Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Nyebut Utai ti Bendar

Nyebut Utai ti Bendar

“Sebut utai ti bendar ngagai pangan diri.”—SEK. 8:16.

LAGU: 56, 124

1, 2. Nama utai ti dikena Sitan ke balat ngemediska mensia?

SEKEDA utai ti digaga mensia baka telefon, mintul lampu segala, kerita, enggau peti ais, udah ngenyamaika pengidup mensia. Utai bukai ke digaga baka senyata, bum peti, insap segerit, enggau bum atomik, udah ngenusahka pengidup mensia. Tang ari semua utai nya bisi siti utai ke udah lama digaga lalu iya balat ngemediska mensia. Nama utai nya? Bula! Iya nya sengaja nyebut utai ti enda amat kena nipu orang. Sapa nyebut pemula ti keterubah? Sitan! Jesus Kristus ngumbai iya “apai pemula.” (Bacha John 8:44.) Ni maya Sitan nyebut pemula ti keterubah?

2 Iya nyebut nya beribu-ribu taun menya lebuh ba Kebun Eden. Adam seduai Hawa gaga ati enggau pengidup ti nyamai ba Paradais ke udah digaga Jehovah. Petara madahka seduai iya deka mati enti makai ‘buah ari kayu penemu ti tau ngasuh nemu semua utai.’ Taja pan Sitan nemu pasal utai tu, iya ngena seiku ular madah ngagai Hawa: “Enda seduai mati.” Nya meh jaku bula ti keterubah. Sitan mega madahka: ‘Petara nemu, lebuh seduai makai buah nya, seduai deka  nyadi sebaka enggau Petara, nemu ngelala bida entara utai ti manah enggau utai ti jai.’—P-kal. 2:15-17; 3:1-5.

3. Nama kebuah pemula Sitan nya balat jai, lalu nama nyadi ketegal pemula nya?

3 Sitan bisi runding ti balat jai lebuh iya bula ke Hawa. Iya nemu Hawa deka mati enti Hawa arapka jaku iya lalu makai buah nya. Nya meh utai ke nyadi. Pengudah Hawa, Adam mega enda ngasika pesan Jehovah lalu iya pan mati. (P-kal. 3:6; 5:5) Ketegal dosa Adam, “pemati ngelekai ngagai semua mensia.” Lalu, ‘pemati udah merintah . . . , nyengkaum orang ke bempu dosa ti enda sebaka enggau penyalah Adam.’ (Rom. 5:12, 14) Nya kebuah kitai enda sempurna lalu enda ulih idup belama iya baka ti dikedekaka Petara. Kitai semina ulih idup ‘70 taun aja, lapan puluh taun, enti kitai regas,’ lalu pengidup kitai penuh “pemerinsa enggau ati ti tusah.” (Mas. 90:10) Semua utai tu nyadi ketegal pemula ti disebut Sitan!

4. (a) Nama sekeda tanya ke patut disaut kitai? (b) Nitihka Masmur 15:1, 2, semina sapa ke ulih nyadi pangan Jehovah?

4 Ku Jesus nyebut pasal Sitan: “Iya endang nadai kaul enggau pemendar, laban iya nadai pemendar dalam iya.” Sitan enda berubah. Iya agi “nipu semua dunya” ngena pemula iya. (Pem. 12:9) Tang kitai enggai nejuka Sitan nesatka kitai. Nya alai kitai patut nemu saut ngagai tiga iti tanya tu. Baka ni Sitan nesatka orang kemayaharitu? Nama kebuah orang bula? Lalu ngambika enda lenyau kaul enggau Jehovah baka Adam seduai Hawa, baka ni kitai nunjukka diri seruran nyebut utai ti bendar?—Bacha Masmur 15:1, 2.

BAKA NI SITAN NESATKA MENSIA

5. Baka ni Sitan nesatka orang kemayaharitu?

5 Kitai ulih nyeliah ari ditipu Sitan. Rasul Paul madahka: “Kitai ukai enda nemu pelan iya.” (2 Kor. 2:11) Kitai nemu serata dunya di baruh kuasa Sitan. Tu nyengkaum jalai pengarap pelesu, bala pemerintah ti enda lurus, enggau pengawa dagang ti amu. (1 Jhn. 5:19) Nya alai kitai enda tekenyit enti Sitan enggau bala antu ngena orang ke bekuasa nyebut utai ti “bula.” (1 Tim. 4:1, 2) Ambika chunto, sekeda orang ke bedagang nyebut utai ti bula ba iklan sida kena ngelakuka barang ti ulih ngemedis tauka nipu sereta makai duit orang.

6, 7. (a) Nama kebuah pemula ke disebut bala tuai pengarap balat agi ngenusahka? (b) Nama pemula ari bala tuai pengarap ke kala didinga nuan?

6 Pemula ke disebut bala tuai pengarap balat agi ngenusahka. Nama kebuah? Laban enti orang arapka ajar sida ti bula lalu ngereja utai ti dipegedi Petara, nya tau ngujungka orang lenyau peluang idup belama iya. (Hos. 4:9) Jesus nemu bala tuai pengarap maya jeman iya nipu orang. Nya kebuah Jesus berani madah ngagai sida: “Tulah meh kita pengajar Adat enggau kita orang Parisi! Kita tu orang ke pura-pura ngapa! Laban kita belayar meraka tasik, lalu ngelangkah mayuh bengkah menua, nguji mai siku orang ngagai agama kita, lalu kita ngaga orang nya nyadi peranak [“Gehenna,” NW],” iya nya pengerusak belama iya. (Mat. 23:15; nota kaki) Jesus madahka bala tuai pengarap ti pelesu nya baka apai sida, Sitan, ke “pemunuh.”—Jhn. 8:44.

 7 Kemayaharitu mega bisi mayuh tuai pengarap. Sida engka dikumbai tuai sembiang, paderi, pengajar adat, sami, tauka gelar ke bukai. Baka orang Parisi, sida nadai ngajar utai ti bendar ari Jaku Petara tang udah ‘nyilih pemendar pasal Petara enggau pemula.’ (Rom. 1:18, 25) Sekeda ari pemula sida nya pasal api neraka, mensia bisi semengat ke enda nemu mati, orang ke udah mati deka ada baru nyadi mensia tauka jelu, lalu sida mega bebula madahka Petara nerima chara idup homoseksual sereta kawin sama penempa.

8. Nama pemula ke deka dipadahka bala tuai politik enda lama agi, lalu baka ni kitai patut nerima nya?

8 Raban politik mega ngena pemula nipu orang. Siti pemula ti pemadu besai ke deka dipadah sida enda lama agi iya nya sida udah mai ‘pemaik sereta pengelikun’ ngagai dunya. Tang “pengerusak deka ngenyit ninggang sida.” Nya alai kitai enda patut arapka raban politik ke madahka gaya utai ba dunya majak manah. Tang kitai “nemu, Hari Tuhan deka datai baka penchuri ke datai lebuh malam hari.”—1 Tes. 5:1-4.

NAMA KEBUAH ORANG BULA

9, 10. (a) Nama kebuah orang bula, lalu nama nyadi ketegal bula? (b) Nama patut dikingatka kitai pasal Jehovah?

9 Kemayaharitu, ukai semina orang ke bekuasa aja bula. Artikel “Nama Kebuah Kitai Bula,” ke ditulis Y. Bhattacharjee, madahka: “Nyebut utai ti bula nya ulah ti tusah deka dibuai.” Reti nya, orang ngumbai bula nya utai ti suah digaga. Selalu iya orang bula ketegal deka ngelindung diri empu, ngelalaika penyalah tauka penyai ke udah digaga sida. Sida mega bula ketegal deka ngulihka duit tauka ke penguntung diri empu. Artikel nya mega madahka, sekeda orang nadai penanggul ngemulaka “orang ke enda dikelala, orang ke sama enggau kereja, bala pangan, sereta orang ti dikesayau.”

Lebuh orang bula, sida ulih nipu orang bukai tang sida enda ulih nipu Jehovah

10 Nama nyadi ketegal semua pemula nya? Orang enda agi arapka pangan diri, lalu kaul sida rusak. Ambika chunto, uji gambarka penusah ati seiku laki tauka bini ke tetap ati lebuh nemu pasal kaling pengidup iya bisi ambai lalai lalu bula ngambika pengawa iya enda ditemu. Tauka uji gambarka ulah seiku laki ke jai enggau anak bini ba rumah. Iya kasar jaku tauka nyamah anak bini. Orang ke baka nya ulih nipu orang bukai, tang kitai patut ingat, sida enda ulih nipu Jehovah. Bup Kudus madahka “semua deka dikebak lalu diayanka magang di mua Iya.”—Heb. 4:13.

11. Nama ulih dipelajarka kitai ari pengawa jai ke dikereja Ananias enggau bini iya Sapira? (Peda gambar ba pun artikel.)

11 Ba Bup Kudus bisi siti chunto pasal Sitan ke ngasuh sepasang laki bini ke Kristian bulaka Petara. Ananias enggau bini iya Sapira nguji nipu bala rasul. Seduai iya nyual sekeda reta lalu meri sekeda duit nya ngagai bala rasul. Ananias  enggau bini iya Sapira deka dipuji orang ba eklisia, nya alai seduai iya madahka diri udah meri semua duit ngagai bala rasul. Tang Jehovah nemu seduai iya bula, nya alai Iya ngukum seduai iya.—SKR. 5:1-10.

12. Nama deka nyadi ngagai orang ke nyebut jaku bula ti bisi tuju deka ngemediska orang bukai sereta enggai nesal ati, lalu nama kebuah?

12 Baka ni asai ati Jehovah pasal orang ke bula? Sekeda orang engka bula laban sida bisi tuju deka ngemediska orang bukai. Enti sida enggai nesal ati, sida deka dibuai ngagai “danau api,” sama baka Sitan. Reti nya, sida deka dirusak belama iya. (Pem. 20:10; 21:8; Mas. 5:6) Nama kebuah? Laban ba Jehovah, semua orang ke bula nya sebaka enggau “orang ke ngereja penyai.”—Pem. 22:15, nota kaki.

13. Nama ditemu kitai pasal Jehovah, lalu tu meransang kitai ngereja nama?

13 Kitai nemu Jehovah “ukai baka mensia ti bula” lalu ‘Iya nunjukka Diri enda bula.’ (P-pau. 23:19; Heb. 6:18) ‘Utai ti dipegedika Jehovah . . . dilah ti bula.’ (J-lam. 6:16, 17) Enti kitai deka ngenyamaika ati Iya, kitai enda tau enda nyebut utai ti bendar. Nya alai “anang bulaka pangan diri.”—Kol. 3:9.

KITAI ‘NYEBUT UTAI TI BENDAR’

14. (a) Nama ngasuh orang Kristian ti bendar bebida ari orang ke enggau jalai pengarap ti pelesu? (b) Terangka prinsip ba Luke 6:45.

14 Ba pekara ni orang Kristian ti bendar bebida ari orang ke enggau jalai pengarap ti pelesu? Kitai ‘nyebut utai ti bendar.’ (Bacha Sekariah 8:16, 17.) Paul madahka: ‘Kami udah ngayanka diri amat ulun Petara, . . . madahka utai ti  amat.’ (2 Kor. 6:4, 7) Lalu Jesus madahka orang nyebut “utai ti ngemenuhka ati” sida. (Luk. 6:45) Reti nya orang ke lurus deka nyebut utai ti bendar. Iya enda ngemulaka orang ke enda dikelala, orang ke sama enggau kereja, bala pangan, sereta orang ti dikesayau. Aram kitai berandauka sekeda chunto ke nunjukka kitai enggai bula tauka nipu ba semua pekara.

Bisi nuan beratika utai ke enda betul ba pengidup menyadi Kristian indu tu? (Peda genteran 15, 16)

15. (a) Nama kebuah nya enda manah ngembuan pengidup ti pura-pura? (b) Nama ulih nulung orang ke nembiak nulak ari ditekan bala ke serambau? (Peda nota kaki.)

15 Enti nuan nya orang ke nembiak, nuan engka deka diterima orang ke serambau enggau nuan. Tang ketegal deka diterima, sekeda orang ke nembiak ngembuan pengidup ke pura-pura. Sida pura-pura bisi ulah ti beresi lebuh enggau diri sebilik sereta bala menyadi Kristian. Tang sida nyadi orang bukai lebuh ba media sosial tauka lebuh enggau orang ke enda nyembah Jehovah. Sida ngena jaku ti kasar, ngena gari ti enda menuku, ningaka lagu ke ngundan leka lagu ti kamah, mabuk, makai dadah, besulu belalai, tauka ngereja pengawa jai ti bukai. Sida ngemulaka apai indai, bala menyadi Kristian, sereta Jehovah. (Mas. 26:4, 5) Tang Jehovah nemu ni maya kitai bebasaka Iya sereta ni maya kitai ngereja utai ti dipegedika Iya. (Mrk. 7:6) Nya alai endang manah nitihka lalau ba jaku dalam: ‘Anang ngining orang ke bedosa, tang awakka nuan seruran nangika Jehovah.’—J-lam. 23:17. * (Peda nota kaki.)

16. Saut ke baka ni patut diberi kitai lebuh nyaut tanya ba pom ke dikena minta gawa penuh jam ke Jehovah?

16 Enti nuan deka nyadi pengerintis biasa tauka berengkah gawa nyadi pekereja spesial penuh jam baka ba Betel, nuan patut ngisi pom. Nuan enda tau bula lebuh nyaut tanya bekaul enggau pengerai, pemerindang ke dipilih sereta ulah nuan. (Heb. 13:18) Tang baka ni enti nuan udah ngereja utai ti dipegedika Jehovah tauka utai ti ngachau pengasai ati nuan lalu nuan empai berandauka utai nya enggau tuai gempuru? Minta sida nulung nuan ngambika nuan ulih gawa ke Jehovah enggau ati ti beresi.—Rom. 9:1; Gal. 6:1.

17. Nama patut digaga lebuh orang ke merinsaka kitai nanya pasal bala menyadi Kristian kitai?

17 Nama patut digaga nuan enti pengawa kitai ditagang lalu piak ti bekuasa nangkap sereta nanya nuan pasal bala menyadi Kristian kitai? Patut nuan madahka semua utai ti ditemu nuan?  Nama digaga Jesus lebuh seiku gabenor Rome nanya iya? Jesus nitihka prinsip Bup Kudus, “maya enda bemunyi enggau maya bejaku,” lalu bisi maya nya iya enda nyaut! (P-jar. 3:1, 7; Mat. 27:11-14) Enti kitai napi utai ti sama, kitai patut pintar sereta bejimat ngambika bala menyadi Kristian kitai enda kena penusah.—J-lam. 10:19; 11:12.

Baka ni nuan nemu ni maya enda patut bejaku sereta ni maya patut nyebut utai ti bendar? (Peda genteran 17, 18)

18. Nama tanggungjawap kitai enti tuai gempuru nanya pasal bala menyadi Kristian kitai?

18 Baka ni enti bisi orang ba eklisia ngereja dosa ti besai lalu nuan nemu pasal utai nya? Bala tuai gempuru betanggungjawap nentuka eklisia mengkang tuchi ari segi ulah, nya alai sida engka nanya nuan pasal utai nya. Nama deka digaga nuan, kelebih agi enti orang nya pangan rapat tauka diri sebilik? Bup Kudus madahka: “Lebuh nuan madahka utai ti amat, nuan ngereja pengelurus.” (J-lam. 12:17; 21:28) Nya alai nuan bisi tanggungjawap madahka utai ti amat, enda ngelalaika nama-nama utai. Bala tuai gempuru patut nemu utai ke amat ngambika sida ulih nulung orang ke ngereja penyalah nya ngaduka kaul iya enggau Jehovah.—Jas. 5:14, 15.

19. Nama deka dikerandauka kitai ba artikel pengudah tu?

19 David besampi ngagai Jehovah: “Nuan begunaka pemendar enggau ati ti lurus.” (Mas. 51:6) David nemu, utai ti beguna bendar nya utai ke bisi ba ati kitai. Orang Kristian ti bendar patut seruran ‘nyebut utai ti bendar ngagai pangan diri.’ Chara bukai kena nunjukka kitai bebida ari orang ke enggau jalai pengarap ti pelesu nya kitai ngajar utai ti bendar ari Bup Kudus. Ba artikel pengudah tu, kitai deka berandauka baka ni kitai ngajar utai ti bendar ba pengawa nginjil.

^ per. 15 Peda pelajar 6, “Baka Ni Aku Ulih Nyeliahka Diri Ari Ditekan Bala Serambau?,” ba brosur Saut Ngagai 10 Tanya Ari Bala Nembiak enggau pasal 16, “Bermuka Dua—Haruskah Aku Mengaku?,” ba bup Pertanyaan Kaum Muda—Jawaban yang Praktis, Jilid 2, dalam jaku Indonesia.