Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Arapka Kepala Kitai—Kristus

Arapka Kepala Kitai—Kristus

“Semina bisi siku aja kepala, iya nya Kristus.”—MAT. 23:10.

LAGU: 16, 14

1, 2. Nama pengawa besai ke digaga Josua pengudah Moses mati?

JEHOVAH madah ngagai Josua: “Nembiak Aku Moses udah mati. Angkat nuan enggau semua orang Israel, bejalai meraka Sungai Jordan, lalu mansang ngagai menua ti diberi Aku ngagai sida.” (Jos. 1:1, 2) Nya endang ubah ti ngenyit ba Josua, ke udah nyadi penulung Moses nyauka 40 taun!

2 Moses udah lama endar ngiring orang Israel, tang diatu Josua deka ngiring sida. Nya alai iya berunding sekalika orang Israel deka nerima iya nyadi tuai tauka enda. (U-dat. 34:8, 10-12) Bekaul enggau Josua 1:1, 2, siti bup penerang Bup Kudus madahka, maya ti pemadu mar sereta tau mai penusah ti besai ngagai siti-siti raban bansa sekalika menya tauka diatu, iya nya lebuh seiku tuai nganti tuai ke seiku agi.

3, 4. Baka ni Jehovah merekat Josua ketegal arapka Iya, lalu nama tanya ke ulih ditanya kitai?

3 Josua bisi kebuah irau. Tang iya arapka Jehovah lalu jampat nitihka iring ti diberi Jehovah. (Jos. 1:9-11) Jehovah merekat Josua ketegal arapka Iya lalu ngena seiku melikat ngiring  Josua enggau orang Israel. Melikat tu engka Jaku, Anak tuai Petara.—P-sut. 23:20-23; Jhn. 1:1.

4 Ketegal Josua nyadi tuai bansa Israel ti baru, Jehovah nulung sida nelebaka diri enggau ubah nya. Kemayaharitu mega bisi mayuh ubah ti besai. Kitai engka berunding, ‘Seraya gerempung Petara majak mansang, kati kitai patut arapka Kepala ti udah dipilih, iya nya Jesus?’ (Bacha Matthew 23:10.) Ngambika ulih nyaut tanya tu, kitai deka meresa baka ni Jehovah ngiring nembiak Iya kelia menya lebuh bisi ubah.

NGIRING NEMBIAK PETARA TAMA NGAGAI MENUA TI UDAH DISEMAYA

5. Nama utai nyelai ke nyadi ba Josua semak nengeri Jeriko? (Peda gambar ba pun artikel.)

5 Lebuh orang Israel udah meraka Sungai Jordan, bisi utai nyelai ke nyadi ba Josua. Semak nengeri Jeriko, iya betemu enggau seiku lelaki ke mai pedang. Josua nanya iya: “Kati nuan tu siku ari bala kami, tauka munsuh?” Josua tekenyit lebuh lelaki nya madahka diri ‘tuai bala soldadu Jehovah,’ iya nya melikat ke sedia ngelindung nembiak Petara. (Bacha Josua 5:13-15.) Taja pan ayat nya madahka Jehovah Empu ke bejaku enggau Josua, tang kebendar Jehovah ngena seiku melikat bejaku ngarika Iya, baka ke suah digaga Iya sebedau tu.—P-sut. 3:2-4; Jos. 4:1, 15; 5:2, 9; SKR. 7:38; Gal. 3:19.

6-8. (a) Nama kebuah sekeda iring ari melikat nya baka ke nyelai? (b) Baka ni kitai nemu iring nya manah lalu diberi ba maya ti ngena? (Peda mega nota kaki.)

6 Melikat nya enggau nyemetak madah ngagai Josua pasal utai ke patut digaga kena ngalahka nengeri Jeriko. Terubah iya, sekeda iring nya baka ke nyelai. Ambika chunto, melikat nya ngasuh Josua nutus semua soldadu orang Israel. Reti nya sida enda ulih beperang beberapa hari. Kati nya maya ti manah alai nutus sida?—P-kal. 34:24, 25; Jos. 5:2, 8.

7 Bala soldadu nya engka berunding: ‘Baka ni kami deka ngelindung ruang bilik kami enti munsuh datai nyerang?’ Tang udah nya utai ti enda disadang nyadi! Ari ke nyerang orang Israel, orang di nengeri Jeriko nyau takut ke sida. Kitai macha: “Pintu kuta nengeri Jeriko endang ditutup sereta dijaga, enggai ke orang Israel tama. Nadai orang tau tama tauka pansut ari nengeri nya.” (Jos. 6:1) Utai tu tentu ngasuh orang Israel arap agi ke iring ari Petara!

8 Melikat nya madahka orang Israel enda ibuh nyerang nengeri Jeriko. Sida diasuh bejalai ngelingi nengeri nya sekali dalam enam hari lalu udah nya tujuh kali ba hari ti ketujuh. Bala soldadu engka berunding, ‘Pengawa tu masau jam enggau pengering!’ Tang Jehovah, Kepala orang Israel nemu utai ti digaga Iya! Nitihka iring Iya ngasuh pengarap orang Israel tegap agi, lalu sida enda ibuh ngelaban soldadu ari nengeri Jeriko.—Jos. 6:2-5; Heb. 11:30. * (Peda nota kaki.)

9. Nama kebuah kitai patut nitihka sebarang ubah ti diberi gerempung Jehovah? Padahka siti chunto.

9 Nama ulih dipelajarka kitai ari cherita tu? Kadang-kadang gerempung Jehovah  ngena chara baru ngereja siti-siti utai, lalu kitai engka enda tentu meretika kebuah iya. Ambika chunto, kitai engka enda ngumbai perengka elektronik nya manah dikena lebuh belajarka Bup Kudus kediri empu, ba pengawa nginjil, tauka ba gempuru. Tang diatu kitai ulih meda penguntung ke diulih ketegal ngena perengka nya. Lebuh kitai meda asil manah ke datai ari ubah nya, pengarap kitai tegap agi lalu kitai begempung agi enggau bala menyadi Kristian kitai.

BAKA NI KRISTUS NGIRING ORANG KRISTIAN BA ABAD KETERUBAH?

10. Ke amat, sapa ke ngasuh raban ti ngiring di Jerusalem baum mutarka pekara ti bekaul enggau pengawa betutus?

10 Kira-kira 13 taun pengudah seiku orang ari bansa bukai ti enda ditutus ke benama Kornelius nyadi orang Kristian, sekeda orang Judah ke udah ditutus madahka pengawa betutus nya enda tau enda dikemeranka. (SKR. 15:1, 2) Di nengeri Antiok, bala menyadi Kristian bekelikuh pasal pekara nya. Nya alai bala tuai ngasuh Paul mupuk nanya raban ti ngiring di Jerusalem pasal pekara nya. Tang ke amat, sapa ke ngasuh Paul kin? Paul nerangka: ‘Aku kin nitihka pemandang ari Tuan.’ Endang nyata bendar, Kristus ke ngasuh utai tu nyadi ngambika pekara nya diputarka raban ti ngiring di Jerusalem.—Gal. 2:1-3.

Kristus nya Kepala eklisia Kristian ba abad keterubah (Peda genteran 10, 11)

11. (a) Nama utai ti agi dipechaya orang Judah ke Kristian pasal pengawa betutus? (b) Baka ni Paul nunjukka diri baruh ati nyukung bala tuai di Jerusalem? (Peda mega nota kaki.)

11 Kristus ngasuh raban ti ngiring nya madahka orang Kristian ke ukai orang  Judah enda ibuh ditutus. (SKR. 15:19, 20) Taja pia, beberapa taun udah nya, mayuh orang Judah ke Kristian agi nutus anak sida. Bala tuai di Jerusalem ninga cherita selebubu ngapa ke madahka Paul enda masa Adat Moses. Nya alai sida ngasuh Paul ngereja utai ke nunjukka iya masa Adat nya. * (Peda nota kaki.) (SKR. 21:20-26) Sida ngasuh iya mai empat iku orang ngagai Rumah Sembiang ngambika sida nuchi diri empu baka ke diasuh Adat Moses, lalu orang ulih meda Paul amat masa Adat nya. Paul engka ngumbai: ‘Tu enda patut! Nama kebuah kita ngasuh aku ngereja tu? Orang Judah ke Kristian ti enda meretika pasal tutus ke ngaga hal.’ Tang Paul nemu, bala tuai nya dekaka semua orang Kristian begempung, nya kebuah iya enggau ati ti baruh nitihka asuh sida. Tang, kitai engka deka nemu kebuah Jesus nejuka pekara nya lama bendar nyadi penanggul, taja pan Adat Moses nadai agi dikena pengudah Jesus mati.—Kol. 2:13, 14.

12. Nama kebuah Kristus enda berumban mutarka pekara ke bekaul enggau pengawa betutus?

12 Endang begunaka awak deka nelebaka diri enggau penemu ti baru. Sekeda orang Judah ke Kristian begunaka awak deka ngelengkaka Adat Moses. (Jhn. 16:12) Sida udah teleba ngumbai pengawa betutus nya nyadika tanda sida bisi kaul ti spesial enggau Petara. (P-kal. 17:9-12) Sekeda ke bukai nangi enggaika sida diperinsa orang Judah ke bukai enti sida enda nitihka adat nya. (Gal. 6:12) Tang nyau kelama, Kristus meri sida mayuh agi iring dalam surat ari Paul.—Rom. 2:28, 29; Gal. 3:23-25.

KRISTUS AGI NGIRING EKLISIA IYA

13. Nama ulih nulung kitai nyukung chara Kristus ngiring kitai kemayaharitu?

13 Kristus agi nyadi Kepala eklisia Kristian kemayaharitu. Nya alai enti gerempung kitai ngaga ubah ke enda dimeretika nuan, perundingka chara Kristus ngiring nembiak Petara menya. Sekalika maya jeman Josua tauka maya jeman bala rasul, Kristus seruran meri iring dikena ngelindung nembiak Petara, negapka pengarap sida, sereta nulung sida mengkang begempung.—Heb. 13:8.

Iring ke diberi ulun ti tetap ati ngagai kitai kemayaharitu nunjukka Jesus ibuhka kitai

14-16. Baka ni iring ari “ulun ke tetap ati sereta bepenemu-dalam” nunjukka Kristus deka nulung kitai negapka pengarap kitai?

14 Kemayaharitu, “ulun ke tetap ati sereta bepenemu-dalam” meri iring ke diguna kitai lebuh kitai begunaka iya. (Mat. 24:45) Iring tu nunjukka Jesus ibuhka kitai. Marc, ke bisi empat iku anak, madahka: “Sitan nguji deka ngelemika eklisia enggau nyerang ruang bilik. Perangsang ti terang ke ngasuh tuai bilik belajarka Bup Kudus ba diri sebilik ninting minggu  nunjukka tuai bilik patut nyaga diri sebilik!”

15 Lebuh beratika baka ni Kristus ngiring kitai, kitai nemu iya deka nulung kitai negapka pengarap kitai. Ambika chunto, seiku tuai gempuru ke benama Patrick madahka: “Terubah iya, sekeda bala menyadi Kristian berasai enda diperansang lebuh enggau gempuru sebedau nginjil dalam raban ti mit maya ujung minggu.” Tang iya madahka, ubah tu nunjukka Jesus ibuhka tiap iku orang ba eklisia. Ambika chunto, sekeda bala menyadi Kristian ke malu tauka jarang enggau nginjil nyau ngasaika diri beguna agi. Tu negapka pengarap sida.

16 Kristus mega nulung kitai mengkang beberatka pengawa nginjil, pengawa ti pemadu beguna ke benung digaga ba bumi diatu. (Bacha Mark 13:10.) André, seiku tuai gempuru ti baru, seruran nitihka iring baru ari gerempung Jehovah. Ku iya madah: “Ngurangka penyampau orang gawa ba pampang opis ngingatka kitai pengujung nyau majak semak lalu kitai patut ngena mayuh agi pengering ba pengawa nginjil.”

BAKA NI KITAI ULIH NYUKUNG IRING KE DIBERI KRISTUS?

17, 18. Nama kebuah kitai patut beratika penguntung ke diulih kitai ketegal nitihka ubah?

17 Iring ke diulih ari Raja kitai Jesus Kristus ti benung merintah, deka nulung kitai diatu sereta jemah ila. Uji peratika penguntung ke diulih nuan ketegal nitihka ubah apin lama ti udah. Lebuh nuan belajarka Bup Kudus ba diri sebilik, nuan ulih berandauka baka ni ubah ba gempuru tauka ba pengawa nginjil udah nulung kita sebilik.

Kati nuan nulung diri sebilik enggau sida ke bukai nitihka ubah ba gerempung Jehovah? (Peda genteran 17, 18)

18 Enti kitai nemu nitihka iring ari gerempung Jehovah nya ngenataika mayuh asil ti manah, kitai deka senang agi nitihka  iring nya lalu gaga ati. Ambika chunto, ketegal penyampau litaricha ti dichelak udah kurang, kitai ngelimat duit. Lalu ketegal kitai ngena teknologi ti baru, kitai ulih ngiga mayuh agi orang ngena berita manah. Ulih kitai suah agi ngena litaricha sereta media elektronik? Tu siti chara kitai ulih nyukung Kristus, ke dekaka kitai ngena utai ti disediaka gerempung kitai enggau manah.

19. Nama kebuah kitai patut nyukung iring ari Kristus?

19 Lebuh kitai nyukung iring ari Kristus, kitai nulung bala menyadi Kristian ngembuan pengarap ti tegap agi sereta begempung. Ku André madah pasal ubah ba penyampau bala menyadi Kristian ke gawa ba Betel apin lama ti udah: “Ulah bala menyadi Kristian ke kala gawa ba Betel ti bebendar nelebaka diri enggau ubah nya meransang aku arap sereta mandangka basa. Enda ngira nama pengawa ke diberi ngagai sida, sida ngereja iya enggau gaga ati, ngambika ulih terus nitihka iring ari kerita Jehovah.”

ANDAL SERETA ARAPKA KEPALA KITAI

20, 21. (a) Nama kebuah kitai ulih arapka Kepala kitai, Kristus? (b) Nama tanya ke deka dikerandauka kitai ba artikel pengudah tu?

20 Enda lama agi Kepala kitai, Jesus Kristus, deka “ngalahka semua munsuh iya” sereta “ngereja utai ti ngalitka ati.” (Pem. 6:2, NW; Mas. 45:4, NW) Tang indah diatu iya nyikap kitai ke pengidup ba dunya baru sereta ke pengawa ti deka digaga kitai dia, lebuh kitai ngajar orang ke diangkatka idup baru lalu nulung ngaga bumi tu nyadi paradais.

21 Seagi-agi kitai arapka Kepala sereta Raja kitai enda ngira utai ke nyadi, iya deka ngiring kitai ngagai dunya baru. (Bacha Masmur 46:1-3.) Kadang-kadang kitai engka tusah deka nitihka ubah, kelebih agi lebuh ubah nya ngachau kitai enggau chara ti enda dijangka. Lebuh nya nyadi, baka ni kitai ulih mengkang lantang ba ati sereta arapka Jehovah? Kitai deka bejuraika tanya nya ba artikel pengudah tu.

^ per. 8 Ba tembawai nengeri Jeriko, bala arkeologi tetemuka mayuh gandum ti udah diketau tang enda diempa. Tu nyukung cherita ba Bup Kudus, ke madahka pengawa ngelulung nengeri nya enda lama lalu orang Israel enda diasuh makai gandum ari nengeri Jeriko. Laban nya maya ngetau, endang manah ngalahka nengeri nya maya nya laban bisi mayuh pemakai ba umai.—Jos. 5:10-12.

^ per. 11 Peda kutak “Paulus dengan Rendah Hati Menyambut Ujian” ba Menara Pengawal, 15 Mac 2003, lambar 24, dalam jaku Indonesia.