lalu tu meri kitai peneleba ke ngasuh pengarap kitai tegap agi. Enti kitai bebendar nyembah Jehovah, kitai deka bulih ati ti puas, pemaik sereta ati ti gaga. (Mas. 34:8; J-lam 10:22) Mayuh agi penemu enggau peneleba ke diulih kitai, tegap agi kaul kitai enggau Iya.

CHARA ABRAHAM NGETANKA KAUL IYA ENGGAU PETARA

9, 10. (a) Nama diguna Abraham ngambika kaul iya enggau Jehovah tegap agi? (b) Nama nunjukka Abraham rinduka sereta ngetanka kaul iya enggau Jehovah?

9 Kaul ti rapat ulih disamaka enggau reta ti berega. (Bacha Jaku-Dalam 17:17.) Iya ukai baka pasu bungai ti mar ke semina dikena ngias aja. Tang iya baka bungai ti manah ke begunaka ai sereta deka ngerembai. Abraham rinduka sereta ngetanka kaul iya enggau Jehovah. Baka ni iya ngereja nya?

Kaul nya baka bungai ti manah ke begunaka ai sereta deka ngerembai

10 Abraham bebendar agi nangika sereta ngasika Petara. Ngambika chunto, lebuh iya enggau sida sebilik sereta bala ulun mupuk ngagai menua Kanaan, iya terus ngelakka Jehovah ngiring iya lebuh ngaga pemutus ti besai tauka mit. Setaun sebedau Isak ada, lebuh Abraham beumur 99 taun, Jehovah ngasuh iya nutus semua lelaki ke bisi ba ruang bilik iya. Kati Abraham kakang ati ngagai Jehovah tauka nguji ngiga kebuah enggai ngereja utai ti diasuh Jehovah? Enda, iya pechayaka sereta ngasika Jehovah “ba hari nya.”—P-kal. 17:10-14, 23.

11. Nama kebuah Abraham irau ati pasal nengeri Sodom enggau Gomorah, lalu baka ni Jehovah nulung iya?

11 Ketegal Abraham seruran ngasika Jehovah indah ba pekara ti mit, kaul seduai iya nyadi tegap agi. Iya ngasaika diri ulih berandau enggau Jehovah pasal semua utai, indah minta tulung lebuh iya bisi utai ti ngirauka ati iya. Ngambika chunto, lebuh Jehovah madahka Iya deka ngerusak semua nengeri ba Sodom enggau Gomorah, Abraham irau ati. Nama kebuah? Iya enggaika orang ke manah sama mati enggau orang ke jai. Iya engka irau pasal Lot anak menyadi iya enggau sida sebilik, ke diau ba nengeri Sodom. Abraham arapka Jehovah, “Hakim ke ngakim semua dunya,” nya alai iya enggau baruh ati madah ngagai Jehovah pasal pengirau ke bisi ba ati iya. Jehovah sabar sereta nunjukka Diri bisi pengasih, ngagai kawan Iya Abraham. Jehovah nerangka, indah lebuh Iya ngakim, Iya ngiga orang ke manah sereta nyelamatka sida.—P-kal. 18:22-33.

12, 13. (a) Baka ni penemu enggau peneleba ulih nulung Abraham dudi hari? (b) Nama kebuah Abraham pechayaka Jehovah?

12 Endang amat, semua penemu enggau  peneleba ke udah diulih Abraham nulung iya ngetanka kaul ti tegap enggau Jehovah. Nya alai, lebuh Jehovah ngasuh Abraham nyerahka anak iya nyadika pemeri tunu, iya nemu Jehovah seruran sabar, kasih, tau dikearapka sereta nyaga. Abraham pechaya bendar Jehovah enda nyadi jai tauka kasar enggau ngenyit! Nama kebuah kitai madahka baka nya?

13 Sebedau ninggalka orang gaji iya, ku Abraham bejaku: ‘Seduai nganti ditu, ngemataka keledai. Aku enggau anak aku deka kin, lalu nyembah Petara, lalu udah nya kami duai deka pulai baru ngagai seduai.’ (P-kal. 22:5) Nama reti utai ku Abraham? Kati iya bula pasal deka pulai baru enggau Isak, laban iya nemu diri deka nyerahka Isak nyadika pemeri tunu? Enda. Bup Kudus madahka, Abraham nemu Jehovah ulih ngangkatka Isak ari mati. (Bacha Hebrew 11:19.) Abraham nemu Jehovah udah nulung iya bulih seiku anak lelaki, taja pan seduai iya Sarah udah tuai. (Heb. 11:11, 12, 18) Nya alai, iya nemu ba Jehovah semua utai ulih magang. Abraham enda nemu utai ke deka nyadi sehari nya. Tang iya bisi pengarap, Jehovah deka ngangkatka anak iya ari mati ngambika semua semaya Jehovah ulih dikeamatka. Nya kebuah Abraham dikumbai “apai semua orang ke arap.”

Abraham bisi pengarap, Jehovah deka ngangkatka anak iya ari mati ngambika semua semaya Jehovah ulih dikeamatka

14. Nama penusah ke ditapi nuan lebuh nyembah Jehovah, lalu baka ni teladan Abraham ulih nulung nuan?

14 Taja pia, kemaya hari tu, Jehovah nadai ngasuh kitai nyerahka bala anak kitai nyadika pemeri tunu, tang Iya bisi ngasuh kitai ngasika pesan Iya. Kekadang kitai engka enda meretika kebuah pesan nya diberi tauka kitai engka ngasaika pesan nya tusah dititihka. Kati nuan kala ngasaika baka nya? Ba sekeda orang, pengawa nginjil nya tusah dikereja. Sida engka malu sereta ngasaika diri tusah bejaku enggau orang ke enda dikelala sida. Sida ke bukai takut deka bebida ari orang bukai ba endur kereja tauka sekula. (P-sut. 23:2; 1 Tes. 2:2) Lebuh nuan diasuh ngereja utai ti tusah, pikirka teladan manah Abraham ba pengarap enggau pemerani. Lebuh kitai belematika teladan bala lelaki enggau indu ke tetap ati, tu ulih meransang kitai neladan sida sereta semak agi ngagai Kawan kitai, Jehovah.—Heb. 12:1, 2.

KAUL TI MAI BEREKAT

15. Nama kebuah kitai pechaya Abraham enda kala nesal ati ngasika Jehovah?

15 Kati Abraham kala nesal ati ngasika pesan Jehovah? Enda, iya nyembah Jehovah enggau tetap ati nyentukka iya mati. Iya nadai nesal ati. (P-kal. 25:8) Lebuh Abraham beumur 175 taun, iya ulih ngenang pasal diri empu ke panjai umur sereta puas ati. Nama kebuah? Laban kaul iya enggau Jehovah seruran nyadi utai ti pemadu beguna ba iya. Taja  pia, lebuh kitai macha pasal Abraham ke udah tuai sereta puas ati, tu ukai reti Abraham nadai pengingin deka idup agi.

16. Nama pengaga ati ke deka diasaika Abraham ba Paradais?

16 Bup Kudus madahka, Abraham ‘nganti sebuah nengeri ti bisi batu pemun, ti diperambu lalu digaga Petara.’ (Heb. 11:10) Abraham pechaya, iya ulih meda nengeri nya, Perintah Petara, merintah atas serata dunya. Lalu iya endang ulih! Uji gambarka pengaga ati Abraham ke deka diau ba dunya paradais sereta terus ngeringka kaul iya enggau Petara. Iya deka gaga ati laban nemu pengarap iya udah beribu taun nulung nembiak Petara! Ba Paradais, iya deka nemu pemeri ke digaga iya ba Bukit Moriah ngambarka utai ti amat besai. (Heb. 11:19) Lalu iya deka nemu pemerinsa ke diasaika iya lebuh iya nyerahka anak iya, Isak, nyadika pemeri tunu udah nulung bejuta iku orang ke tetap ati ngasaika pemerinsa ti diasaika Jehovah lebuh Jehovah meri Anak Iya, Jesus Kristus, nyadika tebus ke mensia. (Jhn. 3:16) Teladan Abraham udah nulung semua kitai bebendar agi beterima kasih ke tebus nya, chara ti pemadu besai dikena ngayanka pengerindu!

17. Nama deka digaga nuan, lalu nama deka dikerandauka kitai ba artikel pengudah tu?

17 Arapka tiap iku kitai keran deka neladan pengarap ke dikembuan Abraham. Baka Abraham, kitai begunaka penemu enggau peneleba. Seraya kitai terus belajar pasal Jehovah sereta ngasika Iya, kitai deka meda chara Iya merekat sereta nyaga kitai. (Bacha Hebrew 6:10-12.) Arapka Jehovah nyadi Kawan kitai belama iya! Ba artikel pengudah tu, kitai deka berandauka tiga iti da agi teladan orang ke tetap ati ti nyadi kawan rapat Petara.

^ [1] (genteran 3) Nama asal Abraham seduai Sarah nya Abram enggau Sarai. Tang ba artikel tu, kitai deka ngena nama ke diberi Jehovah ngagai seduai iya.