Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  April 2017

Nama Deka Nadai Agi Lebuh Perintah Petara Datai?

Nama Deka Nadai Agi Lebuh Perintah Petara Datai?

‘Dunya enggau pengingin iya deka lenyau, tang orang ke ngereja peneka Petara deka idup belama iya.’—1 JHN. 2:17.

LAGU: 134, 24

1, 2. (a) Baka ni dunya ti jai tu sebaka enggau seiku orang jai ti deka diukum bunuh? (Peda gambar ba pun artikel.) (b) Baka ni asai ati genap iku sida ke di serega enggau ke ba dunya pengudah dunya ti jai tu dirusak?

UJI gambarka. Seiku orang ke jai udah diletak ukum bunuh. Diatu iya benung dibai sida jejaga ngagai endur ke alai iya deka diukum bunuh. Taja pan orang ke jai nya agi idup sereta bepengerai, tang iya nyauka mati.

2 Dunya ti jai ke alai kitai diau sama baka orang jai ke deka diukum bunuh nya. Bup Kudus madahka: “Dunya . . . deka lenyau.” (1 Jhn. 2:17) Jehovah udah netapka dunya ti jai tu deka dirusak enda lama da agi, nya alai kitai tau pechaya dunya ti jai tu deka nadai agi. Tang bisi bida ti besai entara pengujung dunya ti jai tu enggau pengawa ngukum orang ke jai nya. Sekeda orang engka ngasaika, ukum ke diletak ngagai orang ke jai nya enda patut, lalu engka deka mantah, ngarapka orang ke jai nya enda diukum bunuh. Taja pia, Jehovah nya hakim ti sempurna, lalu pemutus Iya ke deka ngerusak dunya ti jai tu endang patut. (U-dat. 32:4) Pengawa ngerusak dunya ti jai tu enda betangguh. Pengudah dunya ti  jai tu dirusak, genap iku sida ke di serega enggau ke ba dunya deka setuju, ukum ari Jehovah nya patut. Deka bisi pengelantang ti besai!

3. Nama empat bengkah penusah ke deka nadai agi pengudah Perintah Petara datai?

3 “Dunya” ke “deka lenyau” nyengkaum nama? Iya nyengkaum utai jai ke bisi ba pengidup kemaya hari tu. Semua utai nya deka nadai agi. Kebendar, tu sebagi ari ‘Berita Manah pasal Perintah Petara.’ (Mat. 24:14) Ba artikel tu kitai deka berandauka empat bengkah penusah ke deka nadai agi lebuh Perintah Petara datai: orang ke jai, gerempung ti makai suap, pengawa ti salah, sereta gaya utai ti enda manah. Bekaul enggau tiap bengkah penusah tu, kitai deka belajar (1) baka ni penusah nya ngachau kitai diatu, (2) nama deka digaga Jehovah ngagai semua penusah nya, lalu (3) nama deka dikena Iya nganti penusah nya.

ORANG KE JAI

4. Baka ni orang ke jai ngachau kitai diatu?

4 Baka ni orang ke jai ngachau kitai diatu? Rasul Paul madahka, ba hari ti penudi “mayuh macham penusah deka nyadi.” Udah nya, ku iya agi: “Orang ke jai, enggau orang ke pura-pura ngapa, deka majak jai se-jai.” (2 Tim. 3:1-5, 13) Bisi nuan ngasaika tu? Mayuh ari kitai kala nyadi mansa orang ke jai baka orang ke beduan enggau kasar, balat begedika bansa bukai, sereta orang ke jai nadai penyinu. Sekeda ari sida enda ngelalai pengawa jai ti dikereja sida. Sekeda da agi pepura nulung orang, tang kebendar sida jai. Taja pan kitai enda nyadi mansa pengawa ti jai, tang kitai mega ngasaika penusah ke digaga orang jai. Kitai pedis ati lebuh ninga pasal penyai ti digaga sida ba anak mit, orang ke tuai sereta orang bukai ke enda ulih ngetanka diri. Orang ke jai tu nunjukka ulah baka jelu siga tauka bala antu. (Jas. 3:15) Tang kitai berasai lantang laban Jaku Jehovah meri kitai pengadang.

5. (a) Nama peluang ke agi dikemisi orang ke jai? (b) Nama deka nyadi ngagai orang ke enggai berubah?

5 Nama deka digaga Jehovah? Diatu Jehovah meri orang ke jai peluang berubah. (Isa. 55:7) Taja pan dunya ti jai tu enda lama da agi deka dirusak, sida bedau agi diakim. Tang nama deka nyadi ngagai orang ke enggai berubah sereta ke nyukung dunya ti jai tu nyentuk ngagai maya penusah ti besai? Jehovah udah besemaya deka muai semua orang ke jai ari dunya tu. (Bacha Masmur 37:10.) Kemaya hari tu, mayuh orang ngelalaika pengawa jai ti dikereja sida, lalu kesuah agi sida enda diukum. (Jop 21:7, 9) Tang Bup Kudus ngingatka kitai: ‘Petara nengkilaka semua ulah kitai, lalu meda semua singkang kitai. Nadai pemetang ulih ngelalaika orang ke bedosa ari Petara.’ (Jop 34:21, 22) Nya alai, nadai utai ulih dipelalaika ari Jehovah. Iya ulih meda semua utai ti dikereja orang ke jai. Pengudah Armagedon, kitai engka deka ngiga sida, tang nadai tetemuka sida. Sida deka nadai agi belama iya!—Mas. 37:12-15.

6. Sapa deka meruan bisi lebuh orang ke jai nadai agi, lalu nama kebuah nya berita ti manah?

6 Sapa deka meruan bisi lebuh orang ke jai nadai agi? Jehovah besemaya: “Orang ke baruh ati deka bempu menua tu lalu diau lantang [‘penuh  enggau pemaik,’ NW].” Udah nya, ba masmur ti sama kitai macha: “Orang ke lurus deka bempu menua tu lalu diau ditu belama iya.” (Mas. 37:11, 29) Sapa “orang ke baruh ati” sereta “orang ke lurus”? Orang ke baruh ati nya orang ke belajar ari Jehovah sereta ngasika Iya. Orang ke lurus nya orang ke rindu ngereja utai ti dikumbai Petara ngena. Ba dunya kemaya hari tu, bisi mayuh agi orang ke jai ari orang ke lurus. Tang ba dunya baru, semina bisi orang ke baruh ati enggau orang ke lurus, lalu sida deka ngaga dunya nyadi paradais!

GEREMPUNG TI MAKAI SUAP

7. Baka ni gerempung ti makai suap ngachau kitai kemaya hari tu?

7 Baka ni gerempung ti makai suap ngachau kitai diatu? Mayuh ari penyai ke bisi ba dunya kemaya hari tu ukai datai ari seiku-seiku orang, tang datai ari gerempung. Gerempung pengarap nipu bejuta iku orang. Ngambika chunto, sida bebula pasal sapa Petara, sida madahka Bup Kudus enda tau dikearapka, lalu sida nipu orang pasal pengadang dunya sereta mensia ke jemah ila. Perintah ti makai suap nyukung perang sereta penyai ke bekaul enggau bansa sereta nekan orang ke merinsa sereta orang ke nadai daya. Perintah nya majak kaya sereta bekuasa enggau nunjukka ulah ti bepilih mata tauka nerima suap. Kompeni ti amu ngamahka menua, ngerusak asil bumi, sereta ngambi ulih ari orang ngambika sekeda kompeni nya ulih nyadi kaya. Amat, gerempung ti makai suap ke ngasuh mayuh pemerinsa nyadi ba dunya kemaya hari tu.

8. Nitihka Bup Kudus, nama deka nyadi ngagai gerempung ti baka ke kering ba mayuh orang kemaya hari tu?

8 Nama deka digaga Jehovah? Penusah ti besai deka berengkah lebuh kuasa politik nyerang semua gerempung pengarap pelesu, ke disema Bup Kudus indu sundal ke benama Babilon ti Besai. (Pem. 17:1, 2, 16; 18:1-4) Semua gerempung pengarap nya deka abis lus. Tang nama deka nyadi ngagai semua gerempung bukai ke makai suap? Bup Kudus mandingka sida baka bukit enggau pulau laban sida baka ke kering sereta tegap. (Bacha Pemandang 6:14.) Tang Bup Kudus madahka, perintah enggau semua gerempung bukai ke enda nyukung Perintah Petara deka dirusak. Tu deka nyadi begian ti penudi ari penusah ti besai. (Jer. 25:31-33) Udah nya, gerempung ke makai suap deka nadai agi!

9. Nama kebuah kitai pechaya dunya ti baru deka diatur enggau manah?

9 Nama deka nganti gerempung ti makai suap? Pengudah Armagedon, kati bisi gerempung bukai ba dunya? Bup Kudus madahka: ‘Nitihka semaya Petara, kitai nganti langit ti baru enggau dunya ti baru, endur alai pengelurus diau.’ (2 Pet. 3:13) Langit enggau dunya ti lama nya perintah ti makai suap sereta orang ke enda lurus ti dipegai sida. Pengudah sida nadai agi, nama deka nganti sida? “Langit ti baru enggau dunya ti baru.” Langit baru nya perintah ti baru, Perintah Petara ke dipegai Jesus Kristus enggau 144,000 iku orang ke sama enggau iya merintah. Dunya baru nya orang ke di baruh Perintah Petara. Jesus enggau sida ke sama enggau iya merintah deka enggau pengabis manah neladan  Petara Jehovah, Petara ti teratur. (1 Kor. 14:33) Nya alai, “dunya ti baru” deka teratur. Dia deka bisi bala lelaki ke manah ke ngatur semua pekara. (Mas. 45:16) Sida deka diiring Jesus enggau 144,000 iku orang ke sama enggau iya merintah. Maya nya ila semua gerempung ti makai suap deka diganti enggau siti aja gerempung, gerempung ti beserakup sereta ke enda ulih diberi suap!

PENGAWA TI SALAH

10. Nama bansa pengawa salah ti suah nyadi ba endur alai nuan diau, lalu baka ni tu bekaul enggau nuan sereta diri sebilik?

10 Baka ni pengawa ti salah ngachau kitai diatu? Kitai idup ba dunya ke alai ulah ti kamah, pengawa ti enda lurus, enggau pemangah ti balat suah nyadi. Pemerindang ba dunya ngasuh pengawa jai tu ngerinduka ati seraya ngeleseka standard Jehovah pasal utai ti betul tauka salah. (Isa. 5:20) Apai indai kelebih agi patut bebendar nyaga bala anak sida ari pengawa ti jai nya. Amat, semua orang Kristian ke bendar patut bebendar nyaga kaul sida enggau Jehovah ba dunya ke enda masa standard Iya.

11. Nama dipelajarka kitai ari ukum ke dikenataika Jehovah ngagai Sodom enggau Gomorah?

11 Nama deka digaga Jehovah bekaul enggau pengawa ti salah? Uji pikirka utai ti digaga Jehovah ngagai utai jai ke nyadi ba nengeri Sodom enggau Gomorah. (Bacha 2 Peter 2:6-8.) Lot nya orang ke lurus, lalu iya enggau diri sebilik balat merinsa ketegal semua utai jai ke dikereja orang ti ngelingi sida. Jehovah ngerusak semua nengeri nya kena ngujungka utai jai ke nyadi dia. Tang Iya mega ngena tu nyadika tangkan ngagai orang ke jai kemaya hari tu. Sama baka Jehovah ke muai semua pengawa ti kamah menya, Iya mega deka muai pengawa ti kamah kemaya hari tu lebuh Iya ngerusak dunya ti jai tu.

12. Nama sekeda pengawa ke deka dikereja nuan pengudah dunya ti jai tu nadai agi?

12 Nama deka nganti pengawa ti salah? Ba dunya baru, kitai deka kisuk enggau mayuh pengawa ti ngelantangka ati. Ngambika chunto, kitai deka ngaga dunya nyadi paradais sereta nirika rumah ke diri empu sereta ke bala orang ti dikesayauka kitai. Kitai mega deka ngelaluka bejuta iku orang ke diangkatka idup baru, lalu ngajar sida pasal Jehovah sereta pasal semua utai ti udah dikereja Iya ke mensia. (Isa. 65:21, 22; SKR. 24:15) Maya nya, kitai deka kisuk enggau pengawa ke ngasuh kitai lantang sereta ngenataika puji ngagai Jehovah!

GAYA UTAI TI ENDA MANAH

13. Nama nyadi ketegal pengawa ngelaban ba Kebun Eden?

13 Baka ni gaya utai ke enda manah ngachau kitai diatu? Dunya ti penuh enggau orang ke jai, gerempung ti makai suap, sereta pengawa ti salah udah ngasuh pengidup tusah. Semua kitai merinsa ketegal perang, penyuntuk, ulah ti begedika bansa bukai, penyakit, sereta pemati. Gaya utai ke enda manah tu berengkah ketegal Sitan, Adam, enggau Hawa angkat ngelaban Jehovah. Lalu semua kitai merinsa ketegal pengawa sida ke ngelaban.

14. Nama deka digaga Jehovah bekaul enggau gaya utai ti enda manah?

14 Nama deka digaga Jehovah bekaul enggau gaya utai ti enda manah?  Peratika sekeda chunto. Jehovah besemaya deka ngujungka semua perang. (Bacha Masmur 46:8, 9.) Iya deka muai penyakit. (Isa. 33:24) Iya deka ngerusak pemati belama iya. (Isa. 25:8) Iya deka muai penyuntuk. (Mas. 72:12-16) Lalu Jehovah deka muai semua utai ti enda manah ke ngasuh pengidup merinsa kemaya hari tu. Iya indah deka muai runding ti jai ke datai ari Sitan enggau bala antu iya!—Eps. 2:2.

Uji gambarka dunya ti nadai perang, penyakit tauka pemati! (Peda genteran 15)

15. Nama sekeda utai ke deka nadai agi belama iya pengudah Armagedon?

15 Uji gambarka baka ni gaya pengidup ba dunya baru ke nadai perang, penyakit tauka pemati! Dia nadai agi soldadu, senyata, tauka tugu pengingat orang ti mati beperang. Kitai enda agi begunaka sepital, bala lutur, bala misi, rumah bangkai, tauka kubur. Dia nadai penyai, nya alai kitai enda agi begunaka polis, alarm sekuriti, tauka indah kerepau tauka kunchi! Semua gaya utai ti enda manah tu ke ngasuh kitai balat irau deka nadai agi belama iya.

16, 17. (a) Baka ni asai ati orang ke selamat ari Armagedon? Gambarka. (b) Baka ni kitai nemu diri deka selamat pengudah dunya ti jai tu nadai agi?

16 Baka ni gaya pengidup pengudah utai ti enda manah nya nadai agi? Tu enda senang digambarka. Kitai udah lama napi gaya utai ti enda manah, lalu kitai enda sedar utai nya udah balat ngasuh kitai merinsa. Ngambika chunto, orang ke diau semak stesen kerita api ke kisuk enda agi ngasaika endur nya inggar. Lalu orang ke diau semak palan muai sampah enda agi ngasaika endur nya bau. Tang lebuh Jehovah muai semua gaya utai ti enda manah nya, tu amat ngelantangka ati!

17 Nama deka nganti semua pengirau ke diasaika kitai diatu? Masmur 37:11, madahka: “Orang ke baruh ati deka . . . diau lantang [‘penuh enggau pemaik,’ NW].” Endang ngelantangka ati nemu tu utai ti dikedekaka Jehovah ba kitai! Ba maya ti tusah tu, enggau naka ulih meh mengkang semak ngagai Jehovah sereta gerempung Iya. Pengadang nuan ke jemah ila endang berega, nya alai berundingka enggau dalam pasal pengadang nya, tentuka pengadang nya amat ba nuan, lalu kunsi pengadang nya enggau orang bukai. (1 Tim. 4:15, 16; 1 Pet. 3:15) Enggau chara nya nuan ulih nemu, lebuh dunya ti jai tu nadai agi, nuan deka meruan idup sereta lantang ati belama iya!