Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Disember 2016

Serahka Semua Pengirau Kita Ngagai Jehovah

Serahka Semua Pengirau Kita Ngagai Jehovah

‘Serahka semua pengirau kita ngagai [Jehovah], laban Iya [ibuhka, NW] kita.’—1 PET. 5:7.

LAGU: 60, 23

1, 2. (a) Nama kebuah kitai napi pengirau? (Peda gambar ba pun artikel.) (b) Nama deka dikerandauka kitai ba artikel tu?

KEMAYA hari tu, Sitan “bejalai segau-segau baka singa ti negung, begigaka orang ke deka diempa iya.” (1 Pet. 5:8; Pem. 12:17) Ketegal tu, pengidup penuh enggau pengirau, lalu indah nembiak Petara ngasaika pengirau. Nembiak Petara menya mega napi pengirau. Ngambika chunto, Bup Kudus madahka, kekadang Raja David irau. (Mas. 13:2) Lalu rasul Paul ngasaika diri “ditekanka pengirau ke semua eklisia.” (2 Kor. 11:28) Tang nama ulih digaga kitai enti kitai balat irau?

2 Apai kitai ti bepengerindu di serega nulung nembiak Iya kelia ngurangka pengirau, lalu Iya mega deka ngereja utai ti sama ke kitai kemaya hari tu. Bup Kudus ngasuh kitai: “Serahka semua pengirau kita ngagai Iya, laban Iya [ibuhka, NW] kita.” (1 Pet. 5:7) Baka ni nuan ulih ngereja nya? Kitai deka berandauka empat iti chara. Nuan ulih (1) besampi, (2) macha sereta belematika Jaku Petara, (3) ngawakka roh kudus Jehovah  nulung nuan, sereta (4) berandau enggau orang ke dipechayaka nuan pasal asai ati nuan. Seraya kitai meresa empat iti chara tu, uji giga ni bagi pekara ke deka dikemansangka nuan.

‘SERAHKA PENUSAH NUAN NGAGAI JEHOVAH’

3. Baka ni nuan ulih ‘nyerahka penusah nuan ngagai Jehovah’?

3 Chara keterubah kitai ulih nyerahka pengirau kitai ngagai Jehovah iya nya nengah sampi ke ari ati. Enti nuan bisi pengirau, Apai kitai ti bepengerindu di serega deka nuan madahka utai ti amat diasaika nuan ngagai Iya. Pemasmur David minta Jehovah: ‘Dingaka sampi aku, O Petara.’ Ba masmur ti sama, David mega madahka: ‘Serahka penusah nuan ngagai Jehovah, lalu Iya deka nyaga nuan.’ (Mas. 55:1, 22) Pengudah nuan enggau naka ulih mutarka penanggul, besampi ngagai Jehovah manah agi ari ke irau laban besampi ulih nulung. Tang nama guna sampi? Baka ni sampi ulih nulung kitai nyeliahka asai ati ke balat irau?—Mas. 94:18, 19.

4. Enti kitai bisi pengirau, nama kebuah sampi nya beguna amat?

4 Bacha Pilipi 4:6, 7. Baka ni Jehovah nyaut sampi kitai ke ari ati sereta bebendar? Iya ulih nulung kitai berasai lantang sereta nyeliahka runding enggau asai ati ti enda manah. Kena nganti pengirau sereta asai ati kitai ti takut, Petara nulung kitai bulih pengelantang ba ati enggau runding ke enda kala diasaika kitai. Mayuh ari bala menyadi Kristian kitai udah ngasaika pengelantang ke baka tu. Tu mega ulih diasaika nuan. ‘Pemaik Petara’ ulih nulung nuan mutarka sebarang penanggul! Nuan ulih arap bendar ke semaya Jehovah: ‘Aku tu Petara kita. Anang nejuka utai ngenakutka kita! Aku deka ngasuh kita kering lalu nulung kita.’—Isa. 41:10.

JAKU PETARA MAI PENGELANTANG BA ATI ENGGAU RUNDING

5. Baka ni Jaku Petara ulih nulung nuan bulih pengelantang ba ati enggau runding?

5 Chara kedua kitai tau bulih pengelantang ba ati enggau runding iya nya enggau macha sereta belematika ayat Bup Kudus. Nama kebuah tu beguna? Laban Bup Kudus nya Jaku Petara. Iya ngembuan jaku ajar ti badas sereta ulih dikena ari Penempa kitai. Enda ngira ni maya nuan bisi pengirau, nuan tau berunding enggau dalam pasal runding Petara sereta belematika baka ni jaku ajar Iya ulih ngeringka nuan. Tu ulih nulung nuan mutar, ngurang, tauka indah nyeliahka pengirau. Jehovah enggau terang madahka macha Jaku Iya bekaul enggau nyadi “kering sereta berani” sereta enda “takut tauka lemi semengat.”—Jos. 1:7-9.

Pengarap ti kering ngagai Jehovah deka nulung kitai pechaya, Iya deka enggau pengerindu nyediaka utai ti diguna kitai

6. Baka ni jaku Jesus nguntungka nuan?

 6 Ba Bup Kudus, kitai macha pasal chara Jesus bejaku enggau orang. Sida rindu mendingka iya laban jaku iya ngelantang sereta ngenyamaika ati, kelebih agi ngagai orang ke lemi tauka irau. (Bacha Matthew 11:28-30.) Jesus balat ibuh ke asai ati orang bukai. (Mrk. 6:30-32) Baka Jesus ke besemaya deka nulung bala rasul ke sama bejalai enggau iya, iya mega deka nulung kitai kemaya hari tu. Kitai tau enda ibuh sama begulai enggau Jesus ngambika bulih penguntung. Jesus ke nyadi Raja kitai di serega terus mandangka pengerindu ngagai kitai. Nya alai enti nuan bisi pengirau, nuan ulih pechaya iya bisi enggau nuan sereta deka nulung nuan ba maya ti ngena. Jesus meri kitai pengadang sereta pemerani kena nulung kitai mutarka pengirau.—Heb. 2:17, 18; 4:16.

KUALITI TI DATAI ARI ROH KUDUS PETARA

7. Baka ni kitai bulih penguntung ari roh kudus Petara?

7 Jesus besemaya, Apai kitai deka meri roh kudus enti kitai minta iya. (Luk. 11:10-13) Baka ni chara ketiga tu ulih nulung kitai ngurangka pengirau? Roh kudus Petara nulung kitai ngemansangka kualiti manah ke dikembuan Petara kitai ti pemadu bekuasa. (Kol. 3:10) Ba Bup Kudus, kualiti tu dikumbai ‘buah roh kudus.’ (Bacha Galatia 5:22, 23.) Enti kitai ngemansangka kualiti ti manah tu, kaul kitai enggau orang bukai deka manah agi, lalu kitai deka nyeliahka gaya utai ke ulih ngasuh kitai irau. Aram kitai beratika baka ni buah roh kudus deka nulung kitai ba siti-siti pekara.

8-12. Baka ni buah roh kudus Petara ulih nulung nuan?

8 “Pengerindu, pengaga, pemaik.” Enti nuan bebasaka orang bukai, nuan deka ngasaika diri kurang agi irau. Nama kebuah? Enti nuan mandangka pengerindu enggau basa ngagai bala menyadi Kristian, nuan ulih nyeliahka penanggul ke ngasuh nuan bisi asai ati ke enda manah baka ringat, berasai lebu, sereta irau. Tu deka ngasuh nuan senang agi ngetanka pemaik enggau orang bukai.—Rom. 12:10.

Enti kitai ngemansangka kualiti ti manah, kaul kitai enggau orang bukai deka manah agi

9 “Pengeliat ati, penyiru, pemadas.” Bup Kudus madahka: “Nelap enggau pangan diri, siru enggau pangan diri, ngampun pangan diri.” (Eps. 4:32) Enti kitai nitihka jaku ajar nya, kitai deka bisi kaul ti manah enggau orang bukai, lalu kitai ulih nyeliahka penanggul ke tau ngasuh kitai irau. Pia mega, kitai deka senang agi mutarka penanggul ke nyadi ketegal enda sempurna.

10 “Penetap ati [pengarap].” Kemaya hari tu, kitai suah irau pasal duit sereta pengaya. (J-lam. 18:11) Baka ni kitai ulih nyeliahka pengirau ke baka tu? Kitai enda tau enda nitihka jaku lalau rasul Paul ke ngasuh kitai “puas ati ke utai ti dikemisi.”  Pengarap ti kering ngagai Jehovah deka nulung kitai pechaya, Iya deka enggau pengerindu nyediaka utai ti diguna kitai. Iya udah besemaya: “Aku enggai sekali-kali ninggalka kita, tauka ngelengkaka kita.” Nya kebuah kitai ulih nyebut baka Paul: ‘Jehovah endang penyaup aku, nya alai aku enda takut. Nama utai ulih dikereja orang ngagai aku?’—Heb. 13:5, 6.

11 “Penelap, ulih nagang diri.” Uji perundingka baka ni kualiti tu ulih dikena sereta nulung nuan. Kualiti tu deka nagang nuan ari ngereja tauka nyebut utai ti ngasuh nuan irau, lalu nuan deka bulih penguntung ari nyeliahka “dengki, tebiat ngeransi, pengeringat, jaku laya, tebiat bejakuka orang.”—Eps. 4:31.

12 Nuan begunaka ati ti baruh ngambika ulih arapka ‘Petara ti bekuasa’ sereta ‘nyerahka semua pengirau’ nuan ngagai Iya. (1 Pet. 5:6, 7) Enti nuan baruh ati, Jehovah deka nyukung sereta ngibun nuan. Enti nuan nemu utai ke ulih sereta ke enda ulih digaga nuan, nuan enda bepanggai ba diri empu. Nuan deka kurang agi irau laban nuan deka bepanggai ba Petara.—Mik. 6:8.

‘ANANG IRAU’

13. Nama reti utai ku Jesus lebuh iya nyebut: ‘Anang irau’?

13 Ba Matthew 6:34 (bacha), kitai bisi jaku ajar Jesus ti badas: ‘Anang irau.’ Jaku ajar tu baka ke enda ulih dikena kitai. Tang nama reti utai ku Jesus? Kitai udah nemu, David enggau Paul kekadang berasai irau. Jesus ukai madahka orang ke nyembah Petara enda nemu irau. Tang, Jesus nulung bala murid iya meretika, pengirau ke enda patut tauka ketelalu enda ulih mutarka penanggul. Ninting hari deka bisi penanggul. Nya alai, orang Kristian enda patut nambahka pengirau enggau berunding pasal penanggul ke udah nyadi tauka ke deka nyadi. Baka ni jaku ajar Jesus ulih ngurangka pengirau ti balat?

14. Baka David, baka ni nuan ulih ngurangka pengirau?

14 Kekadang orang irau ketegal penyalah ke digaga sida suba. Sida berasai balat besalah pasal utai ke udah digaga sida, taja pan utai nya udah lama nyadi. Kekadang Raja David berasai tusah ke penyalah ti dikereja iya. Ku iya ngaku: “Ati aku  tusah, lalu aku bedemuh laban pedis.” (Mas. 38:3, 4, 8, 18) Taja pan berasai tusah, David ngereja utai ti badas. Iya arapka Jehovah deka kasih sereta ngampun iya. Lalu udah nya David berasai lantang ati laban nemu Petara udah ngampun iya.—Bacha Masmur 32:1-3, 5.

15. (a) Nama agi dipelajarka kitai ari David? (b) Nama ulih digaga nuan kena ngurangka pengirau? (Peda kutak “ Sekeda Chara Ke Ulih Dikena Ngurangka Pengirau.”)

15 Ba maya bukai, nuan engka irau pasal utai ke diatu. Ngambika chunto, lebuh David nulis Masmur 55, iya takut ke diri deka dibunuh. (Mas. 55:2-5) Taja pia, iya enda ngelakka pengirau ngerusakka pengandal iya ba Jehovah. David besampi ngagai Jehovah ngambika nulung iya mutarka penanggul. Tang iya mega nemu iya patut ngereja siti-siti utai kena mutarka penanggul iya. (2 Sam. 15:30-34) Nuan ulih belajar ari David. Ari ngelakka pengirau ngachau nuan, enggau naka ulih meh mutarka penanggul nya lalu pechaya Jehovah deka ngibun nuan.

16. Nama kebuah reti nama Petara ulih ngeringka pengarap nuan?

16 Kekadang orang Kristian engka irau pasal utai ke deka nyadi dudi hari ila. Tang nuan enda patut irau pasal utai ke bedau nyadi. Nama kebuah enda patut? Laban kesuah agi, utai ke nyadi enda balat ngenusahka baka ke dirunding kitai. Pia mega, anang enda ingat, Petara ulih mutarka semua penanggul. Indah reti nama Iya, “Iya Ngasuh Nyadi.” (P-sut. 3:14, NW) Nya alai kitai enda patut irau pasal jemah ila, laban nama Petara nunjukka semua semaya Iya ke mensia deka dikeamatka. Nuan tau arap, Petara deka merekatka nembiak Iya ke tetap ati sereta nulung sida ngurangka pengirau pasal menya, diatu, sereta jemah ila.

BERANDAU ENGGAU ORANG TI DIPECHAYAKA NUAN

17, 18. Baka ni randau ti manah ulih nulung nuan lebuh nuan berasai irau?

17 Chara keempat ke ulih nulung lebuh nuan berasai irau iya nya enda belalai sereta enda bula lebuh berandau enggau orang ke dipechayaka nuan. Kaling pengidup nuan, pangan rapat, tauka tuai gempuru ulih nulung nuan meretika penanggul enggau manah agi. Bup Kudus madahka: “Pengirau ati nuan ulih muai  pengelantang, tang jaku ti siru [manah] deka ngelantangka ati nuan.” (J-lam. 12:25) Bup Kudus mega madahka: “Enggau naka ulih giga semua jaku lalau, nya baru nuan deka mujur. Enti nuan nadai bulih jaku lalau, pengawa nuan deka puntan.”—J-lam. 15:22.

18 Pengawa begempuru kitai mega ulih nulung ngurangka pengirau. Lebuh begempuru ninting minggu, nuan ngena jam begulai enggau bala menyadi Kristian ke ibuhka nuan sereta deka meransang nuan. (Heb. 10:24, 25) Peransang ke baka nya deka ngeringka nuan sereta ngasuh nuan senang agi mutarka sebarang pengirau.—Rom. 1:12.

KAUL NUAN ENGGAU PETARA NYA UTAI TI PEMADU NGERINGKA NUAN

19. Nama kebuah nuan tau arapka kaul nuan enggau Jehovah deka ngeringka nuan?

19 Seiku tuai gempuru ba Kanada nemu kebuah nya beguna nyerahka pengirau diri ngagai Jehovah. Pengawa iya ke nyadi pengajar sereta pemeri jaku lalau ngagai pelajar balat nekan iya, lalu iya mega bisi penanggul ba pengerai ke ngasuh iya irau. Nama udah nulung iya tan natka nya? Iya bebendar ngeringka kaul iya enggau Jehovah. Pangan ti bendar mega mayuh nulung iya ba maya ti tusah, lalu iya enda belalai sereta enda bula lebuh madahka asai ati diri ngagai bini iya. Nambahka nya, bala tuai gempuru sereta tuai ti ngabas nulung iya beratika penanggul diri ari segi runding Jehovah. Pia mega, seiku lutur nulung menyadi Kristian tu nemu pasal gaya pengerai iya, lalu iya ulih ngaga ubah ba jadual, ngiga awak belelak sereta besenam. Nyau kelama, iya nemu chara mutarka penanggul sereta asai ati iya. Lebuh bisi sekeda pekara ke enda ulih diputarka iya, iya bepanggai ba Jehovah ngambika nulung iya.

20. (a) Baka ni kitai ulih nyerahka pengirau kitai ngagai Petara? (b) Nama deka dikerandauka kitai ba artikel pengudah tu?

20 Ba artikel tu, kitai udah belajarka kebuah nya beguna nyerahka pengirau kitai ngagai Petara nengah sampi, sereta macha enggau belamatika jaku Iya. Kitai mega belajarka kebuah nya beguna ngawakka roh kudus Jehovah nulung kitai, berandau enggau orang ti dipechayaka kitai, sereta enggau pengawa begempuru Kristian. Ba artikel pengudah tu, kitai deka berandauka baka ni Jehovah nulung kitai enggau meri kitai pengadang ke siti-siti upah.—Heb. 11:6.