Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Ngajar Utai ti Bendar

Ngajar Utai ti Bendar

‘Semua jaku Nuan endang amat magang.’—MAS. 119:160.

LAGU: 29, 53

1, 2. (a) Nama kereja ti pemadu beguna ba pengidup Jesus, lalu nama kebuah? (b) Nama patut digaga kitai ngambika mujur ‘sama bekereja enggau Petara’?

JESUS KRISTUS nyadi tukang kayu lalu udah nya iya nyadi pengajar. (Mrk. 6:3; Jhn. 13:13) Iya bela landik ngereja kedua-dua pengawa nya. Lebuh nyadi tukang kayu, iya belajarka chara ngena perengka tukang ngasilka barang ari kayu. Lebuh nyadi pengajar, iya ngena penemu ti dalam ari Bup Kudus nulung orang mayuh meretika pemendar ari Jaku Petara. (Mat. 7:28; Luk. 24:32, 45) Lebuh Jesus beumur 30 taun, iya badu nyadi tukang kayu lalu nyadi pengajar laban iya nemu tu meh kereja ti pemadu beguna ke patut digaga iya. Iya madahka, nusui berita manah pasal Perintah Petara nya meh tuju iya dianjung Petara ke dunya. (Mat. 20:28; Luk. 3:23; 4:43) Jesus beberatka pengawa nusui berita manah ba pengidup, lalu iya mega deka orang bukai baka nya.—Mat. 9:35-38.

2 Mayuh ari kitai ukai tukang kayu, tang semua kitai nyadi pengajar ke ngajar orang pasal berita manah. Nya alai Petara Empu bisi enggau ba pengawa ti besai tu. Indah kitai dikumbai ‘sama bekereja enggau Petara.’ (1 Kor. 3:9;  2 Kor. 6:4) Kitai setuju enggau pemasmur ke madah: ‘Semua jaku Nuan endang amat magang.’ (Mas. 119:160) Nya kebuah kitai deka nentuka diri “ngajar pesan ti bendar ngena jalai ti betul” lebuh bejalaika pengawa nginjil. (Bacha 2 Timoti 2:15.) Nya alai kitai deka landik agi ngena Bup Kudus, laban nya perengka ke suah dikena kitai ngajar orang pasal Jehovah, Jesus, enggau Perintah Petara. Ngambika ulih mujur, gerempung Jehovah udah nyediaka perengka bukai, lalu kitai patut nemu chara ngena sida. Semua perengka tu bisi ba Perengka Ngajar.

3. Nama utai ti patut dikemeratka ba pengawa nginjil, lalu baka ni Kereja Rasul 13:48 nulung kitai ngereja iya?

3 Nuan engka berunding nama kebuah kitai ngumbai iya Perengka Ngajar, ukai Perengka Nginjil. Nya ketegal “nusui” mai reti “madahka” pesan, tang “ngajar” mai reti nerangka pesan ngambika orang meretika utai ti didinga iya lalu udah nya diperansang ngereja utai ti dipelajar iya. Semina mimit aja jam ke agi tinggal sebedau dunya ti jai tu dipunaska. Nya alai utai ti patut dikemeratka kitai iya nya ngepunka pengawa belajar Bup Kudus enggau orang lalu ngajar sida pemendar ari Bup Kudus ngambika sida ulih nyadi murid Kristus. Reti nya kitai patut ransing agi ngiga semua orang ke “bisi pengingin deka bulih pengidup ti meruan belama iya” lalu nulung sida berengkah nyembah Jehovah.—Bacha Kereja Rasul 13:44-48. *

4. Baka ni chara kitai ulih ngiga orang ke “bisi pengingin deka bulih pengidup ti meruan belama iya”?

4 Baka ni chara kitai ulih ngiga orang ke “bisi pengingin deka bulih pengidup ti meruan belama iya”? Ba abad keterubah, orang Kristian ngiga orang ngena chara nginjil. Jesus ngasuh bala murid iya: “Lebuh kita datai ba nengeri tauka genturung pendiau, giga orang ke deka nerima kita.” (Mat. 10:11) Sama mega enggau kitai kemayaharitu. Tang, enti orang enggai nerima, sumbung, tauka enda tentu ibuhka Petara, kitai enda ngarapka sida ninga berita manah. Kitai ngiga orang ke deka nerima, baruh ati, sereta keran deka nemu pasal pemendar. Kitai ulih mandingka pengawa ngiga sida enggau utai ti digaga Jesus lebuh iya nyadi tukang kayu. Sebedau ngaga kereban rumah, pintu, tangkun, sereta utai bukai, iya ngiga kayu ti ngena dulu. Udah nya iya ngambi perengka tukang, ngena pengelandik iya, lalu ngaga utai ari kayu. Pia mega kemayaharitu, utai ti dulu digaga kitai nya ngiga orang ke deka nerima, lalu udah nya ngena perengka sereta pengelandik kitai nulung sida nyadi murid.—Mat. 28:19, 20.

5. Nama patut ditemu kitai pasal semua perengka ba Perengka Ngajar? Terangka. (Peda gambar ba pun artikel.)

5 Tiap iti perengka dikena betukang bisi guna iya empu. Ambika chunto, pikirka perengka ke dikena Jesus lebuh nyadi tukang kayu. * (Peda nota kaki.) Iya begunaka perengka dikena nyukat, nanda, netak, nebuk, enggau ngaga tukuh  kayu, nyengkaum perengka dikena ngerata sereta nyantilka kayu. Sama mega, tiap iti perengka ba Perengka Ngajar bisi guna iya empu. Aram kitai beratika chara ngena semua perengka tu.

PERENGKA DIKENA MADAHKA SAPA KITAI

6, 7. (a) Baka ni nuan ngena kad jw.org? (b) Nama kebuah kitai ngena surat mai datai ke gempuru?

6 Kad JW.Org. Kad tu mit tang ulih mujur dikena madahka sapa kitai lalu mai orang ngagai laman web jw.org kitai. Ba laman web kitai tu, orang ulih nemu mayuh agi pasal kitai lalu ulih mega minta belajarka Bup Kudus. Naka ke diatu lebih ari 400,000 iku orang udah minta belajarka Bup Kudus nengah jw.org, lalu beratus-ratus iku orang ke minta belajar ninting hari! Nuan ulih mai beberapa iti kad jw.org lalu ngena kad nya berandau enggau orang ke ditemu nuan lebuh ngereja pengawa besehari-sehari.

7 Surat Mai Datai. Jaku ke dichelak ba surat mai datai ngagai gempuru kitai: “Kami mai nuan belajarka Bup Kudus enggau Saksi-Saksi Jehovah.” Udah nya surat nya madahka nuan ulih ngereja nya “ba endur kami begempuru” tauka “enggau seiku Saksi.” Nya alai surat nya madahka sapa kitai sereta mega mai orang ke “nemu diri begunaka Petara” belajarka Bup Kudus enggau kitai. (Mat. 5:3, NW) Amat, sekalika orang deka belajarka Bup Kudus tauka enggai, penatai sida ke gempuru endang diterima enggau ati ti gaga. Lebuh sida datai, sida deka nemu sida ulih belajarka mayuh penemu Bup Kudus ari gempuru.

8. Nama kebuah nya beguna orang datai ngagai gempuru kitai abis kurang sekali? Padahka siti chunto.

8 Endang manah enti kitai seruran mai orang datai ngagai gempuru kitai. Abis kurang sida datai sekali. Nama kebuah? Laban lebuh sida datai, sida deka meda Saksi-Saksi Jehovah ngajar pemendar ari Bup Kudus sereta nulung orang ngelala Petara, tang jalai pengarap pelesu nadai ngereja nya. (Isa. 65:13) Ambika chunto, sepasang laki bini di Amerika Serikat ke benama Ray enggau Linda beratika utai ti bebida tu beberapa taun suba. Seduai iya arapka Petara lalu deka ngelala Iya enggau dalam agi. Nya alai seduai iya berunding deka ngagai semua gerija di nengeri diri lalu deka nemu dua iti utai sebedau enggau gerija nya. Kesatu, seduai iya patut belajarka utai ba gerija, lalu kedua, raban ba gerija patut begari baka orang ke layak nyembah Petara. Lama ga seduai iya ngiga dua iti utai nya ketegal bisi mayuh gerija. Tang seduai iya berasai asa. Seduai iya nadai belajarka nama-nama utai, lalu raban ba gerija enda begari enggau chara ti patut. Pengudah ngagai gerija ti kepenudi ba lis, Linda mupuk gawa lalu Ray pulai ke rumah. Lebuh di rantau jalai, iya ngetu ba siti Palan Gempuru. Ku iya berunding, ‘Manah aku tama lalu meda utai ke bisi dia.’ Tang tu meh utai ti pemadu manah! Semua orang ba Palan Gempuru nya manah, rinduka orang lalu begari kemas. Ray duduk ba mua sekali lalu rindu enggau utai ti dipelajarka iya! Tu ngingatka kitai pasal utai ti padah rasul Paul pasal orang ke baru keterubah datai ngagai gempuru: ‘Petara amat bisi enggau kita.’ (1 Kor. 14:23-25) Udah nya, Ray datai begempuru  ninting Hari Minggu. Iya mega berengkah datai enggau gempuru tengan minggu. Linda pan berengkah datai kedua-dua gempuru nya. Taja pan umur seduai iya 70 lebih taun, seduai iya belajarka Bup Kudus lalu dibaptisa.

PERENGKA DIKENA NGEPUNKA RANDAU

9, 10. (a) Nama kebuah surat mit nyamai dikena? (b) Terangka baka ni ngena surat mit Nama Reti Perintah Petara?

9 Surat Mit. Kitai bisi lapan iti surat mit ke nyamai dikena ngepunka randau. Kira-kira lima juta iti surat mit udah dichelak kenyau ari iya ti keterubah dikeluarka ba taun 2013! Format sida sama magang. Enti nuan udah nemu chara ngena siti, semua ke bukai nya pan sama! Baka ni nuan ulih ngepunka randau ngena surat mit?

10 Engka nuan deka ngena surat mit Nama Reti Perintah Petara? Pandangka tanya ba mua surat nya lalu nanya: “Kala nuan berunding nama reti Perintah Petara? Kati nuan ngumbai iya . . . ?” Udah nya asuh iya milih siti ari tiga iti saut. Ari ke nyebut saut iya betul tauka salah, kebak surat mit nya ngagai “Nama Dipadah Bup Kudus” ba lambar sepiak lalu bacha Daniel 2:44 enggau Isaiah 9:6, ke dipandangka dia. Ba ujung randau, bacha tanya ba belakang surat nya di baruh tajuk “Uji Pikirka”: “Baka ni gaya pengidup enti dipegai Perintah Petara?” Nuan ulih nyaut tanya nya lebuh datai ngabas iya. Lebuh seduai betemu baru, nuan ulih ngena pelajar 7 ba brosur Berita Manah Ari Petara! Nya siti ari perengka ke dikena kitai ngepunka pengawa belajarka Bup Kudus.

PERENGKA KE NGASUH ORANG RINDUKA BUP KUDUS

11. Nama tuju majalah kitai digaga, lalu nama patut ditemu kitai pasal sida?

11 Majalah. Menara Jaga enggau Sedarlah! nya majalah ti pemadu mayuh dikeluar sereta disalin di dunya! Laban orang ari mayuh bengkah menua macha majalah tu, nya alai topik ba mua majalah endang digaga kena narit ati orang enda ngira dini alai sida. Kitai patut ngena majalah tu nulung orang beberatka utai ti pemadu beguna ba pengidup kemayaharitu. Tang keterubah, kitai patut nemu ni bagi majalah ti engkeman ke seiku-seiku.

12. Majalah Sedarlah! digaga ke sapa, lalu nama tuju iya?

12 Sedarlah! digaga ke orang ti nemu mimit aja tauka nadai nemu nama-nama pasal Bup Kudus. Sida engka enda nemu pasal ajar orang Kristian, enda tentu arapka jalai pengarap, tauka enda nemu Bup Kudus ulih nulung sida ba pengidup. Tuju majalah Sedarlah! iya nya deka pemacha pechaya Petara endang amat bisi. (Rom. 1:20; Heb. 11:6) Iya mega nguji nulung pemacha arapka Bup Kudus nya ‘endang amat jaku Petara.’ (1 Tes. 2:13) Tiga iti majalah Sedarlah! ba taun 2018 deka nyaut tanya tu: “Jalan yang Menuju Kebahagiaan,” “12 Rahsia Keluarga yang Bahagia,” enggau “Bantuan untuk Orang yang Berkabung” dalam jaku Melayu.

13. (a) Majalah Menara Jaga ke orang mayuh digaga ke sapa? (b) Nama asil manah ke diulih nuan lebuh ngena majalah tu empai lama ti udah?

13 Tuju majalah Menara Jaga ke orang mayuh nerangka ajar Bup Kudus ngagai  orang ke bebasaka Petara enggau Bup Kudus. Sida engka nemu sekeda utai pasal Bup Kudus, tang sida enda tentu nemu ajar iya ti bendar. (Rom. 10:2; 1 Tim. 2:3, 4) Tiga iti majalah Menara Jaga taun 2018 deka nyaut tanya tu: “Kati Bup Kudus Agi Ulih Dikena Kemayaharitu?,” “Nama Deka Nyadi Jemah Ila?,” enggau “Kati Petara Ibuhka Nuan?

PERENGKA TI MERANSANG ORANG BELAJARKA BUP KUDUS

14. (a) Nama tuju empat iti video ba Perengka Ngajar nya digaga? (b) Nama asil manah ke diulih nuan lebuh mandangka video nya?

14 Video. Tukang kayu maya jeman Jesus nadai ngena perengka tukang elekterik. Tang diatu, tukang kayu bisi perengka tukang ke ngena elekterik baka tinso, mesin pengebur, enggau mesin kena ngaluska papan. Lebuh kitai nginjil kemayaharitu, kelimpah ari litaricha ti dichelak, kitai bisi mayuh video ti ngerinduka ati. Empat iti video ke ulih dikena ngajar nya: Nama Kebuah Belajar Bup Kudus?, Nama Nyadi Lebuh Belajarka Bup Kudus?, Nama Nyadi ba Palan Gempuru?, enggau Saksi-Saksi Jehovah—Sapa Kami? Video ke pandak kurang ari dua minit lalu mujur dikena lebuh keterubah datai. Video ke panjai ulih dikena lebuh datai ngabas sereta ke sida ti bisi mayuh agi awak. Semua video tu endang perengka ti manah laban ulih meransang orang belajarka Bup Kudus lalu datai ke gempuru kitai.

15. Nama asil manah ke diulih ketegal orang meda video dalam jaku sida empu? Padahka sekeda chunto.

15 Ambika chunto, seiku menyadi Kristian indu betemu enggau seiku indu ke pindah ari Micronesia. Indu nya bejaku ngena jaku Yapese. Menyadi Kristian indu nya mandangka video Nama Kebuah Belajar Bup Kudus? dalam jaku Yapese. Lebuh video nya berengkah, ku indu nya: “Tu jaku ke dikena aku. Enda pechaya aku! Ari munyi jaku iya aku nemu iya semenua enggau aku. Iya bejaku ngena jaku ke dikena aku!” Udah nya, iya madahka diri deka macha sereta meda semua utai ke bisi dalam jaku ke dikena iya ba jw.org. (Banding Kereja Rasul 2:8, 11.) Siti agi asil manah nya ari seiku menyadi Kristian indu di Amerika Serikat. Anak menyadi lelaki iya diau ba endur bukai di menua nya. Menyadi Kristian indu nya nganjung siti link video ti sama tang dalam jaku ke dikena anak menyadi iya. Iya meda video nya lalu ngirum email ngagai menyadi Kristian indu nya: “Senentang ke nyebut pasal Sitan ke nguasa dunya tu amat narit ati aku. Aku minta belajarka Bup Kudus.” Tu utai ti amat manah laban iya diau ba menua ke alai pengawa kitai disekat!

PERENGKA KE NGAJAR UTAI TI BENDAR

16. Terangka tuju tiap iti brosur tu digaga: (a) Dinga ka Petara lalu Idup Belama-lama. (b) Berita Manah Ari Petara! (c) Sapa Orang Ti Ngereja Peneka Jehovah Kemaya Hari Tu?

16 Brosur. Baka ni kitai ulih ngajar utai ti bendar ngagai orang ke enda tentu nemu macha tauka ke nadai litaricha dalam jaku iya? Kitai ulih ngena brosur Dinga ka Petara lalu Idup Belama-lama. * (Peda nota kaki.) Perengka ti pemadu manah dikena ngepunka pengawa  belajarka Bup Kudus nya brosur Berita Manah Ari Petara! Nuan ulih mandangka 14 topik ke bisi ba kulit belakang brosur nya lalu nanya ni bagi topik ti ngerinduka ati iya. Udah nya ngepunka pengawa belajar ngena pelajar nya. Kala nuan nguji chara tu lebuh datai ngabas? Brosur ketiga ba perengka ngajar kitai nya Sapa Orang Ti Ngereja Peneka Jehovah Kemaya Hari Tu? Brosur tu digaga kena ngajar pemelajar Bup Kudus pasal gerempung kitai. Ngambika nemu chara ngena iya lebuh tiap kali belajarka Bup Kudus, peda Pengidup enggau Pengawa Kristian Kitai—Bup Kereja Kena Gempuru, kena Mac 2017.

17. (a) Nama tuju belajarka tiap iti bup nya? (b) Nama patut digaga semua orang ke udah dibaptisa, lalu nama kebuah?

17 Bup. Pengudah berengkah belajarka Bup Kudus ngena brosur, nuan ulih ngena bup Nama Ulih Dipelajarka Kitai Ari Bup Kudus? Perengka tu ulih nulung orang nemu mayuh agi pasal batang ajar Bup Kudus. Enti pemelajar ngaga pemansang lalu nembuka bup nya, nuan ulih nyambung belajarka Bup Kudus ngena bup Meruan Dalam Pengerindu Petara. Perengka tu deka ngajar pemelajar chara ngena prinsip Bup Kudus ba pengidup ninting hari. Anang enda ingat, indah pengudah dibaptisa, orang nya patut terus belajar nyentuk ke dua iti bup nya tembu dipelajarka. Tu deka nulung iya arap agi ke Jehovah sereta meruan taluk ngagai Iya.—Bacha Kolosi 2:6, 7.

Perengka Ngajar ulih dikena kitai ngajar orang berita manah

18. (a) Nitihka 1 Timoti 4:16, nama patut digaga kitai ke nyadi pengajar Bup Kudus, lalu nama asil iya? (b) Nama juluk ati kitai lebuh ngena Perengka Ngajar?

18 Kitai ke nyadi Saksi-Saksi Jehovah diberi tanggungjawap ngajar orang “pesan ti bendar, iya nya Berita Manah” ke ulih mai sida ngagai pengidup ti meruan belama iya. (Kol. 1:5; bacha 1 Timoti 4:16.) Ngambika ulih ngereja tu, kitai bisi Perengka Ngajar. (Peda kutak “ Perengka Ngajar.”) Aram meh kitai enggau naka ulih ngena semua perengka tu. Tiap iku kitai ulih nentuka ni bagi perengka ti deka dikena lalu ni maya ngena iya. Tang kingatka, tuju kitai ukai semina deka nyadung litaricha aja, lalu kitai mega enda meri litaricha ngagai orang ke enda rinduka pesan ti dibai kitai. Tuju kitai nya deka ngaga orang ke nerima, ke baruh ati, sereta ke keran deka ngelala Petara nyadi murid. Sida nya orang ke “bisi pengingin deka bulih pengidup ti meruan belama iya.”—SKR. 13:48; Mat. 28:19, 20.

^ per. 3 Kereja Rasul 13:48, NW: “Lebuh orang bansa bukai ninga nya, sida gaga ati, lalu muji jaku Petara. Semua sida ke bisi pengingin deka bulih pengidup ti meruan belama iya berengkah nyadi murid Jesus.”

^ per. 5 Peda artikel “Tukang Kayu” enggau kutak “Kotak Peralatan Tukang Kayu” kena 1 Ogos 2010, ba majalah Menara Pengawal dalam jaku Indonesia.

^ per. 16 Enti orang enda nemu macha, nuan ulih ngasuh iya sama macha enggau nuan lebuh ngena brosur Dinga ka Petara, ke ngundan mayuh gambar.