Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 CHERITA PENGIDUP

Nyadi “Semua Macham Utai ke Semua Mensia”

Nyadi “Semua Macham Utai ke Semua Mensia”

“Aku deka ninggalka nuan, enti nuan dibaptisa!” Tu jaku emba apai aku ngagai indai aku ba taun 1941. Taja pan diemba, indai aku mutuska deka dibaptisa. Ketegal tu, apai aku ninggalka kami duai. Maya nya umur aku baru lapan taun.

SEBEDAU utai tu nyadi, aku endang udah rinduka pemendar. Indai aku udah nerima sekeda litaricha Bup Kudus, lalu aku rinduka semua litaricha nya. Kelebih agi aku rinduka gambar ke bisi dalam litaricha. Apai aku enggai indai aku berandau pasal utai ti dipelajarka iya enggau aku. Taja pia, aku deka nemu, lalu mayuh tanya. Nya alai indai belajar enggau aku lebuh apai nadai ba rumah. Asil iya, aku pan mutuska deka nyerahka pengidup diri ngagai Jehovah. Aku dibaptisa di Blackpool, England, ba taun 1943 lebuh aku beumur sepuluh taun.

AKU BERENGKAH GAWA KE JEHOVAH

Pengudah aku dibaptisa, aku enggau indai aku suah nginjil begulai. Maya nya, kami nginjil ngena peti rikut. Peti rikut nya besai sereta berat. Pemerat iya kira-kira empat kilo setengah (10 pound.) Uji gambarka aku, nembiak lelaki ke agi mit, nguji mai peti rikut nya!

 Lebuh beumur 14 taun, aku bisi pengeran deka nyadi pengerintis. Indai aku madahka, aku patut bejaku dulu enggau pengereja pengawa ke bala menyadi Kristian (diatu dikumbai tuai ti ngabas). Tuai ti ngabas nya ngasuh aku nguji ngulihka pengelandik ke ulih nyukung aku bejalaika pengawa nyadi pengerintis. Aku nitihka utai ku iya. Pengudah gawa dua taun, aku nanya seiku agi tuai ti ngabas pasal nyadi pengerintis. Ku iya madahka, “Gaga meh!”

Nya alai kena April 1949, aku enggau indai aku meri sekeda perengka dalam rumah ngagai orang, lalu sekeda agi dijual. Udah nya, kami duai pindah ngagai Middleton, semak Manchester, endur alai kami duai berengkah nyadi pengerintis. Pengudah empat bulan, aku enggau seiku menyadi Kristian lelaki besetuju deka begulai nyadi pengerintis. Pampang opis ngasuh kami duai pindah ngagai siti eklisia ke baru ditumbuhka ba Irlam. Indai aku nyadi pengerintis enggau seiku menyadi Kristian indu ba siti agi eklisia.

Aku semina beumur 17 taun, tang aku enggau kaling pengerintis aku betanggungjawap bejalaika pengawa begempuru, laban dia semina bisi beberapa iku menyadi Kristian lelaki ke ulih megai tanggung pengawa ba eklisia ke baru nya. Udah nya aku pindah ke Eklisia Buxton, laban dia bisi mimit aja bala penginjil sereta begunaka bantu. Peneleba nya nyediaka aku ba pengawa ke dudi hari ila.

Madah pasal cheramah enggau sida ke bukai di Rochester, New York, 1953

Ba taun 1951, aku ngisi pom kena tama Sekula Bup Kudus Gilead Menara Jaga. Udah nya, kena Disember 1952, aku dikangauka datai ngelapurka diri nyadi soldadu. Aku minta enda enggau nyadi soldadu laban aku gawa ke Jehovah aja. Tang kot enggai nerima peminta aku, lalu ngeletak ukum jil enam bulan ba aku. Lebuh ba rumah jil, aku nerima kangau ngagai kelas Gilead ke-22. Kena Julai 1953, enda lama pengudah aku dilepaska, aku ngena kapal ke dikumbai Georgic, lalu mupuk ke New York.

Sepenatai aku din, aku enggau Gempuru Besai New World Society kena taun 1953. Udah nya aku ngena kerita api ngagai Sekula  Gilead di Lansing Selatan, New York. Aku baru pansut ari rumah jil, nya alai aku nadai mayuh duit. Pengudah ngena kerita api, aku ngena bas ngagai Lansing Selatan, tang aku nyau nginjau 25 sen ari penumpang bukai kena mayar tambang bas.

PENGAWA BA MENUA BUKAI

Ba Sekula Gilead, kami nerima latih ti badas ke ulih nulung kami “nyadi semua macham utai ke semua mensia.” (1 Korint 9:22) Aku, Paul Bruun enggau Raymond Leach dianjung ke Filipina, tang kami patut nganti visa kami beberapa bulan. Udah nya kami ngena kapal mupuk ngagai Rotterdam, di Belanda. Kami meraka Tasik Mediterranean, Pemintas Suez enggau Laut India ngagai Malaysia, lalu udah nya ngagai Hong Kong. Pengudah 47 hari ba tasik, kami sangkai ba Manila kena 19 November 1954.

Aku enggau Raymond Leach ngena kapal ngagai Filipina pengelama 47 hari, endur alai kami duai deka bejalaika pengawa nyadi pengerintis seberai tasik

Dia, kami patut nelebaka diri enggau chara pengidup baru, menua baru sereta bansa jaku ti baru. Taja pia, terubah iya, kami tiga dianjung ngagai eklisia ba Quezon City ke alai mayuh orang nemu bejaku ngena jaku English. Nya alai pengudah enam bulan, kami semina nemu beberapa leka jaku dalam jaku Tagalog. Tang pengawa baru kami ke udah nya deka ngubah utai tu.

Bisi sekali, kena Mei 1955, lebuh kami udah pulai ke rumah ari pengawa nginjil, aku enggau Menyadi Leach nerima surat ke madahka kami dipilih nyadi tuai ti ngabas. Aku baru beumur 22 taun, tang ba pengawa tu aku deka belajarka chara baru “nyadi semua macham utai ke semua mensia.”

Meri cheramah ba siti gempuru besai ke ngena bansa jaku Bicol

Ngambika chunto, aku ngenataika cheramah aku ti keterubah maya nyadi tuai ti ngabas ba luar kedai siti kampung. Maya nya ba Filipina, cheramah diberi ba palan orang mayuh! Lebuh aku ngelawa eklisia ba pelilih ke patut diabas aku, aku meri cheramah ba langkau ke orang mayuh, ba makit, ba mua balai orang mayuh, ba padang basketbul, ba taman, lalu kesuah agi ba sukut jalai. Bisi sekali ba San Pablo City, aku enda ulih meri cheramah ba  makit laban ujan bangat. Nya alai aku madah ngagai bala menyadi Kristian lelaki, aku deka meri cheramah nya ba Palan Gempuru. Udah nya, bala menyadi Kristian lelaki nya nanya sekalika sida tau ngumbai cheramah nya siti cheramah ke diberi lebuh begempuru, laban nya ukai diberi ba palan orang mayuh!

Aku selalu diau ba rumah bala menyadi Kristian. Taja pan rumah sida nadai mayuh utai, tang beresi. Kesuah agi aku tinduk ngena tikai mipis ba atas lantai papan. Endur alai mandi semina ba luar rumah, lalu semua orang ulih meda aku mandi. Nya alai aku patut mandi enggau chara ti bebasa. Aku mindah ngena bas, lalu kekadang ngena perau ngagai pulau ke bukai. Betaun-taun pengelama aku gawa ke Jehovah, aku nadai kala ngembuan kerita.

Aku belajarka jaku Tagalog, taja pan aku enda kala enggau kelas belajarka jaku nya. Aku belajar ari mendingka bala menyadi Kristian ba pengawa nginjil sereta lebuh begempuru. Sida deka nulung aku belajar, lalu aku beterima kasih ngagai sida laban sabar sereta meri puji ari ati.

Nyau kelama, aku patut ngaga mayuh agi ubah ketegal pengawa ti baru. Ba taun 1956, lebuh Menyadi Nathan Knorr datai ngelawa, kami bisi gempuru besai menua. Aku diasuh bejaku enggau bala pemberita. Aku nadai peneleba ba pengawa tu, tang sida ke bukai nulung aku. Kurang ari setaun udah nya, kami bisi siti agi gempuru besai menua, lalu aku nyadi tuai ti ngemataka gempuru besai. Menyadi Frederick Franz ari indu opis datai ngelawa, lalu aku belajar mayuh utai ari iya. Lebuh iya ngenataika cheramah, iya ngena baju barong Tagalog, baju asal orang Filipina. Tu ngasuh  bala menyadi Kristian ke dia balat gaga ati, lalu tu ngajar aku ngambika sanggup nelebaka diri enggau orang ke dia.

Aku patut ngaga mayuh agi ubah lebuh nyadi tuai ti ngemataka pelilih menua. Maya nya, kami mandangka cherita The Happiness of the New World Society. Kami kesuah agi mandangka cherita nya ba endur orang mayuh, nya alai kekadang indu utai ngachau kami. Lampu ari projektor ngasuh indu utai nya datai, lalu sida lekat ba projektor nya. Udah nya mayuh pengawa meresi projektor nya! Endang enda senang ngatur pengawa tu, tang pengawa tu ngemuaska ati laban ulih meda orang datai sereta belajar pasal gerempung Jehovah ti entarabansa.

Bala paderi Katolik ba sekeda endur enda ngasuh bala perintah ngemendarka kami ngatur gempuru besai. Ngambika orang enda ulih ninga pencheramah bejaku, sida mega nekung luching gerija tiap kali kitai bisi meri cheramah semak gerija sida. Taja pan napi semua tu, orang majak belajarka pemendar, lalu mayuh ari sida ke ba endur nya diatu nyembah Jehovah.

PENGAWA TI BARU, MAYUH AGI UBAH

Ba taun 1959, aku dianjung gawa ba pampang opis. Aku belajarka mayuh utai lebuh gawa dia. Enda lama udah nya, aku diasuh ngelawa menua bukai nyadi tuai pelilih. Lebuh ngelawa siti ari menua nya, aku bekelala enggau Janet Dumond, seiku pengerintis seberai tasik di menua Thailand. Kami duai betulis surat ngagai pangan diri lalu enda lama udah nya, kami duai jadi enggau pangan diri. Pengelama 51 taun, kami duai lantang ati sama gawa ke Jehovah.

Enggau Janet ba sebuah ari pemayuh pulau ke bisi di menua Filipina

Aku berasai gaga udah ngelawa nembiak Jehovah ba 33 buah menua. Aku balat gaga ati laban pengawa ke dipejalaika aku suba nulung aku nemu chara begulai enggau orang ke ngembuan adat sereta gaya pengidup ti  bebida! Pengawa ngelawa tu nulung aku enggau terang nemu, Jehovah rinduka semua mensia.—Kereja Rasul 10:34, 35.

Kami duai balat gaga laban penyampau bala Saksi majak nambah

KAMI DUAI AGI NGAGA UBAH

Aku enggau Janet gaga ati gawa ke bala menyadi Kristian di menua Filipina, lalu kami duai agi gawa ba pampang opis di Quezon City. Diatu, dia bisi kira-kira 200,000 iku penginjil, enti dibanding enggau 20,000 iku penginjil lebuh aku berengkah gawa ke Jehovah ba endur nya kira-kira 60 taun ti udah. Indah pengudah timpuh nya, aku agi patut sedia ngaga ubah baka ke dikedekaka Jehovah. Ngambika chunto, ketegal ubah ke udah digaga ba gerempung baru-baru tu, kami duai patut deka ngaga mayuh agi ubah.

Kami duai nentuka diri ngereja pengawa nginjil enggau tetap

Kami duai udah enggau naka ulih nitihka iring ari Jehovah, lalu tu chara pengidup ti pemadu ngemuaska ati. Kami duai mega nguji ngaga sebarang ubah ke patut ngambika ulih gawa ke bala menyadi Kristian. Amat, seagi-agi Jehovah begunaka kami duai, kami duai keran deka nyadi “semua macham utai ke semua mensia.”

Kami duai agi gawa ba pampang opis di Quezon City