Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 CHERITA PENGIDUP

Jehovah Merekatka Pemutus Aku

Jehovah Merekatka Pemutus Aku

Maya nya taun 1939. Kami dani tengah malam hari lalu neriba kerita lebih ari sejam ngagai Joplin, sebuah nengeri ti mit ba barat daya Missouri, Amerika Serikat. Lebuh dia, kami enda bemunyi ngengkahka surat mit ba baruh pintu tiap buah rumah. Sepengudah tembu, kami neriba kerita nuju raban kami ke bukai. Hari nyau rerak tawas. Tang nama kebuah kami nginjil sebedau mata panas tumbuh lalu jampat-jampat mupuk ari endur nya? Aku deka nusui cherita tu ngagai kita.

AKU ada ba taun 1934. Apai indai aku, iya nya Fred seduai Edna Molohan, udah nyadi Nembiak Bup Kudus (Saksi-Saksi Jehovah) sepengelama 20 taun. Aku beterima kasih ngagai seduai iya laban ngajar aku rinduka Jehovah. Kami diau ba Parsons, sebuah nengeri ti mit ba tenggara Kansas. Nyauka semua menyadi Kristian ba eklisia kami nya, sida ke dipilih ngagai serega. Kami sebilik seruran datai begempuru sereta enggau pengawa nginjil. Maya lemai Hari Enam, kami nginjil ba jalai. Diatu, pengawa nginjil tu dikumbai nginjil ba endur orang mayuh. Kadang-kadang kami berasai lelak. Tang pengudah abis nginjil, apai suah mai kami makai sekelim.

Eklisia kami mit, tang kandang endur kami nginjil besai. Dia bisi beberapa buah nengeri mit sereta mayuh endur alai orang betanam betupi. Ari ke meri duit ke litaricha kitai, sida meri sayur ke ditanam sida empu, telu manuk (baru diambi ari tansang), indah meri manuk idup. Apai udah mayar litaricha nya, nya alai utai ke diberi orang nya nyadi pemakai kami sebilik.

KIMPIN NGINJIL

Apai indai aku bulih peti rikut ngambika ulih dikena ba pengawa nginjil. Aku enda ulih ngena nya laban aku agi mit. Tang aku rindu nulung apai enggau indai mainka cheramah Menyadi Rutherford ke udah dirikut lebuh datai ngabas sereta ngajar orang Bup Kudus.

Aku enggau apai indai ba mua kerita bunyi

Apai ngengkahka sepika besai ba atas kerita Ford 1936 kami, lalu nyadika iya kerita bunyi. Kerita nya beguna bendar ba pengawa nginjil. Kami berengkah enggau mainka musik dulu ngambika orang meda kami. Pengudah kami mainka cheramah Bup Kudus, kami meri litaricha ngagai orang ke bisi ati deka nemu pasal Bup Kudus.

Ba nengeri mit Cherryvale, Kansas, polis enda ngemendarka apai mai kerita bunyi nya tama ngagai taman, alai mayuh orang belelak maya Hari Minggu. Tang ba luar taman nya tau. Nya alai apai  mindahka kerita ngagai jalai ba seberai taman ngambika orang agi ulih ninga cheramah nya enggau terang. Aku seruran gagit ati ulih begulai enggau apai sereta Jerry, menyadi lelaki ke tuai ari aku, lebuh ngereja pengawa nya.

Beberapa taun sebedau 1940, kami ngaga kimpin spesial ba endur orang ke balat nyakal. Baka ke udah dipadah aku ba pun tadi, kami dani tengah malam hari lalu enda bemunyi ngengkahka surat mit sereta bup ba baruh pintu rumah orang. Pengudah nya, semua kami betemu ba luar nengeri. Kami deka nemu sekalika bisi entara kami ditangkap polis tauka enda.

Siti ari pengawa nginjil kami ti ngagitka ati iya nya bebaris bebaika poster. Kami mai poster ti besai lalu bebaris bejalai nengah nengeri. Aku agi ingat, bisi sekali bala menyadi Kristian datai ngagai pasar alai kami diau lalu bebaris bebaika poster ti mandangka “Religion Is a Snare and a Racket.” Sida berengkah ari rumah kami, bejalai kira-kira satu setengah kilometer (1 batu) nengah pasar, lalu udah nya pulai baru ngagai rumah kami. Kami gaga ati laban nadai orang nagang sida, tang mayuh orang deka nemu pasal pengawa ke digaga sida.

KONVENSYEN LEBUH AKU AGI BIAK

Kami sebilik suah ngagai konvensyen di Texas. Apai bekereja ba kompeni rel kerita api, nya alai kami ulih nepan kerita api enggau enda bebayar lebuh ngagai konvensyen sereta ngelawa kaban belayan kami. Menyadi tuai indai aku, Fred Wismar enggau bini iya, Eulalie, diau ba Temple, Texas. Aya Fred belajarka pemendar ba pun taun 1900-an lebuh iya agi biak. Iya dibaptisa lalu madahka pasal utai ti udah dipelajar iya ngagai bala menyadi iya, nyengkaum indai aku. Bala menyadi Kristian di Texas tengah ngelala Aya Fred laban iya kala nyadi penulung ba pelilih (diatu dikumbai tuai ti ngabas). Iya nelap, seruran gaga ati, sereta ransing. Iya nyadi chunto ti manah ke aku.

Ba taun 1941, kami nepan kerita api ngagai konvensyen besai ba St. Louis, Missouri. Semua sida ke nembiak diasuh duduk begulai semak panggau ngambika ulih ninga cheramah Menyadi Rutherford ke betajuk “Children of the King.” Ba pengujung cheramah iya, lebih 15,000 iku orang ke nembiak bulih utai ti ngagaka ati. Menyadi Rutherford enggau beberapa iku penulung iya meri bup baru ke betajuk Children ngagai tiap iku kami.

Kena bulan April 1943, kami datai ngulu Gempuru Besai Sehari “Call to Action” ba Coffeyville, Kansas. Lebuh dia, kami ninga jaku gerah pasal semua eklisia deka bisi sekula ti baru iya nya Sekula Kereja Teokratik. Kami mega nerima siti bup mit ti ngundan 52 iti pelajar ke deka dikena ba sekula. Lalu ba taun nya mega, aku meri cheramah pelajar aku ti keterubah. Gempuru besai sehari nya mega besai reti ba aku ketegal beberapa iku kami, dibaptisa dalam ai pegung ti chelap semak ladang.

AKU DEKA GAWA BA BETEL

Aku abis sekula sekondari ba taun 1951 lalu patut nentuka utai ti deka digaga ba pengidup diri. Menyadi lelaki aku Jerry udah gawa ba Betel. Aku mega keran deka ngagai Betel, nya alai aku nganjung pom. Enda lama udah nya, aku dikangau ngagai Betel lalu berengkah gawa kena 10 Mac 1952. Tu meh pemutus manah ke udah nulung aku gawa ke Petara enggau mayuh agi.

Aku ngarapka diri ulih enggau pengawa nyelak majalah kitai sereta litaricha bukai. Tang aku enda diberi pengawa nya. Aku diasuh nyadi pengenah lalu udah nya gawa ba dapur. Aku rinduka pengawa tu lalu ulih belajarka mayuh utai. Kami gawa nitihka gintir lalu kadang-kadang maya siang hari aku nadai gawa. Aku seruran ngagai librari Betel sereta ngena mayuh bup ke bisi dia lebuh belajarka Bup Kudus kediri empu. Tu nulung ngeringka pengarap sereta kaul aku enggau Jehovah. Tu ngasuh aku keran agi deka gawa ke Jehovah ba Betel seagi-agi aku ulih. Jerry enda agi gawa ba Betel dalam taun 1949 lalu jadi enggau Patricia, tang seduai iya diau semak Brooklyn. Seduai iya suah nulung sereta meransang aku lebuh aku agi baru ba Betel.

Enda lama pengudah aku datai ba Betel, bisi pengawa diatur kena ngiga mayuh agi bala menyadi Kristian lelaki ngambika ulih nyadi pencheramah Betel. Sida ke bisi dalam lis nya deka diasuh ngabas  eklisia nyentuk ngagai endur ke penyauh kira-kira 320 kilometer (200 batu) ari Brooklyn. Lebuh ba endur nya, sida meri cheramah ba mua orang mayuh lalu nginjil enggau bala menyadi Kristian. Aku seiku ari sida ke kena pilih. Taja pan aku berasai takut, aku tetap bejalaika pengawa ngabas sereta meri cheramah. Maya nya cheramah diberi sejam. Aku suah ngabas eklisia ngena kerita api. Aku agi ingatka utai ke udah nyadi maya lemai Hari Minggu kena musin chelap ba taun 1954. Aku nepan kerita api pulai ke New York lalu patut datai ba Betel sebedau lemai hari. Tang lebuh pulai, bisi kabut enggau ribut ti balat sereta seleju. Enjin elekterik kerita api enggai idup. Pukul lima pagi Hari Satu baru aku ulih datai ba New York City. Aku nepan kerita api baruh tanah ngagai Brooklyn. Pengudah datai ba Betel, aku terus gawa ba dapur. Aku mimit laun lalu lelak amat laban semalam-malam nya aku enda tinduk. Taja pia, aku gaga ati ulih ngabas eklisia sereta betemu enggau bala menyadi Kristian ke baru.

Besedia sebedau naburka program ari stesen WBBR

Lebuh taun keterubah aku ba Betel, aku mega berengkah enggau program belajarka Bup Kudus ke ditaburka ninting minggu nengah stesen radio kitai, WBBR. Stesen nya ba tingkat dua bengunan 124 Columbia Heights. Menyadi Alexander H. Macmillan, ke udah betaun-taun gawa ba Betel, selalu enggau program radio nya. Kami ngangau iya Menyadi Mac. Iya nyadi chunto ti manah ke kami ti agi biak ba Betel laban iya mengkang tetap ati taja pan napi mayuh penanggul.

Kami ngena surat mit madahka pasal WBBR

Ba taun 1958, pengawa aku berubah lalu aku berengkah gawa enggau pemelajar Sekula Gilead. Aku nulung bala menyadi Kristian ke ransing ati gawa ke Petara ngulihka visa, lalu aku mega ngatur pejalai sida. Maya nya tikit bilun mar amat, nya alai sekeda ari sida ke ngagai menua Afrika sereta Asia deka nepan kapal kargo. Betaun udah nya, lebuh rega tikit bilun nyau murah, mayuh ari pengerintis seberai tasik nepan bilun ngagai endur alai sida gawa.

Nusun diploma Gilead sebedau Majlis Nyuaka Setipikit Sekula Gilead

NGAGAI KONVENSYEN

Ba taun 1960, aku ngatur beberapa buah bilun sua dikena terebai ari Amerika Serikat ke Eropah ngambika ulih ngagai beberapa iti konvensyen entarabansa ba taun 1961. Aku nepan bilun ngagai siti ari konvensyen nya ba Hamburg, Jerman. Pengudah konvensyen nya, aku enggau tiga iku menyadi Kristian lelaki ke sama gawa ba Betel nyua sebuah kerita, neriba kerita nya ari Jerman ngagai Itali lalu ngelawa pampang opis ba Rome. Ari Rome, kami ngagai Perancis, mansa gunung Pyrenees, lalu tama ke Sepanyol, alai pengawa kitai ditagang. Kami ulih meri sekeda litaricha ke udah dibungkus baka hadiah ngagai menyadi Kristian di Barcelona. Kami berasai gagit ati ulih betemu enggau sida! Ari Barcelona, kami neriba kerita ngagai Amsterdam lalu nepan bilun ngagai New York.

Ba taun 1962, aku diberi pengawa ngatur pejalai 583 iku bala menyadi Kristian ke deka ngulu siti siri konvensyen entarabansa ti spesial di serata dunya. Nya Gempuru Besai Entarabansa 1963 ke betajuk “Everlasting Good News.” Sida deka ngulu konvensyen nya ba Eropah, Asia, sereta Pasifik Selatan. Udah nya ba Honolulu, Hawaii, lalu iya kepenudi  ba Pasadena, California. Beserimbai enggau pengawa nya, sida mega ngelawa Lebanon enggau Jordan ngagai endur ke bisi disebut dalam Bup Kudus. Opis kami ngatur pekara bekaul enggau bilun sereta hotel alai diau lalu ngulihka semua visa ke bala menyadi Kristian nya.

KALING BARU ENGGAU BEJALAI

Bisi siti agi kebuah ke ngasuh taun 1963 nya besai reti ba aku. Kena 29 Jun, aku jadi enggau Lila Rogers ari Missouri, ke berengkah gawa enggau Betel ba taun 1960. Seminggu pengudah kami duai Lila jadi, kami enggau siti siri konvensyen ke diatur di serata dunya lalu ngelawa Greece, Ejip, sereta Lebanon. Ari Beirut, kami nepan bilun ngagai Jordan. Taja pia, pengawa kitai ba menua nya disekat, lalu piak ti bekuasa enggai meri visa ngagai Saksi-Saksi Jehovah. Nya alai kami enda nemu utai ke deka nyadi lebuh datai din. Gambarka pengaga ati ti diasaika kami lebuh meda seraban bala menyadi Kristian bediri ngambat penatai kami ba padang bilun mai poster ti besai ke bisi tulis “Selamat Datai Saksi-Saksi Jehovah”! Kami rindu ulih ngelawa endur ke bisi disebut dalam Bup Kudus, lalu ulih meda endur ke kala alai Abraham, Isak, enggau Jakop diau, endur alai Jesus enggau bala rasul nginjil, sereta endur alai pengarap Kristian berengkah dikerembai “nyentuk ngagai ujung dunya.”—Kereja Rasul 13:47.

Sepengelama 55 taun, Lila udah nyadi kaling ke tetap ati dalam semua pengawa kami duai. Kami beberapa kali ngelawa Sepanyol enggau Portugal lebuh pengawa kitai ditagang ba menua nya. Kami ulih meransang bala menyadi Kristian lalu mai litaricha sereta utai bukai ke diguna sida. Kami indah ulih ngelawa bala menyadi Kristian kitai ke dijil di Cádiz, Sepanyol. Aku gaga ati laban ulih meri cheramah ti meransang ati sida.

Enggau Patricia seduai Jerry Molohan mansang ngagai Konvensyen “Peace on Earth” ba taun 1969

Kenyau taun 1963, aku udah nulung ngatur pejalai ngagai konvensyen entarabansa di Afrika, Australia, Amerika Tengah enggau Selatan, Eropah, Timur Jauh, Hawaii, New Zealand, sereta Puerto Rico. Kami duai Lila udah ngagai mayuh konvensyen ti seruran dikenang kami baka di Warsaw, Poland, ba taun 1989. Mayuh bala menyadi Kristian ari Rusia ulih datai ngulu konvensyen besai nya. Tu konvensyen sida ti keterubah! Kami duai betemu enggau bala menyadi Kristian ke udah lama dijil ketegal pengarap ba Soviet Union.

Siti agi pengawa ke ngerinduka ati aku nya ngelawa lalu meransang bala menyadi ba Betel sereta bala pengerintis seberai tasik di serata dunya. Pengawa ngelawa kepenudi digaga kami duai nya ngagai Korea Selatan. Kami ulih betemu enggau 50 iku menyadi Kristian kitai ke dijil di Suwon. Semua sida ngayanka ulah ti positif lalu enda sabar deka gawa baru ke Jehovah. Kami duai berasai diperansang lebuh betemu enggau sida!—Rome 1:11, 12.

PEMANSANG TI MAI PENGAGA BA ATI

Aku udah meda baka ni Jehovah betaun-taun udah merekatka nembiak Iya. Lebuh aku dibaptisa ba taun 1943, bisi kira-kira 100,000 iku penginjil. Diatu udah lebih ari 8,000,000 iku orang ke nyembah Jehovah ba 240 buah menua. Pemansang tu  nyadi ketegal bala pemelajar Gilead udah bebendar ba pengawa nginjil. Tu ngasuh aku gaga ati ulih begulai gawa enggau sida lalu nulung ngatur ngambika sida ulih datai ba endur alai sida ngerintis.

Aku gaga ati laban lebuh agi biak, aku ngena pengidup aku gawa ke Jehovah lalu minta gawa ba Betel. Sekumbang gawa ke Jehovah, Iya udah meri aku mayuh berekat. Kelimpah ari rindu enggau pengawa ba Betel, kami duai Lila rindu nginjil begulai enggau beberapa buah eklisia ba Brooklyn lebih 50 taun lalu betemu enggau mayuh bakih ti bendar.

Ketegal sukung ari Lila, aku agi ulih gawa ba Betel ninting hari. Taja pan diatu aku udah beumur lebih 84 taun, aku gaga ati laban agi ulih ngereja pengawa ti besai reti lalu nulung pampang opis ba begian surat.

Enggau Lila

Aku gaga ati ulih enggau gerempung Jehovah ti ngalitka ati lalu meda baka ni jaku ba Malaki 3:18 dikeamatka. Ayat nya madahka: ‘Bala nembiak Aku deka, sekali agi, meda bida entara orang ke lurus enggau orang ke jai, entara orang ke betuaika Petara enggau orang ke enda betuaika Iya.’ Ninting hari kitai meda dunya Sitan majak jai. Orang nadai pengadang lalu enda tentu gaga ati ba pengidup. Tang orang ke rindu sereta nyembah Jehovah ngembuan pengidup ti ngagaka ati, indah ba maya ti tusah tu, lalu bisi pengadang ke tau diandalka jemah ila. Nya alai, madahka berita manah ngagai orang bukai nya endang peluang ti manah! (Matthew 24:14) Enda lama agi, Perintah Petara deka nganti dunya lama tu enggau paradais. Kitai enda sabar nganti maya nya datai! Udah nya, semua orang ba dunya deka gerai, gaga ati, lalu idup belama iya.