Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Disember 2016

Ulih Pengasih Nuan Dilepaska

Ulih Pengasih Nuan Dilepaska

“Dosa nadai agi merintah kita, laban kita . . . di baruh pengasih.”—ROM. 6:14.

LAGU: 2, 61

1, 2. Baka ni Rome 5:12 ulih nulung kitai?

ROME 5:12 madahka: “Baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.” Tu siti ari ayat ke dikelala kitai enggau manah sereta suah dikena kitai lebuh kitai ngajar orang bukai pasal Bup Kudus.

2 Ayat nya mayuh kali dikena ba bup Nama Utai ti Bendar Diajar Bup Kudus? Lebuh kitai belajarka Pelajar 3, 5, sereta 6 enggau bala anak kitai tauka orang bukai, kitai tentu bisi macha Rome 5:12. Kitai ngena ayat tu nulung sida meretika kebuah dunya tu ukai paradais, kebuah kitai begunaka tebus, sereta kebuah kitai mati. Tang ayat tu mega ulih nulung semua kitai bebendar agi beterima kasih ke kaul kitai enggau Jehovah, lalu nulung kitai keran agi deka ngelantangka ati Iya sereta mengkang nganti utai ti udah disemaya Iya ke kitai.

3. Nama enda tau enda dikingatka kitai pasal diri empu?

 3 Sayau amat, semua kitai bedosa. Kitai ngereja penyalah ninting hari. Tang Jehovah kasih ke kitai. Iya nemu kitai enda sempurna, lalu Iya deka ngampun kitai. (Mas. 103:13, 14) Jesus madahka, kitai enda tau enda minta Petara ngampun dosa kitai. (Luk. 11:2-4) Lebuh Jehovah ngampun penyalah ke digaga kitai suba, kitai enda patut berundingka penyalah nya agi. Aram kitai beratika baka ni Jehovah ulih ngampun kitai.

BAKA NI JEHOVAH ULIH NGAMPUN KITAI

4, 5. (a) Nama nulung kitai meretika Rome 5:12? (b) Nama reti “pengasih”?

4 Bup Rome, kelebih agi bab 6, nulung kitai meretika baka ni Jehovah ulih ngampun dosa kitai. Ba bab 3, kitai nemu “semua bela udah bedosa magang.” Udah nya Paul nerangka: “Diatu sida digaga lurus ulih pengasih ti diberi Iya pechuma, lebuh sida ditebus [dilepaska] Jesus Kristus.” (Rom. 3:23, 24) Leka jaku Gerika ke disalin ngagai “pengasih” ngembuan reti pasal ngereja utai ti manah enggau enda ngarapka dibalas, utai ti enda patut diberi tauka diberi nyadika upah.

5 Seiku pakar nerangka, leka jaku Gerika nya suah nunjukka utai ke udah digaga Petara enggau Kristus kena nyelamatka mensia ari dosa enggau pemati. Aram kitai meda utai ke udah digaga Petara ke kitai sereta baka ni pengasih Iya meri penguntung ke kitai diatu sereta meri pengadang ke kitai jemah ila.

Jehovah mandangka pengasih ti besai ngagai semua mensia nengah Jesus Kristus

6. Sapa tau bulih penguntung ari pengasih Petara, lalu baka ni?

6 Ketegal Adam bedosa, dosa enggau pemati udah ngelekai ngagai tiap iku mensia ke enda sempurna. Nya kebuah Bup Kudus madahka “ketegal dosa orang siku, pemati merintah ulih orang siku nya.” Tang Jehovah mandangka pengasih ti besai lalu nyediaka siti chara dikena nyelamatka semua mensia nengah “orang siku, iya nya Jesus Kristus.” (Rom. 5:12, 15, 17) “Mayuh orang deka digaga lurus laban orang siku ngasi.” Lalu sida deka nganti “pengidup ti meruan belama iya, ulih Jesus Kristus.”—Rom. 5:19, 21.

7. Nama kebuah tebus ari Petara nya mandangka pemanah ati tang enda layak diterima kitai?

7 Perundingka tu: Jehovah tau enda ibuh meri anak Iya nyadika tebus. Tang Iya mandangka pemanah ati ti besai enggau nyediaka siti chara kena nyelamatka kitai ari dosa enggau pemati. Nadai seiku ari kitai layak nerima utai ke digaga Petara enggau Jesus ke kitai. Naka meh pengaga ati kitai laban seduai iya udah muka jalai ngambika dosa kitai diampun sereta ulih idup belama iya! Awakka kitai mandangka diri beterima kasih ngagai Petara ari chara kitai ngena pengidup diri.

 BETERIMA KASIH KE PENGASIH PETARA

8. Nama runding ke enda tau enda diseliahka kitai?

8 Kitai nemu Petara deka ngampun dosa, indah dosa ti besai. Tang kitai enda patut ngena pengasih Jehovah nyadika tegal kitai tau ngereja utai ti salah lalu ngumbai, ‘Jehovah deka ngampun aku.’ Ba kurun keterubah, indah lebuh maya sekeda bala rasul agi idup, bisi sekeda orang Kristian ke ngembuan runding baka nya. (Bacha Jude 4.) Kemaya hari tu, kitai patut bejimat ngambika enda nitihka orang bukai lalu belubah-lubah berengkah berunding baka nya.

9, 10. Baka ni Paul enggau sida ke bukai dilepaska ari dosa enggau pemati?

9 Paul madahka, orang Kristian enda tau ngumbai Petara mengkang deka ngampun sida enti sida majak bedosa. Paul madahka sida patut nyeliahka runding ke baka tu laban sida udah “dilepaska ari dosa, NW.” (Rom. 6:1, 2.) Nama reti utai ku Paul?

Kitai ulih milih sekalika deka alah laban tauka bekuasa atas runding enggau pengingin kitai ti bedosa

10 Nengah tebus, Petara ngampun dosa Paul enggau orang Kristian ke bukai ba kurun keterubah. Jehovah ngiri sida ngena roh kudus ngambika nyadi anak Iya. Enti sida mengkang tetap ati, sida deka diau di serega sereta merintah enggau Kristus. Tang ketegal sida agi idup ba dunya, baka ni sida udah “dilepaska ari dosa”? Paul ngaga banding kena nunjukka chara pengidup sida berubah abis. Iya madahka, pengudah Jesus mati, Jesus diangkatka idup baru lalu ngembuan tubuh roh ti enda ulih mati. Nya kebuah pemati ‘nadai agi kuasa atas iya.’ Enggau chara ti sama, orang Kristian ke diiri ngena roh kudus mega baka ke udah mati. Pengidup sida berubah abis laban sida enda agi ngawakka pengingin ti bedosa bekuasa atas sida. Kenyau ari nya, sida enggau naka ulih idup enggau chara ti ngelantangka ati Petara. Sida ‘[dilepaska ari dosa, NW] lalu idup ke Petara dalam Jesus Kristus.’—Rom. 6:9, 11.

11. Baka ni orang Kristian kemaya hari tu udah “dilepaska ari dosa”?

11 Tang baka ni enggau orang Kristian kemaya hari tu? Baka ni kitai udah “dilepaska ari dosa”? Suba, kitai engka udah ngereja mayuh penyalah tang enda beratika nama runding Jehovah pasal pengawa kitai. Kitai baka “ulun pengamah, sereta . . . ulun penyai,” iya nya “ulun dosa.” (Rom. 6:19, 20) Tang lebuh kitai belajar ari Bup Kudus pasal baka ni Petara dekaka kitai idup, kitai ngaga ubah ba pengidup kitai, nyerahka diri ngagai Iya, lalu dibaptisa. Kitai keran deka ngasika Jehovah sereta idup enggau chara ti ngelantangka ati Iya. Kitai “dilepaska ari dosa,” lalu kitai “nyadi ulun pengelurus.”—Rom. 6:17, 18.

12. Nama utai ke patut dipilih tiap iku kitai?

12 Tang, kitai agi ulih milih. Ku Paul madahka: “Anang nejuka dosa merintah tubuh kita, ti ngasuh kita ngasika pengingin tubuh.” (Rom. 6:12) Nya alai, kitai ulih milih sekalika deka alah laban tauka bekuasa atas runding enggau pengingin kitai ti bedosa. Tanya diri empu: ‘Kati aku nejuka pengingin ti salah majak balat nyentukka aku ngereja utai ti jai? Tauka kati aku lalu tekala nya nulak pengingin ti salah?’ Enti kitai amat beterima kasih ke pengasih Petara, kitai deka enggau naka ulih ngelantangka ati Iya.

 NUAN ULIH NGELABAN DOSA

13. Nama kebuah kitai pechaya kitai ulih ngereja utai ti ngena?

13 Ba kurun keterubah, sekeda orang ba Korint nyadi penchuri, lelaki beleman enggau lelaki, butang, nyembah engkeramba tauka pemabuk. Tang lebuh sida udah ngelala sereta rinduka Jehovah, sida berubah sereta dituchi. Sida berasai malu enggau utai ti dikereja sida. (Rom. 6:21; 1 Kor. 6:9-11) Orang Kristian ba Rome mega patut ngaga ubah ti sama. Paul ngasuh sida: ‘Anang agi nyerahka tubuh kita ngagai dosa, nyadika senyata kena ngereja penyai, tang serahka diri ngagai Petara baka orang ke udah dibai ari pemati ngagai pengidup, lalu serahka tubuh kita ngagai Petara nyadika senyata kena ngereja pengelurus.’ (Rom. 6:13) Paul pechaya, sida ulih ngereja utai ti ngena sereta terus bulih penguntung ari pengasih Petara.

14, 15. Nama patut ditanya kitai ngagai diri empu?

14 Sama mega kemaya hari tu. Sekeda ari bala menyadi Kristian kitai engka udah baka orang ke ba Korint. Tang pengudah ngelala Jehovah, sida berubah. Sida baka ke dituchi. Ngambika ulih ngelantangka ati Jehovah, semua kitai ngaga ubah ba pengidup kitai. Indah diatu kitai deka nunjukka diri beterima kasih ke pengasih Petara. Nya alai kitai keran deka ngelaban pengingin kitai ti salah sereta ngena pengidup kitai nyembah Jehovah.

15 Endang amat, kitai enda tau enda nyeliah ari ngereja dosa besai ti udah dikereja sekeda orang ba Korint. Kitai enda tau majak ngereja dosa besai nya, lalu ba maya ti sama ngarapka Petara mandangka pengasih sereta ngampun kitai. Tang baka ni enggau dosa ke engka dikumbai sekeda orang penyalah ti enda entu besai? Kati kitai keran deka enggau naka ulih ngasika Jehovah ba semua pekara?—Rom. 6:14, 17.

16. Baka ni kitai nemu, kitai enda tau enda nyeliahka dosa ke dipadah ba 1 Korint 6:9-11?

16 Uji perundingka rasul Paul. Iya nulis: “Asal aku ari mensia ke dijual nyadika ulun dosa. Aku enda nemu utai ti dikereja diri, laban aku enda ngereja utai ti dikedekaka aku, tang ngereja utai ti dipegedika aku.” (Rom. 7:14, 15) Taja pan iya enda ngereja utai ke dipadah ba 1 Korint 6:9-11, Paul ngaku iya agi bedosa. Iya deka ngelantangka ati Jehovah, nya alai iya bebendar nyeliah ari ngereja utai ti salah. (Bacha Rome 7:21-23.) Arapka kitai neladan chunto iya sereta enggau naka ulih ngasika Jehovah.

17. Nama kebuah nuan deka lurus?

17 Ngambika chunto, kitai nemu ngambika ulih nyembah Jehovah kitai enda tau enda lurus. (Bacha Jaku Dalam 14:5; Epesus 4:25.) Kitai enggai baka Sitan,  ke nyadi “apai pemula.” Lalu kitai nemu, Ananias enggau bini iya mati ketegal seduai iya bula. Nya alai kitai anang bula. (Jhn. 8:44; SKR. 5:1-11) Tang pengawa ti lurus ukai aja enda bula. Enti kitai amat beterima kasih ke pengasih Petara, kitai mega deka lurus ba pekara bukai.

18, 19. Nama reti lurus?

18 Orang tau dikumbai enda lurus taja pan iya enda nyebut utai ti bula. Ngambika chunto, Jehovah nangkan orang Israel: “Anang ngenchuri tauka nipu, tauka bula.” Nama kebuah sida patut nitihka jaku nya? Ku Jehovah madahka: ‘Kita enda tau enda kudus, laban Aku ti Jehovah Petara kita, kudus.’ (Lew. 19:2, 11) Taja pan kitai engka enda nyebut utai ti bula, tang enti kitai ngasuh orang bukai pechayaka utai ti enda amat, kitai enda lurus.

Kati kitai amat keran deka nyeliahka diri ari bula tauka nipu? (Peda genteran 19)

19 Ngambika chunto, seiku lelaki madah ngagai tauke iya tauka orang ke sama gawa enggau iya, iya patut pulai tumu laban iya bisi semaya enggau lutur.  Tang tu ukai kebuah ti bendar. Iya deka tumu mupuk raun. Iya ke amat, “semaya” iya enggau lutur enda lama, semina ngambi ubat tauka mayar ungkus berubat ngagai opis lutur. Kati iya lurus tauka ngemulaka orang bukai? Lelaki nya ngasuh orang pechayaka utai ke enda amat. Kekadang, orang ngemulaka orang bukai ketegal deka bulih utai ti dikedekaka sida tauka ketegal enggai diukum. Tang kitai ngasika Jehovah, ke madahka: “Anang . . . bula.” Kitai deka ngereja utai ke dikumbai Iya ngena sereta kudus.—Rom. 6:19.

20, 21. Enti kitai beterima kasih ke pengasih Petara, nama agi utai bukai ke enda tau enda diseliahka kitai?

20 Endang amat, kitai nyeliahka butang, pemabuk, sereta dosa besai ke bukai. Tang kelebih agi, kitai deka nyeliahka sebarang utai ke enda ngelantangka ati Jehovah. Ngambika chunto, kitai ukai semina nyeliahka ulah seks ti kamah, tang kitai mega nyeliahka pemerindang ti kamah. Kitai ukai semina nyeliahka diri ari mabuk, tang kitai mega enggai ngirup nyentuk ke kitai nyauka mabuk. Kitai engka patut bebendar ngelaban penguji ke baka tu, tang kitai ulih menang.

21 Kitai deka utai ti dipadah Paul nyadika juluk ati kitai. Paul madahka: “Anang nejuka dosa merintah tubuh kita, ti ngasuh kita ngasika pengingin tubuh.” (Rom. 6:12; 7:18-20) Endang amat, kitai enda ulih nyeliahka semua dosa. Tang lebuh kitai ngelaban tiap bengkah dosa, kitai nunjukka diri amat beterima kasih ke pengasih ti udah diayanka Petara enggau Kristus ngagai kitai.

22. Nama upah ke dianti kitai enti kitai amat beterima kasih ke pengasih Jehovah?

22 Jehovah udah ngampun dosa kitai lalu Iya ulih terus ngampun dosa kitai. Kitai amat beterima kasih ke pengasih Iya! Nya alai aram meh kitai bebendar nyeliahka utai ke dikumbai Iya salah, taja pan orang bukai enda ngumbai nya dosa. Nama upah ke ulih dianti kitai enti kitai nyeliahka dosa nya? Paul madahka: ‘Laban kita diatu udah dilepaska ari dosa, lalu nyadi ulun Petara, penguntung kita nya pengudus, ti ngujung ngagai pengidup ti meruan belama iya.’—Rom. 6:22.